Rahaba o be a Theetša Ditaba

ANKE re tšee gore ke mo e ka bago nywageng e 3 500 e fetilego. Re motseng wa Jeriko, nageng ya Kanana. Ngwanenyana yo a bitšwago Rahaba o dula motseng wo. O belegwe ka morago ga gore Moše a ntšhe Baisiraele bokgobeng kua Egipita le go ba etelela pele go phatša Lewatle le Lehwibidu ba sepela mo go omilego! Ga go na diradio, dithelebišene goba Inthanete, eupša Rahaba o tseba ka mohlolo wo—gaešita le ge o diragetše kgole kudu le mo a dulago gona. Na o tseba gore o kwele bjang ka wona?—a

Ga go pelaelo gore basepedi ba ile ba laodiša mehlolo ye. Ge a dutše a gola, Rahaba o gopola seo Jehofa a se diretšego batho ba gagwe. Ke moka o kwa dilo tše dingwe tše di makatšago mabapi le Baisiraele. Ka morago ga nywaga e 40 ba le lešokeng, ba ile ba tsena Kanana, gomme Modimo o be a dutše a ba thuša go fenya yo mongwe le yo mongwe yo a bego a ba ganetša. Bjale Rahaba o kwa gore Baisiraele ba hlomile mešaša ka mošola wa Noka ya Jorodane go tloga Jeriko!

Mantšiboeng a mangwe, batho ba šele ba babedi ba tla go Rahaba ka gobane ba tseba gore o šoma lefelong leo baeng ba ka dulago go lona. Ka gona o a ba amogela. Bošego, kgoši ya Jeriko e kwa gore dihlodi tša Isiraele di tlile Jeriko gomme di ile ntlong yeo Rahaba a šomago go yona. Ka gona, kgoši e romela batseta go Rahaba, gomme ba mmotša gore a ntšhe banna bao ba tlilego go yena. Na o tseba seo Rahaba a šetšego a se kwele le seo a se dirilego?—

Go ba gona, gaešita le pele ga ge batseta ba kgoši ba ka fihla, Rahaba o be a šetše a tseba gore baeng ba gagwe e be e le dihlodi tša Baisiraele. Ka gona o ile a ba uta tlhakeng ya ntlo, gomme bjale o botša batseta ba kgoši gore: “Xo byalo, banna bao ba be ba tlile fá xo nna; . . . E itše xe kxôrô e tswalêlwa ka lefsifsana, ba be ba tšwile.” Rahaba o ba kgothatša ka gore: “Kitimang Le ba hlômarêlê.”

O nagana gore ke ka baka la’ng Rahaba a ile a šireletša dihlodi tše?— O hlalosa lebaka ge a ba botša gore: “Nna ke tseba xobane Morêna ó Le neile naxa yé . . . Ka xobane re kwile xobane Morêna ó xopišitše meetse a Lewatlê la mahlaka xe Le fihla mohla Le e-tšwa Egipita.” O be a kwele le ka diphenyo tše dingwe tšeo ka tšona Modimo a dirilego gore Baisiraele ba fenye manaba a bona.

Jehofa o be a thabetše e le ka kgonthe gore Rahaba o šireleditše dihlodi, go etša ge Beibele e re botša go Baheberu 11:31. O be a bile a thabišitšwe ke ge Rahaba a lopa dihlodi ka gore: ‘Ka ge ke le dirile ka botho, nkholofetšeng hle, gore ge le thopa Jeriko le tla šireletša tate le mma le dikgaetšedi tša-ka le banyanana ba-ka.’ Dihlodi di holofetša gore di tla dira bjalo ge feela Rahaba a ka latela ditaelo tša tšona. Na o tseba gore ditaelo tšeo ke dife?—

Dihlodi di itše: ‘Tšea thapo e khubedu o e tlemelele lefasetereng, gomme o kgobe bohle ba geno ba be le wena mo ngwakong wa gago. Ge o ka dira seo, bohle ba lego moo ba tla šireletšega.’ Rahaba o dira ka yona tsela yeo dihlodi di mmoditšego gore a dire ka yona. Na o tseba seo se ilego sa direga ka morago?—

Baisiraele ba fihla ka ntle ga merako ya Jeriko. Ba dikologa motse ga tee ka letšatši ka setu matšatši a tshelelago. Ka letšatši la bošupa, ba o dikologa gašupa gomme ba tšhela lehowa le legolo. Morako o a wa—ntle le moo thapo e khwibidu e lekeletšego gona lefasetereng! Rahaba le ba gabo ba šireletšegile.—Jošua 2:1-24; 6:1-5, 14, 15, 20-25.

Re ka ithuta’ng go seo Rahaba a se dirilego?— Go ba gona, ga se a theetša feela ditaba tšeo di lego mabapi le dilo tšeo Modimo a bego a di dira go šireletša batho ba gagwe, eupša gape o ile a ba thuša ge sebaka sa go dira bjalo se mmulegela. Ee, Rahaba o ile a kgetha go hlankela Jehofa a e-na le batho ba gagwe! Na o tla dira se se swanago?— Re rapelela gore o dire bjalo.