Modimo o Bopile Monna wa Mathomo le Mosadi wa Mathomo

Jehofa Modimo o ile a dira serapa lefelong leo le bitšwago Edene. Serapa seo se be se tletše ka matšoba, mehlare le diphoofolo. Ke moka Modimo o ile a bopa monna wa mathomo e lego Adama. O mmopile ka lerole gomme a mmutšwetša moya ka dinkong. Na o a tseba gore go ile gwa direga eng ka morago ga moo? Adama o ile a thoma go phela! Modimo o ile a nea Adama mošomo wa go hlokomela serapa sa Edene, gomme a mmotša gore a nee diphoofolo ka moka maina.

Jehofa o ile a nea Adama molao wa bohlokwa. O ile a re go yena: ‘O ka ja dienywa tša dihlare ka moka mo serapeng, ka ntle le dienywa tša sehlare setee feela. Ge o ka ja dienywa tša sehlare seo, o tlo hwa.’

Ka morago, Jehofa o ile a re: ‘Ke nyaka go direla Adama mothuši.’ O ile a dira gore Adama a ye ka boroko, ke moka a ntšha e nngwe ya dikgopo tša gagwe. Jehofa o ile a diriša kgopo yeo a e ntšhitšego go Adama gomme a mmopela mosadi ka yona. Leina la mosadi yoo e be e le Efa. Adama le Efa e ile ya ba lapa la mathomo mo lefaseng. Adama o ile a ikwa bjang ge a bona mosadi wa gagwe? O ile a thaba kudu moo a ilego a re: ‘Bona seo Jehofa a ntiretšego sona ka kgopo ya ka! Mafelelong, ke na le motho yo a swanago le nna.’

Jehofa o ile a botša Adama le Efa gore ba be le bana gomme ba tlatše lefase. O be a nyaka gore ba thabele go šoma gotee go dira gore lefase ka moka e be paradeise, goba phaka e botse, go fo swana le serapa sa Edene. Eupša dilo di ile tša senyega. Go tlile bjang gore di senyege? Re tla ithuta ka seo kgaolong e latelago.