Na O Ka Dira Ka Mo Go Oketšegilego Go Godiša Jehofa?

1 Yeo ke potšišo e bohlokwa yeo ka moka ga rena re swanetšego go e naganišiša. Bjalo ka baetši ba botegago ba Mong wa rena, Jesu Kriste, re godiša Modimo wa rena lehono ka go bolela leina la gagwe phatlalatša. Bjo ke boikarabelo bjo re swanetšego go bo rwala ge e ba re nyaka go amogelwa ke Modimo. (Mar. 13:10; Luka 4:18; Dit. 4:20; Ba-Heb. 13:15) A tokelo yeo e sa hlalosegego—ee, yeo e lego kgodišo—go iša ditaba tše tše di lokilego go “dinku” tšeo di šetšego tše di gašaganego tšeo di sa dutšego di ka fetoga karolo ya lešaka la Jehofa la legohle!—Johane 10:16.

2 Na wena le bana ba gago le ka dira ka mo go oketšegilego go godiša Jehofa ka go oketša modiro wa lena bodireding? Banabeno le dikgaetšedi ba tsenela tirelo ya bobulamadibogo ka dipalo-palo tšeo di oketšegago ka mehla lefaseng ka bophara. Ka kgwedi ya April 1992, ba 12 555 ba be ba le tirelong ya bobulamadibogo bjo bo kgethegilego, bja ka mehla goba bja go thuša mo Afrika Borwa. Na wena ka noši o šetše o naganišišitše kudu ka go bula madibogo? Na o kgothaletša bana ba gago gore ba phegelele modiro wa bophelo ka moka bodireding bja nako e tletšego?

3 Ke ka baka la’ng o sa hlahlobe maikwelo a gago ka noši ka tirelo ya bobulamadibogo? Nako le nako ge go bolelwa ka taba ye, na o phakišetša go phetha ka gore maemo a gago a tloga a sa go dumelele go dira o le modiredi wa mmulamadibogo? Ke therešo gore ga se bohle bao ba kgonago go bula madibogo. Boikarabelo bja mangwalo le ditšhitišo tše dingwe di thibela ba bantši go hlankela ka nako e tletšego. (1 Tim. 5:8) Eupja na moragonyana bjale o kile wa naganišiša taba yeo ka thapelo? Na le boledišane ka taba ye le le lapa go bona ge e ba bonyenyane setho se tee sa lapa se ka bula madibogo? Tokollo ya June 1, 1983, ya Morokami e boletše mantšu a ao a šišinyago kgopolo go letlakala 16: “Ruri, modiredi e mongwe le e mongwe wa Mokriste o swanetše go nagana ka thapelo mabapi le ge e ba a ka bula madibogo goba go se dire bjalo. Banyalani ba mo Afrika Borwa bao ba šetšego ba butše madibogo ka nywaga e lesome-hlano ba itše: ‘Ke ka baka la’ng re bula madibogo? Na re ka itokafatša pele ga Jehofa ge e ba re be re sa dire bjalo?’ Ba bantši bao e sego babulamadibogo ba ka dira gabotse go ipotšiša potšišo e bapilego le yeo: ‘Na ruri nka itokafatša pele ga Jehofa ka ge ke se mmulamadibogo?’”

4 Sehlogo se sengwe sa Morokami seo se bolelago ka taba ye se boletše ntlha ye e lebanyago: “O mongwe le o mongwe wa rena o swanetše go ipotegela. Na o re, ‘Moya o a rata, eupja nama e a fokola’? Eupja na ka kgonthe moya o a rata? A re phemeng go diriša go fokola ga nama e le lebaka la go iphahlelela bakeng sa go se rate ga moya.”—w78 8/15 letl. 23.

5 Batswadi Bao ba Nyakago Bana ba Bona ba Atlega: Diema 15:20 e re kgonthišetša gore: “Ngwana’mohlalefi ó kxahla tat’axwe.” Batswadi bao ba boifago Modimo ka ntle le pelaelo ba a hlalala ge ba bona barwa ba bona le barwedi ba bona ba phegelela bophelo bja tirelo ya go ikgafa go Jehofa. Lega go le bjalo, bana ba gago ba ka se fo kgetha tsela e bohlale ka go itiragalela feela. Kgoketšo ya lefase le e matla kudu. Batswadi, dilo tšeo bana ba lena ba di lebelelago e le tše bohlokwa di agwa ke tšeo lena ka noši le di lebelelago e le tša bohlokwa. Ge e ba ka mehla le bolela gabotse ka mehola ya tirelo ya nako e tletšego, ge e ba le kgothaletša bana ba lena gore ba tsome go dira segwera le babulamadibogo bao ba ineetšego, ge e ba le kgodišegile e le ruri gore bodiredi bja nako e tletšego ke modiro o hlomphegago kudu woo bana ba lena ba ka o tsenelago, gona pono ye e nepagetšego ka ntle le pelaelo e tla ba le tutuetšo e kgolo baneng ba lena. Ba thušeng gore ba lemoge bohlokwa bja go itirela leina le le botse le Jehofa go e na le batho.

6 Bafsa, Diema 22:1 (PK) e gatelela kgetho yeo le swanetšego go e dira: “Tumo e botse e phala mahumo a mantši, gomme go ba morategi go phala disilifera le digauta.” Ke leina la mohuta mang leo o tlago go itirela lona? Nagana ka banna le basadi bao re balago ka bona ka Beibeleng bao ba ilego ba itirela leina le Modimo ka tirelo ya bona ya go ikgafa. Go be go e-na le Luka, ngaka yeo e rategago, le Henoge, yo a sepetšego le Modimo wa therešo. Samuele o ile a hwetša thuto e botse kudu yeo e bego e ka hwetšwa, a thoma tirelo ya gagwe tempeleng ya Jehofa e sa le o monyenyane kudu. Na o nagana gore bahlanka ba ba ba botegago ba ile ba ka ba itshola ka dikgetho tšeo ba bego ba di dirile? Ke ka baka la’ng ba be ba ka itshola? Ka moka ga bona ba phetše maphelo a thabilego, a nago le mafelelo a mabotse le a kgahlišago. Le gona ba ile ba hwetša kamogelo ya ka mo go sa felego ya Jehofa!—Ps. 110:3; 148:12, 13; Die. 20:29a; 1 Tim. 4:8b.

7 Ge bana ba atlega bophelong, batswadi ba bona ba ikwa ba ikgantšha ka bona. Boiteko bja bona bjo ba bo dirilego go tlwaetšeng, go layeng le go ruteng “lefa le le tšwago go Jehofa” bo putswa ka makga a mantši kudu. (Ps. 127:3, NW) Ke’ng seo se bego se ka dira motswadi lege e le ofe gore a ikwe a ikgantšha kutšwanyana go feta go ba le morwa goba morwedi yo a dirago sohle seo a ka se kgonago go godiša Jehofa? Bafsa ba bantši ba mehleng yeno ba latela mehlaleng ya Luka, Henoge le Samuele, bjalo ka ge lengwalo le lengwe le bontšha se: “Ke na le nywaga e 16. Ke thomile bobulamadibogo bja ka mehla . . . dikgwedi tše senyane ka morago ga gore ke kolobetšwe, gomme ke dutše ke amogela ditšhegofatšo tše di tšwago go Jehofa ga e sa le go tloga nakong yeo. . . . Bobulamadibogo gape bo go thuša le kua sekolong. Pele ke be ke kwerwa ke bao ke tsenago le bona ka klaseng mabapi le go ba ga-ka Hlatse. Gona bjale, ka ge ke swanetše go ithuta kudu thutong ya motho ka noši, ke kgona go ‘fetola yo a nnyatšago.’”

8 Thuto Yeo e Hlamelago Motho Bodireding: Ntlheng ye mo gongwe re ka ela hloko taba ya thuto ya lefase. Ye ke taba yeo go yona pono e leka-lekanego e tlogago e nyakega. Morokami wa November 1, 1992 o bile le sehlogo se se rego “Thuto Yeo e Nago le Morero.” Ka tlase ga sehlogwana se se rego “Thuto e Lekanego,” go ile gwa bolelwa ntlha ye: “Bakriste ba swanetše go kgona go iphepa, gaešita lege e le badiredi ba babulamadibogo ba nako e tletšego. (2 Ba-Thesalonika 3:10-12) . . . Mofsa wa Mokriste o nyaka thuto e kaaka’ng gore a hlomphe melao ye ya motheo ya Beibele le go phetha boikarabelo bja gagwe bja Bokriste? . . . Ke eng [meputso] seo go ka thwego ke se se ‘lekanego’ go bao ba kganyogago go ba badiredi ba ditaba tše di lokilego ba babulamadibogo? Ba bjalo gantši ba nyaka modiro wa nakwana go phema go rweša banababo rena le malapa a gabo bona ‘boima.’—1 Ba-Thesalonika 2:9.”

9 Ge e ba yo e tlago go ba mmulamadibogo wa nako e tlago a bona thuto e oketšegilego e nyakega gore e tle e mo thuše go phegelela tirelo ya nako e tletšego, Morokami wa November 1, 1992, o eletša ka gore: “Mofsa wa Hlatse o tla dira gabotse gore ge e ba go kgonega a dire se mola a sa dutše a dula ka gae, ka go rialo a kgona go kgomarela mokgwa wo o tlwaetšwego wa go ithuta wa Mokriste, wa go ba gona dibokeng le modirong wa boboledi.”

10 Go tšwa Afrika go na le phihlelo ya mofsa wa nywaga e 22 yo a ilego a swanelwa ke go ya sekolong sa tša kgwebo, lege pelo ya gagwe e be e ganeletše tirelong ya bobulamadibogo. Ge a le sekolong sa tša kgwebo, o ile a ngwadišetša go ba mmulamadibogo wa go thuša. Dithaka tša gagwe di be di mo kwera, di bolela gore ruri o tla palelwa ditlhahlobong tša gagwe. Ka mehla karabo ya gagwe go bona e be e le e rego: “Sa pele tsomang Mmušo wa Modimo le go loka ga gagwe.” Ka go diriša boitayo, o be a tsoga e sa le ka pela kudu mesong e mengwe le e mengwe gomme a itokišeletša dithuto tša gagwe ka diiri tše pedi, ke moka mathapameng ge dithuto di fedile a be le karolo tirelong ya tšhemo. Sekolo ka moka se ile sa makala ge mofsa yo a ile a ba maemong a boraro tlhahlobong e kgethegilego ya go kgetha barutwana ba bararo ba maemo a pele-pele bakeng sa go fiwa sefoka se se kgethegilego sa go lefelelwa sekolong. Morutwana yo a bego a le maemong a bobedi e be e le motho yo a kgahlegago yoo ngwanabo rena wa mmulamadibogo a bego a ithuta le yena Beibele kua sekolong. Morutwana yo a bilego maemong a pele e be e le mofsa o mongwe yo mafolofolo wa Hlatse sekolong seo.

11 Bagolo ba Phetha Karolo ya Bona: Bagolo ba phuthego, bao ba thabelago modiro woo babulamadibogo ba o dirago, ba nea kgothatšo e kgolo go badiredi ba ba mafolofolo. Bagolo ba thabela go dira se ka gobane ba tseba gore go ba le babulamadibogo bao ba šomago ka thata bao ba nago le mafelelo a mabotse ao ba a hwetšago ke tšhegofatšo phuthegong e nngwe le e nngwe. Ka morago ga go fetša ngwaga goba go feta moo tirelong ya bobulamadibogo bja ka mehla, batho bao ba fetoga bao ba swanelegelago go fiwa tlwaetšo e oketšegilego Sekolong sa Tirelo ya Bobulamadibogo. Tlwaetšo ye e ipontšhitše e le sedirišwa se bohlokwa kudu go kaonafatšeng bokgoni bja babulamadibogo. Lege babulamadibogo e le bona bao ba lego ka pele modirong, le bona ba nyaka kgothatšo e lerato, gomme bagolo ba swanetše go phafogela go kgotsofatša senyakwa se.—1 Pet. 5:1-3.

12 Bagolo ba ka nea bjang tlhohleletšo modirong wa bobulamadibogo? Ntlha e botse yeo ba ka thomago ka yona e tla ba go hlahloba nako le nako bao mo gongwe ba ka kgonago go fihlelela tokelo ye. Bagolo ba ka batamela batho bao ba bonagalago ba le boemong bjo bobotse go ka bula madibogo, go akaretša le ba bantši bao ba dirago bobulamadibogo bja go thuša ka mehla, batho bao ba rotšego modiro, basadi ba malapa le barutwana. Lege go se yo a swanetšego go ikwa a gapeletšega gore a ngwadiše, bao ba nago le kganyogo eupja e le bao ba ilego ba dika-dika, ka go fiwa thušo e nyenyane e holago, mo gongwe ba ka lemoga gore ba ka kgona go bula madibogo.

13 Ge ba nea kgothatšo go bao ba nyakago go dira kgopelo, bagolo ba swanetše go gopola gore ga go nyakege gore yo a dirago kgopelo a fetše dikgwedi tše dintšinyana a dira bobulamadibogo bja go thuša pele ga ge a ka ngwadišetša go ba mmulamadibogo wa ka mehla. (kmSE 8/86 pampiri ya ka gare dir. 24-26) Ee, bagolo ba tla swanela gore ba kgodišege ka mo go lekanego gore motho yo a dirago kgopelo o boemeng bja go ka fihlelela diiri tšeo di nyakegago.

14 Ka morago ga ge kgopelo e hlahlobilwe ke Komiti ya Tirelo ya Phuthego gomme e hlahlobišišitšwe ke mongwaledi bakeng sa go kgonthišetša gore dipotšišo ka moka di arabilwe, e swanetše go romelwa kapejana go Mokgatlo.

15 Mongwaledi o swanetše go dula a tsebiša bagolo ka mathata ohle ao babulamadibogo ba ka bago ba e-na le ona. Se se bohlokwa kudu-kudu diphuthegong tšeo di nago le babulamadibogo ba bantši. Go oketšeng tabeng ya go hlahloba modiro wa babulamadibogo bofelong bja ngwaga wa tirelo, bjalo ka ge go kgopetšwe godimo ga Tlhahlobo ea Peho ea Phutheho (S-10-SU), mongwaledi o swanetše go kgopela molebeledi wa tirelo gore a kopane le yena e sa le ka pela ka March bakeng sa go bona gore ke bomang bao ba ka bago ba šaletše morago go fihleleleng diiri tšeo di nyakegago gomme ba nyaka tlhokomelo ya motho ka noši. (Bona Tirelo ya Rena ya Mmušo ya February 1992, Ditsebišo.) Ge e ba thušo e newa ka ntle le go dika-dika, mmulamadibogo yoo a ka kgona go fetša ngwaga wa tirelo ka katlego.

16 Palo e kgolo ya babulamadibogo ba bafsa ke ba bafsa ka nywaga le gona e sa le ba bafsa kudu therešong. Moya wa bona wa go rata ruri o a re thabiša! Eupja batho ba ba bafsa ba sa dutše ba nyaka tlwaetšo bakeng sa gore ba be le bokgoni modirong wa ntlo le ntlo, bakeng sa go dira maeto a go boela ao a atlegago, le go ruta dithutong tša Beibele. Ge e ba tlwaetšo ye e sa amogelwe, motho o mofsa a ka fela matla ka morago ga ngwaga goba go feta moo gomme a feletša a tlogetše tirelo ya bobulamadibogo ka baka la go se hwetše mafelelo a mabotse bodireding. Bagolo bao ba phafogilego ba ka kgona go lemoga mathata a manyenyane goba go boela morago tirelong. Ge e ba tlhokomelo ya kapejana e newa gomme mmulamadibogo a thušwa ka bothata bja gagwe, a ka thabela go fetša nywaga e mentši ya tirelo yeo e tšweletšago mafelelo a mabotse.

17 Na o ka Kgona go Rea Meetseng a Kgole? Ba bangwe ba barutiwa ba Jesu e be e le barei ba dihlapi. Ka dinako tše dingwe, ka morago ga go fetša bošego ka moka ba reile, malokwa a bona a be a sa dutše a se na selo. (Joh. 21:3) Dikarolong tše dingwe tša naga ye moo ‘go rewa ga batho’ go tšwetšego pele ka nywaga e mentši, babulamadibogo ba bangwe mo gongwe ba ka phetha ka gore go na le “dihlapi” tše sego nene tše di šetšego “meetseng” a phuthego ya bona. (Mateo 4:19) Ka mo go fapanego, na ga re thabišwe ke go bala dipego tše di tšwago dinageng tše dingwe moo bagoeledi le babulamadibogo ba swarago dithuto tše dintši tša Beibele? Lethabo leo babulamadibogo le baromiwa ba nago le lona dinageng tše le tloga le le molaleng. (wSE92 9/1 letl. 20 ser. 15) Ka go rialo, ge e ba babulamadibogo ba bangwe bao ba šomago ka thata ba ka kgona go hudugela nageng yeo go nyakegago thušo e kgolo go yona, ba swanetše go ahla-ahla se le ofisi ya lekala pele ba ka huduga.

18 Lega go le bjalo, gopola gore bao ba ratago go ya dinageng tše dingwe bakeng sa go tsenela tirelo ya nako e tletšego ba swanetše go ba bao ba phetšego gabotse, bao ba gotšego moyeng, e be ba nago le moya wa tirišano wa pušo ya Modimo gomme e be bao ba swanelegago bjalo ka bogoeledi ba Mmušo. Gape ba swanetše gore ba be le pego e botse e tšwago phuthegong yeo ba šomago ba le go yona gona bjale. Go oketša moo, ba swanetše go kgona go itlhokomela ka tša ditšhelete gomme ba se ke ba letela gore banababo rena ba nageng yeo ba yago go yona ba ba hlokomele. Ba swanetše pele ba boledišane le bagolo ba phuthegong ya gabo bona ka dithulaganyo tša bona gomme ba hwetše tumelelo ya bona. Ge e ba bagolo ba sa kgonthišege ka taba lege e le efe yeo e tswalanago le motho yo bjalo yo a šomago lefelong le lengwe, ba swanetše go boledišana le molebeledi wa bona wa tikologo goba ba ngwalele ofising ya lekala bakeng sa go fiwa ditaba tše dingwe ka botlalo.

19 Mathomong, ba bangwe mo gongwe ba ka ba ba ile ba thoma go bula madibogo fela ka gobane ba be ba tseba gore ke selo se se nepagetšego seo ba swanetšego go se dira eupja ba dutše ba ipotšiša ge e ba ba tla atlega go bjona. Ba ka ba ba dirile dikgopelo ba e-na le dipelaelo le dilo tšeo ba ipeetšego tšona ka pele. Ge ba sa thoma, mafelelo ao ba bago le ona tšhemong e ka ba e be e le a manyenyane. Lega go le bjalo, ge nako e dutše e e-ya bokgoni bja bona bo ile bja oketšega, gomme go be go na le bohlatse bjo ba bo bonago bja gore Jehofa o šegofatša modiro wa bona. Ka baka leo, lethabo la bona le kgotsofalo di ile tša gola. Go ba bangwe, bobulamadibogo bo ile bja ba bja ipontšha e le moratho wa go iša tirelong ya Bethele, Sekolo sa Tlwaetšo ya Bodiredi, gape ešita le modiro wa bosepedi.

20 Mo gongwe go ka ba go sa kgonege gore o hudugele nageng e nngwe goba o holwe ke Sekolo sa Tlwaetšo ya Bodiredi, eupja go sa dutše go e-na le dibaka tša go rea meetseng a mangwe ka gare ga naga ye ge e ba tšhemo yeo o e šomago gona bjale e se yeo e tšweletšago gakaalo. Hle ikopanye le Mokgatlo ge e ba o kgahlegela go yo šoma moo go nyakegago thušo e kgolo gona mono Afrika Borwa goba go e nngwe ya dinaga tšeo di agišanego le rena. Go khuduga mo go bjalo mo gongwe go ka nyaka gore o dire diphetogo tše itšego mokgweng wa gago wa go phela, eupja meputso ya moya e tla ba e megolo e le ruri.—Mat. 6:19-21.

21 Goba ge e ba maemo a gago a go dumelela, mo gongwe o ka kgona go thuša phuthego ya kgaufsi yeo e lego tikologong ya geno. Ge e ba o swanelega, molebeledi wa tikologo ya geno o tla thabela go go nea ditšhišinyo ka diphuthego tša tikologong ya geno tšeo di ka holwago ke go ba le mmulamadibogo o mongwe.

22 Babulamadibogo ba bangwe le bagoeledi ba ile ba kgona go hlokomela dinyakwa tša lefelong la gabo bona ba dutše ba dula ka gae. Ba ka ba ba tseba leleme le lengwe. Na o hwetša tšhemong ya geno go e-na le karolo e kgolo ya baagi yeo e bolelago leleme le lengwe? Na go na le batho bao ba nyakago go hwetša molaetša wa Mmušo mothong o mongwe yo a dirišago polelo ya diatla? Bao ba tsebago leleme le lengwe e ka ba thušo e kgolo go fihlelela batho ba mehuta yohle ka molaetša wa Mmušo. Lege se e ka ba tlhohlo e kgolo, fela se ka ipontšha gape e le se se putsago kudu.—1 Tim. 2:4; Tito 2:11.

23 Ge e ba mo nakong ye o dira sohle seo o ka se kgonago go godiša Jehofa, thabela ditokelo tša gago tša gona bjale tša tirelo. Ge e ba o ikwa gore o ka dira ka mo go oketšegilego, iša taba yeo go Jehofa ka thapelo. Hlahlobišiša ka tsela e leka-lekanego diphetogo tšeo maemo a gago a tlago go go dumelela go di dira. Boledišana le mogolo yo a nago le moya wa bobulamadibogo goba le molebeledi wa tikologo ka dithulaganyo tša gago. Ge o šetše o dirile phetho ya thapelo le e kwalago, latelela seo kapejana, o dutše o holofetše kholofetšo ya Jehofa ya gore o godiša bao ba mo godišago.—Ba-Heb. 13:5, 6; 1 Sam. 2:30.