Bophelo le Bodiredi bja Jesu

Jesu o Ruta Kua Jeriko

KAPEJANA Jesu le lešaba leo le sepelago le yena ba fihla Jeriko, e lego motse wo e ka bago leeto la letšatši go tloga Jerusalema. Jeriko go bonagala e le motse o lego gabedi, moo motse wa kgale wa ba-Juda o lego mo e ka bago khilomithara le seripa go tloga motseng o mofsa wa Roma. Ge lešaba le e-tšwa motseng wa kgale gomme le batamela o mofsa, bakgopedi ba babedi ba difofu ba kwa lešata le legolo. O mongwe wa bona o bitšwa Baratimeo.

Ka go lemoga gore ke Jesu yo a fetago fao, Baratimeo le mogwera’gwe ba thoma go goeletša: “Re xauxêlê, Morêna Morwa wa Dafida!” Ge lešaba le ba botša ka bogale gore ba homole, ba goeletša ka go hlaboša mantšu le go feta: “Re xauxêlê, Morêna Morwa wa Dafida!”

Jesu ge a e-kwa khuduego ye, o a ema. O kgopela bao a nago le bona gore ba bitše bao ba goeletšago. Ba ba ya go bakgopedi ba difofu gomme ba re go o mongwe wa bona: “Beta pelo! Tsoxa o êmê. Ó a Xo bitša.” A tletše lethabo, monna wa sefofu o lahla kobo ya gagwe, o ema ka maoto gomme o ya go Jesu.

Jesu o botšiša banna ba babedi ka gore, “Le rata xe nka Le dirêla’ng?”

Ba a kgopela: “Morêna, a mahlô a rena a budollwê!”

Jesu ka go ba šokelwa o kgwatha mahlo a bona. Go ya ka pego ya Mareka, Jesu a re go e mongwe wa bona: “Sepela! Tumêlô ya xaxo e xo phološitše.” Ka pela-pela bakgopedi ba difofu ba a bona, gomme ka ntle le pelaelo bobedi bja bona ba thoma go tumiša Modimo. Ge batho bohle ba bona seo se diregilego, le bona ba reta Modimo. Ka ntle le tika-tiko, Baratimeo le mogwera’gwe ba thoma go latela Jesu.

Ge Jesu a dutše a phatša Jeriko, mašaba ke a magolo. O mongwe le o mongwe o rata go bona motho yo a fodišitšego banna ba difofu. Batho ba pitlagana go ya go Jesu ba e-tšwa mahlakoreng ohle, ka baka leo ba bangwe ga ba kgone le go ka mmona. Gare ga ba go na le Sakeo, letona la balekgetho kua Jeriko le tikologong. Ke yo mokopana kudu go ka bona se se diregago.

Ka gona Sakeo o kitimela pele gomme o namela sehlare sa mogo mo tseleng ye Jesu a e tšeago. Go tšwa mo a lego gona, o kgona go bona selo se sengwe le se sengwe gabotse. Ge lešaba le dutše le batamela, Jesu o bitša a lebeletše godimo sehlareng: “Sakeo, akxofa O foloxê; xobane lehono ke swanetše xo dula ngwakong wa xaxo.”

Sakeo o fologa a thabile gomme o kitimela gae gore a lokiše dilo bakeng sa moeng wa gagwe yo a hlomphegago. Eupja ge batho ba bona se se diregago, bohle ba thoma go ngongorega. Ba bone e le mo go sego gwa swanela gore Jesu e be moeng wa motho yo bjalo. Lebaka ke gore Sakeo o bile mohumi ka go hwetša tšhelete ka boradia modirong wa gagwe wa go ntšhiša lekgetho.

Batho ba bantši ba latela, gomme ge Jesu a tsena ka ngwakong wa Sakeo, ba belaela ka go re: “Ó xoroxetše xa monna wa mo-dira-dibe.” Lega go le bjalo Jesu o bona kgonagalo ya tshokologo go Sakeo. Jesu ga a nyamišwe ke ge Sakeo a ema gomme a tsebatša gore: “Morêna O k’o bônê; Maruo a-ka ke a arolêla bahloki ka boxare; xomme xe ke forile motho, ke mo lefêla xa-nê.”

Sakeo o bontšha gore tshokologo ya gagwe ke ya kgonthe ka go neela seripa sa dilo tša gagwe go badiidi le ka go diriša seripa se sengwe go bušetša bao a ba hlalefeditšego. Go molaleng gore a ka bala go tšwa dipegong tša lekgetho gore ge e le gabotse ke tšhelete e kaaka’ng ye a e kolotago batho ba. Ka gona o ena gore o tla ba bušetša ka makga a mane, ka go dumelelana le molao wa Modimo wo o rego: ‘Ge motho a ka utswa nku a lefe ka dihuswane tše nne.’

Jesu o thabišwa ke tsela yeo Sakeo a holofetšago go aba dilo tša gagwe ka yona, ka gobane O re: “Lehono ngwakô wó o tletšwe ke phološô, xobane le yêna ke ngwana wa Aborahama. Xobane Morwa-motho ó tlile xo nyaka le xo phološa se se timetšexo.”

Pejana Jesu o ile a swantšha boemo bja ‘se se timetšego’ ka taba ya morwa wa lehlaswa. Bjale re na le mohlala wa kgonthe wa yo a bego a timetše gomme a hwetšwa. Gaešita lege baetapele ba bodumedi le balatedi ba bona ba ngongorega le go belaela ka go hlokomela ga Jesu batho ba swanago le Sakeo, Jesu o tšwela pele a tsoma le go phološa bana ba timetšego ba Aborahama. Mateo 20:29-34, Mareka 10:46-52; Luka 18:35–19:10; Ekisodo 21:37 Ek 22:1, NW.

◆ Ke kae moo mo gongwe Jesu a kopanago le bakgopedi ba difofu, gomme ke’ng seo a ba direlago sona?

◆ Sakeo ke mang, gomme ke ka baka la’ng a namela sehlare?

◆ Sakeo o bontšha bjang tshokologo ya gagwe?

◆ Ke thuto efe ye re ka ithutago yona go tšwa go tsela yeo Jesu a swarago Sakeo ka yona?