Ba Botše Gore o a ba Rata

Ong-Li ke mosadi yo a dulago kua Bulgaria yoo e lego Hlatse ya Jehofa. O be a ithuta Beibele le mosadi yo mongwe yo a bitšwago Zlatka, eupša monna wa Zlatka o be a sa ithute le bona. Ong-Li o re: “Ge re be re ithuta kgaolo yeo e bolelago ka bophelo bja lapa, ke ile ka mo hlalosetša gore go bohlokwa kudu gore re botše balekane ba rena le bana ba rena gore re a ba rata. Zlatka o ile a ntebelela a nyamile, ke moka a mpotša gore le ka mohla ga se a ka a botša monna wa gagwe goba morwedi wa gagwe wa mengwaga e senyane gore o a ba rata!”

Zlatka o re: “Ga ke na bothata bja go ba direla se sengwe le se sengwe seo ba se nyakago, eupša ga ke kgone go ba botša gore ke a ba rata.” O okeditše ka gore: “Mma ga se a ka a mpotša gore o a nthata, le koko ga se a ka a botša mma gore o a mo rata.” Ong-Li o ile a bontšha Zlatka gore Beibele e re botša gore Jehofa o ile a botša Jesu ka go lebanya gore o a mo rata. (Mateo 3:17) O ile a kgothaletša Zlatka gore a rapele Jehofa a mmotše ka taba ye le gore a leke go botša monna wa gagwe le morwedi wa gagwe gore o a ba rata.

Ong-Li o re: “Ka morago ga matšatši a mabedi, Zlatka o ile a mpotša a thabile gore o rapetše Jehofa a mo kgopela gore a mo thuše. Ge monna wa gagwe a boa gae, o ile a mmotša gore thutong ya gagwe ya Beibele o ithutile gore go bohlokwa gore mosadi a hlomphe monna wa gagwe le go mo rata. Ke moka ka morago ga go homolanyana, o ile a botša monna wa gagwe gore o mo rata kudu! Ge morwedi wa gagwe a boa gae, Zlatka o ile a mo gokarela a mmotša gore o a mo rata! Zlatka o ile a re go nna: ‘Ga bjale ke ikwa ke imologile. Mengwaga ye ka moka ke be ke sa kgone go bolela gore ke ikwa bjang, eupša ka ge Jehofa a nthušitše, ga bjale ke kgona go botša ba lapa la ka gore ke a ba rata.’”

Ong-Li o tšwetšwe pele ka gore: “Ka morago ga beke ke ile ka tsebana le monna wa Zlatka, ke moka a re go nna: ‘Batho ba bantši ba mpoditše gore Zlatka ga se a swanela go ithuta Beibele le wena, eupša ke a tseba gore go ithuta Beibele ga gagwe go hotše lapa la rena kudu. Ga bjale re a ipshina e bile re thabile ka mo gae.’”