Go Fela ga Bosenyi Bjale go Kgaufsi!

MATSEKA a nyaka go rarolla bosenyi ka go hlahlobišiša mehlala yeo e utollago basenyi le morero wa bona. Mekgwa le bokgoni bja letseka ke tšeo go bolelwago kudu ka tšona dipukung tše tumilego lefaseng ka bophara. Lege mo gongwe le ka feleletša le atlegile go hwetša sesenyi, ka kakaretšo modiro wa letseka o thoma ka morago ga tiragalo, ka morago ga ge bosenyi bo dirilwe.

Bjalo ka ge go ka bonwa ka koketšego ya bosenyi, ge go swarwa mosenyi o mongwe le o mongwe, ba bangwe ba bantši ba retologela bosenying. Ka gona go nyakega gore go dirwe se sengwe go fediša bosenyi go feta go fo rarolla melato yeo e šetšego e dirilwe. Ke’ng seo se tlago dira gore batho ba kgaotše go ba basenyi?

Bosenyi bo sepedišana le boitshwaro. Ga re na bothata bja go amogela gore polao, go kata le ditiro tše dingwe tše šoro ke tša bosenyi. Eupja go ka thwe’ng ka boradia ge go tlatšwa dipoelo tša motšhelo? Tiro e bjalo le yona ke bosenyi, ka gobane e ganetšana le ditekanyetšo tša boitshwaro tša potego. Go fediša bosenyi ka mo go feletšego go swanetše go bolela go fediša ditiro ka moka tše di ganetšanago le boitshwaro bja motheo.

Ela hloko mehlala e meraro ya Beibele yeo e gatelelago e sego feela se se bakago bosenyi eupja le tsela yeo bo tlago go fedišwa ka yona.

Go Boifa Modimo Malebana le Lehufa

Hle ela hloko mantšu a mopsalme Asafa: “Ke ile ka hufegela baikgantšhi ge ke be ke bona khutšo ya batho ba kgopo.” (Psalme 73:3, NW) Ee, go hufegela katlego ya sesenyi le mohuta wa bophelo bja sona go gokeletša ba bantši go amogela ditsela tše kgopo. Bosenyi bjo bo goketšago thelebišeneng le dikuranteng bo dira gore bosenyi e be bjo bo amogelegago kudu go e na le go hlohleletša lehloyo la go hloya se e lego se sebe.

Lega go le bjalo, mongwadi yo a buduletšwego wa Diema o a kgothatša: “Pelo ya xaxo e se kê ya tsebafêla ba xo dira dibe.” Tutuetšo le kganyogo ya motho ke tšona tšeo di lego modung wa bothata. Tsela e holago kudu ya go di laola ke go aga go boifa go se kgahliše Jehofa Modimo. “Ka kxonthe tše tlaxo di s’e xôna, kholofelo y’axo e ka se kê ya ba lefêla.”—Diema 23:17, 18.

Tumelo Malebana le Megabaru

Seruthwaneng sa 33 C.E. Jesu o be a sepela go phatša motse wa Jeriko. Wo e be e le motse wa gabo Sakeo, yoo mongwadi wa Ebangedi Luka a mo hlalosago e le “letona la ba lekxêthô,” a ba a oketša ka gore e be “e le mohumi.” Selete se se nonnego go dikologa Jeriko e be e le lefelo le legolo la go kgoboketšwa ga lekgetho, gomme bjalo ka ge go bontšhitšwe ke mantšu a Sakeo ka noši, modiro wa gagwe bjalo ka letona la lekgetho o mo neetše dibaka tša go dira boradia. Eupja Sakeo ga se a dula e le moradia.—Luka 19:1-8.

Sakeo o ile a kganyelela pele ga lešaba le le bokanego go dikologa Jesu gomme ka baka la seemo se se kopana sa gagwe a nyaka lefelo leo ge a le go lona a bego a ka bona gabotse ka go namelela mogo. Jesu a mmona gomme a mmotša gore a fologele fase, ka gobane O be a tla dula le yena ge a sa dutše a le Jeriko. Ka morago, mantšu a Sakeo a ile a kwatša kgopolo e fetogilego: “Maruô a-ka ke a arolêla bahloki ka boxare; xomme xe ke forile motho, ke mo lefêla xa-nê.” Go bušetša tšhelete ye e hweditšwego ka bofora go be go tla akaretša tshenyagalelo e kgolo. Ka go holofetša go dira se, Sakeo o ile a kwatša tumelo ya gagwe go Jesu. Ee, pono ya gagwe e fetogilego e tlišitše mafelelo a kgonthe, go bušetša se se bego se tšerwe ka boradia gotee le go bušetša se sengwe sa theko e fetago yeo ka makga a mararo, e lego se se dirago pušetšo ye e mennwego gane. Ka gona Sakeo o ile a lokiša phošo ye a e dirilego a ba a dira se se fetago seo, a bontšha go botega ga tsela ya gagwe e fetogilego ya go phela.—2 Ba-Korinthe 7:11.

Batho ba Bohlokwa go Feta Maruo

Mmušiši wa Roma Pilato o ile a bolela ka Jesu Kriste yo a beilwego molato gore: “Nna xa ke hwetše molato xo motho yo!” (Luka 23:4) Jesu go e na le go diriša mokgwa wa bosenyi wa go hwetša maruo bodireding bja gagwe ka moka bja lefaseng, o bontšhitše go kgomega ka tsela e lerato ka batho. “Xe a bôna mašaba a batho a ba šôkêlwa; ka xobane ba be ba lapile, bà lahlexile wa dinku tše di se naxo modiši. A bolêla le barutiwa ba xaxwe a re: Punô ké e ntši; ’me badiri xa ba nene. Ké xôna kgopêlang Mong wa punô a romêlê badiri punong ya xaxwe.” (Mateo 9:36-38) Go molaleng gore Jesu o be a bea batho pele ga maruo, gaešita le pele ga boiketlo le dikgahlego tša gagwe. Re bona se gape boikemišetšong bja gagwe bja go ikgafa ge a hlokomela barutiwa le mašaba ao a bego a mo tsoma bakeng sa thuto le thušo. (Mateo 8:20; 14:13-16) Go se, Jesu o re tlogeletše mohlala gore re o latele.—1 Petro 2:21.

Na go a kgonega bakeng sa batho lehono go latela mohlala woo, go swara batho ba gabo bona bjalo ka ba e lego ba bohlokwa kudu go feta dilo tše di bonagalago? Re ka araba ka go dumela. Ela hloko Dihlatse tša Jehofa, bao bjale e lego ba fetago dimilione tše tharo le kotara ka palo. Ba nyaka go ba le kgopolo ya Kriste le go bontšha se ka tsela ya kgonthe. Ba katanela ka mehla go fediša dipelong tša bona dikganyogo tše di lebišago ba bangwe ba bantši bosenying. Pele ga ge ba e ba Dihlatse, ge ba be ba dutše ba ithuta Beibele le go tšweletša lerato la go rata Modimo, se se ile sa kgoma ba bangwe ba bona bao e bego e le disenyi; se se tutueditše ba bantšinyana ba bona go lokiša ditiro tša bona tša bosenyi bjo ba bo dirilego nakong e fetilego. Aowa, ba bjalo ga se ba dira se bakeng sa botumo eupja ba dirile bjalo e le gore ba be le ditirišano tša khutšo le Jehofa Modimo gomme ka go rialo ba holwa ke botho bjo bo sa swanelago bjalo ka ge bo bontšhitšwe ka sehlabelo sa topollo sa Jesu Kriste.—1 Ba-Korinthe 2:16; 6:11; 2 Ba-Korinthe 5:18-20.

Ka baka la lerato bakeng sa magagabo bona, Bakriste ba bjalo ba diriša nako ba etela batho ba bangwe le go hlalosa kamoo malapa a bjalo a ka lebelelago pele go phela ka tlase ga maemo a Paradeise tlase ga Mmušo wa Modimo. Beke e nngwe le e nngwe Dihlatse tša Jehofa di swara diboka tša ka mehla Diholong tša bona tša Mmušo. Lehodu leo le ipobotšego le ile la amogela taletšo ya gore le be gona bakeng sa go bona kamoo diboka di lego ka gona. Le a anega: “Go bolela mantšu a sego kae, ke ile ka makala kudu. Go be go sa tene le ganyenyane goba go leša bodutu go etša ge ke be ke letetše. Borutho le lerato, tše di bonagetšego gakaakaa, ruri e be e tloga e le tša kgonthe. Tebogo yeo Dihlatse ka moka di bonagetšego di e-na le yona bakeng sa dilo tša moya e bile ye e lemogegago.” O ile a makala kudu mo a ilego a tšwela pele go kopanela, gomme se se mo thušitše go fetoga. Go sa šetšwe ge e ba o kile wa dira bosenyi goba go se bjalo, ge o kopanela le bahlanka ba Modimo, le wena o tla ba le kgahlego ya kgonthe e swanago ya go kgahlegela batho go e na le maruo.—Mateo 22:39.

Na Bosenyi bo Šetše bo Fedišitšwe?

Ge e ba batho ba se sa hlwa ba itshwara bjalo ka disenyi, na se se bolela gore ba phethagetše? Le gatee? Dihlatse tša Jehofa, go etša motho lege e le ofe, ba tlaišwa ke sebe seo ba se abetšego go motswadi wa rena wa pele wa motho, Adama. (Ba-Roma 5:12; 1 Johane 1:8) Eupja bjale ke batee go direleng Modimo, bjalo ka ge go bontšhitšwe modirong wa bona wa lefase ka bophara wa go bolela le go ruta. Se se hlatsela ka matla phethagatšo ya boporofeta bja Jesaya: “Bofelong bya mabaka thaba ya Ntlo ya Morêna e tlo ba e thekxilwe xodimo xa dithaba, . . . ’me dithšaba tšohle di tlo thšoloxêla mo xo yôna” (Jesaya 2:2) Ka kgonthe, dimilione di kgeregela borapeding bjo bo phagamego bja Jehofa, di nyaka go rutwa ka ditsela tša gagwe. O ka ba o mongwe wa bao ba holwago ke go kopanela le batho bao ba phemago bosenyi.

Ditebelelo tša go Fedišwa ga Bosenyi

Ditiro tša mehleng ya rena tše di oketšegilego tša bosenyi ge e le gabotse di bolelela pele go batamela ga go tsena gare ga Modimo gore a tloše ba babe ka moka, go akaretša le ba ba dirago bosenyi. “Xobane ba babe ba tlo lôba; . . . Xo se xokae e mobe ó tlo ba a ile; o tlo boxâ lešope, yêna á se xôna.” (Psalme 37:9, 10) Ruri go fedišwa ga bosenyi bjale go kgaufsi, gobane re batamela kgaufsi le nako ya ge mosenyi wa pele, Sathane Diabolo, a tla tlengwa gomme a lahlelwe sekoting. (Kutollo 20:1-3) E swanetše go ba mo go kgahlišago gaaakang go tseba gore go boifa bosenyi le bohloko bjo bo kwewago ke ba ba hlaselwago ke bjona kapejana e tla ba dilo tša nako e fetilego!

Eupja, go thwe’ng ka dimilione tša batho bao ka tsogo ba tlago go bušetšwa bophelong lefaseng? (Ditiro 24:15) Ge ba tšwetša pele mekgwa le ditsela tše ba bilego le tšona pele ga lehu la bona, ba tla tsoša lephoto le lefsa la bosenyi? Ga go nyakege gore re boife seo. Jesu o holofeditše lehodu tsogo, ka go re: “Ruri ke a go botša lehono, O tla ba le nna Paradeiseng.” (Luka 23:43, NW) Se ruri se bontšha gore bao ba tsošitšwego ba swanetše go dira diphetogo; go sego bjalo lefase le lefsa le be le ka se be paradeise.

Go fo swana lege disenyi tše šoro di swanetše go dira phetogo pele ba ka aga setšhabeng ntle le go baka mathata, tlase ga Mmušo wa Modimo, lenaneo le nabilego la thuto le tla thuša babušwa gore e be ba latelago molao. (Kutollo 20:12, 13) Ka mohola wo o lego molaleng wa go ba gare ba badudi ba Paradeise bao ba kwago melao ya Modimo, batho bao ba tsošitšwego ba tla thabela maemo a tša boiphedišo ao a sepedišwago ka tsela ya tshwanelo. (Jesaya 65:21-23) Go tla ba le babuši ba swanetšego ba go loka, gomme mosenyi lege e le ofe yo a phegelelago o tla fedišwa. (Jesaya 32:1; 65:20) Ka gona go na le mabaka a mantši a go holofela gore mafelelong bosenyi bo tla fedišwa.

Lege re sa dutše re phela lefaseng la bosenyi, o ka bontšha go bota Jehofa ka kgodišego, yo a holofetšago go putsa bahlanka ba gagwe ba botegago ka bophelo bjo bo phethagetšego Paradeiseng. Dira bjalo gona bjale ka go diriša ka mo go holago thulaganyo ya thuto e sa lefelelwego ya Beibele ya legae ye e neelwago ke Dihlatse tša Jehofa. (Johane 17:3) Nakong e latelago ge o kopana le bona, ke ka baka la’ng o sa botšiše bakeng sa ditaba tše oketšegilego? Goba o ka ngwalela atereseng ya kgaufsi le wena bjalo ka ge di lokeleditšwe letlakaleng 2 la makasine wo. Ruri ke mo go swanetšego go dira boiteko, ka gobane bofelo bja bosenyi bjale bo kgaufsi!

[Seswantšho go letlakala 5]

Tumelo ya Sakeo e mo tutueleditše go bušetša tše a di hweditšego ka boradia

[Seswantšho go letlakala 7]

Lenaneo la thuto le tla ruta balata ba Mmušo wa Modimo gore ba latele molao