Bagoeledi ba Mmušo ba Bega
Lerato le Kopanya Malapa
BOTEE bja lapa bo ka fihlelelwa ge feela lenyalo le theilwe leratong leo le hlahlwago ke go se be le boithati. Lerato le bjalo le tšwa go Jehofa, e lego Modimo wa lerato, ka gona ke seenywa sa moya wa Modimo. (Ba-Galatia 5:22, 23; 1 Johane 4:8) Diphihlelo tše di latelago di bontšha kamoo lerato le le theilwego tsebong ya Beibele le ilego la kopanya malapa ka gona.
Hong Kong
◻ Kua Hong Kong mmulamadibogo o ile a thoma thuto ya Beibele ya legae le mosadi wa lapa le barwedi ba gagwe ba babedi. Monna o ile a bolela ka go kgomega gore mo gongwe o be a itsenya sehlopheng sa borabele sa bodumedi. Mmuladibogo o ile a eletša mosadi gore a laletše monna wa gagwe gore a tle a kopanele thutong gomme a ikwele, e lego seo monna a ilego a se dira. Ka nako yeo, mosadi o ile a thoma go ba gona dibokeng, eupja o be a e-na le bothata bja go tlwaetša bana ba gagwe. O be a kgalemela o mogolo ka mehla gomme a pepetletša o monyenyane. Ka gona go ile gwa tsebega gore yena le monna wa gagwe ba na le mathata. Diphapang tša bona gantši di be di feleletša ka bošoro, gomme ka dinako tše ntši maphodisa a be a swanelwa ke go bitšwa. Mmulamadibogo o ile a diriša Lentšu le matla la Modimo go ba ruta kamoo ba ka bontšhago lerato la Modimo lenyalong la bona. Kapejana ditsela le mekgwa ya kgale di ile tša thoma go fetoga. Bobedi bja bona ba ile ba ba gona dibokeng ka mehla, gomme ka lapeng gwa foka moya wa lethabo. Monna o ile a kgaotša go kgoga gomme mo nakong ye o ngwadišitše Sekolong sa Bodiredi sa Pušo ya Legodimo. Mosadi bjale ke mogoeledi yo a kolobeditšwego.
Botee bja lapa bo ile bja fihlelelwa ka go bontšha lerato, e lego seenywa sa moya wa Modimo.
Brithania
◻ Phihlelo e tšwago Brithania e bontšha kamoo Jehofa a šegofatšago monna yo a bontšhago lerato, go se fele pelo le kgotlelelo ge a dirišana le mosadi wa gagwe. Nakong ya ge monna a tsena therešong nywageng e 12 e fetilego, kganetšo e šoro ya mosadi wa gagwe e ile ya iša mosadi wa gagwe bokgoleng bja go hwetša tlhalo ya molao. Lega go le bjalo, monna o ile a tšwela pele a mmontšha botho, a kgonthiša gore o newa tlhokomelo ya tša ditšhelete, a mo direla mediro e menyenyane ya lapa ka mehla. Ka morago ga nywaga e mene go sa šetšwe kganetšo ya mosadi ya pele, o ile a dira phetho ya go mmotša therešo gape. Se se ilego sa makatša monna kudu ke gore ge a be a šišinya gore kgaetšedi a ithute le yena Beibele, mosadi o ile a e amogela. Mafelelong o ile a emela therešo gomme a kolobetšwa. Monna le ka mohla o be a se a ka a lahlegelwa ke lerato la gagwe go yena, gomme ge a be a ipontšhitše gore o amogetše therešo e le ya gagwe, monna o ile a mo kgopela gore ba nyalane gape. O be a maketše, le ka mohla ga a ka a mo letela gore a ka dire seo ka baka la kgopolo ya gagwe e mpe ya nakong e fetilego. Gona bjale e šetše e le nywaga e ka bago seswai ba nyalane gape, gomme bobedi bja bona ba tšwela pele gabotse therešong.
Pacific Borwa
◻ Nywageng e fetago 20 e fetilego, lesogana le le tšwago sehlakahlakeng sa Tuvalu kua Pacific Borwa le ile la ngwalela Mokgatlo wa Watch Tower le kgopela dipuku. Go be go se na Dihlatse sehlakahlakeng seo ka nako yeo. Ka gona, le ile la ipalela dipuku gomme la lemoga therešo. Lega go le bjalo, mosadi wa lona o ile a ganetša tumelo ya lona e mpsha o šoro, ka gona la e tlogela.
Morago bjale, ge dipuku di thoma go hwetšagala ka se-Tuvalu, mosadi o ile a ikhweletša dipuku tše dingwe gomme a kgona go ipalela ka noši. Bjale o ile a lemoga therešo gomme a belaela go monna wa gagwe ka gore: “Nywageng ye ka moka o be o dutše o e-na le seetša eupja ga se wa ka wa se lebelela e le therešo. Ke ka baka la’ng o sa ka wa ntlhalosetša lebaka leo ka lona o bego o dumela gore Dihlatse di nepile?” Mo nakong ye banyalani ba ba kopanego therešong ya Beibele, ba kopanela le Dihlatse.
Ge barwedi ba bona ba babedi bao ba bego ba tsena sekolo kua Fiji ba boa gae, batswadi ba ile ba ba tsebiša phetho ya bona ya go ba Dihlatse tša Jehofa. Ba ile ba kgothaletša banenyana gore ba ba tlatše thutong ya Beibele, gomme ba hwetša gore banenyana ba be ba šetše ba e-ba gona dibokeng kua Fiji. Lapa le ile la amogela therešo gotee ka lethabo, gomme tate, mma gotee le o mongwe wa barwedi ba fetogile bagoeledi ba Mmušo.
Ke mo go thabišago gakaakang go bona kamoo therešo ya Beibele le lerato di kopanyago malapa ka gona lefaseng ka moka.