Ke Mang yo a Ngwadilego Beibele?

BATHO ba belaelago ba bolela gore, “Beibele e tletše ka ditaba tše di ganetšanago. Ka ntle le moo, e na le difilosofi tša batho. Ka gona, motho lege e le ofe a ka amogela Beibele bjang e le puku e hlahlago ya bophelo yeo e swanelwago ke go botwa?”

Na o na le kgopolo ya batho ba belaelago ya gore Beibele e fo ba puku e bolelago dikgopolo tše fošagetšego tša batho? Baruti ba bangwe ba na le kgopolo yeo. Morutwana wa thutatumelo wa Moprotestanta wa mo-Swiss yo a hlokofetšego, e lego Karl Barth o ngwadile go Kirchliche Dogmatik (Dithuto tša Kereke) ya gagwe ka gore: “Baporofeta le baapostola ka mo go swanago ba be ba ka kgona go dira diphošo ge ba bolela le ge ba ngwala.” Ke therešo, go ka hwetšwa diphapano tša mantšu ditaodišong tša tiragalo yeo e begilwego ke bangwadi bao ba fetago o tee ba Beibele. Le gona go ka hwetšwa dipego tšeo ge di lebelelwa ka go se šetše, di bonalago di fapana ka mo go feletšego le dipego tšeo di hweditšwego mo gongwe mo Beibeleng. Eupja na tše e tloga e le ditaba tše ganetšanago? Na Beibele e fo ba selo se se tšweleditšwego ke batho? Ge e le gabotse, ke mang yo a ngwadilego Beibele?

Karabo e bonolo: “Batho ba boletše se se tšwago go Modimo.” Eupja ba tsebile bjang seo ba swanetšego go se bolela le seo ba swanetšego go se ngwala? Monna yo a sa tšwago go tsopolwa, e lego moapostola Simone Petro, o tšwela pele go hlalosa gore ba boletše “ka go išwa ke moya o mokgethwa.”—2 Petro 1:21, NW.

Ge e le gabotse, nako le nako Beibele e gatelela gore ke “Lentšu la Modimo.” Ditemaneng tše 176 tša Psalme 119 e nnoši, taba ye e bolelwa ka makga a 176! Seo se dirago gore se e be sa bohlokwa ke gore ka tlwaelo bangwadi ba rata gore go tsebje gore ba ngwadile puku e itšego. Eupja banna bao ba ngwadilego Beibele ba be ba se bjalo. Tlhompho yohle e be e swanetše go ya go Modimo. E be e le puku ya gagwe, e sego ya bona.—1 Ba-Thesalonika 2:13; 2 Samuele 23:2.

Ke Bjang ba ‘Bego ba Išwa ke Moya o Mokgethwa’?

Banna ba ba be ba ‘išwa ke moya o mokgethwa’ bjang? Lengwalo leo le bego le e-ya go Mokriste wa lekgolong la pele la nywaga Timotheo, le nea karabo: “Mangwalô ka moka ké ma-hebetšwa-ke-Modimo.” “Ma-hebetšwa-ke-Modimo” ya Beibele ya Segerika e fetolela lentšu la mathomo la temana, the·oʹpneu·stos, leo ge e le gabotse le bolelago gore a be a “buduletšwe ke Modimo.” Modimo o dirišitše matla a gagwe a dirago ao a sa bonagalego, e lego moya wa gagwe o mokgethwa, go “budulela” dikgopolo tša gagwe menaganong ya bangwadi. Ka gona, Jehofa Modimo ke Mothopo le Motšweletši wa Beibele. Dikgopolo tša gagwe di hlahlile go ngwalwa go fo swana le ge rakgwebo a diriša mongwaledi gore a mo ngwalele mangwalo.—2 Timotheo 3:16.

Le gona, kgopolo ye ya “go budulelwa ke Modimo” e swana le polelo ya Beibele e rego, “go išwa ke moya o mokgethwa.” Go bjalo bjang? “Go išwa” go dirišwa ka Segerika ge go bolelwa ka dikepe tšeo di sepetšwago ke moya tseleng e itšego. (Bapiša le Ditiro 27:15, 17.) Ka gona, go etša ge phefo e foka gomme e sepetša sekepe se se sesago, bangwadi ba Beibele ba ile ba nagana, ba bolela le go ngwala bjalo ka tlase ga tutuetšo ya Modimo, ba išwa ke moya wa gagwe o mokgethwa ge a o “budulela” go bona.

Banna Bao ba Dirišitšwego ke Modimo Gore ba Ngwale

Re upja re e-na le pego e nyenyane ya taodišo ya bophelo bja bangwadi ba Beibele. Go e na le gore ba itebelele e le ba bohlokwa ka mo go fetišišago, ka mehla ba be ba katanela go hlompha Modimo ka go ipea boemong bjo e sego bja bohlokwa. Lega go le bjalo, re a tseba gore ba be ba akaretša bahlankedi ba mmušo, baahlodi, baporofeta, dikgoši, badiši, balemi le barei ba dihlapi, e lego banna ba 40 ge ba kopane. Ka gona, Beibele gaešita lege e le molaetša o tšwago go Modimo, e na le borutho, ditaba tše di fapa-fapanego le yeo e ipiletšago ya dika tša motho.

Bontši bja bangwadi ba Beibele ga se ba ka ba tsebana. Ba bile ba phetše nywaga e makgolo-kgolo e sa swanego, gomme ba be ba fapane ka mo go fetišišago ka semelo le phihlelo gotee le ka ditšo tša tša leago le tša thuto. Lega go le bjalo, go sa šetšwe ge e ba ba be ba le ba bafsa goba ba tšofetše, seo ba se ngwadilego se bontšha botee bjo bo feletšego. Lebakeng la mo e ka bago nywaga e 1 600, ba ile ba ngwala go fihla ge puku e phethwa mafelelong. Ka morago ga go hlahloba ka kelohloko, o tla hwetša gore dipego tša Beibele di bontšha go kwana mo gogolo. Ka gona Beibele e boeletša kgopolo ya Mongwadi o tee, gaešita lege go dirišitšwe bangwadi ba bantši.

Na se ga se sa swanela go re hlohleletša ‘go šetša ka mo go fetišišago’ puku ye e sa tlwaelegago, e lego Beibele? Na ga se ra swanela go fihlelela phetho e swanago go etša ge Petro a dirile, yo a ngwadilego gore: “Tšohle tše di fo re tiišetša molaetša wa baporofeta, woo le tla bago le dira gabotse ge le o šetša, ka gobane o swana le lebone leo le kganyago lefelong leo le lego lefsifsi”?—Ba-Hebere 2:1, NW; 2 Petro 1:19, The New English Bible.

Eupja mo nakong ye, go thwe’ng ka polelo ya gore Beibele e a ikganetša? Na e a ikganetša? O araba bjang?

[Lepokisi go letlakala 4]

“A puku e bohlokwa gakaakang! Seo ke sa se tlwaelago go feta tše di lego ka gare ga yona ke mokgwa wa yona wa go bolela, moo lentšu e bago setšweletšwa sa kgonthe sa tlhago go swana le sehlare, go swana le letšoba, go swana le lewatle, go swana le dinaledi, go swana le motho ka noši. E ya hloga, e ya elela, e ya phadima, e ya sega, motho a se tsebe gore go tlile bjang, motho a se tsebe gore ke ka baka la’ng, motho o hwetša se sengwe le se sengwe e le sa tlhago ka mo go feletšego. Ka kgonthe ke Lentšu la Modimo, go fapana le dipuku tše dingwe tšeo di bontšhago feela bohlale bja batho.”—Sereti sa Mojeremane seo e bilego e le mongwadi wa dikuranta, Heinrich Heine, wa lekgolo la nywaga la bo-19 o hlalosa mabapi le Beibele.

[Seswantšho go letlakala 4]

Go etša ge phefo e sepetša dikepe tše di sesago, bangwadi ba Beibele ba be ba ‘išwa ke moya o mokgethwa wa Modimo bjalo’