Modimo O Buduletše Bjang Beibele?

TSELA ya go fetiša melaetša ke e kgahlišago kudu lehono go feta nakong le ge e le efe e nngwe historing. Megala, metšhene ya fax le di-computer—ke mang yo a ka bego a ile a akanya nywageng e fetilego ka nako yeo ka yona melaetša e bego e ka fetišetšwa mo e nyakilego go ba le ge e le kae lefaseng ka moka le semeetseng?

Eupša tsela e kgahlišago ka go fetišiša ya go fetiša melaetša ke yeo motho a ka se kgonego go e diriša—e lego pudulelo ya Modimo. Jehofa o buduletše bangwadi ba ka bago 40 bao e lego batho gore ba tšweletše Lentšu la gagwe le le ngwadilwego, e lego Beibele e Kgethwa. Go fo swana le ge batho ba e-na le ditsela tše di fetago e tee tša go fetišetša melaetša, Jehofa o dirišitše mekgwa e mmalwa ya go fetišetša molaetša gore a budulele Mangwalo.

Piletšo. Modimo o fetišeditše melaetša e itšego yeo e ilego ya tsenywa pegong ya Beibele ka morago.a Ka mohlala, ela hloko ditaelo tšeo di bopago kgwerano ya Molao. Jehofa o boditše Moše gore: “Mantšu á O a ngwalê; ka xobane ke dirile kxwêranô le wêna le Isiraele ka mantšu á.” (Ekisodo 34:27) “Mantšu” ao, ao a ilego a “laeletšwa ke Barongwa” a ile a kopollwa ke Moše gomme bjale a ka hwetšwa ka dipukung tša Beibele tša Ekisodo, Lefitiko, Numeri le Doiteronomio.—Ditiro 7:53.

Baporofeta ba bangwe ba bantši go akaretša le Jesaya, Jeremia, Hesekiele, Amosi, Nahume le Mika ba ile ba amogela melaetša e lebanyago e tšwago go Modimo ka barongwa. Ka dinako tše dingwe banna ba ba be ba thoma diporofeto tša bona ka polelwana e rego: “Seo Jehofa a se boletšego se se.” (NW) (Jesaya 37:6; Jeremia 2:2; Hesekiele 11:5; Amosi 1:3; Mika 2:3; Nahume 1:12) Ka morago ba be ba ngwala seo Modimo a se boletšego.

Dipono, Ditoro le go ya le Moya. Pono ke ponagalo, pontšho goba molaetša o tsenywago monaganong wa motho a dutše a phafogile, gantši e le ka tsela e itšego e sa tlwaelegago. Ka mohlala, Petro, Jakobo le Johane “ba re xo phafoxa” ba bona pono ya Jesu yo a fetošitšwego lebopo. (Luka 9:28-36; 2 Petro 1:16-21) Mabakeng a mangwe molaetša o be o fetišwa torong goba ponong ya bošego, wa tsenywa monaganong wa moamogedi mola a robetše. Ka gona Daniele o ngwala ka “pônô ya hlôxô ya-ka kè le dilaong”—goba go etša ge mofetoledi Ronald A. Knox a e fetolela, “ge ke be ke robetše ke bogetše torong ya-ka.”—Daniele 4:10.

Motho yoo Jehofa a bego a mo iša le moya go molaleng gore o ile a nwelela boemong bja go tsepamiša kgopolo ka mo go tseneletšego, gaešita le ge bonyenyane a leba-leba. (Bapiša le Ditiro 10:9-16.) Ka Beibeleng lentšu la Segerika leo le fetoletšwego e le “go ya le moya” (ekʹsta·sis) le bolela ‘go tloša goba go šuthiša.’ Le rotoša kgopolo ya go ntšha monagano boemong bja wona bja tlwaelo. Ka go rialo, motho yo a ilego le moya o be a ka se šetše ditikologo tša gagwe mola a amogela pono ka botlalo. Moapostola Paulo go bonala a be a ile le moya ka tsela yeo ge a be a “rotošetšwa Paradiseng, a kwa mantšu a palaxo xo bolêlwa, ao motho a sa dumelelwexo xo a bolêla.”—2 Ba-Korinthe 12:2-4.

Go fapana le bao ba ngwadilego melaetša yeo ba e bileditšwego ke Modimo, bangwadi ba Beibele bao ba amogetšego dipono goba ditoro goba bao ba ilego ba ya le moya gantši ba be ba lokologile go hlalosa seo ba se bonego ka mantšu a bona. Habakuku o ile a botšwa gore: “Ngwala pônô yé; tša yôna O di tlôkê mamating, di balêxê ka pelá.”—Habakuku 2:2.

Na se se bolela gore dikarolo tše tša Beibele ga se tša budulelwa ka mo go tletšego ka tsela e itšego go e na le dikarolo tše di bileditšwego? Le gatee. Jehofa ka moya wa gagwe o ile a gatiša molaetša wa gagwe ka go tia monaganong wa mongwadi yo mongwe le yo mongwe e le gore dikgopolo tša Modimo di ka fetišwa, e sego tša motho. Le ge Jehofa a ile a dumelela mongwadi gore a kgethe mantšu a swanetšego, o ile a hlahla monagano wa mongwadi le pelo ya gagwe e le gore go se be le tsebišo e bohlokwa e tlogelwago, gomme mafelelong mantšu a lebelelwa ka mo go swanetšego e le a Modimo.—1 Ba-Thesalonika 2:13.

Kutollo ya Modimo. Beibele e na le boporofeta—histori e utolotšwego gomme ya ngwalwa e sa le pele—bjo bo fetago kgole kudu bokgoni bja motho feela. Mohlala o mongwe ke go tsoga le go wa ga “kxoši ya Ba-Gerika” Alexander yo Mogolo mo go boletšwego nywageng e ka bago 200 e sa le pele! (Daniele 8:1-8, 20-22) Beibele e bile e utolla ditiragalo tšeo di se tša kago tša bonwa ke mahlo a motho. Go bopša ga legodimo le lefase ke mohlala o mongwe. (Genesi 1:1-27; 2:7, 8) Go bile go na le dipoledišano tšeo di ilego tša direga legodimong tše bjalo ka tšeo di begilwego ka pukung ya Jobo.—Jobo 1:6-12; 2:1-6.

Ge ditiragalo tše bjalo di be di sa utollwa ka go lebanya ke Modimo go mongwadi, Modimo o be a di tsebiša motho yo mongwe e le gore e ka ba karolo ya histori e fetišetšwago ka molomo goba e ngwadilwego, e fetišetšwago go tloga molokong o mongwe go ya go o mongwe go fihlela e e-ba karolo ya pego ya Beibele. (Bona lepokisi go letlakala 7.) Boemong le ge e le bofe, re ka kgonthišega gore Jehofa e be e le Mothopo wa tsebišo e bjalo ka moka le gore o be a hlahla bangwadi e le gore dipego tša bona di se ke tša šilafatšwa ke go se nepagale, go feteletšwa goba nonwane. Petro o ngwadile mabapi le boporofeta gore: “Batho . . . ba Modimo ba boletše bà išwa ke Môya o mokxêthwa.”b—2 Petro 1:21.

Go Nyakega Boiteko bjo Bogolo

Gaešita le ge bangwadi ba Beibele ba be “bà išwa ke Môya o mokxêthwa,” ba be ba sa dutše ba swanelwa ke go nagana ka kelohloko. Ka mohlala, Salomo o ile “a akanya, a tsomišiša ditaba, gomme a dira diema tše dintši, . . . a tsomeša gore a bone mantšu a rategago, a ba a ngwala mantšu ao a therešo ka go loka.”—Mmoledi 12:9, 10, PK.

Bangwadi ba bangwe ba Beibele ba ile ba swanelwa ke go dira nyakišišo e tseneletšego gore ba ngwale pego ya bona. Ka mohlala, Luka o ngwadile mabapi le pego ya Ebangedi ya gagwe gore: ‘Ke latišišitše tšohle ka go šetša go tloga setlogong, ka di ngwala ka go hlatlamana ga tšona.’ Go ba gona, moya wa Modimo o ile wa šegofatša maiteko a Luka go se na pelaelo ya gore o be o mo tutueletša go hwetša mengwalo e botegago ya histori le go boledišana le dihlatse tše di ka botwago tše di bonego ka mahlo tše bjalo ka barutiwa bao ba bego ba phela, mohlomongwe le mmago Jesu e lego Maria. Ka gona moya wa Modimo o be o tla hlahla Luka gore a ngwale tsebišo ka mo go nepagetšego.—Luka 1:1-4, PK.

Go fapana le Ebangedi ya Luka, ya Johane e be e le pego ya hlatse e bonego ka mahlo e ngwadilwego nywageng e ka bago 65 ka morago ga ge Jesu a hwile. Ga go na pelaelo gore moya wa Jehofa o ile wa loutša kgopolo ya Johane e le gore e se ke ya fokodišwa ke nako e fetago. Se se be se tla dumelelana le seo Jesu a bego a se holofeditše balatedi ba gagwe ge a be a re: “Yêna Molwedi Môya-mokxêthwa, wo Tate a tl’o xo o roma ka Leina la-ka, o tlo Le ruta tšohle, o tlo Le xakolla tšohle tše ke Le boditšexo tšôna.”—Johane 14:26.

Mabakeng a mangwe bangwadi ba Beibele ba ile ba akaretša dikgoboketšo tšeo di tšwago mengwalong ya dihlatse tše di bonego ka mahlo tša bangwadi ba pele ba histori, bao e sego bohle ba bona bao ba bego ba buduletšwe. Jeremia o kgobokeditše karolo e kgolo ya Dikxoši tša Pele le tša Bobedi ka tsela ye. (2 Dikxoši 1:18) Esera o tsopotše go bonyenyane methopo e 14 e sa budulelwago bakeng sa go kgoboketša taba ya Dikoronika tša Pele le tša Bobedi, go akaretša le “ditaba tša kxalê tša kxoši Dafida” le “[puku] ya dikxoši tša Juda le tša Isiraele.” (1 Koronika 27:24; 2 Koronika 16:11) Moše o bile o tsopotše “lengwalong la dintwa tša Morêna”—yeo go bonalago e le pego e ka botwago ya dintwa tša batho ba Modimo.—Numeri 21:14, 15.

Mabakeng a bjalo moya o mokgethwa o be o akaretšwa kudu, o tutueletša bangwadi ba Beibele go kgetha feela taba e ka botwago yeo ka morago e ilego ya ba karolo ya pego e buduletšwego ya Beibele.

Keletšo e Šomago—E tšwa go Mang?

Beibele e hupere lehumo la keletšo e šomago e theilwego dikgopolong tše di tseneletšego tša motho ka noši. Ka mohlala Salomo o ngwadile gore: “Motho xa a na se se kaone; a a jê, a a nwê; pelo ya xaxwe e thabêlê botse mo ’tirong tša xaxwe. Fêla le tšôna tšeo ke bone di e-tšwa ’atleng sa Modimo [wa therešo, NW].” (Mmoledi 2:24) Paulo o boletše gore keletšo ya gagwe mabapi le lenyalo e be e le “ka mo [a] gopolago,” gaešita le ge a okeditše ka gore: “Kè ithsema xore ke na le Môya wa Modimo.” (1 Ba-Korinthe 7:25, 39, 40, bapiša le PK.) Ka kgonthe Paulo o be a e-na le moya wa Modimo ka gobane go etša ge moapostola Petro a boletše, seo Paulo a se ngwadilego e bile “ka bohlale byo a bo filwexo.” (2 Petro 3:15, 16, mongwalo o sekamego ke wa rena.) Ka go rialo, o be a nea kgopolo ya gagwe a hlahlwa ke moya wa Modimo.

Ge bangwadi ba Beibele ba be ba bolela dikgopolo tše bjalo tša motho ka noši, ba be ba dira bjalo ka thekgo ya thuto le tirišo ya mangwalo ao ba bego ba e-na le ona. Re ka kgonthišega gore mengwalo ya bona e be e dumelelana le kgopolo ya Modimo. Seo ba se begilego e ile ya ba karolo ya Lentšu la Modimo.

Go ba gona, Beibele e na le dipolelo tša ba bangwe bao tsela ya bona ya go nagana e bego e fošagetše. (Bapiša Jobo 15:15 le 42:7.) E bile e na le dipolelo tše sego kae tše di hlalosago maikwelo a manyami a bahlanka ba Modimo gaešita le ge tše bjalo di be di sa hlalose taba ka mo go feletšego.c Gaešita le ge a be a bolela dipolelo tše bjalo tša motho ka noši, mongwadi o be a sa dutše a hlahlwa ke moya wa Modimo gore a ngwale pego e nepagetšego yeo e thušitšego go hlaola le go pepentšha kgopolo e fošagetšego. Go feta moo, boemong bjo bongwe le bjo bongwe taba e dikologilego e hlalosetša mmadi le ge e le ofe yo a nago le tlhaologanyo ge e ba kgopolo ya mongwadi e le e nepagetšego.

Ka boripana, re ka kgodišega gore Beibele ka moka ke molaetša wa Modimo. Ka kgonthe, Jehofa o ile a kgonthišetša gore selo se sengwe le se sengwe seo e se huperego se swanela morero wa gagwe le gore se nea bao ba kganyogago go mo hlankela thuto e nyakegago.—Ba-Roma 15:4.

Bangwadi Bao e Lego Batho —Ka Baka La’ng?

Go diriša ga Jehofa batho gore ba ngwale Beibele go bontšha bohlale bja gagwe bjo bogolo. Nagana ka se: Ge nkabe Modimo a ile a abela barongwa modiro wo, na Beibele e be e ka ba e kgahlišago ka mo go swanago? Ke therešo gore re be re tla thabela go bala ka dika tša Modimo le ditirišano tša gagwe go ya ka pono ya morongwa. Eupša ge go be go tloga go se na karolo ya motho, mo gongwe re be re tla ba le bothata bja go kwešiša molaetša wa Beibele.

Ka mohlala: Beibele e be e tla bega feela gore Kgoši Dafida o ile a dira bootswa le go bolaya le gore o ile a itshola ka morago ga moo. Eupša go kaone gakaakang go kwa mantšu a Dafida ka noši ge a be a hlalosa manyami a kokobetšago pelo ka baka la tsela ya gagwe gomme a kgopela tshwarelo ya Jehofa! O ngwadile gore: “Sebe sa-ka xa se tloxe pele xa-ka. . . . Pelo xe e rôbêxile, xe e setlêxile, Wene Modimo O ka se e nyatše.” (Psalme 51:3, 17) Ka gona, Beibele e na le borutho, dilo tše di fapa-fapanego le go kgahliša tšeo karolo ya motho e e neago tšona.

Ee, Jehofa o kgethile tsela e phalago tšohle ya go re nea Lentšu la gagwe. Gaešita le ge go dirišitšwe batho bao ba nago le mafokodi le diphošo, ba be ba išwa ke moya o mokgethwa e le gore go se be le phošo mengwalong ya bona. Ka go rialo, Beibele ke ya bohlokwa bjo bo phagamego kudu. Keletšo ya yona e tiile gomme diporofeto tša yona mabapi le Paradeise ya nakong e tlago lefaseng ke tšeo di ka holofelwago.—Psalme 119:105; 2 Petro 3:13.

Ke ka baka la’ng o sa dire go bala karolo ya Lentšu la Modimo letšatši le lengwe le le lengwe mokgwa? Petro o ngwadile gore: “Le llêlê lebese la Lentšu lé le sa forexo, xore Le xolê ka lôna Le fihlêlê phološô.” (1 Petro 2:2) Ka ge le buduletšwe ke Modimo, o tla hwetša Lengwalo lohle e le le “[holago] ka xo ruta, le ka xo kxodiša le xo sokolla, le ka xo iša tokong, xore motho wa Modimo e bê yo boló-ka-tlalô, a kxonišwê xo dira medirô e botse ka moka.”—2 Timotheo 3:16, 17.

[Mengwalo ya tlase]

[Box page 7]

Moše O Hweditše Kae Tsebišo Ya Gagwe?

MOŠE o ngwadile puku ya Beibele ya Genesi, eupša se sengwe le se sengwe seo a se begilego se diregile nako e telele pele ga ge a belegwa. Ka gona, o hweditše kae tsebišo e bjalo? A ka ba a e utolletšwe ka go lebanya ke Modimo, goba tsebo ya tše dingwe tša ditiragalo e ka ba e ile ya fetišetšwa ka molomo go tloga molokong o mongwe go ya go o mongwe. Ka ge batho ba be ba phela nako e telele kudu mehleng ya pele, bogolo bja seo Moše a se ngwadilego go Genesi bo ka ba bo ile bja fetišwa go tloga go Adama go ya go Moše ka dikgokaganyi tše hlano feela tša batho—e lego Methusala, Seme, Isaka, Lefi le Arama.

Go oketša moo, Moše a ka ba a ile a hlahloba dipego tše di ngwadilwego. Tabeng ye, ke mo go lemogegago gore Moše o diriša leboelela polelwana “še histori ya” (NW) pele ga ge a bolela leina la motho yo go tla bolelwago ka yena. (Genesi 6:9; 10:1; 11:10, 27; 25:12, 19; 36:1, 9; 37:2) Diithuti tše dingwe di bolela gore lentšu la Sehebere le le fetoletšwego mo e le “histori” e lego toh·le·dhohthʹ, le šupa pego ya histori e ngwadilwego yeo e šetšego e le gona yeo Moše a e dirišitšego e le mothopo wa mongwalo wa gagwe. Go ba gona, se se ka se ke sa bolelwa ka go kgonthišetšwa.

E ka ba e le gore tsebišo yeo e lego ka pukung ya Genesi e hweditšwe ka mekgwa ka moka e meraro yeo e lego ka mo godimo—e nngwe e hweditšwe ka kutollo e lebanyago, e nngwe ka go fetišetšwa ka molomo gomme e nngwe e hweditšwe dipegong tše di ngwadilwego. Ntlha ya bohlokwa ke gore moya wa Jehofa o ile wa budulela Moše. Ka gona, seo a se ngwadilego se lebelelwa ka tshwanelo e le lentšu la Modimo.

[Seswantšho go letlakala 4]

Modimo o ile a budulela batho ka ditsela tše di fapa-fapanego gore ba ngwale Beibele

[Comment on page 6]

(Se tšwela pele go letlakala 8)