Mašole a Jehofa a Mollo

Go be go na le kgoši e nngwe ya Siria yeo e bego e dula e elwa le Baisiraele. Leina la yona e be e le Bene-hadada. Eupša nako le nako ge Bene-hadada a be a tlo hlasela Baisiraele, Elisha o be a tsebiša kgoši ya Isiraele ka seo. Seo se be se thuša kgoši ya Isiraele go phologa. Ka gona Bene-hadada o ile a tla ka polane ya gore a sware Elisha. O ile a kwa gore Elisha o motseng wa Dothane, ka gona a romela mašole a gagwe gore a yo mo swara.

Mašole a Siria a ile a tla motseng wa Dothane e le bošego. Ge bosele, mohlanka wa Elisha o ile a tšwela ka ntle gomme a bona motse woo wa Dothane o dikologilwe ke mašole a mantši kudu. O ile a tšhoga kudu moo a ilego a goeletša ka gore: ‘Joo mong wa ka! Re tla dira eng?’ Elisha a re go yena: “Bao ba nago le rena ke ba bantši go feta bao ba nago le bona.” Ka yona nako yeo, Jehofa a dira gore mohlanka wa Elisha a bone dipere le dikoloi tša ntwa tša mollo di tletše dithabeng tša motseng woo wa Dothane.

Ge mašole a Baasiria a leka go swara Elisha, Elisha o ile a rapela a re: ‘Hle Jehofa, dira gore mašole a e be difofu.’ Gateetee mašole ao a se tsebe mo a lego gona, le ge mahlo a wona a be a bulegile. Ke moka Elisha a re go wona: ‘Le lahlegile. Ntateleng, ke tla le iša go monna yo le mo nyakago.’ Mašole ao a ile a šala Elisha morago go ba go fihla Samaria, moo kgoši ya Isiraele e bego e dula gona.

Mašole a Baasiria a ile a bona ka morago gore a mo kae. Kgoši ya Isiraele ya botšiša Elisha ya re: ‘Ke a bolaye?’ Na Elisha o ile a diriša sebaka seo go itefeletša go mašole ao a Baasiria, ao a bego a nyaka go mmolaya? Aowa. Elisha o ile a botša kgoši ya Isiraele a re: ‘O se ke wa a bolaya. A nee dijo gomme o a tlogele a sepele.’ Ka gona kgoši ya Isiraele ya direla mašole ao monyanya o mogolo gomme ya a tlogela a sepela.