Tumišang Leina le Lekgethwa la Jehofa!
“Molomo wa-ka a o bolêlê thêtô ya Morêna, nama yohle a e rête ’ina le lekxêthwa l’axwe ka mehla le mehleng ya neng le neng.”—PSALME 145:21.
1, 2. (a) Sathane o ile a hlohla pušo ya Modimo ka tsela efe? (b) Ke dipotšišo dife tšeo di rotošwago mabapi le Psalme 145:11-21?
JEHOFA ka ntle le pelaelo ke Mmuši wa Legohle. Eupja Sathane o hlohlile go loka le tshwanelo ya go buša ya Modimo. (Genesi 2:16, 17; 3:1-5) Diabolo gape o ile a belaela potego ya bahlanka ka moka ba Modimo legodimong le mo lefaseng. (Jobo 1:6-11; 2:1-5; Luka 22:31) Ka gona, Jehofa o dumeletše nako bakeng sa dibopiwa ka moka tše bohlale gore di bone dienywa tše mpe tša go rabela malebana le pušo ya gagwe le gore ba ipontšhe moo ba emego gona dikganyeng tše.
2 Psalme 145 e re thuša gore re eme re tiile bakeng sa pušo ya Modimo. Bjang? Dafida o re’ng ka bogoši bja Jehofa? Le gona, Jehofa o swara bjang baemedi ba bjona? Dikarabo tše holago di hwetšwa go Psalme 145:11-21.
Bolela ka Bogoši bja Jehofa
3. Ge e ba re hlompha bogoši bja Jehofa, ke’ng seo re tlago go se dira?
3 Pušo ya Jehofa e be e le selo seo Dafida a bego a se etše hloko kudu, e lego yo a boletšego gore: “Ba bolêla tša letaxô la boxoši by’axo, ba kwatša tša matla a xaxo. Xore bana ba batho ba botšwê tša matla a xaxo, le tša letaxo la mmušô wa xaxo.” (Psalme 145:11, 12) Batho ba bolela ka dilo tšeo di ba kgahlago. Ka gona, monna o bolela ka lapa la gagwe, legae la gagwe le dibjalo tša gagwe. Jesu o itše, “Motho yo botse ó tšweletša tše botse di e-tšwa lehumong le le botse la pelo.” (Luka 6:45) Ge e ba pušo ya Modimo e ratega dipelong tša rena, re tla rapelela Mmušo wa Modimo gore o tle, gomme re tla botša ba bangwe ka toka, khutšo le toko tšeo di tlago go aparetša ka tlase ga pušo ya wona. Re tla tumiša Jehofa e le “kgoši ya ka mo go sa felego,” gomme re tla bolela ka pontšho ya bogoši bja gagwe ka Mmušo wa Mesia diatleng tša Morwa wa gagwe yo a rategago, Jesu Kriste. (Kutollo 15:3, NW; Jesaya 9:5, 6) Ke tokelo e kaakang go bolela ka letago la legodimong la bogoši bja Jehofa, leo kapejana le tlago go bontšhwa botseng bja paradeise ya lefaseng yeo e tletšego ka dibopiwa tše di thabilego ka botlalo!—Luka 23:43.
4. Ke neng moo re bago le sebaka sa go bolela ka “matla” a Jehofa, gomme re thekgwa bjang modirong o bjalo?
4 Tebogo gape e tla re tutueletša go bolela ka “matla” a Jehofa. Gaešita lege e le “yo moxolo ka matla,” feela ga a a diriše gampe. (Jobo 37:23) O dirišitše matla a gagwe go bopa lefase le batho gomme o tla a diriša go fediša ba babe. Re na le sebaka sa go bolela ka matla a Modimo ge re bolela ditaba tše di lokilego. Le gona, na ga re leboge gore Mothopo wo o mogolo ka go fetišiša wa matla o re matlafaletša go dira modiro wo? (Jesaya 40:29-31) Ee, bjalo ka Dihlatse tša Jehofa, tirelong e kgethwa re thekgwa ke matla le moya wa Modimo. Ke ka tsela ye feela moo molaetša wa Mmušo o bolelwago ka katlego e makatšago lefaseng ka bophara.—Psalme 28:7, 8; Sakaria 4:6.
5. Ka ge batho ba bantši ba sa tsebe ka ‘ditiro tše matla’ tša Jehofa, ke’ng seo re swanetšego go se dira?
5 Go nyakega gore re tsebiše bana ba batho ka ‘ditiro tše matla’ tša Jehofa go etša ge ba-Isiraele ba ile ba botša bana ba bona ka tsela yeo Modimo a ba phološitšego ka yona bohlankeng Egipita. (Ekisodo 13:14-16) Batho ba agela batho bao ditiro tša bona ba di lebelelago e le tše bohlokwa dimonyumente, eupja ke ba bakae bao ba tsebago ka ditiro tše matla tša Modimo? Go bjalo ka ge moithuti o mongwe a bea se ka gore: “Ba tloka ditiro tša bagale ba bona godimo ga porase, eupja ditiro tša letago tša Jehofa di ngwalwa godimo ga mohlaba, gomme go feta ga nako go dira gore di lebalwe.” Ditiro tšeo ge e le gabotse ga di phumolege gaešita lege batho ba bantši ba sa di tsebe. Ka gona, modirong wa rena wa ntlo le ntlo, ge re swere dithuto tša Beibele tša magae le mabakeng a mangwe, anke re boleleng ka ditiro tše matla tša Modimo ka phišego.
6. (a) Ke lebakeng lefe nywageng e fetilego moo moya wa phišego woo re phethago bodiredi bja rena ka wona o ilego wa bontšhwa gabotse? (b) Ge e le gabotse, ke’ng seo se ilego sa bolelwa ka 1922 mabapi le go tsebatša Mmušo?
6 Gape re swanetše go tsebiša letago la bogoši bja Modimo ka phišego. Go fišegela tirelo e bjalo ya Mmušo go ile gwa bonala e le ka kgonthe ge ka 1922 J. F. Rutherford, yo e bego e le mookamedi wa Mokgatlo wa Watch Tower ka nako yeo a be a bolela le bao ba tlilego kopanong kua Cedar Point, Ohio, gomme a re: “Ga e sa le go tloga ka 1914 Kgoši ya letago e tšere mmušo wa yona . . . Mmušo wa legodimo o batametše; Kgoši e a buša; Mmušo wa Sathane o a wa; dimilione tše di phelago mo nakong ye di ka se ke tša hwa le ka mohla. Na le dumela se? . . . Bjale boelang tšhemong lena barwa ba Modimo Yo Godimo-dimo! Itlhameng ka ditlhamo tša lena! Phakgamang, e-bang ba matla, ba mafolofolo le bao ba sa boifego. E-bang dihlatse tše di botegago le tša therešo tša Morena. Tšwelang pele tlhabanong go fihlela mekgwa yohle ya Babele e senywa. Tsebatšang molaetša ka gohle. Lefase le swanetše go tseba gore Jehofa ke Modimo, le gore Jesu Kriste ke Kgoši ya dikgoši le Morena wa marena. Le ke letšatši leo le fetago matšatši ka moka. Bonang, Kgoši e a buša! Ke lena baemedi ba yona ba phatlalatša. Ka gona tsebatšang, tsebatšang, tsebatšang Kgoši le mmušo wa gagwe.”
7. Re swanetše go ikwa bjang ka modiro wa rena re le bagoeledi ba Mmušo?
7 Go thabiša gakaakang go ‘nagana ka leina la Modimo,’ go botša ba bangwe ka pušo ya gagwe, le go tsebatša Mmušo wa Mesia wa Morwa wa gagwe yo a rategago! (Maleaki 3:16) Bjalo ka bagoeledi le baboleledi ba Mmušo, re tšeela godimo tokelo ya rena ya go bolela ditaba tše di lokilego go retollela dipelo tša ba bangwe go Modimo, Kriste le Mmušo. Go swanetše go ba le kganyogo e kgolo ya go botša ba bangwe ka letago le legolo la bogoši bja Jehofa ka gare ga rena.—Bapiša le Jeremia 20:9.
8. (a) Pušo ya Jehofa e emetšwe ka eng lehono? (b) Ke ka baka la’ng go ka bolelwa gore Modimo o buša “mehleng ya ditloxolwana xo ya xo ile”?
8 Re swanetše go tutueletšega go tsebatša Mmušo wa Modimo ka phišego e kgolo, ka gobane se se latelago Dafida o itše: “Mmušô wa xaxo ké mmušô wa mehla yohle le ya neng le neng; boxoši bya xaxo bo tlo ba xôna le mehleng ya ditloxolwana xo ya xo ile.” (Psalme 145:13) Ge go naganišiša ga mopsalme mabapi le bogoši bja Jehofa go be go dutše go tšwela pele o ile a fetola mašala go tloga go “xaxwe” go ya go “xaxo” a lebiša mantšu a gagwe a thapelo go Modimo ka go lebanya. Ee, pušo ya Jehofa bjalo ka ge e emelwa ke Mmušo wa Mesia ga e tšeele bogoši bja ka mo go sa felego bja Modimo sebaka. Ge e le gabotse, ge batho ba kwago ba išitšwe phethegong, Kriste o tla bušetša Mmušo go Tatagwe. (1 Ba-Korinthe 15:24-28) Ka gona Modimo ke mmuši “mehleng ya ditloxolwana xo ya xo ile.” Jehofa e be e le Kgoši nakong ya ge Adama a be a bopja gomme o tla buša godimo ga batho ba lokilego ka mo go sa felego.
9. Go Psalme 145, go ka thwe’ng ka temana yeo e thomago ka tlhaka ya Sehebere nun?
9 Lengwalo la ba-Masora psalmeng ye ya sereto ya ditemana tšeo di thomago ka e nngwe ya ditlhaka go ya ka tatelano ya tšona, le tabogile temana yeo e thomago ka tlhaka ya Sehebere nun. Eupja ka go dumelelana le Septuagint ya Segerika, Peshitta ya se-Syria, le Vulgate ya Selatine, mongwalo o mongwe wa Sehebere o balega ka gore: “Jehofa o a botega mantšung a gagwe ka moka, o na le botho bjo lerato [goba “o a botega”] medirong ya gagwe ka moka.” (New World Translation of the Holy Scriptures—With References, mongwalo wa ka tlase) Modimo o phethagatša dikholofetšo tša gagwe ka moka gomme ke yo a botegago le yo botho go bohle bao ba lebogago botho bja gagwe.—Jošua 23:14.
Thekgo ya Jehofa le ka Mohla ga e Palelwe
10. Modimo o re “thêkxa” bjang?
10 Kgoši ya ka mo go sa Felego le ka mohla ga e hlokomologe tlalelo ya bahlanka ba yona. Ka baka leo Dafida o be a ka re: “Morêna ó thêkxa bohle ba ba waxo, ó tsoša bohle ba xo bôkalêla.” (Psalme 145:14) Ga e sa le go tloga mehleng ya Abele, Jehofa o ile a thekga barapedi ba Gagwe. Ge e ba re be re ka tlogelwa re nnoši, re be re tla wa ka makga a mantši ka tlase ga merwalo ya rena. Re hloka matla a lekanego go ka rwala madimabe a rena ka moka a bophelo le tlaišo yeo e tlago go rena re le batho ba Modimo, eupja Jehofa o a re thekga. Sebopego sa lediri la Sehebere le le dirišitšwego mo le bontšha gore Modimo ‘o re nea thekgo’ ka mo go tšwelago pele. Mo gongwe go ka lemogwa gore Johane Mokolobetši le Morwa wa Modimo ka noši ba ile ba thuša go tsoša badira-dibe ba ba gobogilego boitshwarong. Ge batho ba ba be ba sokologa gomme ba fetoga bahlanka ba Jehofa, ba be ba thabela tšhegofatšo e makatšago ya go thekgwa ke Modimo.—Mateo 21:28-32; Mareka 2:15-17.
11. Ke ka tsela efe yeo ka yona Jehofa a ‘tsošago bohle bao ba bokaletšego’?
11 Go a homotša go tseba gore ‘Jehofa o tsoša bohle ba go bokalela’ ka meleko e fapa-fapanego. O kgothatša bao ba nyemilego moko gare ga rena, o homotša bao ba nyamilego le go re thuša go bolela lentšu la gagwe ka sebete ge re tlaišwa. (Ditiro 4:29-31) Le ka mohla ga a dumelele merwalo ya rena gore e re šite ge feela re amogela thušo ya gagwe. (Psalme 55:22) Ka gona, ka go swana le “ngwana wa Aborahama” yo a bego a “hunaxane” eupja a fodišwa mmeleng ke Jesu, re swanetše “go tumiša Modimo” ge ka lerato a re tsoša moyeng. (Luka 13:10-17) Batlotšwa bao ba bego ba gateletšwe bohlankeng bja Babele ba ile ba thaba ge Modimo a be a ba tsoša ka 1919, gomme o be a dutše a tsoša “dinku tše dingwê” tšeo di bontšhago tebogo ga e sa le go tloga ka 1935.—Johane 10:16.
12. Ke bjang ‘mahlo a diphedi ka moka a lebelelago ka kholofelo’ go Modimo?
12 Jehofa le ka mohla ga a nyamiše batho ba gagwe, bjalo ka ge Dafida a hlalositše ka mo go kwagalago ka gore: “Mahlô a diphedi tšohle a lebeletše Wêna; ’me kê Wene O di faxo dijô lebakeng la xôna. O khupurolla ’atla sa xaxo, ’me ka moka tše di phelaxo O di horiša lethabô.” (Psalme 145:15, 16) Go bjalo ka ge eka mahlo a diphedi ka moka a lebeletše ka kholofelo go Mmuši wa Legohle. Barongwa ba lebelela go Modimo bakeng sa bophelo bjo bo tšwelago pele. Bjalo ka ge ngwana a lebelela go motswadi bakeng sa dilo tšeo a di nyakago, le rena re lebelela go Tatago rena wa legodimong. Ge e le gabotse, batho le diphoofolo ka mo go swanago ba hwetša dijo go yena. Ga go na o mongwe yo a ka kgotsofatšago tšeo ba di nyakago. Modimo o ba nea ‘dijo tša bona lebakeng la gona,’ ke gore, ge di nyakega.
13. Ke ka ditsela dife Jehofa a ‘khupurollago seatla sa gagwe gomme a horiša tšohle tše di phelago’?
13 Modimo ‘o khuporolla seatla sa gagwe gomme a huriša tšohle tše di phelago.’ (Psalme 104:10-28) Ke therešo gore diphoofolo tše dingwe di a hwa ka baka la go hloka dijo. Batho ba bantši ba hwa ka baka la boithati, kgatelelo le go dirišwa gampe ga dithoto. Go feta moo, Jesu o ile a bolela e sa le pele gore, “ditlala” e be e tla ba karolo ya ‘pontšho’ ya go ba gona ga gagwe mehleng ye ya bofelo. (Mateo 24:3, 7) Eupja ga go le se tee sa tše seo se diregago ka baka la gore Jehofa a timana goba a sa kgone go fepa. Nagana ka diphedi tše dimilione tše dikete tšeo di fepjago! Go feta moo, psalme ye e nea kgonthišetšo ya gore ka tlase ga pušo ya Mmušo, ‘ge motho a sa buše motho gore a mo gobatše,’ Jehofa o tla kgotsofatša dinyakwa tša rena tša nama le tša moya. (Mmoledi 8:9; Jesaya 25:6) Gaešita le lehono, ga se ra swanela go swarwa ke tlala ya dijo tša moya, ka gobane Modimo o di neela ka bontši ka nako ya gona ka “molaki e a bôtêxaxo yo bohlale.” (Mateo 24:45-47; 1 Petro 2:2) Ge re bolela ka tsela ya moya, Dihlatse tša Jehofa lefaseng ke bona batho bao ba fepjago gabotse kudu. Na o bontšha tebogo e kgolo bakeng sa dijo tšeo tše dintši?
Jehofa o Hlokomela ba ba mo Ratago
14. Ke ka baka la’ng Dafida a be a ka bolela gore “Jehofa o lokile ditseleng tša gagwe ka moka, gomme o a botega medirong ya gagwe ka moka”?
14 Bošilo bja rena bo ka ‘kgopamiša tsela ya rena’ gomme bja re tlišetša mathata, eupja le ka mohla ga se ra swanela go sola Modimo bakeng sa mathata a. (Diema 19:3) Dafida o bontšha lebaka ge a re “Jehofa o lokile ditseleng tša gagwe ka moka, gomme o a botega medirong ya gagwe ka moka.” (Psalme 145:17, NW) Modimo ka mehla o dira ka tsela e lokilego, ya toko le ya kgaugelo. Kgaugelo ya gagwe kudu-kudu e bonala tokišetšong ya gagwe ya phološo ka sehlabelo sa Jesu sa topollo. (Ditiro 2:21; 4:8-12) Jehofa gape ‘o a botega medirong ya gagwe ka moka,’ ka mehla ke yo a botegago, yo lerato le yo a sa bebego sefahlego. Ka gona, bjalo ka “baetši ba Modimo” anke re be ba lokilego, ba nago le toka, ba gaugelago, ba sa bebego sefahlego le ba botegago.—Ba-Efeso 5:1, 2; Doiteronomio 32:4; Psalme 7:10; 25:8; Jesaya 49:7; Ditiro 10:34, 35.
15. Ke bjang ‘re biditšego Modimo ka go rereša,’ gomme ke’ng seo se diragetšego ka baka la go dira ga rena bjalo?
15 Ka ge Modimo a lokile e bile a botega, se se dira gore re batamele go yena. Go feta moo, Dafida o a kgonthišetša: “Morêna ó kxaufsi le bohle ba mmitšaxo, le bohle ba e rexo xe ba mmitša ba rereša.” (Psalme 145:18) Ka go kolobetšwa re le badumedi ba ineetšego, re ile ra bitša leina la Jehofa. (Ditiro 8:12; 18:8; Ba-Roma 10:10-15) Ka ge re ile ra batamela kgaufsi le Modimo ka tsela yeo, le yena o a re batamela. (Jakobo 4:8) Re ‘mmitša ka go rereša’ ka gobane re dira seo ka tsela ya therešo, e lego ka Jesu Kriste. Jehofa o tla dula a le kgaufsi ge e ba re mo rapela ka “Môya le ka therešô,” re bontšha ‘tumelo e se nago boikaketši,’ le ‘go gomarela e a sa bonwego bjalo ka ge e ka re a mmona.’ (Johane 4:23, 24; 1 Timotheo 1:5; Ba-Hebere 11:27) Ka gona re ka se rapelele lefeela goba ra swanela go lebana le Sathane re nnoši, eupja re tla tšwela pele go thabela thušo ya Modimo le tlhahlo. (Psalme 65:2; 1 Johane 5:19) A tšhireletšo e kaakang yeo se se e bolelago!
16. Ke ka baka la’ng gomme bjang Jehofa a ‘dirago tše di kganyogwago ke bao ba mmoifago’?
16 Gape re na le setšhabelo sa kgonthe, ka baka la dilo tše dingwe tšeo Jehofa a re direlago tšona. Dafida o itše: “O tla dira tše di kganyogwago ke ba ba mmoifago, gomme o tla kwa sello sa bona sa go nyaka tlhakodišo, gomme o tla ba phološa.” (Psalme 145:19, NW) Jehofa ‘o dira tšeo re di kganyogago’ ka gobane re hlompha Modimo e le ka kgonthe re bile re e-na le poifo e botse ya go boifa go se mo kgahliše. (Diema 1:7) Pelo ya rena e kwago e re tutueleditše go ineela go Jehofa, gomme kgopolo ya rena ke gore, “thatô ya xaxo a e dirwê.” Ka ge e le thato ya gagwe gore re bolele molaetša wa Mmušo, o kgotsofatša kganyogo ya rena ya go dira modiro woo. (Mateo 6:10; Mareka 13:10) Modimo ‘o dira seo re se kganyogago’ ka gobane ga re rapele ka boithati eupja re kgopela dilo ka go dumelelana le thato ya gagwe. O nea seo se dumelelanago le thato ya gagwe e bile e le bakeng sa go re hola.—1 Johane 3:21, 22; 5:14, 15; bapiša le Mateo 26:36-44.
17. Ke ka baka la’ng re ka kgodišega gore ‘go llela ga rena tlhakodišo’ go tla kwewa ke Modimo?
17 Bjalo ka Dihlatse tše botegago tša Jehofa, re ka kgonthišega gape gore ‘go llela ga rena tlhakodišo’ go ka se hlokomologwe. Modimo o ile a phološa Dafida tlalelong gomme a phološa Jesu, a ba a mo tsoša bahung. Mohlang re lebanago le tlhaselo ya lenaba, kudu-kudu nakong ya tlhaselo ya Gogo, re kgonthišege gore Jehofa o tla re phološa. (Hesekiele 38:1–39:16) Ge e le gabotse, nakong lege e le efe ya mathata, ka go swana le Dafida re ka rapela ka kgodišego ka gore: “Morêna nkxauxêlê xobane ke tlaletšwe . . . Ke kwa ba bantši xe ba sêbêlana; thokô tšohle xo na le tše šiišaxo, ka xe ba ntakana ba re ba nkamoxê bophelô. Xomme nna ke botile Wene Morêna; ke re Modimo wa-ka ké Wene.”—Psalme 31:9-14.
18. Re holega bjang ka go tseba gore Jehofa o ‘hlokomela bohle bao ba mo ratago’ eupja o tla ‘fediša ba babe’?
18 Jehofa Modimo o dula a ikemišeditše go thuša. Go bjalo ka ge Dafida a bolela gore: “Bohle ba ba mo rataxo ó ba hlôkômetše; ba babe bôná ó tlo ba fediša.” (Psalme 145:20) Ee, ge e ba re rata Modimo, o tla re šegofatša le go re šireletša. (Numeri 6:24-26) O ‘putsa baikgogomoši ka thata’ eupja o šireletša bahlanka ba gagwe ba ba ikokobeditšego, gomme ga a dumelele selo seo se tlago go ba gobaletša ruri se direga. Ka ge Jehofa a e-na le rena, anke re tieng matla. (Psalme 31:20-24, Phetolelo ya Kgale; Ditiro 11:19-21) ‘Ga go marumo ao a rulelwago go lwa le rena ao a tlago go atlega.’ (Jesaya 54:17; Psalme 9:17; 11:4-7) Yeo ke phihlelo ya bao ba hlatselago lerato la bona la go rata Modimo e le bahlanka ba gagwe ba botegago ba ineetšego. Dihlatse tša Jehofa e le sehlopha di tla phologa ‘masetla-pelo a magolo’ ao a tlišwago godimo ga ba babe. (Kutollo 7:14) A tšhegofatšo e kaakang yeo go lokišwa ga kgang e kgolo ya bogoši bja legohle bja Jehofa e tlago go ba yona go “bohle ba ba mo rataxo”!
Tšwelang Pele le Tumiša Leina le Lekgethwa la Jehofa
19. Ke ka baka la’ng melomo ya rena e ‘bolela theto ya Jehofa’?
19 Dafida o phetha psalme ye e tutuetšago ka mantšu a: “Molomo wa-ka a o bolêlê thêtô ya Morêna, nama yohle a e rêtê ’ina le lekxêthwa l’axwe ka mehla le mehleng ya neng le neng.” (Psalme 145:21) Bjalo ka Dihlatse tša Jehofa, re leboga bogolo bja Modimo, botho bja gagwe, bogoši bja gagwe bjo bo lokilego, thekgo ya gagwe ye e sa felego le tlhokomelo ya gagwe ya ka mehla. Ka gona, ka go swana le Dafida, melomo ya rena e bolela ditumišo tša Modimo. Re tutueletšega go mo nea boineelo bjo bo feletšego, go mo leboga bakeng sa ditšhegofatšo tša gagwe tše dintši le go tumiša ‘leina la gagwe le le tagilego.’—1 Koronika 29:10-13; Ekisodo 20:4-6.
20. Re lebeletše bosafelego, boikemišetšo bja rena mo nakong ye e swanetše go ba bofe?
20 Ka ge Jehofa a re šegofatša letšatši le letšatši, anke re mo tumišeng ka mehla, goba re boleleng ka yena gabotse. Anke re boleleng ditaba tše di lokilego ka phišego bakeng sa go tumiša Modimo, re botšeng ba bangwe gore go se go ye kae ‘nama yohle e tla tumiša leina la gagwe le lekgethwa.’ E tla ba mo go thabišago gakaakang go phela nakong ya ge badudi ka moka ba lefase—ruri diphedi ka moka tše bohlale legohleng—di tlago go opelela Tatago rena wa legodimong ditumišo! (Psalme 148:1-13) Tumišo a e ye go Jehofa bakeng sa go utolla leina la gagwe le go re nea tokelo ya go ba Dihlatse tša gagwe. (Psalme 83:18, Phetolelo ya Kgale; Jesaya 43:10-12, Phetolelo ya Kgale) Eka re ka itshwara ka tsela yeo e swanelago bao ba swarago leina leo e le le lekgethwa le go rapelela gore le kgethagatšwe. (Luka 11:2) Anke re hlankeleng Modimo ka potego, e le gore tshepedišong ya gagwe e mpsha, lentšu la rena le ke le kwewe kopelong ya bao ba tumišago leina le lekgethwa la Jehofa ka mo go sa felego.
Ditlhaloso tša Gago ke Dife?
◻ Ke’ng seo re tlago go se dira ge e ba re rata bogoši bja Jehofa?
◻ Bogoši bja Jehofa bo emetšwe ke eng lehono?
◻ Jehofa o ‘tsoša bjang bohle bao ba bokaletšego’?
◻ Ke ka ditsela dife Modimo a ‘khuporollago seatla sa gagwe gomme a kgotsofatša dikganyogo tša diphedi ka moka’?
◻ Re ka tumiša bjang leina le lekgethwa la Jehofa?
[Seswantšho go letlakala 17]
Ka 1922 mantšu ‘tsebatšang Kgoši le Mmušo’ a ile a tutueletša baemedi ba bogoši bja Jehofa go dira modiro o mogolo