Rahaba o Ile a Uta Dihlodi

Banna ba babedi ba Baisiraele bao Joshua a ilego a ba roma go yo hlola motse wa Jeriko, ba ile ba dula ntlong ya mosadi yo a bitšwago Rahaba. Kgoši ya Jeriko e ile ya kwa seo gomme ya romela mašole ntlong ya Rahaba. Rahaba o ile a uta banna bao ka godimo ga ntlo, gomme a botša mašole ao gore banna bao ba sa tšwa go tloga. Ge mašole ao a tlogile, Rahaba o ile a re go banna bao: ‘Ke tla le thuša ka gobane ke a tseba gore Jehofa o a le thekga, le gore le tlo tšea naga ye ya Kanana. Hle ntshepišeng gore ge le boa le ka se bolaye ba lapa la gešo.’

Banna bao ba re go Rahaba: ‘Re go tshepiša gore batho ka moka bao ba tla bego ba dutše ka ntlong ye ge re boa, re ka se ba bolaye.’ Ba buša ba re: ‘Tlemelela thapo e khwibidu lefasetereng la ntlo ya gago, ke moka lapa la geno le tla phologa.’

Rahaba o ile a re banna bao ba theogele fase ka thapo yeo a bego a e tlemeletše lefasetereng la ntlo ya gagwe. Ba ile ba tšhabela dithabeng gomme ba fihla ba utama. Ka morago ga matšatši a mararo, ba boela go Joshua. Ke moka Baisiraele ba tshela Noka ya Jorodane gomme ba itokišeletša go tšea naga ya Kanana. Motse wa pele wo Baisiraele ba ilego ba o fenya ke wa Jeriko. Jehofa o ile a ba botša gore ba dikologe motse woo gatee ka letšatši, ka matšatši a tshelelago. Ka letšatši la bošupa, ba ile ba o dikologa gašupa. Baperisita ba letša diphalafala, gomme mašole a goeletša ka matla, ke moka maboto a motse wa Jeriko a wa! Eupša ntlo ya Rahaba, yeo e bego e ageletšwe lebotong la motse, ya se we. Jehofa o ile a phološa Rahaba le ba lapa la gabo ka gobane ba ile ba mo theetša.