THUTO 20
Jehofa o Hlahla Phuthego ya Gagwe Bjang?
Jehofa ga se Modimo wa tlhakatlhakano. (1 Bakorinthe 14:33) Se se ra gore le batho ba gagwe ga se ba swanela go ba le tlhakatlhakano. Bjale re ka ipotšiša gore: ‘Jehofa o hlahla phuthego ya gagwe bjang? Gona re ka dira’ng gore dilo di dule di sepela gabotse ka phuthegong?’
1. Ke mang yo a etelelago phuthego pele?
Beibele e re ‘Jesu Kriste ke hlogo ya phuthego.’ (Baefeso 5:23) O etelela pele mediro ya Dihlatse tša Jehofa lefaseng ka moka a le legodimong. O kgethile “mohlanka yo a botegago le wa temogo,” e lego sehlopha se senyenyane sa bagolo bao e lego kgale ba hlankela Jehofa ka go botega. Mohlanka yo, yoo a botegago ke Sehlopha se Bušago. (Bala Mateo 24:45-47.) Go no swana le ge kgale baapostola le bagolo ba kua Jerusalema ba be ba hlahla diphuthego, Sehlopha se Bušago le sona lehono se dira se se swanago lefaseng ka moka. (Ditiro 15:2) Eupša se ga se re gore sehlopha se sa banna ke baetapele ba mokgatlo wa rena. Go e na le moo, ba ithuta Beibele gore ba kwe gore Jehofa o nyaka ba dira eng. Ka morago ga moo, ba latela tlhahlo ya Jesu.
2. Bagolo ke bomang, gona mošomo wa bona ke eng?
Bagolo ke banna ba Bakriste bao ba nago le nakonyana ba hlankela Jehofa ka go botega. Ba ruta batho ba Jehofa dilo tšeo di tšwago ka Beibeleng. Ba a ba thuša e bile ba a ba kgothatša. Ga go na motho yo a ba patelago. Go e na le moo, ba hlankela Modimo ‘ka go rata, e sego ka go rata leruo la go se botege, eupša ba dira seo ka go fišega.’ (1 Petro 5:1, 2) Bagolo ba thušwa ke bahlanka ba bodiredi. Ge nako e dutše e eya, le bona ba ka swanelega gore e be bagolo.
Sehlopha se Bušago ke sona se kgethago bagolo ba itšego gore e be balebeledi ba tikologo. Ba etela diphuthego tša go fapafapana gore ba tšame ba kgothatša bana babo rena le dikgaetšedi. Balebeledi ba ba tikologo ba diriša Mangwalo go bona ge e ba motho a swanelega go ba mogolo goba mohlanka wa bodiredi. Ka morago ga gore ba bone gore motho yoo o a swanelega, ba a mo kgetha.—1 Timotheo 3:1-10, 12; Tito 1:5-9.
3. Hlatse e nngwe le e nngwe ya Jehofa e na le boikarabelo bofe?
Batho ka moka ka phuthegong ba na le boikarabelo bja go ‘tumiša leina la Jehofa’ ka go botša batho ditaba tše dibotse go ya ka maemo a bona. E bile ba dira seo ka go opela, go araba ge ba le dibokeng, le go dira dilo tše dingwe.—Bala Psalme 148:12, 13.
ITHUTE KA MO GO TSENELETŠEGO
Ekwa gore Jesu ke moetapele wa mohuta mang, gore bagolo ba ka leka go ekiša mohlala wa gagwe bjang, le gore rena re ka dirišana le Jesu le bagolo bjang.
4. Jesu ke moetapele yo a nago le botho
Ka moka ga rena Jesu o re mema gore re tle go yena. Balang Mateo 11:28-30, gomme le boledišaneng ka potšišo e latelago:
Jesu ke moetapele wa mohuta mang, gona o nyaka gore re ikwe bjang?
Bagolo ba ekiša Jesu bjang? Bapalang BIDIO ye.
Beibele e re botša gabotse gore bagolo ba swanetše go dira mošomo wa bona bjang.
Balang Jesaya 32:2; 1 Petro 5:1-3, gomme le boledišaneng ka dipotšišo tše di latelago:
Go tseba gore bagolo ba dula ba nyaka go lapološa batho ba bangwe go swana le Jesu, go dira gore o ikwe bjang?
Bagolo ba ekiša Jesu ka ditsela dife tše dingwe?
5. Bagolo ba ruta ka mohlala
Jesu o nyaka gore bagolo ba lebelele mošomo wa bona bjang? Bapalang BIDIO ye.
Jesu o boletše kamoo bagolo ba phuthego ba sa swanelago go itshwara ka gona. Balang Mateo 23:8-12, gomme le boledišaneng ka potšišo e latelago:
Tsela yeo bagolo ba dirišago melao ya Beibele ka yona, e fapana bjang le kamoo o bonego baruti ba e dirišago ka gona? Ke’ng seo se go kgahlago tabeng ye?
Bagolo ba leka ka thata gore ba be le segwera se se tiilego le Jehofa le go thuša malapa a bona gore a dire se se swanago
Bagolo ba hlokomela batho ka moka ka phuthegong
Bagolo ba dula ba botša batho ditaba tše dibotse
Bagolo ba ruta phuthego, ba thuša ka go hlwekiša le go dira mešomo e mengwe
6. Re ka dirišana gabotse le bagolo
Beibele e re botša gore ke ka baka la eng go le bohlokwa gore re dirišane le bagolo. Balang Baheberu 13:17, gomme le boledišaneng ka dipotšišo tše di latelago:
Ke ka baka la’ng Beibele e re kgothaletša gore re kwe bao ba re etelelago pele? Wena o ikwa bjang ka seo?
Balang Luka 16:10, gomme le boledišaneng ka potšišo e latelago:
Ke ka baka la’ng go le bohlokwa gore re dirišane le bagolo, gaešita le dilong tšeo di ka bonagalago e le tše dinyenyane?
BATHO BA BANGWE BA RE: “Ga se gore go bohlokwa gore o hlankele Modimo o na le batho ba bangwe.”
O nagana gore ke ka baka la eng go le bohlokwa gore re hlankele Modimo re na le batho ba bangwe?
O ITHUTILE ENG?
Jesu ke moetapele goba hlogo ya Phuthego. Re thabela go dirišana le bagolo bao ba hlahlwago ke Jesu, ka gobane ba a re lapološa e bile ba re beela mohlala o mobotse.
Dipotšišo
Hlogo ya Phuthego ke mang?
Bagolo ba thuša phuthego bjang?
Motho yo mongwe le yo mongwe ka phuthegong o na le boikarabelo bofe?
ITHUTE KA MO GO OKETŠEGILEGO
Ekwa bohlatse bjo bo bontšhago gore lehono Sehlopha se Bušago le bagolo ba re rata kudu.
Go Dula re le Boteeng le ge Modiro wa Rena o Thibetšwe (4:22)
Ekwa gore balebeledi ba tikologo ba dira mošomo ofe.
Bophelo bja Molebeledi wa Tikologo ge a Etetše Diphuthego (4:51)
Ekwa gore basadi ba kgatha tema efe e bohlokwa ka phuthegong.
“Na Dihlatse tša Jehofa di na le Badiredi ba Basadi?” (Morokami wa September 1, 2012.)
Ekwa kamoo bagolo ba šomago ka thata gore ba kgothatše Bakristegotee le bona.
“Bagolo ba Bakriste ke ‘Badirišanigotee le Rena Gore re Thabe’” (Morokami wa January 15, 2013.)