Lehu la Jesu le tsogo ya gagwe—Seo di ka se Bolelago go Wena

Batho ba be ba sa bopelwa go hwa

“Jehofa Modimo a bea motho serapeng sa Edene gore a se leme le go se hlokomela. Jehofa Modimo a laela motho a re: ‘O ka ja wa ba wa kgotsofala ka se se tšwago sehlareng se sengwe le se sengwe sa mo serapeng. Eupša ge e le sehlare sa go tseba botse le bobe o se ke wa ja tša sona, gobane mohlang o ka jago tša sona o tla hwa lehu.’”—Genesi 2:15-17.

Modimo o beile motho wa pele e lego Adama serapeng sa Edene, e lego paradeise ya lefaseng yeo e bego e tletše diphoofolo tše dintši gotee le dimela tše dibotse. Go be go na le dihlare tše di enywago tšeo Adama a bego a ka ja dienywa tša tšona ka bolokologi. Lega go le bjalo, Jehofa Modimo o be a boditše Adama ka go lebanya gore a se ke a ja tša sehlare se itšego, a ba a lemoša Adama gore ge e ba a be a ka ja tša sona, gona o be a tla hwa.

Na Adama o ile a kwešiša thibelo yeo? O be a tseba gore lehu ke eng; o be a bone ge diphoofolo di ehwa. Ge e ba Adama a be a bopetšwe gore mafelelong a hwe, gona temošo ya Modimo e be e ka se bolele selo. Go e na le moo, Adama o ile a lemoga gore ge a be a ka kwa Modimo gomme a se je tša sehlare seo, o be a tla phela ka mo go sa felego—o be a ka se hwe.

Ba bangwe ba dumela gore sehlare se be se emela thobalano, eupša go be go se bjalo. Go ba gona, Jehofa o be a nyaka gore Adama le mosadi wa gagwe e lego Efa, ba ‘tswale ba ate’ ba be ba ‘tlale lefase ba le fenye.’ (Genesi 1:28) Thibelo yeo e be e šoma sehlareng sa kgonthe. Jehofa o be a se bitša “sehlare sa go tseba botse le bobe” ka gobane se be se emela tshwanelo ya gagwe ya go bea tekanyetšo ya seo e lego se sebotse le se sebe bakeng sa batho. Ka go se je seenywa sa sehlare seo, Adama nkabe a se a bontšha feela go kwa ga gagwe eupša o be a tla bontšha le go leboga ga gagwe Yo a mmopilego le yo a bego a mo šegofaditše ka mo go humilego gakaakaa.

Adama o hwile ka gobane a se a kwa Modimo

“[Modimo] a botša Adama a re: ‘Ka ge o . . . [jele] tša sehlare seo ke go laetšego ka re: . . . O tla ja dijo ka kudumela ya sefahlego sa gago go fihlela o boela mmung, gobane o ntšhitšwe go wona. Gobane o lerole gomme o tla boela leroleng.’”—Genesi 3:17, 19.

Adama o ile a ja tša sehlare seo a bego a thibetšwe go ja tša sona. Tiro yeo ya go se kwe e be e le e kgolo kudu. E be e le borabele, e lego go hlokomologa ka boomo dilo ka moka tše dibotse tšeo Jehofa a bego a mo diretše tšona. Ka go ja seenywa seo, Adama o ile a gana Jehofa gomme a kgetha tsela ya go ipuša, yeo e bego e tla ba le mafelelo a gobatšago.

Bjalo ka ge Jehofa a ile a bolela e sa le pele, Adama o ile a feleletša a hwile. Modimo o be a bopile Adama “ka lerole la mmu” gomme a mmoditše gore o be a tla “boela mmung.” Adama ga se a ka a tšwela pele a phela a le ka sebopego se sengwe goba a phela lefelong le lengwe ka morago ga lehu. Ge a ehwa, o ile a se sa phela a swana le mmu wo a bego a bopilwe ka wona.—Genesi 2:7; Mmoledi 9:5, 10.

Re a hwa ka gobane re tšwa go Adama

“Ka motho o tee sebe se tsene lefaseng gomme lehu la tsena ka sebe, ka go re’alo lehu le aparetše batho bohle gobane bohle ba dirile sebe.”—Baroma 5:12.

Go se kwe ga Adama—goba sebe—go ile gwa ba le ditlamorago tše dikgolo kudu. Ka go dira sebe, Adama ga se a lahlegelwa feela ke bophelo bjo bo tlwaelegilego bja nywaga e 70 goba e 80, eupša o ile a lahlegelwa ke tebelelo ya go phela ka mo go sa felego. Go feta moo, ge Adama a dira sebe, o ile a lahlegelwa ke go phethagala gomme o be a ka fetišetša feela go se phethagale baneng ba gagwe ka moka.

Ka moka re ditlogolo tša Adama. Go yena re abetše mmele o sa phethagalago woo o nago le sebe le woo mafelelong o hwago, e sego ka go rata ga rena. Paulo o hlalositše tlalelo ya rena gabotse. O ngwadile gore: “Ke wa nama, ke rekišitšwe gore ke be mohlanka wa sebe. Ruri ke motho yo a hlomolago pelo! Ke mang yo a tlago go ntlhakodiša mmeleng wo o hwago lehu le?” Ke moka Paulo o ikaraba ka gore: “A go lebogwe Modimo ka Jesu Kriste Morena wa rena!”—Baroma 7:14, 24, 25.

Jesu o ile a gafa bophelo bja gagwe e le gore re ka phela ka mo go sa felego

“Tate o rometše Morwa wa gagwe e le Mophološi wa lefase.”—1 Johane 4:14.

Jehofa Modimo o rulagantše tsela ya go fenya sebe le go re lokolla kotlong ya lehu la ka mo go sa felego. Bjang? O rometše Morwa wa gagwe yo a rategago a etšwa legodimong gore a tlo belegwa e le motho yo a phethagetšego go swana le Adama. Eupša ka go se swane le Adama, Jesu “ga se a ka a dira sebe.” (1 Petro 2:22) Ka ge a be a phethagetše, ga se a ka a ba ka tlase ga kotlo ya lehu gomme nkabe a ile a phela ka mo go sa felego e le motho yo a phethagetšego.

Lega go le bjalo, go e na le moo Jehofa o ile a dumelela gore Jesu a bolawe ke manaba a gagwe. Ka morago ga matšatši a mararo, Jehofa o ile a mo tsošetša bophelong e le moya gore ge nako e dutše e eya a boele legodimong. Gona moo, Jesu o ile a tlišetša Modimo mohola wa bophelo bja gagwe bjo bo phethagetšego gore a lopolle seo se bego se lahlegetše Adama le bana ba gagwe. Jehofa o ile a amogela sehlabelo seo, a dira gore bao ba dumelago go Jesu ba kgone go hwetša bophelo bjo bo sa felego.—Baroma 3:23, 24; 1 Johane 2:2.

Ka go re’alo Jesu o ile a reka seo se bego se lahlegetše Adama. O ile a re hwela e le gore re kgone go phela ka mo go sa felego. Beibele e re: “Jesu . . . [o] ile a hwa, gore ka botho bjo bogolo bja Modimo a hwele motho yo mongwe le yo mongwe.”—Baheberu 2:9.

Tokišetšo ye e utolla mo gontši ka Jehofa. Tekanyetšo ya gagwe e phagamego ya toka e dirile gore batho ba sa phethagalago ba se kgone go itokolla sebeng. Lega go le bjalo, lerato la gagwe le kgaugelo ya gagwe di ile tša mo tutuetša gore a fihlelele dilo tšeo a di nyakago ka gore yena a lahlegelwe kudu, e lego ka go nea Morwa wa gagwe a nnoši gore a nee theko ya topollo.—Baroma 5:6-8.

Jesu o ile a tsošwa bahung, gomme le ba bangwe ba tla tsošwa

“Kriste o tsošitšwe bahung, yena thakangwaga ya bao ba robetšego lehung. Gobane bjalo ka ge lehu le tlile ka motho, tsogo ya bahu le yona e tla ka motho. Gobane go etša ge ka Adama bohle ba ehwa, ka tsela e swanago, le ka Kriste bohle ba tla phedišwa.”—1 Bakorinthe 15:20-22.

Ga go pelaelo gore Jesu o ile a phela a ba a hwa, eupša ke bohlatse bofe bjo bo lego gona bja gore o ile a tsošwa bahung? Gare ga bohlatse bjo matla kudu bjo bo lego gona go na le therešo ya gore Jesu yo a tsošitšwego bahung o ile a iponagatša bathong ba bantši mabakeng a sa swanego le mafelong a sa swanego. Lebakeng le lengwe, o ile a iponagatša go batho ba ka godimo ga ba 500. Moapostola Paulo o ngwadile ka seo lengwalong la gagwe leo a le ngwaletšego Bakorinthe, a bolela gore ba bangwe ba dihlatse tšeo ba be ba sa dutše ba phela, e le ge a bontšha gore ba be ba ka hlatsela seo ba se bonego le seo ba se kwelego.—1 Bakorinthe 15:3-8.

Sa bohlokwa ke gore ge Paulo a be a ngwala gore Kriste e be e le “thakangwaga” ya bao ba tsošitšwego bahung, o be a bontšha gore ba bangwe le bona ba be ba tla tsošwa ka morago. Jesu ka boyena o boletše gore go be go tla tla nako yeo ka yona “bohle bao ba lego mabitleng” ba bego ba tlo “tšwa.”—Johane 5:28, 29.

Re swanetše go dumela go Jesu e le gore re tle re phele ka mo go sa felego

“Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.”—Johane 3:16.

Matlakaleng a mathomo a Beibele go bolelwa ka nako yeo lehu le ilego la thoma ka yona gomme Paradeise ya lahlega. Matlakaleng a mafelelo a yona re botšwa ka nako yeo lehu le tlago go fedišwa gomme Modimo a tsošološa Paradeise lefaseng. Ka nako yeo batho ba tla kgona go phela maphelo a lethabo le a humilego ka mo go sa felego. Kutollo 21:4 e re: “Lehu le ka se hlwe le sa ba gona.” E le go gatelela go botega ga kholofetšo yeo, temana 5 e re: “Mantšu a a botega e bile ke a therešo.” Seo Jehofa a se holofetšago, o kgona go se phethagatša.

Na o dumela gore “mantšu a a botega e bile ke a therešo”? Ka gona, ithute mo go oketšegilego ka Jesu Kriste gomme o dumele go yena. Ge e ba o dira bjalo, gona o tla amogelwa ke Jehofa. Ga se feela gore o tla hwetša ditšhegofatšo tša gagwe tše di humilego gona bjale eupša o tla hwetša le kholofelo ya go phela ka mo go sa felego Paradeiseng mo lefaseng, moo “lehu le ka se [hlwego] le sa ba gona, le ge e le manyami goba sello goba bohloko di ka se hlwe di sa ba gona.”