Ba Dirile Thato Ya Jehofa

Mohlala Wa Boikgafo Le Potego E Sa Kwanantšhego

GO MOLEMI yo mofsa yo a bitšwago Elisa, seo se ilego sa thoma e le letšatši la ka mehla la go lema e ile ya ba letšatši la bohlokwa kudu bophelong bja gagwe. Ge a be a šoma tšhemong, Elisa o ile a hwetša ketelo yeo a bego a se a e letela go tšwa go Eliya yo e lego moporofeta yo mogolo wa Isiraele. ‘Ke eng se a ka nnyakelago sona?’ Elisa a ka ba a ile a ipotšiša. Ga se a ka a swanelwa ke gore a lete nako e telele bakeng sa karabo. Eliya o ile a lahlela kobo ya gagwe ya boporofeta godimo ga Elisa, a bontšha gore ka letšatši le lengwe Elisa o be a tla mo hlatlama. Elisa ga se a ka a tšeela taletšo ye fase. O ile a tlogela tšhemo ya gagwe gatee-tee gore e be mohlankedi wa Eliya.—1 Dikxoši 19:19-21.

Nywaga e ka bago e tshela ka morago go ile gwa tla nako ya gore Eliya a tloge. Pego ya go tloga ga gagwe e biditšwe gore “ke e nngwe ya dikanegelo tše di kgomago kudu” ka Mangwalong a Sehebere.

Eliya o Lokišetša go Tloga

Eliya o be a kganyoga go etela Bethele, Jeriko le Jorodane la mafelelo. Se se be se tla akaretša go sepela dikhilomithara tše telele, moo mo gongwe ga gona e bego e tla ba mafelong a dithaba tša makgwara. Lefelong le lengwe le le lengwe la go khutša leetong, Eliya o ile a kgothaletša Elisa gore a šale. Eupša Elisa o ile a phegelela go sepela le mong wa gagwe go fihla mafelelong.—2 Dikxoši 2:1, 2, 4, 6.

“Barwa ba baporofeta” ba ile ba ya go Elisa ge a be a le Bethele le Jeriko.a Ba mmotšiša gore: “A fa O a tseba xobane lehono Morêna ó tlo Xo amoxa mong wa xaxo [gore e se sa ba moetapele wa gago, NW]?” O ile a araba ka gore: “Le nna ke a tseba; homolang.”—2 Dikxoši 2:3, 5.

Se se latelago Eliya le Elisa ba ile ba leba Nokeng ya Jorodane. Ge ba fihla Jorodane, Eliya o ile a dira mohlolo mola barwa ba e ka bago ba 50 ba baporofeta ba be ba lebeletše ba le kgojana. “Eliya a thsôpha kobô ya xaxwe, a itia meetse ka yôna; meetse a aroxana a ya thokô yé le thokô yé; ’me ba sela ka babedi ka mo xo omilexo.”—2 Dikxoši 2:8.

Ge ba setše, Eliya o ile a re go Elisa: “Kgopela se nka go direlago sona, ke sešo ka tlošwa go wene.” Elisa o ile a kgopela kabelo ya moya wa Eliya “gabedi”—ke gore karolo ya bobedi yeo ka tlwaelo e bego e swanetše morwa wa leitšibulo. Ka kgonthe, Elisa o be a hlompha Eliya go fo swana le kamoo morwa wa leitšibulo a bego a tla hlompha tatagwe ka gona. Go feta moo, o be a tloditšwe gore e be mohlatlami wa Eliya e le moporofeta wa Jehofa Isiraeleng. Ka gona kgopelo ya gagwe e be e se ya boithati goba yeo e sa swanelago. Lega go le bjalo, ka go tseba gore ke Jehofa feela a bego a ka nea kgopelo ye, Eliya o ile a araba ka boikokobetšo gore: “O kxopetše selô se sethata.” Ke moka a oketša ka gore: “Ge o ka mpona ge ke tlošwa go wene, go tlo ba bjalo go wene, eupša ge o sa ka wa mpona, go ka se ke gwa ba bjalo.”—2 Dikxoši 2:9, 10, PK; Doiteronomio 21:17.

Ka ntle le pelaelo Elisa o ile a ikemišetša go feta le ge e le neng pele go kgomarela mong wa gagwe. Ke moka go ile gwa tla “koloi ya mollô le dipitsi tša mollô.” Gona moo pele ga Elisa a maketše, Eliya o ile a tšewa ke ledimo—a išwa lefelong le lengwe ka mohlolo.b Elisa o ile a topa kobo ya Eliya gomme a boela morago lebopong la Noka ya Jorodane. O ile a itia meetse, a re: “O kae Jehofa, Modimo wa Eliya, ke ra Yena?” Meetse a arogana, a nea bohlatse bjo bo lego molaleng bja gore Elisa o be a thekgwa ke Modimo e le mohlatlami wa Eliya.—2 Dikxoši 2:11-14, PK.

Dithuto go Rena

Ge a be a laleletšwa go dira tirelo e kgethegilego le Eliya, Elisa o ile a tlogela tšhemo ya gagwe gatee-tee go ya go hlankela moporofeta yo mogolo wa Isiraele. Go molaleng gore e mengwe ya mešomo ya gagwe e be e le ya maemo a tlase, ka gore o ile a tsebja e le yo a “bexo a hlapiša Eliya.”c (2 Dikxoši 3:11) Lega go le bjalo, Elisa o ile a lebelela modiro wa gagwe e le tokelo gomme o ile a kgomarela Eliya ka potego e sa kwanantšhego.

Ba bantši ba bahlanka ba Modimo lehono ba bontšha moya o swanago wa boikgafo. Ba bangwe ba tlogetše “mašemo” a bona goba mekgwa ya bona ya go iphediša gore ba ye go bolela ditaba tše di lokilego mafelong a kgole goba go ya go hlankela e le ditho tša lapa la Bethele. Ba bangwe ba ile dinageng dišele go ya go šoma medirong ya Mokgatlo ya go aga. Ba bantši ba amogetše yeo go ka thwego ke mešomo ya maemo a tlase. Lega go le bjalo, ga go le o tee yo a hlankelago Jehofa yo a dirago tirelo yeo e sego ya mohola. Jehofa o leboga bohle bao ba mo hlankelago ka go rata gomme o tla šegofatša moya wa bona wa boikgafo.—Mareka 10:29, 30.

Elisa o ile a kgomarela Eliya go fihla mafelelong. O ile a gana go tlogela moporofeta yo a tšofetšego gaešita le ge a be a newa sebaka. Ka ntle le pelaelo, bogwera bja kgaufsi bjo a bo hlagoletšego le Eliya bo ile bja dira gore lerato le le bjalo la go botega ka go se kwanantšhe e be selo se se thabišago. Lehono bahlanka ba Modimo ba katanela go tiiša tswalano ya bona le Modimo le go ba kgaufsi le badumedi-gotee le bona. Tlemo ya kgaufsi ya botee e tla šegofatšwa ka ge Beibele e bolela ka Jehofa gore: “Go motho yo a botegago ka go se kwanantšhe o tla dira ka potego e sa kwanantšhego.”—2 Samuele 22:26, NW.

[Mengwalo ya tlase]