‘Tšwelang Pele le Rata Banna ba Mohuta Woo’
“Banna ba mohuta woo le ba hlomphe.”—1 BA-KORINTHE 16:18, NW.
1. Ke banna ba mohuta ofe bao moapostola Paulo a bego a ba rata ka mo go kgethegilego, gomme ke’ng seo a ilego a se ngwala mabapi le Mokriste o mongwe o bjalo?
MOHUTA wa banna bao moapostola Paulo a bego a ba rata ka mo go kgethegilego e be e le bao ba bego ba ikemišeditše go diriša matla a bona ka go se šadiše go direleng Jehofa le banababo bona. Paulo o ngwadile mabapi le modiri-gotee le yena o mongwe o bjalo ka gore: “Mo amoxeleng-xê Moreneng ka lethabô le le tletšexo; xomme banna ba byalo Le ba xodišê [“le tšwele pele le ba rata,” NW]. Xobane xe a batametše lehu, e be e le ka ‘baka la modiro wa Kriste xe a sa re selô ka bophelô bya xaxwe.”—Ba-Filipi 2:29, 30.
2. Ke bomang bao re ba kolotago tlhompho e kgethegilego, gomme ka baka la’ng?
2 Lehono, diphuthegong tše fetago 55 000 tša Dihlatse tša Jehofa, go na le banna ba bantši ba babotse ba Bakriste bao re swanetšego go ba leboga ka mo go kgethegilego ka baka la modiro wa bona o thata gare ga banababo bona. Paulo ge a be a bontšha gore re swanetše go rata banna ba bjalo o itše: “Bana bešo, re a Le kxopêla, tsebang bao ba ba Le swaretšexo modirô; ba e lexo baxolo ba lena Moreneng ba xo Le eletša. Le ba xodišê sa ruri ka leratô, ka ‘baka la modirô woo wa bôná. Bang ba leaxô.”—1 Ba-Thesalonika 5:12, 13.
3. (a) Ke’ng seo se tlago go re thuša gore re be le khutšo magareng ga rena? (b) Ke tabeng efe yeo bagolo ba swanetšego go bea mohlala go yona?
3 Go leboga ka mo go swanetšego banababo rena ka moka le dikgaetšedi, kudu-kudu bagolo bao ba dirago ka thata, ka ntle le pelaelo ke taba e bohlokwa tabeng ya go phedišana ka khutšo diphuthegong tša rena. Tabeng ye, go etša ditabeng ka moka tša bophelo bja Bokriste, bagolo ba swanetše go ba ‘mehlala go mohlape.’ (1 Petro 5:2, 3, Phetolelo ya Kgale) Lega go le bjalo, gaešita lege bagolo ba ka letela ka tshwanelo gore ba hlompšhe ke banababo bona ka baka la modiro wa bona o thata wo ba o dirago, ba swanetše go bea mohlala tabeng ya go bontšha tlhomphano e swanetšego.
‘Go Bontšha Tlhomphano’
4, 5. (a) Ke eng se se bontšhago gore moapostola Paulo o be a leboga bagolo ba ba dirago ka matla? (b) Ke’ng seo a se ngwaletšego Bakriste kua Roma, gomme ke ka baka la’ng mantšu a gagwe a dira go bagolo ka mo go kgethegilego?
4 Moapostola Paulo o beile mohlala o mobotse tabeng ye. Go etša ge re bone sehlogong se se fetilego, o be a lebelela dilo tše dibotse go banababo le dikgaetšedi. Le gona ga se feela gore o ile a kgothatša Bakriste go rata le go hlompha bagolo ba ba dirago ka thata eupja le yena o ile a bontšha tebogo e swanetšego go batho. Go molaleng gore o be a rata banna ba mohuta woo.—Bapiša le Ba-Filipi 2:19-25, 29; Ba-Kolose 4:12, 13; Tito 1:4, 5.
5 Lengwalong la gagwe le le yago go Bakriste ba Roma, Paulo o ngwadile ka gore: “Ratanang e le ka kgonthe ka maikwelo a borutho a borwarre. Etelelang pele tabeng ya go bontšha tlhomphano. Le se ke la tšwafa modirong wa lena. Fišegang moyeng. Hlankelang Jehofa.” (Ba-Roma 12:10, 11, NW) Ka kgonthe, mantšu a a dira kudu-kudu go bagolo ba Bakriste. Ba swanetše go etelela pele tabeng ya go bontšha tlhomphano go feta Bakriste ka moka.
6. (a) Ke eng seo bagolo ba swanetšego go phema go se dira, gomme ka baka la’ng? (b) Ke bjang bagolo ba ka godišago go bota ga phuthego sehlopha ka moka sa bagolo?
6 Bagolo ba swanetše go ela hloko ka mo go kgethegilego gore ba se bolele mantšu ao a nyenyefatšago balebeledi-gotee le bona. Ga go na mogolo le o tee yo a nago le dika tša Bokriste ka moka ka tekanyo e kgolo, ka gobane bohle ga ba phethagala. Ba bangwe ba dira gabotse kudu dikeng tše itšego, eupja ba a fokola go tše dingwe. Ge e ba bagolo ba e-na le lerato la borwarre le le swanetšego le maikwelo a borutho a kgonthe go ba bangwe, gona ba tla hlokomologa mafokodi a ba bangwe. Dipoledišanong tša bona le banababo bona, ba tla šupa dika tše botse tša bagologotee le bona. Ka go etelela pele bjalo tabeng ya go bontšha tlhomphano, ba tla godiša go bota ga phuthego sehlopha sa bagolo ka moka.
Go Dira Gotee e le Sehlopha
7. Ke’ng seo se tlago go thuša bagolo go dira ka botee, gomme ba tla bontšha se bjang?
7 Ka morago ga go bolela ka ‘dineo tša batho’ tšeo Kriste a di neilego phuthego ya gagwe ya lefase ka morero wa go fetola banababo le bakeng sa modiro wa bodiredi, moapostola Paulo o ile a ngwala ka gore: “Ka lerato anke re goleng dilong tšohle go yo e lego hlogo, Kriste.” (Ba-Efeso 4:7-15, NW) Go lemoga gore Kriste ke Hlogo e mafolofolo ya phuthego le gore bagolo ba swanetše go ikokobeletša letsogo la gagwe le letona la taolo ke selo seo se dirago gore go be le botee sehlopheng se sengwe le se sengwe sa bagolo. (Ba-Efeso 1:22; Ba-Kolose 1:18; Kutollo 1:16, 20; 2:1) Ba tla tsoma tlhahlo ya gagwe ka moya o mokgethwa, melao ya motheo ya Beibele le ketelelo-pele ye e newago ke Sehlopha se Bušago sa “molaki e a bôtêxaxo yo bohlale.”—Mateo 24:45-47; Ditiro 15:2, 28; 16:4, 5.
8. Ke’ng seo bagolo ka moka ba swanetšego go se gopola, gomme ke bjang ba tlago go bontšha tlhomphano?
8 Bagolo ba tla lemoga gore Kriste ka moya o mokgethwa a ka hlahla monagano wa mogolo lege e le ofe yo a lego sehlopheng sa bagolo gore a nee molao wa motheo wa Beibele wo o nyakegago go lebeletšana le boemo lege e le bofe goba go dira phetho lege e le efe e bohlokwa. (Ditiro 15:6-15) Ga go na mogolo le o tee yo a laolago moya woo o lego sehlopheng sa bagolo. Bagolo ba tla bontšha tlhomphano ka go theetša ka kelohloko mogolo lege e le ofe yo a lego sehlopheng sa bona yo a ba hlokomedišago molao wa motheo wa Beibele goba taelo e tšwago go Sehlopha se Bušago yeo e tswalanago le taba yeo e ahla-ahlwago.
9. (a) Ke dika dife tša moya tšeo di tlago go thuša molebeledi go phema go buša bagolo-gotee le yena? (b) Ke bjang mogolo a tlago go ipontšha e le yo a “nago le tlhaologanyo,” gomme sehlopha se bušago sa lekgolong la pele la nywaga se beile mohlala bjang tabeng ye?
9 Boipoetšo bja Bokriste, bonolo le boikokobetšo di tla thibela mogolo lege e le ofe gore a leke go buša banababo le go gapeletša gore go amogelwe kgopolo ya gagwe. (Diema 11:2; Ba-Kolose 3:12) Molebeledi wa Mokriste mo gongwe a ka ba le dipono tše matla le tša kgonthe mabapi le taba e itšego. Eupja ge a bona gore bagolo-gotee le yena ba na le mabaka a Mangwalo le a pušo ya legodimo go fapana le yena, o tla ‘ikokobetša’ gomme a ipontšha e le yo a “nago le tlhaologanyo” ka go amogela pono ya batho ba bantši.a (Luka 9:48; 1 Timotheo 3:3, NW) O tla latela mohlala o mobotse wo o beilwego ke sehlopha se bušago sa lekgolong la pele la nywaga seo ka morago ga poledišano ya Mangwalo le ka tlase ga ketelelopele yeo e newago ke Kriste ka moya o mokgethwa, se ilego sa “kwana.”—Ditiro 15:25.
10. (a) Ke’ng se se hlatselago gore go kgethwa ga sehlopha sa bagolo ka phuthegong e nngwe le e nngwe ke thulaganyo e theilwego Beibeleng? (b) Puku Go Rulaganyetšwa go Dira Bodiredi bja Rena e hlalosa bjang mehola ya thulaganyo ye?
10 Go kgethwa ga sehlopha sa bagolo phuthegong e nngwe le e nngwe bakeng sa go etelela pele go theilwe mohlaleng wo o beilwego ke phuthego ya pele ya Bokriste. (Ba-Filipi 1:1; 1 Timotheo 4:14; Tito 1:5; bapiša le mongwalo wa ka tlase wa lentšu “bagolo” go Tito 1:5 go The Jerusalem Bible) Puku Go Rulaganyetšwa go Dira Bodiredi bja Rena (letlakala 37) ge e akaretša go ba bohlale ga thulaganyo ye, e re: “Bagolo ba bangwe ba tla feta ba bangwe ka tshwanelego e nngwe, kanthe ba bangwe ka sehlopheng ba tla ba ba dirago gabotse ditshwanelong tšeo mo gongwe ba bangwe ba ka bago ba fokola go tšona. Mafelelo e tla ba a gore ka ge e le sehlopha, ruri ka gare ga bona ba tla ba le ditshwanelego tšohle tše botse tšeo di nyakegago gore ba hlokomele ka tshwanelo phuthego ya Modimo.”
Go Hlomphana Gare ga Dihlopha tša Bagolo
11, 12. (a) Ke ka baka la’ng sehlopha sa bagolo se ka dira mo gogolo go feta seo se dirwago ke ditho tša sona tšeo di dirago di nnoši? (b) Kriste Jesu le moapostola Paulo ba ile ba dirišana bjang le dihlopha tša bagolo tše bjalo, gomme ke keletšo efe yeo e ilego ya newa?
11 Ka gona, sehlopha sa bagolo ke selo sa kgonthe sa Mangwalo seo ge se kopane se emelago selo se segolo go feta ditho tša sona ka o tee ka o tee. Ge ba kopana gomme ba rapelela tlhahlo ya Jehofa ka Kriste le moya o mokgethwa, ba ka kgona go dira diphetho tšeo ba bego ba ka se kgone go di fihlelela ge e ba go be go ka bolelwa le bona ka o tee ka o tee. Ge bagolo ba kopana gotee, dika tša bona tše fapa-fapanego di a dira gomme tša tšweletša mafelelo ao a bontšhago go hlahla ga Kriste ditaba.—Bapiša le Mateo 18:19, 20.
12 Taba ya gore Kriste o ile a dirišana le dihlopha tša bagolo ka tsela yeo e bontšhwa ke melaetša yeo a ilego a e romela go “dinaledi tše šupaxo” goba “batseta ba diphuthêxô tše šupaxo” kua Asia. (Kutollo 1:11, 20) Molaetša wa mathomo wa melaetša yeo o ile wa romelwa phuthegong ya Efeso ka “motseta” wa yona goba sehlopha sa balebeledi ba ba tloditšwego. Mo e ka bago nywaga e 40 pejana, moapostola Paulo o ile a dira gore sehlopha sa bagolo kua Efeso se ye Mileto bakeng sa seboka se se kgethegilego le yena. O ile a ba gopotša gore ba itote le gore ba diše phuthego.—Ditiro 20:17, 28.
13. Ke ka baka la’ng bagolo ba swanetše go ela hloko moya woo ba o bontšhago ka gare ga sehlopha sa bagolo sa lefelong leo le tswalanong ya bona e le sehlopha le dihlopha tše dingwe tša bagolo?
13 Dihlopha tša bagolo di swanetše go ela hloko ka mo go kgethegilego gore di boloke moya o mobotse le wo o lokilego gare ga bona ka noši le ka gare ga phuthego ya gabo bona. (Ditiro 20:30) Go fo etša ge Mokriste o tee a bontšha moya o itšego, ka mo go swanago dihlopha tša bagolo le diphuthego ka moka di ka ba le moya o itšego. (Ba-Filipi 4:23; 2 Timotheo 4:22; Filemone 25) Ka dinako tše dingwe go a direga gore bagolo bao ba hlomphanago ka phuthegong ya gabo bona ba bontšhe moya wa go se dirišane le sehlopha se sengwe sa bagolo. Metseng yeo diphuthego tše dintšinyana di kopanago holong e tee, ka dinako tše dingwe go se dumelelane go a tšwelela magareng ga dihlopha tša bagolo mabapi le dinako tša diboka, mellwane ya tšhemo, dilo tšeo di tsenywago ka Holong ya Mmušo le tše dingwe. Melao ya motheo e swanago ya boipoetšo, bonolo, boikokobetšo le go ba le tlhaologanyo yeo e bušago bagolo sehlopheng se sengwe le se sengwe sa bagolo e swanetše go buša tswalano magareng ga dihlopha tša bagolo. Moapostola Paulo o eleditše ka gore: “Tšeo ka moka di dirwe gore e be kagišo.”—1 Ba-Korinthe 14:26, Phetolelo ya Kgale.
Tlhompho e Swanetšego go Balebeledi ba Basepedi
14. Ke sehlopha sefe se sengwe sa bagolo seo se swanetšego go ratwa, gomme ka baka la’ng?
14 Thulaganyo e nngwe ye e theilwego Beibeleng ye e lego gona gare ga Dihlatse tša Jehofa ke ya gore ba etelwe ka mehla ke bagolo ba basepedi bao ba bitšwago balebeledi ba tikologo goba ba selete. (Ditiro 15:36; 16:4, 5) Ba e tloga e le “baxolo ba xo êmêla phuthêxô xa-botse.” Go swana feela le bagolo ba bangwe, ba swanetše go ‘godišwa gabedi, kudu-kudu bao ba go itapiša ka go bolela le ka go ruta.’—1 Timotheo 5:17.
15. Ke keletšo efe yeo moapostola Johane a e neilego mabapi le baebangedi ba basepedi?
15 Lengwalong la gagwe la boraro moapostola Johane o ile a kgalema Dioterefe ka gobane o be a gana go “amoxêla bana ba bô-rena [ka tlhompho].” (3Joh Temana 10, bapiša le NW.) Banababo rena ba e be e le Bakriste ba basepedi bao ba bego ba sepela “bà dirêla ‘ina la [Jehofa].” (3Joh Temana 7) Go molaleng gore ba be ba romilwe e le baebangedi go ya go bolela ditaba tše di lokilego le go aga diphuthego metseng yeo ba bego ba e etela. Johane o ile a laela gore baboledi ba ba basepedi bao ba dirago ka matla ba swanetše go ‘thušwa go iša pele ka leeto ka tsela yeo e swanetšego Modimo.’ (3Joh Temana 6) Moapostola o okeditše ka gore: “Batho ba babyalo xo swanetše xe re ba amoxêla, xore re bê bathuši modirong wa therešô.” (3Joh Temana 8) Ba be ba swanetše go amogelwa ka tlhompho.
16. Bakriste ka moka lehono ba ka latela bjang mohlala wa Gayo ‘modirong wa potego’ wo a o diretšego baebangedi ba lekgolong la pele la nywaga, gomme ke ka baka la’ng se se swanetše?
16 Ka mo go swanago, lehono balebeledi ba basepedi ba ba rongwago ke Sehlopha se Bušago go ya go bolela ditaba tše di lokilego le go thuša diphuthego ba swanetše go amogelwa ka botho le ka tlhompho. Banababo rena ba le basadi ba bona (ge e ba ba nyetše, ka ge ba bantši ba nyetše) ba ile ba ikemišeditša go tlogela go dula lefelong le tee sa ruri. Ba sepela go tloga lefelong le lengwe go ya go le lengwe, gantši ba ithekgile ka kamogelo ya banababo rena bakeng sa dijo tša bona le malao ao ba ka robalago go wona. Johane o ngwaletše Gayo yoo ka lerato a ilego a amogela baebangedi ba basepedi lekgolong la pele la nywaga ka gore: “Moratexi! O botexile ka tšohle tše O di diretšexo bana bešo, wa di dirêla le ba mohuta o šele.” (3 Johane 5) Ka mo go swanago, lehono bao ba sepelago ‘ka leina la Jehofa’ ba swanetše go godišwa le go bontšhwa lerato le tlhompho.
17. Ke bjang bagolo ba phuthego ba swanetšego go bontšha tlhompho e swanetšego go baemedi ba ba etetšego ba Sehlopha se Bušago?
17 Bagolo ka mo go kgethegilego ba swanetše go bontšha tlhompho e swanetšego bakeng sa baemedi ba ba etelago diphuthego ba Sehlopha se Bušago. Ba romelwa diphuthegong ka baka la dika tša bona tša moya le phihlelo ya bona, yeo ka mehla e lego e kgolwanyane go feta ya bagolo ba bantši ba lefelong leo. Ba bangwe ba balebeledi ba basepedi mo gongwe e ka ba ba banyenyane ka nywaga go bagolo ba itšego ka diphuthegong tšeo ba di etelago. Eupja leo ga se lebaka le le kwalago la go gana go ba bontšha tlhompho e swanetšego. Mo gongwe ba ka bona go nyakega gore go akgofa ga bagolo ba lefelong leo go thibelwe tabeng ya go bolelela ngwanabo rena e le mohlanka wa bodiredi goba mogolo, ba gopola temošo ya Paulo go Timotheo. (1 Timotheo 5:22) Gaešita lege molebeledi yo a etetšego a swanetše go naganišiša ka ditaba tšeo di bolelwago ke bagolo ba lefelong leo ka mo go swanetšego, bagolo ba swanetše go ikemišetša go mo theetša le go holwa ke phihlelo ya gagwe e kgolo. Ee, ba swanetše go ‘dula ba rata banna ba mohuta woo.’—Ba-Filipi 2:29, bapiša le NW.
“Banna ba Mohuta Woo le ba Hlomphe”
18, 19. (a) Paulo o bontšhitše bjang tebogo go badiri-gotee le yena? (b) Ke mohlala ofe o bontšhago gore Paulo ga se a ka a ba boloka dikgopi malebana le banababo?
18 Lengwalong la gagwe la pele la go ya go Ba-Korinthe, Paulo o ngwadile ka gore: “Bana bešo, a nke ke Le eletšeng. Tsebang ntlo ya Stefana ka xe e le thaka-ngwaxa ya ba Akaya, le ka xobane ba itirile bahlankedi ba ba bakxêthwa. Le lena Le laolweng ke ba babyalo, le bohle ba ba ba swarišaxo, ba ba itapišaxo. Stefana le Fortunato le Axaiko ke ba thabetše xe ba tla xo nna; xobane mo ke bexo ke hlôka tša lena ba xo tladitše. Ba khutšišitše meôya ya lena. Batho ba ba byalo a nke le ba tsebeng [“banna ba mohuta woo le ba hlomphe,” NW].”—1 Ba-Korinthe 16:15-18.
19 A maikwelo a botse le a botho gakaakang ao Paulo a bego a e-na le ona go banababo, bao ba bangwe ba bona ba bego ba sa tsebje kudu. Eupja Paulo o be a ba rata ka gobane ba be ba ‘swarišana le yena’ gomme ba “itapiša” maitekong a bona a go hlankela bakgethwa. Paulo gape o beile mohlala o mobotse kudu ka go lebalela ruri dilo tše di fetilego. Gaešita lege Johane Mareka a be a mo nyamišitše leetong la gagwe la pele la boromiwa, Paulo ka morago o ile a mmolela ka borutho go phuthego ya Kolose. (Ditiro 13:13; 15:37, 38; Ba-Kolose 4:10) Ge a be a golegilwe kua Roma, Paulo o ile a kgopela gore Mareka a tle a mmone ka gobane o ile a bolela gore, “[Mareka o] nkxahla xe a ntirêla.” (2 Timotheo 4:11) Ga go na go bolokelana dikgopi le mo go nyenyane moo!
20. Ke bjang Bakriste ka kakaretšo, kudu-kudu bagolo, ba swanetšego go bontšha gore ba leboga balebeledi ba botegago le gore ba ‘tšwela pele ba rata banna ba mohuta woo’?
20 Lehono gare ga batho ba Modimo go na le balebeledi ba bantši bao ba ineetšego bao go swana le Stefana ba direlago banababo bona. Ke therešo gore ba na le diphošo tša bona le mafokodi a bona. Lega go le bjalo, ba ‘dirišana’ le “molaki e a bôtêxaxo yo bohlale” le Sehlopha se Bušago sa gagwe, gomme ba “itapiša” modirong wa boboledi le go thušeng banababo bona. Re swanetše ‘go dula re ikokobeletša batho ba mohuta woo,’ re ba leboga bakeng sa dika tša bona tše botse, re sa nyakišiše diphošo tša bona. Bagolo ba swanetše go etelela pele tabeng ya go bontšha lerato le le swanetšego le tlhompho go bagologotee le bona. Bagolo ba swanetše go dirišana ka moya wa lerato le botee. Bohle ba tla lemoga bohlokwa bja banababo rena ba botegago ka tsela e bjalo gomme ‘ba tla tšwela pele ba rata banna ba mohuta woo.’—Ba-Filipi 2:29, bapiša le NW.
[Mongwalo wa tlase]
a Mongwalo wa ka tlase go New World Translation Reference Bible o bontšha gore lentšu ‘go ba le tlhaologanyo’ go 1 Timotheo 3:3, NW le fetoletšwe go tšwa lentšung la Segerika leo le bolelago “go ineela.”
Dintlha tša Tlhahlobo
◻ Ke banna ba mohuta ofe bao Paulo a bego a ba rata ka mo go kgethegilego, gomme ke bomang bao re swanetšego go ba hlompha ka mo go kgethegilego lehono?
◻ Bagolo ba swanetše go bontšha bjang gore ba a hlomphana?
◻ Ke ka baka la’ng sehlopha sa bagolo se ka dira mo gogolo go feta ditho tša sona tšeo di dirago di nnoši?
◻ Ke mafelong afe moo sehlopha sa bagolo se tlago go bontšha gore se hlompha sehlopha se sengwe sa bagolo?
◻ Ke sehlopha sefe sa balebeledi seo se swanetšego go ratwa ka mo go kgethegilego, gomme tlhompho e swanetšego e ka bontšhwa bjang?
[Seswantšho go letlakala 15]
Bagolo bo swanetše go bontšha tebogo e swanetšego magareng ga bona
[Seswantšho go letlakala 18]
Bontšha lerato le tlhompho go balebeledi ba basepedi