Tate le Mogolo—Go Phetha Dikarolo ka Bobedi

“Xe motho a sa tsebe xo laola ba lapeng la xabô, ó tlo kxôna bya’ng xo babalêla phuthêxô ya Modimo?”—1 TIMOTHEO 3:5.

1, 2. (a) Lekgolong la pele la nywaga, balebeledi bao ba sa nyalago le balebeledi ba ba nyetšego bao ba se nago bana ba be ba kgona bjang go hlankela banababo bona? (b) Akwila le Perisila ke mohlala bjang bakeng sa banyalani ba bantši lehono?

BALEBELEDI ka phuthegong ya pele ya Bokriste e be e ka ba banna ba ba sa nyalago, banna ba ba nyetšego ba se na bana goba banna ba malapa ba ba nago le bana. Ga go pelaelo gore ba bangwe ba Bakriste bao ba ile ba kgona go latela keletšo ya moapostola Paulo yeo e neilwego ka lengwalong la gagwe la pele le le yago go ba-Korinthe, 1Ba-Kor kgaolo 7, ba dula ba sa nyala. Jesu o be a boletše gore: “Xo na le dikxôpê . . . tše di itirilexo dikxôpê ka ’baka la mmušô wa maxodimo.” (Mateo 19:12) Banna ba bjalo ba sa nyalago ba bjalo ka Paulo mohlomongwe le ba bangwe ba bagwera bao a bego a sepela le bona, e be e tla ba ba lokologilego bakeng sa go sepela ba thuša banababo bona.

² Beibele ga e bolele ge e ba Baranaba, Mareka, Silase, Luka, Timotheo le Tito e be e le banna ba sa nyalago. Ge e ba ba be ba nyetše, go molaleng gore ba be ba lokologile ka mo go lekanego boikarabelong bja lapa gore ba kgone go sepela gohle dikabelong tše fapa-fapanego. (Ditiro 13:2; 15:39-41; 2 Ba-Korinthe 8:16, 17; 2 Timotheo 4:9-11; Tito 1:5) Ba ka be ba ile ba felegetšwa ke basadi ba bona bjalo ka Petro le “Baapostola ba bangwê” bao go bonalago ba be ba e-ya le basadi ba bona go tloga lefelong le lengwe go ya go le lengwe. (1 Ba-Korinthe 9:5) Akwila le Perisila ke mohlala wa banyalani bao ba bego ba ikemišeditše go huduga gantši ba latela Paulo go tloga Korinthe go ya Efeso, ke moka ba hudugela Roma gomme ba boela Efeso gape. Beibele ga e hlalose ge e ba ba be ba e-na le bana. Tirelo ya bona ya boineelo bakeng sa banababo bona e ile ya dira gore ba lebogwe “ke diphuthêxô tšohle tša ba-ntlê.” (Ba-Roma 16:3-5; Ditiro 18:2, 18; 2 Timotheo 4:19) Ga go pelaelo gore lehono go na le banyalani ba bantši bao ba ka hlankelago diphuthego tše dingwe bjalo ka Akwila le Perisila, mohlomongwe ka go hudugela moo go nyakegago thušo e kgolo gona.

Tate le Mogolo

3. Ke eng se se bontšhago gore bagolo ba bantši ba lekgolong la pele la nywaga e be e le banna ba ba nyetšego bao ba nago le malapa?

³ Go bonala eka lekgolong la pele la nywaga C.E., bontši bja bagolo ba Bakriste e be e le banna ba ba nyetšego bao ba nago le bana. Ge Paulo a be a hlalosa ditshwanelego tše di nyakegago go monna yo ‘a nyakago bolebeledi,’ o hlalositše gore Mokriste yo bjalo e swanetše go ba “e a bušaxo ba lapeng la xabô xa-botse, e bê mo-laola-bana-ka-bokwala.”—1 Timotheo 3:1, 4.

4. Go be go nyakega’ng go bagolo ba ba nyetšego bao ba nago le bana?

⁴ Go etša ge re bone, molebeledi o be a sa gapeletšege go ba le bana goba gaešita le go nyala. Eupša ge e ba a nyetše, Mokriste o be a swanetše go diriša bohlogo ka mo go swanetšego le ka lerato go mosadi wa gagwe gomme a ipontšhe e le yo a kgonago go boloka bana ba gagwe ba ikokobetša ka mo go swanetšego gore a swanelegele go ba mogolo goba mohlanka wa bodiredi. (1 Ba-Korinthe 11:3; 1 Timotheo 3:12, 13) Bofokodi le ge e le bofe bjo bogolo tabeng ya go laola lapa la gagwe bo be bo tla dira gore ngwanabo rena e be yo a sa swanelegelego ditokelo tše kgethegilego ka phuthegong. Ka baka la’ng? Paulo o hlalosa gore: “Xobane xe motho a sa tsebe xo laola ba lapeng la xabô, ó tlo kxôna bya’ng xo babalêla phuthêxô ya Modimo?” (1 Timotheo 3:5) Ge bao ba tswalanago le yena ka madi ba be ba sa rate go ikokobeletša bolebeledi bja gagwe, ba bangwe ba be ba tla arabela bjang?

“E a Naxo le Bana ba ba Dumetšexo”

5, 6. (a) Ke selo sefe se se nyakegago mabapi le bana seo Paulo a se bolelago go Tito? (b) Ke eng se se letetšwego go bagolo bao ba nago le bana?

⁵ Ge a be a laela Tito gore a kgethe balebeledi ka phuthegong ya Kereta, Paulo o ile a hlalosa gore: “E bê batho ba ba se naxo bosodi, monna e bê wa mosadi o tee, e a naxo le bana ba ba dumetšexo, e sexo ba xo tsebya bohlôla le xo se kwe. Xobane molebeledi, xo swanetše xe e le motho e a se naxo senyalô, xobane ké molaki wa Modimo.” Ge e le gabotse, ke eng se se bolelwago ke senyakwa sa gore “e a naxo le bana ba ba dumetšexo”?—Tito 1:6, 7.

⁶ Polelwana e rego “bana ba ba dumetšexo” e šupa bana bao ba šetšego ba neetše maphelo a bona go Jehofa gomme ba kolobeditšwe, goba bana bao ba tšwelago pele go ya boineelong le kolobetšong. Ditho tša phuthego di letela gore bana ba bagolo ka kakaretšo e be ba itshwerego gabotse le ba kwago. Go swanetše go bonagala gore mogolo o dira sohle seo a ka se kgonago go aga tumelo baneng ba gagwe. Kgoši Salomo o ngwadile gore: “Ngwana mo eteletše tsela y’axwe; ké mo a tl’o xo tšofala à sa ka a e lahla.” (Diema 22:6) Eupša go thwe’ng ge e ba mofsa yo a hweditšego tlwaetšo e bjalo a gana go hlankela Jehofa goba gaešita le go dira phošo e kgolo?

7. (a) Ke ka baka la’ng go le molaleng gore Diema 22:6 ga e bee molao o sa koba-kobegego le maemo? (b) Ge e ba ngwana wa mogolo a sa kgethe go hlankela Jehofa, ke ka baka la’ng mogolo a sa nape a lahlegelwa ke ditokelo tša gagwe?

⁷ Go molaleng gore seema se se tsopotšwego ka mo godimo ga se bee molao o sa koba-kobegego le maemo. Ga se phumole molao wa motheo wa tokologo ya go dira kgetho. (Doiteronomio 30:15, 16, 19) Ge morwa goba morwedi a fihla nywageng ya go rwala boikarabelo, o swanetše go itirela phetho mabapi le boineelo le kolobetšo. Ge e ba go le molaleng gore mogolo o šetše a neile thušo, tlhahlo le tayo tše di nyakegago tša moya fela mofsa a sa kgethe go hlankela Jehofa, tate ga e nape ya ba yo a sa swanelegelego go hlankela e le molebeledi. Ka lehlakoreng le lengwe, ge e ba mogolo a e-na le bana ba mmalwa ba banyenyane bao ba dulago ka gae bao ba thomago go babja moyeng le go tsena mathateng ka go latelana, a ka fo se sa lebelelwa e le “e a bušaxo ba lapeng la xabô xa-botse.” (1 Timotheo 3:4) Ntlha ke gore, go swanetše go bonagala gore molebeledi o dira seo a se kgonago gore a be le ‘bana ba ba dumetšego bao ba se nago molato wa bohlola le go se kwe.’a

Yo a Nyetšego “Mosadi e a sa Dumelexo”

8. Mogolo o swanetše go itshwara bjang go mosadi wa gagwe yo a sa dumelego?

⁸ Paulo o ngwadile mabapi le banna ba Bakriste bao ba nyetšego batho ba sa dumelego gore: “Xe modumedi a na le mosadi e a sa dumelexo, ’me mosadi eo a rata xo dula le yêna, xôna a se kê a mo hlala. . . . Xobane . . . mosadi e a sa dumelexo ó kxethexile ka monna. Xe xo ka be xo se byalo, bana ba lena e ka be e le ba dithšila; xomme byale ba kxethexile. Xomme . . . wene monna, O tseba’ng? Mohlomong O tlo phološa mosadi eo.” (1 Ba-Korinthe 7:12-14, 16) Polelwana e rego “e a sa dumelexo” mo ga e šupe mosadi yo a se nago ditumelo tša bodumedi, eupša e šupa yo a sa ineelago go Jehofa. E ka ba e be e le mo-Juda goba modumedi wa medingwana ya boheitene. Lehono mogolo a ka ba a nyetše mosadi yo e lego wa bodumedi bjo bo fapanego, e le mo-agnostic goba gaešita le moila-Modimo. Ge e ba a rata go dula le monna, ga se a swanela go mo tlogela feela ka baka la go fapana ga ditumelo. O sa dutše a swanetše go ‘phedišana le yena ka tsebo, a mo godiša a tseba gore ke sebjana se se swanetšego go neneketšwa,’ a phela a e-na le kholofelo ya go mo phološa.—1 Petro 3:7; Ba-Kolose 3:19.

9. Mogolo o swanetše go itshwara bjang dinageng tšeo molao o neago monna le mosadi tshwanelo ya go tlwaelanya bana ba bona le ditumelo tša bona tša bodumedi, gona se se tla kgoma bjang ditokelo tša gagwe?

⁹ Ge e ba molebeledi a e-na le bana, o tla diriša bohlogo bjo bo swanetšego bja monna le tate tabeng ya go ba godiša “ka tayo le tlwaetšo ya monagano ya Jehofa.” (Ba-Efeso 6:4, NW) Dinageng tše dintši molao o nea balekane ba lenyalo ka bobedi tshwanelo ya go nea bana ba bona thuto ya bodumedi. Boemong bjo mosadi a ka gapeletša go diriša tshwanelo ya gagwe ya go tlwaelanya bana le ditumelo tša gagwe tša bodumedi gotee le mekgwa, yeo e ka akaretšago go ya le bona kerekeng.b Ee, bana ba swanetše go latela letswalo la bona le le tlwaeditšwego ka Beibele ge go tliwa tabeng ya go se tšee karolo ditirelong tša bodumedi bja maaka. Ka ge e le hlogo ya lapa, tate o tla dirišetša tshwanelo ya gagwe ka noši go ithuta le bana ba gagwe gomme a ya le bona dibokeng Holong ya Mmušo ge go kgonega. Ge ba fihla nywageng yeo go yona ba ka itirelago diphetho, ba tla ikgethela tsela yeo ba tlago go e latela. (Jošua 24:15) Ge bagolo-gotee le yena le ditho tša phuthego ba ka bona gore o dira sohle seo molao o mo dumelelago go se dira bakeng sa go ruta bana ba gagwe ka mo go swanetšego tseleng ya therešo, e ka se ke ya ba yo a sa swanelegelego go ba molebeledi.

“E a Bušaxo ba Lapeng la Xabô Xa-botse”

10. Ge e ba monna wa lapa e le mogolo, boikarabelo bja gagwe bjo bogolo bo letše kae?

¹⁰ Gaešita le bakeng sa mogolo yo e lego tate le yoo mosadi wa gagwe e lego Mokriste-gotee le yena, ga se modiro o bonolo go aroganya nako ya gagwe le tlhokomelo gabotse magareng ga mosadi wa gagwe, bana le boikarabelo bja phuthego. Mangwalo a hlalosa ka mo go kwalago kudu gore tate wa Mokriste o na le boikarabelo bja go hlokomela mosadi wa gagwe le bana. Paulo o ngwadile gore: “Xe motho a sa babalele b’abô, xaxolo ba lapeng la xabô, ó latola tumêlô; ó phalwa ke e a sa dumelexo.” (1 Timotheo 5:8) Lengwalong lona leo, Paulo o boletše gore ke feela banna ba ba nyetšego bao ba šetšego ba ipontšhitše gore ke banna le bo-tate ba ba lokilego bao ba swanetšego go bolelelwa gore ba hlankele e le balebeledi.—1 Timotheo 3:1-5.

11. (a) Mogolo o swanetše go ‘babalela ba gabo’ ka ditsela dife? (b) Se se ka thuša mogolo bjang gore a phethe boikarabelo bja gagwe bja phuthego?

¹¹ Mogolo o swanetše go ‘babalela’ ba gabo e sego ka dilo tše di bonagalago feela, eupša le ka tša moya le tša maikwelo. Kgoši Salomo yo bohlale o ngwadile gore: “Phêtha medirô ya xaxo ya ntlê, O itemêlê thšemo; e bê xôna O axaxo ntlo ya xaxo.” (Diema 24:27) Ka gona, ge a dutše a nea mosadi wa gagwe le bana dinyakwa tša dilo tše di bonagalago, tša maikwelo le tša boitapološo, molebeledi o swanetše go ba aga le moyeng. Se se nyaka nako—e lego nako yeo a ka se kgonego go e dirišetša ditaba tša phuthego. Eupša ke nako yeo e ka bago le mafelelo a humilego lethabong le boemong bja moya bja lapa. Mafelelong ge e ba lapa la gagwe le tiile moyeng, mogolo a ka swanelwa ke go fetša nako e nyenyane a rarolla mathata a lapa. Se se tla tlogela monagano wa gagwe o lokologile bakeng sa go hlokomela ditaba tša phuthego. Mohlala wa gagwe e le monna yo a lokilego le tate yo a lokilego e tla ba o holago phuthego moyeng.—1 Petro 5:1-3.

12. Ke ditabeng dife tša lapa moo bo-tate bao e lego bagolo ba swanetšego go bea mohlala o mobotse?

¹² Go buša lapa gabotse go akaretša go rulaganya nako bakeng sa go okamela thuto ya lapa. Ke gabohlokwa ka mo go kgethegilego gore bagolo ba bee mohlala o mobotse tabeng ye, ka gobane malapa a tiilego a bopa diphuthego tše di tiilego. Nako ya molebeledi ga se ya swanela go dula e jewa ke ditokelo tša tirelo moo a se nago nako ya go ithuta le mosadi wa gagwe le bana. Ge e ba boemo bo be bo le ka tsela ye, o swanetše go hlahloba lenaneo la gagwe lefsa. A ka swanelwa ke go rulaganya lefsa goba go fokotša nako yeo a e dirišetšago ditaba tše dingwe, gaešita le go gana ditokelo tše itšego ka nako e nngwe.

Bolebeledi bjo bo Leka-lekanego

13, 14. “Molaki e a bôtêxaxo yo bohlale” o neile bagolo bao e lego banna ba malapa keletšo efe?

¹³ Keletšo ya go leka-lekanya boikarabelo bja lapa le bja phuthego ga se e mpsha. Ka nywaga e mentši “molaki e a bôtêxaxo yo bohlale” o be a dutše a nea bagolo keletšo tabeng ye. (Mateo 24:45) Nywageng e fetago 37 e fetilego, The Watchtower ya September 15, 1959, matlakala 553 le 554 e ile ya eletša gore: “Ka kgonthe, na se ka moka ga e fo ba taba ya go leka-lekanya dilo tše tše di nyakago nako ya rena? Go leka-lekanyeng mo, anke o gatelele dikgahlego tša lapa la gago ka mo go swanetšego. Ka kgonthe, Jehofa Modimo o be a ka se ke a letela gore monna a diriše nako ya gagwe ka moka modirong wa phuthego, a thuša banababo le baagišani gore ba hwetše phologo eupša a sa šetše phologo ya lapa la gagwe. Mosadi wa motho le bana ke boikarabelo bja motheo.”

¹⁴ Morokami wa November 1, 1986, letlakala 22 o eleditše gore: “Go ba le karolo bodireding bja tšhemo le le lapa go tla le dira gore le be selo se tee, fela dilo tše di nyakegago tša bana di nyaka gore o gafe nako ya gago le matla a gago a maikwelo. Ka gona, teka-tekano e a nyakega gore o tsebe tekanyo ya nako yeo o ka e dirišetšago mediro ya . . . phuthego ge o bile o hlokomela ba ‘lapeng la gago’ moyeng, maikwelong le nameng. [Mokriste o] swanetše go ‘thoma ka go ithuta borapedi ka lapeng la [gagwe].’ (1 Timotheo 5:4, 8)”

15. Ke ka baka la’ng mogolo yo a nago le mosadi le bana a nyaka bohlale le temogo?

¹⁵ Seema sa Mangwalo se re: “Ngwakô ó axwa ka bohlale; ó thêwa ka thlaoloxanyô.” (Diema 24:3) Ee, gore molebeledi a phethe boikarabelo bja gagwe bja pušo ya Modimo a be a age lapa la gagwe, ka kgonthe o nyaka bohlale le temogo. Go ya ka Mangwalo, o na le dikarolo tše di fetago e tee tša bolebeledi. Go akaretšwa lapa la gagwe le boikarabelo bja gagwe bja phuthego. O nyaka temogo gore a boloke teka-tekano magareng ga dikarolo tše. (Ba-Filipi 1:9, 10) O nyaka bohlale gore a rulaganyetše dilo tša gagwe tše di tlago pele. (Diema 2:10, 11) Go sa šetšwe tekanyo yeo a ikwago ka yona a e-na le boikarabelo bja go phetha ditokelo tša gagwe tša phuthego, o swanetše go lemoga gore ka ge e le monna le tate boikarabelo bja gagwe bjo bogolo bjo a bo neilwego ke Modimo ke go hlokomela gotee le phologo ya lapa la gagwe.

Bo-tate ba Lokilego le Bagolo ba Lokilego

16. Mogolo o ba le mohola ofe ge e bile e le tate?

¹⁶ Mogolo yo a nago le bana ba itshwerego gabotse e ka ba lehumo. Ge e ba a ithutile go hlokomela lapa la gagwe gabotse, o tla kgona go thuša malapa a mangwe ka phuthegong. O kwešiša mathata a bona gakaone gomme a ka nea keletšo e bonagatšago phihlelo ya gagwe ka noši. Ka lethabo, bagolo ba dikete lefaseng ka moka ba dira modiro o mobotse e le banna, bo-tate le balebeledi.

17. (a) Monna yo e lego tate le mogolo ga se a swanela go lebala’ng le ka mohla? (b) Ditho tše dingwe tša phuthego di swanetše go bontšha kwelobohloko bjang?

¹⁷ Gore monna wa lapa e be mogolo, e swanetše go ba Mokriste yo a budulego yo a kgonago go rulaganya ditaba tša gagwe e le gore a kgone go diriša nako le go nea tlhokomelo go ba bangwe ka phuthegong, ge a dutše a hlokomela mosadi wa gagwe le bana. Le ka mohla ga se a swanela go lebala gore modiro wa gagwe wa bodiši o thoma ka gae. Ka go tseba gore bagolo ba ba nago le basadi le bana ba na le boikarabelo bja malapa a bona gotee le bja phuthego, ditho tša phuthego di tla leka go se nyake nako ya bona ka mo go sa swanelago. Ka mohlala, mogolo yo a nago le bana bao ba swanetšego go ya sekolong mesong e latelago a ka fo se kgone ka mehla go dula nakwana ka morago ga diboka tša mantšiboa. Ditho tše dingwe tša phuthego di swanetše go kwešiša se gomme di bontšhe kwelobohloko.—Ba-Filipi 4:5.

Re Swanetše go Rata Bagolo ba Rena

18, 19. (a) Go hlahloba ga rena 1 Ba-Korinthe kgaolo 7 go re dirile gore re kgone go lemoga’ng? (b) Banna ba bjalo ba Bakriste re swanetše go ba lebelela bjang?

¹⁸ Go hlahloba ga rena kgaolo 7 ya lengwalo la Paulo la pele le le yago go ba-Korinthe go re dirile gore re kgone go bona gore ka morago ga keletšo ya Paulo, go na le banna ba bantši ba sa nyalago bao a dirišetšago tokologo ya bona go hlankela dikgahlego tša Mmušo. Go bile go na le banababo rena ba dikete ba ba nyetšego bao ba se nago bana, bao ba hlankelago e le balebeledi ba lokilego dileteng, ditikologong, ka diphuthegong le makaleng a Watch Tower ge ba dutše ba nea basadi ba bona tlhokomelo e swanetšego, ka baka la tshwarišano e retegago ya basadi ba bona. Sa mafelelo, ka diphuthegong tšeo e nyakilego go ba tše 80 000 tša batho ba Jehofa go na le bo-tate ba bantši kudu bao ba sa hlokomelego basadi ba bona le bana feela ka lerato, eupša gape ba dirišetša nako go hlankela banababo bona e le badiši ba šetšago.—Ditiro 20:28.

¹⁹ Moapostola Paulo o ngwadile gore: “Ba baxolo ba xo êmêla phuthêxô xa-botse, a ba xodišwê xobedi, xa-xolo bao ba xo itapiša ka xo bolêla le ka xo ruta.” (1 Timotheo 5:17) Ee, bagolo bao ba okamelago gabotse magaeng a bona le ka phuthegong ba swanelwa ke lerato la rena le tlhompho. Ka kgonthe re swanetše gore “banna ba ba byalo [re] ba xodišê.”—Ba-Filipi 2:29.

[Mengwalo ya tlase]

E le Poeletšo

◻ Re tseba bjang gore bagolo ba bantši lekgolong la pele la nywaga C.E. e be e le banna ba malapa?

◻ Ke eng se se nyakwago go bagolo ba ba nyetšego bao ba nago le bana, gona ka baka la’ng?

◻ Ke eng se se bolelwago ke go ba le “bana ba ba dumetšexo,” eupša go thwe’ng ge e ba ngwana wa mogolo a sa kgethe go hlankela Jehofa?

◻ Mogolo o swanetše go ‘babalela ba gabo’ ka ditsela dife?

[Seswantšho go letlakala 23]

Malapa a tiilego a bopa diphuthego tše di tiilego