THUTO 31
Mmušo wa Modimo ke Eng?
Molaetša o bohlokwahlokwa wa ka Beibeleng ke Mmušo wa Modimo. Jehofa o tlo diriša Mmušo wa gagwe go dira gore lefase ka moka e be Paradeise, ka ge a be a nyaka gore le be bjalo ge a be a le bopa. Mmušo wa Modimo ke’ng? Re tseba bjang gore o a buša gona bjale? Ke dilo dife tšeo Mmušo woo o šetšego o di dirile? Le gona o tlo re direla’ng nakong e tlago? Re tlo kwa dikarabo tša dipotšišo tše thutong ye, le dithutong tše pedi tšeo di latelago.
1. Mmušo wa Modimo ke eng, gona Kgoši ya wona ke mang?
Mmušo wa Modimo ke mmušo wo o bušago legodimong. Jehofa Modimo ke yena a thomilego Mmušo wo. Kgoši ya wona ke Jesu Kriste, e bile o buša a le legodimong. (Mateo 4:17; Johane 18:36) Ge Beibele e bolela ka Jesu e re: “O tla buša e le Kgoši . . . ka mo go sa felego.” (Luka 1:32, 33) Ka ge Jesu e le Kgoši ya Mmušo wa Modimo, o tlo buša batho ka moka mo lefaseng.
2. Jesu o tlo buša le bomang?
Jesu a ka se buše a nnoši. Beibele e re o tlo buša le batho bao ba tšwago “molokong o mongwe le o mongwe, lelemeng le lengwe le le lengwe, morafong o mongwe le o mongwe le setšhabeng se sengwe le se sengwe.” (Kutollo 5:9, 10) Batho bao ba tlago go buša le Jesu Kriste ke ba bakae? Ga e sa le go tloga nakong ya ge Jesu a be a le mo lefaseng, go bile le batho ba dimilione bao ba fetogilego Bakriste. Na ka moka ga bona ba tlo buša le yena? Aowa. Ke Bakriste ba 144 000 feela bao ba tlago go ya legodimong go yo buša le yena. (Bala Kutollo 14:1-4.) Bakriste ba bangwe ka moka ba tlo phela mo lefaseng ba bušwa ke Mmušo wa Modimo.—Psalme 37:29.
3. Ke ka baka la eng Mmušo wa Modimo o phala mebušo ya batho?
Le ge batho bao ba bušago ba leka go dira dilo tše dibotse, ga ba na matla a go dira dilo ka moka tšeo ba nyakago go di dira. Le batho bao ba bušago ka morago ga bona, gantši ga ba na taba le batho bao ba ba bušago. Eupša Kgoši ya Mmušo wa Modimo e lego Jesu, o tlo ba le taba le batho, e bile ga go na motho yo a tlago go buša ka morago gagwe. Beibele e re Modimo o “[hlomile] mmušo wo o ka se kego wa fedišwa.” (Daniele 2:44) Jesu o tlo buša lefase ka moka, e bile a ka se kgetholle motho. Ka ge Jesu a na le lerato, botho, e bile a swara batho gabotse, o tlo ruta batho ka moka gore le bona ba bontšhane lerato, botho, e bile ba swarane gabotse.—Bala Jesaya 11:9.
ITHUTE KA MO GO TSENELETŠEGO
Ekwa gore ke ka baka la eng Mmušo wa Modimo o phala mebušo ka moka ya batho.
4. Mmušo wa Modimo o tlo buša lefase ka moka
Jesu o na le matla go feta batho ka moka bao ba kilego ba buša. Balang Mateo 28:18, gomme le boledišaneng ka potšišo e latelago:
Ka ge Jesu e le Kgoši ya Mmušo wa Modimo, o fapana bjang le batho bao ba bušago lefase?
Mebušo ya batho e fetoga gantši, e bile ge motho a buša o no buša feela naga e itšego e sego lefase ka moka. Bjale Mmušo wa Modimo wona o fapana bjang le mebušo ya batho? Balang Daniele 7:14, gomme le boledišaneng ka dipotšišo tše di latelago:
Ke ka baka la’ng o thabišwa ke gore Mmušo wa Modimo ‘o ka se fedišwe’?
Ke ka baka la’ng o thabišwa ke gore Mmušo wa Modimo o tlo buša lefaseng ka moka?
5. Mebušo ya batho e swanetše go fedišwa
Ke ka baka la’ng Mmušo wa Modimo o swanetše go fediša mebušo ka moka ya batho? Bapalang BIDIO ye, gomme le boledišaneng ka potšišo e latelago:
Mebušo ya batho e dirile gore mo lefaseng go be bjang?
Balang Mmoledi 8:9, gomme le boledišaneng ka dipotšišo tše di latelago:
Na o nagana gore Mmušo wa Modimo o swanetše go fediša mebušo ya batho? Go re’ng o re’alo?
6. Jesu le bao a bušago le bona ba a re kwešiša
Ka ge Jesu e kile ya ba motho, o kgona go re ‘kwela bohloko le go kwešiša mafokodi a rena.’ (Baheberu 4:15) Ge Jehofa a be a kgetha banna le basadi ba 144 000 bao ba botegago gore ba tle ba buše le Jesu, o ile a ba kgetha go “tšwa molokong o mongwe le o mongwe, lelemeng le lengwe le le lengwe, morafong o mongwe le o mongwe le setšhabeng se sengwe le se sengwe.”—Kutollo 5:9.
Go tseba gore Jesu le batho bao ba tlago go buša le yena ba a re kwešiša e bile ba tseba mathata a rena go dira gore o ikwe bjang? Go re’ng o re’alo?
Jehofa o kgethile banna le basadi ba go fapafapana gore ba tle ba buše le Jesu
7. Melao ya Mmušo wa Modimo e phala melao ya mebušo ya batho
Mebušo ya batho e dira melao yeo e naganago gore e tlo hola batho le go ba šireletša. Mmušo wa Modimo le wona o na le melao yeo batho bao ba bušwago ke Mmušo woo ba swanetšego go ekwa. Balang 1 Bakorinthe 6:9-11, gomme le boledišaneng ka dipotšišo tše di latelago:
O nagana gore mo lefaseng go tlo ba bjang ge batho ka moka ba phela ka melao ya Modimo?a
Na o nagana gore Jehofa o gatelela batho bao ba tlago go bušwa ke Mmušo wa gagwe ge a nyaka gore ba phele ka melao ya gagwe? Go re’ng o re’alo?
Re tseba bjang gore batho bao ba sa phelego ka melao ya Modimo ba ka kgona go fetoga?—Bona temana 11.
Go no swana le ge mebušo ya lefase e na le melao ya go šireletša batho, Mmušo wa Modimo le wona o na le melao yeo e phalago melao ya batho. Melao yeo e hola batho bao ba tlago go bušwa ke Mmušo woo e bile e tla ba šireletša
BATHO BA BANGWE BA RE: “Mmušo wa Modimo o ka dipelong tša rena.”
Wena o ka re’ng go bona?
O ITHUTILE ENG?
Mmušo wa Modimo ke mmušo wo o lego legodimong wo o tlago go buša lefase ka moka.
Dipotšišo
Ke bomang bao ba bušago Mmušong wa Modimo?
Ke ka baka la’ng Mmušo wa Modimo o phala mebušo ka moka ya batho?
Jehofa o nyaka gore batho bao ba tlago go bušwa ke Mmušo wa gagwe ba dire’ng?
ITHUTE KA MO GO OKETŠEGILEGO
Ekwa gore Jesu o ile a re Mmušo wa Modimo o kae.
“Na Mmušo wa Modimo o ka Pelong ya Motho?” (Sehlogo seo se lego wepesaeteng)
Ke ka baka la’ng Dihlatse tša Jehofa di kgetha go thekga Mmušo wa Modimo e sego mebušo ya batho?
Ekwa gore Beibele e reng ka batho ba 144 000 bao Jehofa a ba kgethilego gore ba tle ba buše le Jesu.
“Ke Bomang Bao ba Yago Legodimong?” (Sehlogo seo se lego wepesaeteng)
Ekwa gore ke eng seo se ilego sa dira gore mosadi yo a bego a le ka teronkong a tshepe gore Mmušo wa Modimo ke wona feela o tlago go fediša mathata ka moka a lefase.
“Kamoo ke Ilego ka Hwetša Karabo ya Mabapi le go Hloka Toka” (Phafoga! ya November 2011.)