Bota Jah Jehofa!

“Botang Jehofa, lena batho, ka mehla le mehla, ka gobane Jah Jehofa ke Lentswe la mehla ya neng le neng.”—JESAYA 26:4, NW.

1, 2. Ke kopelo efe ya theto yeo e thabišago ye e tšweletšwago go Jesaya 26:1-6, gomme ka baka la’ng?

GO KOKOBETŠWA ga “metse ya ’thšaba tše matla” go dira gore go nyakege kopelo ya phenyo! (Jesaya 25:3) Ka gona, boporofeta bja Jesaya kgaolo 26, ditemana 1 go ya go 6 bo tšweletša ka mo go swanetšego kopelo e thabišago ya theto go Morena yo a Phagamego Jehofa. Mo nakong ye e opelwa gaešita le “naxeng ya Juda,” Juda ye e bolelago “Selebogwa.” Mo le gona King James Version e diriša polelo “MORENA JEHOFA” moo leina la Modimo le boletšwego gabedi. Eupja mantšu a kopelo yeo ke a kgahlišago kudu gakaakang ka ge a tšwelela ka go New World Translation, moo leina la Modimo le fetoletšwego ka go nepagala lefelong le gotee le mafelong a mangwe ka moka ao le tšwelelago go wona!

² Bjale theetša kopelo yeo e bose go ya ka New World Translation: “Re na le motse o tiilego. O [Jehofa] beile phološo ka boyona ya merako le magora. Bulang dikgoro, lena batho, gore setšhaba sa go loka seo se bolokago mokgwa wa go botega se tsene. Kgopolo yeo e thekgwago gabotse o tla e šireletša ka khutšo e sa felego, ka gobane go botilwe wena. Botang Jehofa, lena batho, ka mehla le mehla, ka gobane Jah Jehofa ke Lentswe la mehla ya neng le neng. Gobane o ušitše motse wa tletlolo. O o kokobeditše, a o kokobeletša fase-fase; a o digela leroleng. O gatakelwa ke maoto, maoto a bahlaki, dinao tša babotla.” Ke mo go thabišago gakaakang go ba gare ga batho bao ba holofelago bao mo nakong ye ba bago le karolo ya go opela kopelo ye, e lego Dihlatse tša Jehofa!

3. (a) “Setšhaba sa go loka” ke sefe, gomme ke bomang bao ba ilego ba tsena ka “dikgoro” tša sona tšeo di bulegilego? (b) Go tla bjang gore phuthego ya Jehofa e tšwele pele e momagane go sa šetšwe maiteko a lenaba a go e senya?

³ Morena Jehofa, Jah Jehofa, ruri o tla kokobetša bao ba ikgodišago gomme a phološa bao ba mmotago ka mehla. Gaešita lege Isiraele ya moya e kile ya ba “e monyenyane,” fela e fetogile “’thšaba se matla,” e lego “setšhaba sa go loka.” Ka “dikgoro” tše bulegilego tša phuthego ya Jehofa yeo e swanago le motse go tsene le sehlopha se matla sa bagwera ba babotse bao palo ya bona e fetago dimilione tše tharo. Ge ba le ka moka ba bopa borwarre bja ditšhaba ka moka, bjoo palo ya batho ba bjona e fetago ya mo e ka bago ba 57 ba ditšhaba tšeo di bopago seo se bitšwago Ditšhaba tše Kopanego. Eupja “setšhaba” sa Modimo le bao ba kopanelago gotee le sona ke seo se momaganego e le ka kgonthe. Lefaseng ka bophara, ba rata go thekga melao ya gagwe ya motheo ya go loka. “Merako” ya phuthego ya “setšhaba” sa Modimo e nea tšhireletšo malebana le maiteko a Sathane a go šitiša tsela ya sona ya go botega ka go thekga therešo. Lenaba le ka se ke la senya mosepelo wa go ya pele wa potego wa batho ba Modimo! Ka mehla re bota ‘Jah Jehofa, Lentswe la mehleng e sa felego.’—Jesaya 54:17; 60:22.

4, 5. (a) “Motse wa tletlolo” ke ofe, gomme batho ba Jehofa ba o gatakela bjang ka tsela ya seswantšhetšo? (b) Boporofeta bja Jesaya 26:10 bo ba le phethagatšo ya bjona e kgolo neng, gomme bjang? (c) Boporofeta bjo bo dirišwa bjang gape?

⁴ Ge re dutše re kwatša temošo ya gore Jehofa o kgaufsi le go kokobetša “motse wa tletlolo,” e lego “Babele o Moxolo,” ruri ke mo go kgothatšago go bona bahlaki le babotlana ba lefase ba amogela ditaba tše di lokilego tša Mmušo. (Kutollo 18:2, 4, 5) Le bona ka tsela ya seswantšhetšo ba gatakela ‘motse woo wa tletlolo,’ e sego ka go kopanela modirong wa go senya, eupja ka go ba le karolo go boleleng ka letšatši la tefetšo ya Jehofa godimo ga tshepedišo yeo e senyegilego. (Jesaya 61:1, 2) Bjale go šetše go fetile nywaga e masome a mantši Dihlatse tša Jehofa di bontšha botho gaešita le go ba babe ka go ba etela magaeng a bona ba swere molaetša wa Mmušo wo o phološago bophelo. Eupja mafelelo a bile bjalo ka ge go boletšwe go Jesaya 26:10: “Yo mobe—le xo setšwa—xa a ithute tokô; le mo naxeng ya mekxwa e mebotse ó fo senya; boxolo bya Morêna xa’ bo bône.”

⁵ Boporofeta bjo bja tsošološo bo phethagatšwa kudu lehono. Batho gaešita lege ba neilwe sebaka, ruri ke ba sego kae bao ba lokišago maphelo a bona e le gore ba tle ba amogelwe ke Jehofa “naxeng ya mekxwa e mebotse.” Bao ba gobošago Jehofa gotee le dihlatse tša gagwe tše botegago ‘ba ka se ke ba bona bogolo bja Jehofa’ ka gobane ba ka se ke ba phologa gore ba thabele ditšhegofatšo tše kgahlišago tšeo di tlago go tla go batho ka morago ga ge leina la Jehofa le kgethagaditšwe. (Jesaya 11:9) Boporofeta bjo bo ka dirišwa le go lefaseng la Paradeise gare ga bao ba tsošwago mabitleng. Motho lege e le ofe yo a ganago go dumelelana le melao ya Modimo, bjalo ka ge go bontšhitšwe gabotse ka “mangwalong” a Modimo a nako yeo, ruri maina a bona a ka se ke a ngwalwa ka ‘pukung ya bophelo.’—Kutollo 20:12, 15; bapiša le Hesekiele 33:11.

Jehofa o Nea Khutšo

6. Ke mantšu afe ao batho bao ba botegago ba Jehofa ba a goeletšago ka lethabo, gomme ka baka la’ng?

⁶ Lega go le bjalo, batho bao ba botegago ba Modimo ba rata go bona e le ka kgonthe Jah Jehofa a godišwa, a phagamišwa. Ba mo kgopela gore a ‘nee batho ba gagwe khutšo,’ gomme ba goeletša ka lethabo ka gore: “Morêna, O kile wa atiša ’thšaba sé, wa rêtwa Ò se atišitše, Ò katološitše mellwanê ya naxa yohle.” (Jesaya 26:12, 15) Mafaseng a 210 go dikologa lefase, Jehofa o tšwela pele a atiša batho bao ba swanago le dinku setšhabeng sa gagwe sa moya. Batho ba bafsa ba dikete tše makgolo bao ba kopanelago ba a kolobetšwa. Babulamadibogo ba fetago seripa sa milione ba kgethegilego, ba ka mehla le ba go thuša ba tšweletša koketšego dikgweding tšeo di nago le ditlhora. Go agwa Diholo tša Mmušo tše oketšegilego le Diholo tša Kopano. Makala a Watch Tower a katološa Magae a wona a Bethele le difeketori gomme a oketša ditlabakelo tša go gatiša. Kgolo e tšwela pele!

7. Ke eng seo se dirilego gore phuthego ya Jehofa yeo e swanago le motse e gole?

⁷ Kgolo ye e ba gona ka gobane ‘Kgoši ya Khutšo’ e laola ditaba tša batho ba Modimo mo lefaseng. Go bjalo ka ge Jesaya a boletše mathomong boporofeteng bja gagwe: “Mmušô wó ké wa kênêlô, wa khutšô ye e sa felexo mo sedulong sa Dafida le mmušong wa xaxwe, ké wa xo tlo tia, le wa xo tlo thêkxwa ka molaô le ka tokô. Byale le mehleng ya neng le neng. Tšeo di tlo dirwa ke xo pelofala xa Morêna wa mašaba.” (Jesaya 9:5, 6) Mantšu ao a phethagaditšwe kudu gakaakang lehono! Bao ba botago Jehofa ba šetše ba bona khutšo, toka le toko ya pušo yeo ya kgoši. E ba tlišitše gotee ka botee bjo lerato bjo bo thabelwago feela ke barutiwa ba therešo ba Jesu. (Johane 13:34, 35) Go feta moo, ba letetše ka kholofelo e kgolo nako yeo e batamelago ka go akgofa ge pušo ya Mmušo ya Jesu le “xo tseba Morêna” go tla ba go tletše lefaseng ka moka.—Jesaya 11:9; Daniele 2:35, 44, 45.

8. Ke eng seo se bontšhwago ke mantšu a Jehofa go Jesaya 26:20, gomme “phapoši” e tswalanywa le eng?

⁸ Ge koketšego ya Mmušo e dutše e e-ya seremong, ruri kgoeletšo ya Jehofa go Jesaya 26:20 e a kwala: “Wene Sethšaba sa-ka! Sepela O y’o tsêna phapošing ya xaxo, O itswalêlêlê O iphihlê xo se xokaenyana, xo bê xo fetê dikôtlô.” Ka ntle le pelaelo ‘phapoši’ ya boporofeta bjo e tswalanywa gabotse le diphuthego tše fetago 54 000 tšeo di swanago le metse tšeo di direlago Dihlatse tša Jehofa lefaseng ka moka lehono. Seo Jehofa a se gopotšego se sa tlile go bonwa. Eupja re ka kgonthišega gore ge a fediša batho ba babe, o tla šireletša batho ba gagwe bao ba holofelago go swana lege a dirile mehleng ya Jesaya ge a be a gomiša Asiria e sehlogo.—Jesaya 10:24-26.

Topollo e a Kgonthišetšwa!

9. (a) Kgoši Hiskia o ile a bontšha bjang go bota ga gagwe Jehofa? (b) Ge re tlaišwa goba re rogwa ke bao ba hloilego Jehofa, boitshwaro bja rena bjo bo swanetšego e ba bofe?

⁹ Bahlanka ba Jehofa lehono ba mmota ka lebaka lona leo Kgoši Hiskia a ilego a mmota ka lona. O ile a ithekga ka mo go tletšego ka Jehofa e le Morena wa gagwe yo a Phagamego. Ka gona, seremong sa tšhošetšo ya Asiria, o ile a rapela Jehofa ka mantšu a: “Morêna Modimo wa Isiraele, Kokama-Bakerube, O Modimo Ò nnoši wa mebušô yohle ya lefase. Ké Wene O dirilexo lexodimo le lefase. Morêna, O k’O sêkêxê tsêbê Ô kwê, lebeleša O bônê! Kwaa mantšu, a Sanheribe a a rometšexo xo xoboša Modimo a phelaxo.” (Jesaya 37:16, 17) Ge o tlaišwa, o kwerwa goba o rogwa ke bao ba hloilego Jehofa, na thapelo yeo e swanago le ye ga e runye ka pelong ya gago? Ka go bota Jehofa ka mo go tletšego, na ga o mo kgopele gore a tloše kgobošo yeo e lego leineng la gagwe? Ye ke tsela yeo Jesu a ilego a ikwa ka yona ge a be a šetše a le kgaufsi le go hwa koteng ya tlhokofatšo. O ile a ba a kgopela gore eka senwelo seo a bego a le kgaufsi le go se nwa se ka ‘feta’ go yena ka baka la go gobošwa mo gogolo ga Tatagwe.—Mateo 26:39-44.

10. (a) Thapelo ya Hiskia e ile ya utolla eng mabapi le seo a kgomegilego kudu ka sona? (b) Re ka ba bjang bao ba swanago le Hiskia ge re dutše re lebeletšane le diteko tšeo di tlago kapejana ka pele ga Haramagedone?

¹⁰ Thapelo ya Hiskia e ile ya bontšha gore o be a se na tutuetšo ya boithati ge a be a nyaka go namolelwa go ba-Asiria. O be a sa leke feela go iphološa. Go e na le moo, o be a rata gore leina la Jehofa le kgethagatšwe gomme bogoši bja Gagwe bo godišwe. Ka gona, thapelo ya gagwe e ile ya phetha ka mantšu a: “Byale, Morêna Modimo wa rena, re phološê seatleng sa xaxwe, mebušô yohle ya lefase e tlê e tsebê xobane Modimo ké Wene Morêna Ò nnoši.” (Jesaya 37:20) Ka mo go swanago, ge re dutše re lebeletšana le diteko tšeo di tlago ka pele ga ntwa ya mafelelo ya Haramagedone, gona anke re gopoleng gore go phološwa ga rena ka noši ke mo go tlago ka morago ga go kgethagatšwa ga leina la Jehofa. Go bjalo ka ge Morena wa rena yo a Phagamego a boletše ka makga a ka bago a 60 ka moporofeta wa gagwe Hesekiele gore: ‘Ba tla tseba ge Nna ke le Jehofa.’—Hesekiele 38:23.

11. (a) Ke phošo efe yeo Sanheribe a ilego a e dira, gomme Jehofa o ile a bolela eng mabapi le se? (b) Ka baka la mafelelo ao a ilego a tlela Sanheribe, ke kholofelo efe ye re ka bago le yona?

¹¹ Ka morago ga gore Hiskia a rapele, Jesaya o ile a tsebiša kgoši ka lentšu leo Jehofa a le boletšego malebana le Sanheribe. A phošo e kaakang yeo e ilego ya dirwa ke morogaki wa Asiria ge a be a goboša Modimo yo a phelago! Jehofa o boletše ka Jesaya mabapi le Sanheribe gore: “Ké mang yo O bexo O mo fôtlêla? Ké mang yo O mo roxilexo? Ké mang yo O mmoletšexo ka mašata? Yo O bexo O mo khutlolêla mahlô ké Mokxêthwa wa Isiraele.” Le gona e bile Mokgethwa wa Isiraele yo a ilego a gata mogato bošegong bjoo! Go ile gwa nyakega morongwa o tee feela wa Jehofa gore a bolaye gomme go be le “ditoto” tše 185 000 tša madira a ba-Asiria, e lego banna ba matla kudu ba madira a Sanheribe. Kgoši yeo ya go ikgodiša e ile ya gomela Ninife ka dihlong gomme nywageng e sego kae ka morago e ile ya bolawa ke barwa ba yona ka noši ge e be e phegeletše go dira borapedi bja yona bja medimo ya diswantšho. Re ka bota Jehofa gomme re kgonthišega gore O tla swara Sathane ka yona tsela yeo le sehlopha sa gagwe ka moka bao ba rogago ka lenyatšo gotee le go tlaiša Dihlatse tša Jehofa.—Jesaya 37:23, 36-38.

Go Lefeletša ‘Bao ba Bolailwego’

12. (a) Jesaya 26:21 e hlalosa bjang go ikarabela mo go tlago go ba gona ka Haramagedone? (b) Ke ‘bomang bao ba bolailwego’ bao ba tlago go lefeletšwa gaešita le pele ga Haramagedone, gona bjang?

¹² Morago kua e ile ya ba pono e šiišago kudu ya ntwa, eupja go ikarabela mo go šoro kudu go tla ba gona nakong ya ‘masetla-pelo a magolo.’ (Mateo 24:21) Jehofa o re laletša gore re lebelele bogolo bja polao yeo: “Xobane Morêna šoo-lee! Ó tšwêlêla felô xa xaxwe; ó tla xo latiša molato wa ba dutšexo lefaseng; naxa e tlo bipolla madi a a lexo mo xo yôna, e ka se fêle e bipile ba xo bolaêlwa mo xo yôna.” (Jesaya 26:21) Sa pele, Jehofa o tla dira gore mebušo ya bopolitiki e ahlole baemedi ba phošo ya bodumedi. Medimo ya bona ya maaka e ka se ke ya ba phološa letšatšing leo! Anke mopapa wa Roma a tšwele pele a kgobokanya bodumedi ka moka bja “Babele o Moxolo” bakeng sa dithapelo tša tumelo e tswaka-tswakanego. Ga go le o tee wa baemedi ba ba tumelo e tswaka-tswakanego yo a godišago Modimo yo a phelago wa therešo Jehofa. Dithuto tša bona ke tšeo di nago le phošo, ke tšeo e sego tša Beibele gomme le ditsela tša bona di bjalo. Ba ile ba bolayana nywageng e makgolo a mantši. Ba ile ba tšholla madi a Bakriste bao ba sego šoro. Lekgolong le la nywaga la bo-20, ba bantši ba batho ba bao ba dirago diphošo ba ile ba thekga babuša-noši ba sehlogo bao ba ilego ba bolaya Dihlatse tša Jehofa dikgolegong le dikampeng tša tshwenyo ka dihlopha tšeo di thunyago le ka selepe. Bjalo ka ge Jehofa a bolela ka go lebanya ka baporofeta ba gagwe, ruri ba bjalo ‘bao ba bolailwego’ ba tla lefeletšwa.—Doiteronomio 32:41, 43; Jesaya 1:24; 63:4; Kutollo 17:15-18; 18:21, 24.

13. Jesaya o boletše ka eng e sa le pele mabapi le “’tšatši la Morêna,” gomme mantšu a a dirišwa go bomang?

¹³ Ka morago ga gore bodumedi bja maaka bo senywe, Jehofa o tla akgofa malebana le baganetši ka moka bao ba šetšego ba Mmušo wa Kriste. Go baganetši ba bjalo ka moka gotee le go “Babele o Moxolo,” go dirišwa mantšu a Modimo ao a lego go Jesaya 13:6, 9 ao a rego: “Hlabang mokxoši, xobane ’tšatši la Morêna le kxaufsi, e ke xo tla thšwalalanô ye e tšwaxo xo Yo-xodimo. Še-leo ’tšatši la Morêna, lè e-tla è le la sehloxo, la sehutla le boxale bo tukaxo, la xore naxa e šalê è le marope, xo fedišwê disenyi mo xo yôna.” Go tla ba bjalo ka ge mopsalme Dafida a boletše e sa le pele gore: “Bohle ba ba mo rataxo ó ba hlôkômetše; ba babe bôná ó tlo ba fediša.”—Psalme 145:20; Kutollo 19:11-21.

14. Ke mantšu afe a mangwe a Jesaya ao ditšhaba di dirago gabotse gore di a ele hloko, gomme ka baka la’ng?

¹⁴ Ditšhaba tša lefase di tla dira gabotse gore di ele hloko mantšu a mangwe a Jesaya go kgaolo 34, ditemana 1 go ya go 8: “Hee lena Dithšaba, batamêlang! Hee lena Merafô, theetšang! . . . Xobane Morêna ó xalefetše ’thšaba tšohle, ó befetšwe ke madirá ohle a tšôna, a di xafa-moka a re di bolawê. ’Me babolawa ba tšôna ba tlo lahlwa; ’me seuta sa ditoto tša bôná se tlo hlatloxêla kwa xodimo, dithaba di tlo êla madi a bôná. . . . Xobane e tlo ba e le letšatši la tefetšô la Morêna.” Tikologong ya bopolitiki, kgwebo e kgolo le bodumedi bja maaka lehono, go senyega le boitshwaro bjo bobe ke tšeo di apareditšego. Eupja Jehofa o rerile go tliša lefase le le hlwekilego. Ka baka la se, o kgobokanya go tšwa ditšhabeng ka moka bakeng sa phologo batho bao ba ikemišeditšego go lokiša maphelo a bona gore ba mo direle ka go loka. Ba bangwe ka moka ba swanetše go fela letšatšing la gagwe la tefetšo.—Jeremia 25:31-33.

Paradeise ya Khutšo

15. Jesaya o hlalosa’ng go Jes kgaolo 35 mabapi le (a) lehono? (b) nakong e tlago?

¹⁵ Go Jesaya kgaolo 35, moporofeta wa Modimo o tšwela pele go hlalosa ka leleme le lebotse la go swantšhetša, boemo bja batho ba Jehofa bao ba tsošološitšwego, bao lehono ba mmotago ka mehla. Ba ka ge ba kgobokantšhitšwe ka paradeiseng ya moya, ba “bôna letaxo la Morêna le bothšepi bya Modimo wa rena.” Le gona ba letetše paradeise ya kgonthe le phethagatšo ya kholofetšo ye: “Ké mo xo tl’o xo budollwa mahlô a difofu, xwa thibollwa ’tsêbê tša difoa. Ké mo dixôlê di tl’o xo taboxa bo-ka thsêpê, xwa tlo hlalala ’leme la semuma, xobane lešokeng xo thulêxa ’diba tša meetse, mo lehanateng xo tlo êla dinokana.” (Jesaya 35:1, 2, 5, 6) Na o thabela kholofelo yeo? Na o bota Jehofa, gomme o kgodišega gore o tla phethagatša dikholofetšo tšeo?

16, 17. (a) Ke kgopelo efe e akgofilego yeo Jesaya a e dirago ge a hlalosa Paradeise? (b) Batho ba Jehofa ba swanetše go itshwara bjang kgopelong ye?

¹⁶ Ka ge o bota Jehofa, gona o ka ba le karolo ya go kgothatša ba bafsa gotee le ba bangwe bao tumelo ya bona mo gongwe e ka nyakago gore e matlafatšwe. Moporofeta Jesaya ge a le gare a hlalosa Paradeise o tsentšha le kgopelo ye ya go akgofa: “Tiišang diatla tše di bexo di rephile, matôlô a xo lôka-lôka a bê le matla. Ba ’pelo tše thsêsanyane Le ba botšê Le re: Tiišang! Se boifeng! Šó Modimo wa lena! Xo tla tefetšô, moputsô wa Modimo. Yêna ó tlêla xo Le phološa.” (Jesaya 35:3, 4) Ee, re rata go bona bohle bao dipelo tša bona di sekametšego go lokeng ba hlagolela go bota Jehofa, e le gore ba kgone go tsena lefaseng la Paradeise.

¹⁷ Ka gona anke re tiišeng diatla lege e le dife tšeo di rephilego gore di kgone go “xomarêla Lentšu la bophelô.” Anke re matlafatšeng lege e le bafe bao ba nago le matolo ao a thekeselago, gomme re ba nee thušo moo go nyakegago gore ba “swarê ka tsela ye e loketšexo ba Morêna, e bê xo mo kxahla xohle.” (Ba-Filipi 2:16; Ba-Kolose 1:10) Ee, anke re homotšeng lege e le bafe bao mo gongwe ba ka bago ba nyamile pelong, gomme anke re kgothatšane ge re lebeletšane le diteko goba tlaišo, gore re ‘tleme pelo re tiišetše go bolela Lentšu la Modimo re sa boife.’ (Ba-Filipi 1:14; 1 Ba-Thesalonika 5:14; Ba-Efeso 5:15, 16) Ka gona, ge letšatši la Jehofa la tefetšo le fihla, re ka kgonthišega ka tšhegofatšo ya gagwe ge ‘a e-tla go tla go phološa batho ba gagwe.’ Ka letšatši leo, na o tla ba gare ga bao ba botago Jehofa bakeng sa phološo?

18. Ke tebelelo efe e kgahlišago yeo e lego ka pele ga bao ba botago Jehofa, gomme boikemišetšo bja bona ke bofe?

¹⁸ Go bao ba botago Jehofa ka mehla, a tebelelo e kgahlišago gakaakang yeo e lego ka morago ga letšatši leo! Bagateledi ba badira-dibe ba tla ba ba se gona! Lefaseng le lefsa, bao ba ratago Jah Jehofa ba tla tsošološwa ke Morwa wa gagwe gore ba be phethegong yeo e se nago sebe! Na ga o hlologele nako yeo? Go bota ga gago Jehofa go tla go tliša letšatšing leo le le kgahlišago. Ee, botang Jehofa ka mehla, lena batho, ka gobane se se bolela phološo!

Dipotšišo tša Tlhahlobo

◻ Kopelo ya phenyo ya Jesaya 26 e re kgothaletša gore re dire’ng?

◻ Ke ‘motse ofe wa tletlolo’ wo Jehofa a tlago go o kokobetša, gomme rena re o gatakela bjang?

◻ Re ithuta’ng go ya ka thapelo ya Hiskia ge a be a lebeletšane le tšhošetšo ya Sanheribe?

◻ ‘Bao ba bolailwego’ ba Jesaya 26:21 ba lefeletšwa bjang?

◻ Mafelelo e tla ba afe ge e ba re bota Jah Jehofa?

[Lepokisi go letlakala 19]

Na Mmušo wa bo-Mopapa o Swanetše go Sekišwa?

World Press Review ge e akaretša sehlogo sa Umberto Siniscalchi ka go Il Giornale ya Milan, e bolela gore: “Kgoro e kgolo ya Boipiletšo ya Italy e swawa diphošo o šoro ka gobane e ile ya fediša ka July [1987] go swarwa mo go kgonthišeditšwego ga bahlankedi ba bararo ba panka ba Mmušo wa bo-Mopapa bao ba ilego ba akaretšwa tabeng ya go tuma gampe ga tshenyo kua Banco Ambrosiano.” Phetho yeo e theilwego kgweranong ya kgale magareng ga Mmušo wa bo-Mopapa le mmušo wa Italy, e ile ya hunolla modula-setulo wa panka yo e lego mopišopo o mogolo gotee le molaodi o mogolo wa panka le ra-tšhupatlotlo o mogolo. Poeletšo e oketša ka gore: “Bantšhi ba bangwe ba diphošo gaešita lege ba sa bee baahlodi molato bakeng sa phetho, ba dumela gore kgwerano e lwantšhana le molao wa motheo wa Italy ka go hunolla bao ba robilego molao mobung wa Italy. Ba bangwe bao e lego babei ba molao ba gapeletša gore go be le kwano yeo e dumelelago tshepedišo ya toka ya Italy ya gore go sekišwe Mmušo wa bo-Mopapa bakeng sa tshenyo yeo e dirilwego Italy.”