Na o a Swanelega go ka Hlankela?

“Go ba ga rena ba ba swanelegago ka mo go lekanego go tšwa go Modimo.”​—2 BA-KORINTHE 3:​5, “NW.”

1. Phuthego ya Bokriste ga e amogele batho ba mohuta ofe?

JEHOFA MODIMO le Jesu Kriste ke badiri. Jesu o itše: “Tate ó sa dira le byalo; ’me le Nna ke a dira.” (Johane 5:​17) Modimo ga a amogele batho bao ba ganago go dira; e bile ga a amogele bao ba nyakago boikarabelo e le gore ba buše ba bangwe. Phuthego ya Bokriste ga e nyake batho bao ba tšwafago goba bao ka boithati ba ratago maemo.​—Mateo 20:​25-27; 2 Ba-Thesalonika 3:10.

2. Ke ka baka la’ng ge mo nakong ye go e-na le go nyakega mo gogolo ga banna bao ba ka rwalago boikarabelo ka phuthegong ya Bokriste?

² Dihlatse tša Jehofa di ‘dira mo gontši modirong wa Morena,’ kudu-kudu mo nakong ye ka ge batho ba bantši ba tšhologela “thabeng” ya borapedi bja therešo. (1 Ba-Korinthe 15:​58; Jesaya 2:​2-4) Go na le go nyakega mo gogolo ga banna bao ba swanelegago moyeng gore ba rwale boikarabelo ka phuthegong. Banna ba ba bjalo, ba sa tutuetšwe ke boithati bja go rata maemo, ba godiša Jehofa, e sego bona ka noši. (Diema 8:​13) Ba a tseba gore Modimo o ba thuša gore ba swanelegele mediro ya ka phuthegong, bjalo ka ge a ‘dira gore batseta ba kgwerano e mpsha ba swanelege ka mo go lekanego.’​—2 Ba-Korinthe 3:​4-6.

3. Boikarabelo bja motheo bja bagolo le bahlanka ba bodiredi ke bofe?

³ Lehono, bjalo ka ge go be go le bjalo gare ga Bakriste ba pele, go kgethwa banna ka moya o mokgethwa le ka dithulaganyo tša phuthego ya Jehofa gore ba dire e le bagolo le bahlanka ba bodiredi. (Ditiro 20:​28; Ba-Filipi 1:1; Tito 1:5) Bagolo ba diša mohlape wa Modimo moyeng, gomme ba o hlokomela ka go o šireletša. Ba thušwa ke bahlanka ba bodiredi, e lego bao mediro ya bona e sa akaretšego bolebeledi bja moya ka go lebanya. (1 Petro 5:2; bapiša le Ditiro 6:​1-6.) Go swana le Morwa wa Modimo yo a tletšego go direla, banna ba ba bjalo bao ba kgethilwego ba kganyoga go direla badumedi-gotee le bona. (Mareka 10:​45) Ge e ba o le monna wa Mokriste, na o na le moya o bjalo?

Ditshwanelego Tšeo ba Swanago ka Tšona

4. Ke kae moo ka mo go kgethegilego re hwetšago lelokelelo la ditshwanelego tša bao ba neilwego boikarabelo ka phuthegong?

⁴ Ditshwanelego tša bao ba neilwego boikarabelo bja phuthego di bolelwa ke moapostola Paulo go 1 Timotheo 3:​1-10, 12, 13 le Tito 1:​5-9. Ge re dutše re naganišiša ka ditshwanelego tše, tšeo tše dingwe tša tšona di dirago go bagolo gotee le go bahlanka ba bodiredi, ga se ra swanela go di lebelela go ya ka ditekanyetšo tša lefase. Go e na le moo, re swanetše go di lebelela go ya kamoo di rulagantšwego ka gona lekgolong la pele la nywaga le kamoo di šomago ka gona gare ga batho ba Jehofa. Go kgona go fihlelela ditekanyetšo tše ga go nyake phethego, ka gore ge go ka ba bjalo go ka se be le motho yo a ka swanelegago. (1 Johane 1:8) Eupja ge e ba o le monna wa Mokriste, gomme mo nakong ye o e-na le mediro yeo o e dirago ka phuthegong goba go se bjalo, ke ka baka la’ng o sa hlahlobe ditshwanelego tša gago ka noši?

5. Go hloka bosodi go bolela’ng?

⁵ A hloke bosodi; a be le tumo e botse go ba ka ntle; a se ke a solega. (1 Timotheo 3:​2, 7, 8, 10; Tito 1:​6, 7) Ka nako yeo ba kgethwago ka yona gaešita le nakong ya ge ba tšwela pele ka modiro, bahlanka ba bodiredi gotee le bagolo ba swanetše go hloka bosodi, ke gore ba se be le seo ba solwago ka sona ka tshwanelo ka baka la boitshwaro bjo bo fošagetšego goba thuto e fošagetšego. Go pharwa melato ya maaka mo go dirwago ke ‘banababo rena ba maaka’ goba batho ba bangwe ga go dire gore a be yo a nago le molato. Tsholo yeo e ka dirago gore monna a tlošwe go hlankeleng phuthego ga se ya swanela go ba e fokolago, le gona e swanetše go hlatselwa ka go dumelelana le melao ya motheo ya Mangwalo. (2 Ba-Korinthe 11:​26; 1 Timotheo 5:​19) Motho yo a kgethwago ka phuthegong “xo rata xe e le monna wa tumô e botse xo ba-ntlê, a se tlo tanywa ke dithsêlê le morêô wa Diabolo.” Ge e ba monna yo a ile a dira phošo e kgolo nakong e fetilego, a ka kgethwa feela ge e ba a ile a tloša kgobogo lege e ka ba efe gomme a itiretše leina le lebotse.

6. Gore a be monna wa mosadi o tee go bolela’ng?

⁶ Monna wa mosadi o tee. (1 Timotheo 3:​2, 12; Tito 1:6) Se ga se bolele gore ke banna ba ba nyetšego feela bao ba ka bago bahlanka ba bodiredi goba bagolo. Lega go le bjalo, ge e ba a nyetše, monna o swanetše go ba le mosadi o tee feela yo a phelago gomme a be yo a mmotegelago. (Ba-Hebere 13:4) Ka mo go fapanego le banna ba bantši bao e bego e se Bakriste lekgolong la pele la nywaga, a ka se tsene lenyalong la segadikane.a

7. (a) Na ke bogolo bja nywaga bjo bo dirago gore motho a swanelege go ba mogolo? (b) Go okamela lapa gabotse go akareletša’ng?

⁷ E be yo a okamelago lapa la gagwe gabotse, a kgone go buša bana. (1 Timotheo 3:​4, 5, 12; Tito 1:6) Ba bangwe mo gongwe ba ka nagana gore bagolo ba swanetše gore bonyenyane ba be le nywaga e 30, eupja Beibele ga e bolele nywaga. Lega go le bjalo, motho o swanetše go itshwara bjalo ka monna yo a godilego ka kgopolo ya moya. Bahlanka ba bodiredi gotee le bagolo ba swanetše gore e be ba ba godilego ka mo go lekanego gore ba ka ba le bana. Ge e-ba a nyetše, monna ga a swanelege ge e-ba a itshwara ka tsela e lokilego ge a le mafelong a mangwe eupja ge a le ka gae e le nkgwete. O swanetše go ba yo a ikhweleditšego tlhompho ka baka la go okamela lapa la gagwe ka go ya ka melao ya motheo ya Beibele, gomme pakane ya gagwe e swanetše gore e be go dira gore setho se sengwe le se sengwe sa lapa se atlege moyeng. Ka tshwanelo, mogolo yo e lego tate o swanetše go ba le bana ba banyenyane bao ba itshwerego gabotse bao “ba dumetšexo.” Ba swanetše go ba ba dira tšwelopele ya go ya boineelong go Modimo goba e le bao ba šetšego ba kolobeditšwe e le Dihlatse tša Jehofa. Monna yo a sa kgonego go aga tumelo baneng ba gagwe go bonala a ka se ke a kgona go dira bjalo go ba bangwe.

8. Pele monna yo a nago le lapa a ka ba mogolo, o swanetše go ithuta go dira’ng?

⁸ Pele monna yo a nago le lapa a ka ba mogolo yo a kgonago go okamela phuthego ka tsela ya moya, o swanetše go ithuta kamoo a ka hlahlago lapa leo e lego la gagwe ka gona. ‘Motho ge a sa kgone go laola ba lapa la gagwe, o tla kgona bjang go babalela phuthego ya Modimo?’ (1 Timotheo 3:5) Ke therešo gore monna a ka ganetšwa ke mosadi yo a sa dumelego. (Mateo 10:​36; Luka 12:​52) Mohlomongwe o mongwe wa bana ba gagwe a ka dira sebe se segolo, gaešita lege ba bangwe ba ka ba ba dira gabotse moyeng. Lega go le bjalo, ge e ba monna a dirile tšohle tšeo di letetšwego, gomme kudu-kudu ge e ba a ile a atlegiša ba bangwe moyeng ka lapeng la gagwe, go gana boetapele bja gagwe bjo bo botse ga setho se setee sa lapa go ka se ke gwa dira gore a se ke a ba yo a sa swanelegego go ba mohlanka wa bodiredi goba mogolo.

9. Mogolo goba mohlanka wa bodiredi o swanetše o ela eng hloko ge e le mabapi le go diriša dino tše di tagago?

⁹ E se ke ya ba letagwa goba yo a nwago beine e ntši. (1 Timotheo 3:​3, 8; Tito 1:7) Mohlanka wa bodiredi goba mogolo ga se a swanela go nwelela dinong tše tagago. Go di lemalela go ka dira gore a palelwe ke go laola kgopolo le maikwelo, gwa lebiša mašateng goba dintweng ka baka la botagwa. Ga se a swanela go ba yo a ‘lemaletšego beine’ goba go tsebja e le yo a nwago ka mehla goba yo a nwago kudu. (Diema 23:​20, 21, 29-35) E ka ba manyami a makaakang ge e ba modiro wa bodiši o be o ka šitišwa ke go nwa ka go se lekanetše! Ge e ba ngwanabo rena ruri a e-nwa, ga se a swanela go dira bjalo ge a e-na le karolo dibokeng, bodireding goba tirelong e nngwe e kgethwa.​—Lefitiko 10:​8-11; Hesekiele 44:21.

10. Ke ka baka la’ng bao ba ratago tšhelete le bao ba nyakago leruo ka go se botege ba sa swanelege go ba bagolo goba bahlanka ba bodiredi?

¹⁰ E se ke ya ba motho yo a ratago tšhelete goba yo a nyakago leruo ka tsela ya go se botege. (1 Timotheo 3:​3, 8; Tito 1:7, bapiša le NW) Batho bao ba ratago tšhelete ba kotsing ya moya, gomme “ba mexabaru” ba ka se ke ba rua Mmušo wa Modimo. Ka gona, banna ba mohuta woo ga se ba swanelwa ke go ba bagolo goba bahlanka ba bodiredi. (1 Ba-Korinthe 6:​9, 10; 1 Timotheo 6:​9, 10) Lentšu la Segerike leo le fetoletšwego e le “wa go se botege” ge e le gabotse le bolela gore “yo a lešago dihlong” gomme lentšu leo le fetoletšwego e le “leruo” le bolela ka poelo ya mohuta lege e ka ba ofe goba mohola. (Ba-Filipi 1:​21; 3:​4-8) Ke therešo gore monna yoo kgopolo ya gagwe e bontšhago gore o tla swara “dinku” tša Modimo ka go se botege ga se a swanelwa ke go ba le boikarabelo ka phuthegong. (Hesekiele 34:​7-10; Ditiro 20:​33-35; Juda 16) Bohlokwa bja go ela hloko ge go dirwa dikgetho bo bonala ge re gopola gore monna ge a kgethilwe mohlomongwe a ka swarišwa tšhelete gomme a lebana le moleko wa go utswa e nngwe ya yona.​—Johane 12:​4-6.

11. Ke ka baka la’ng “modumedi e mofsa” a ka se bolelelwe bakeng sa boikarabelo bja ka phuthegong?

¹¹ E se be modumedi e mofsa; a lekolwe pele. (1 Timotheo 3:​6, 10) Motho yo a sa tšwago go kolobetšwa ga se a hlwa a ipontšha gore o tla hlokomela medirong yeo a e abetšwego ka go botega. Mohlomongwe a ka tla a se ke a kwela balwetši bohloko goba a hloka bohlale bjo bo nyakegago bakeng sa go thuša barapedi-gotee le yena gomme a ka ba a nyatša ba bangwe. Pele a ka bolelelwa e le mohlanka wa bodiredi gomme kudu-kudu e le mogolo, monna o swanetše go “lekolwa pele” gomme a bontšhe gore o na le kahlolo e botse gotee le le go botega. Tekolo ye ga e a beelwa nako, le gona kgolo ya batho ya moya e a feta-fetana. Eupja bagolo ga se ba swanela go bolelela monna o mofsa gore “a se tlo ikxoxomoša a wêla molatong wa Diabolo.” Monna yo o swanetše go bontšha boikokobetšo bjo bo swanago le bja Kriste pele.​—Ba-Filipi 2:​5-8.

Go Bea Tlhokomelo go Bahlanka ba Bodiredi

12. Na ditshwanelego tšeo di lokeleditšwego bakeng sa bahlanka ba bodiredi di swanetše go fihlelelwa ke bona feela?

¹² Dinyakwa tše dingwe di lokeleditšwe bakeng sa bahlanka ba bodiredi. Lega go le bjalo, ge ba bagolo ba be ba sa fihlelele dinyakwa tše bjalo, ba be ba ka se swanelege. Bjalo ka monna wa Mokriste, na o a swanelega dikarolong tše?

13. Go bolela’ng go ba yo a tsepamego?

¹³ A be yo a tsepamego. (1 Timotheo 3:8, NW) Monna yo a swanelegago go ba mohlanka wa bodiredi ga se a swanela go tšeela boikarabelo bja gagwe fase. O swanetše go bontšha seriti seo se dirago gore a hlomphege. Le ge go dira metlae ka dinako tše dingwe go lokile, a ka se ke a ba yo a swanelegago ge e ba ka dinako tšohle a itshwara tše e ka rego ke ra-metlae.

14. (a) Go se be le maleme a mabedi go bolela’ng? (b) Go ba le letswalo le le sekilego go nyaka’ng?

¹⁴ A se be le maleme a mabedi; a be le letswalo le le sekilego. (1 Timotheo 3:​8, 9, Phetolelo ya Kgale) Bahlanka ba bodiredi (le bagolo) ba swanetše go bolela therešo, ba se ke ba rata go seba goba ba ba le bohwirihwiri. Ka ge ba se ba swanela go ba le maleme a mabedi, ga se ba swanela go botša motho o mongwe taba gomme ba bolela e fapanego go o mongwe. (Diema 3:​32; Jakobo 3:​17) Banna ba ba swanetše go ba bathekgi ba bagolo ba go thekga therešo yeo e utolotšwego, “e bê ba ba swerexo thopa ya tumêlô bà na le letswalô le le se naxo molato.” Letswalo la monna yo bjalo le swanetše go mo hlatsela ka pele ga Modimo gore o lokile le gore ga a dire selo lege e ka ba sefe se sebe ka bohwirihwiri goba se se gobošago. (Ba-Roma 9:1; 2 Ba-Korinthe 1:​12; 4:2; 7:1) Ga go motho yo a swanelegago go hlankela mohlape wa Modimo ge e se ge a kgomarela therešo le melao ya motheo ya go boifa Modimo.

Go Lebiša Tlhokomelo Ditshwanelegong Tša Bagolo

15. Ke ditshwanelego dife tšeo bjale di hlahlobišišwago, gomme kudu-kudu di akaretša eng?

¹⁵ Ditshwanelego tše dingwe di dira ka mo go kgethegilego go bagolo gomme kudu-kudu di mabapi le modiro wa bona e le badiši le barutiši. Bjalo ka monna wa Mokriste, na o fihlelela dinyakwa tše?

16. (a) Ke eng seo se nyakegago gore motho a leka-lekane mekgweng? (b) Mogolo a ka kgomarela boitshwaro bjang?

¹⁶ A be yo a leka-lekanego mekgweng; a be le boitshwaro. (1 Timotheo 3:2; Tito 1:8, NW) Mogolo o swanetše go leka-lekana, a se ke a ba lekgoba la mekgwa e mebe. Ge a lebana le meleko, Modimo o tla mo thuša go boloka teka-tekano ge e ba a rapela bjalo ka mopsalme ka gore: “Ditlalêlô di xoletše pelo ya-ka; nnamolêlê dipitlaxanong.” (Psalme 25:​17) Le gona molebeledi o swanetše go rapelela moya wa Modimo gomme a bontšhe dienywa tša wona, go akaretša le boitshwaro. (Luka 11:​13; Ba-Galatia 5:​22, 23) Mogolo, ka go ela hloko dipolelo tša gagwe le ditiro tša gagwe, o tla kgona go phema go ba yo a feteletšego ge a dutše a nea phuthego tlhahlo ya moya.

17. Ke eng seo se akaretšwago tabeng ya go ba le tlhaologanyo?

¹⁷ A be le tlhaologanyo. (1 Timotheo 3:2, Phetolelo ya Kgale) Mogolo o swanetše go ba le tlhaologanyo, bohlale gotee le temogo. O swanetše go ba le morero le bohlale dipolelong le ditirong tša gagwe. Kgopolo ya gagwe ya boikokobetšo le e leka-lekanego e theilwe bohlaleng bja Modimo le thutong e phedišago ya Lentšu la Jehofa, leo a swanetšego go ba moithuti wa paala wa lona.​—Ba-Roma 12:3; Tito 2:1.

18. Go ba le thulaganyo go nyaka gore mogolo a be bjang?

¹⁸ A be le thulaganyo. (1 Timotheo 3:2, NW) Lentšu la Segerika leo le dirišitšwego mo le fetoletšwe e le “tše di beakantšwego gabotse” go 1 Timotheo 2:9 (NW). Ka gona mogolo o swanetše go ba le thulaganyo ya bophelo e beakantšwego gabotse. Ka mohlala, o swanetše go boloka nako. Bakriste ba lekgolong la pele la nywaga mo gongwe ga se ba ka ba leka go boloka dipego ka tsela e nepagetšego kudu, le gona mogolo wa mehleng yeno ga go nyakege gore a be setsebi sa go boloka dipego goba mongwaledi. Bahlanka ba bodiredi ba ka hlokomela dilo tšeo di nyakegago ditabeng tše. Eupja lentšu la Segerika bakeng sa “go ba le thulaganyo” le ka bolela boitshwaro bjo bo botse, gomme monna ruri o be a ka se ke a swanelega go ba mogolo ge e ba a sa bušege goba a hloka thulaganyo​—1 Ba-Thesalonika 5:​14; 2 Ba-Thesalonika 3:​6-12; Tito 1:10.

19. Ka ge e le yo a amogelago baeng, mogolo o swanetše go dira’ng?

¹⁹ A be yo a amogelago baeng. (1 Timotheo 3:2; Tito 1:8) Mogolo ke motho yo a ‘amogelago baeng.’ (Ba-Roma 12:​13; Ba-Hebere 13:2) Lentšu la Segerika bakeng sa “go amogela baeng” ge e le gabotse le bolela gore “yo a ratago batho ba šele.” Ka gona, mogolo yo a amogelago baeng o amogela ba bafsa dibokeng tša Bokriste, gomme o bontšha go thabela bahloki ka tsela e swanago le yeo a thabelago bahumi ka yona. O amogela basepedi bao ba sepelago ka baka la dikgahlego tša Bokriste gomme ge ba tloga o ba laela “ka mo xo swanetšexo ba Modimo.” (3 Johane 5-8) Ka kgonthe, mogolo o bontšha go amogela baeng kudu-kudu go badumedi-gotee ka tšeo ba di nyakago go ya kamoo maemo a gagwe a ka mo go dumelelago ka gona.​—Jakobo 2:​14-17.

20. Ke ka ditsela dife mogolo a swanetšego go ba yo a kgonago go ruta?

²⁰ A kgone go ruta. (1 Timotheo 3:2) Go kgona ga mogolo e le morutiši wa moya ga go dirwe ka bohlale bja ka hlogong goba ka bohlale bja lefase. (1 Ba-Korinthe 2:​1-5, 13) O ba le bjona ka gobane a e-ya “ka thutô ya Lentšu le le tiilexo lé, xore a kxônê xo eletša batho ka thutô yé e se naxo phôkôlô, a kxônê xo sôla baxanyetši.” (Tito 1:9; bapiša le Ditiro 20:​18-21, 26, 27.) O swanetše go kgona go ‘eletša bangangi ka boleta.’ (2 Timotheo 2:​23-26) Gaešita lege mogolo e se seboledi se sebotse sa phatlalatša ka phuthegong, o swanetše go ba seithuti se se botse sa Lentšu la Modimo mo e lego gore o kgona go nea keletšo le tsholo go badumedi, bao le bona ba ithutago Beibele. (2 Ba-Korinthe 11:6) O swanetše go kgona go nea “thutô ye e phedilexo” yeo e thušago malapa gotee le batho ka o tee ka o tee go phegelela bophelo bja go boifa Modimo.​—Tito 2:​1-10.

21. (a) Ke ka baka la’ng go ka bolelwa gore mogolo ga se a swanela go ba yo a bethago batho? (b) Go ba le tlhaloganyo go bolela’ng? (c) Go se be le dikgang go bolela’ng?

²¹ E se be yo a bethago batho, eupja a be yo botho, a se be le dikgang. (1 Timotheo 3:3; Tito 1:7) Ka ge a rata khutšo, mogolo a ka se ke a tia batho goba a ba kweša bohloko ka go bolela dipolelo tša maroga goba tše di hlabago. (Bapiša 2 Ba-Korinthe 11:​20.) (Tlhaloso ye e fetilego yeo e bolelago gore ga se “monwi wa sedilá” e bontšha gore o phema go diriša dino tše di tagago kudu e lego seo gantši se lebišago dintweng.) Ka ge e le “yo a na nago le tlhaloganyo” (goba, “yo a feto-fetogago”), e sego nkgwete, le yo go sego thata go ka mo kgahliša, ga a tsoše dikgang ka dilo tše nyenyane. (1 Ba-Korinthe 9:​12; Ba-Filipi 4:5; 1 Petro 2:​18) Ka ge mogolo e se yo a ratago dikgang, goba manganga, o phema diphapano gomme ga se “moxalefi.”​—Tito 3:2; Jakobo 1:​19, 20.

22. Ke eng seo se bontšhwago ke therešo ya gore mogolo ga se a swanela go ba wa go dira ka boithatelo?

²² A se ke a ba seithati. (Tito 1:​7, Phetolelo ya Kgale) Ge e le gabotse, se se bolela gore “a se be yo a ikgahlišago yena mong.” (Bapiša le 2 Petro 2:​10.) Mogolo ga se a swanela go ba senganga eupja o swanetše gore a lebelele bokgoni bja gagwe ka boikokobetšo. A se ke a nagana gore o kgona go dira dilo ka tsela e kaone go feta ba bangwe, eupja ka boikokobetšo a abelane le ba bangwe boikarabelo gomme a rate go ba le baeletši ba bantši.​—Numeri 11:​26-29; Diema 11:​14; Ba-Roma 12:​3, 16.

23. (a) O ka hlalosa bjang “mo-rata-boló”? (b) Go ba yo a lokilego go bolela’ng?

²³ A rate tše bolo; a be yo a lokilego. (Tito 1:8) Gore monna a swanelege bjalo ka mogolo, o swanetše go rata tše botse gomme e be moloki. Motho yo a ratago tše bolo o rata seo e lego se se lokilego pele ga mahlo a Jehofa, o dira ditiro tša botho le tše di holago, gomme o bontšha go leboga go loka ga ba bangwe. (Luka 6:​35; bapiša le Ditiro 9:​36, 39; 1 Timotheo 5:​9, 10.) Go ba yo a lokilego go bolela go dumelelana le melao le ditekanyetšo tša Modimo. Se sengwe gape ke gore monna yo bjalo ga a bebe sefahlego gomme o dula a nagana ka dilo tše lokilego, tše hlwekilego le tše holago. (Luka 1:6; Ba-Filipi 4:​8, 9; Jakobo 2:​1-9) Ka ge bolo bo fapane le go loka ka gore bo dira go fetiša seo se nyakwago ke toka, morati wa bolo o direla batho ba bangwe se se fetago seo a swanetšego go ba direla sona.​—Mateo 20:4; 13-15; Ba-Roma 5:7.

24. Go ba yo a botegago go nyaka’ng?

²⁴ Ke yo a botegago. (Tito 1:8, NW) Monna yo a swanelegago go ba mogolo o na le boineelo bjo bo sa kgaotšego go Modimo gomme o kgomarela molao wa gagwe, go sa šetšwe kamoo potego ya gagwe e lekwago ka gona. O dira seo Jehofa a se tsomago go yena, gomme se se akaretša le go dira e le mogoeledi yo a botegago wa Mmušo.​—Mateo 24:​14; Luka 1:​74, 75; Ditiro 5:​29; 1 Ba-Thesalonika 2:10.

Go Fihlelela Ditshwanelego

25. Ditshwanelego tšeo di sa tšwago go ahla-ahlwa di nyakwa go bomang gomme dishwanelego tše bjalo di ka fihlelelwa bjang?

²⁵ Bontši bja dika tšeo di sa tšwago go ahla-ahlwa di akaretša dilo tšeo di nyakwago go Hlatse e nngwe le e nngwe ya Jehofa gomme di ka fihlelelwa ka tšhegofatšo ya Modimo go ithuteng ga motho o mongwe le o mongwe, boitekong bja gagwe, ditlwaelanong tše botse le thapelong. Batho ba ka dira gabotse dikeng tše dingwe go feta tše dingwe. Eupja bagolo le bahlanka ba bodiredi ba swanetše go fihlelela dinyakwa ka moka tša tokelo ye e itšego ya bona.

26. Ke ka baka la’ng banna ba Bakriste ba itira bao ba hwetšagalago bakeng sa boikarabelo bja ka phuthegong?

²⁶ Dihlatse ka moka tša Jehofa di swanetše gore di nyake go dira ka matla ka moka tirelong ya Modimo. Moya wo o tutueletša banna ba Bakriste gore ba nyake go itira bao ba hwetšagalago bakeng sa boikarabelo bja ka phuthegong. Na o monna yo a ineetšego le go kolobetšwa? Ge e ba go le bjalo, gona katana gomme o dire ka mešego fela gore o be yo a swanelegago go ka hlankela!

[Mongwalo wa tlase]

◻ Ke ka baka la’ng mo nakong ye go e-na le go nyakega mo gogolo ga banna bao ba kolobeditšwego gore ba amogele boikarabelo bja ka phuthegong?

◻ Ditshwanelego tšeo di swanetšego go fihlelelwa ke bahlanka ba bodiredi ke dife?

◻ Tše dingwe tša dinyakwa tšeo bagolo ba swanetšego go di fihlelela ke dife?

◻ Ke ka baka la’ng mogolo a swanetše gore a kgone go okamela lapa la gagwe gabotse?

◻ Ke eng se se tutueletšago banna ba Bakriste gore ba itire bao ba hwetšagalago bakeng sa mediro ya ka phuthegong?

Bagolo le bahlanka ba bodiredi ba swanetše go okamela malapa a bona go ya ka melao ya motheo ya Beibele