Jehofa o Swanelwa ke go Tumišwa ka mo go sa Felego

“Ke tlo go reta ka matšatši ka moka, ke tlo tumiša leina la gago ka mehla.”​—PSALME 145:​2, “Phetolelo ya Kgale.”

1. Ke ka baka la’ng Dafida a be a e-na le mabaka a mantši bakeng sa go tumiša Jehofa?

DAFIDA, mohlanka yo a botegago wa Jehofa o be a e-na le mabaka a mantši bakeng sa go tumiša Modimo. Kgoši ye yeo e tsebjago gabotse ya Isiraele ya bogologolo e be e tseba ka bogolo bja Jehofa le go loka ga gagwe gomme e lemoga gore bogoši bja Gagwe ke bja ka mo go sa felego. Yo Godimo-dimo o swanetše go tumišwa bakeng sa go kgotsofatša dikganyogo tša diphedi ka moka le bakeng sa go gaugela bahlanka ba gagwe ba botegago.

2. (a) Psalme 145 e rulagantšwe bjang? (b) Ke dipotšišo dife tšeo re tlago go di hlahloba?

² Dafida o ile a nea Modimo tumišo e bjalo go Psalme ya bo-145. Temana e nngwe le e nngwe ya psalme ye ya sereto e thoma ka e nngwe ya ditlhaka tša Sehebere ka go ya ka tatelano ya tšona, gaešita lege tlhaka e nngwe (nun) e ile ya tabogwa. Thulaganyo ya tatelano ya ditlhaka e swanetše go ba e ile ya dira e le thušo ya go gopola. Psalme 145 e tumiša Jehofa, go etša mantšung a rego: “Ka mehla ke tlo Xo rêta, ka xoloka leina la xaxo ka mehla le neng le neng.” (Psalme 145:2) Eupja psalme ye e ka re kgoma bjang? Ke’ng seo e ka se dirago kwanong ya rena le Modimo? Gore re hwetše mabaka, anke re thome ka go hlahloba ditemana 1 go ya go 10.

Bogolo bja Jehofa ga bo Latišišege

3. Ka go swana le Dafida, ke’ng seo re swanetšego go se direla ‘Modimo wa rena yo e lego Kgoši,’ gomme ka baka la’ng?

³ Dafida e be e le kgoši, eupja o ile a amogela bogoši bja Jehofa godimo ga gagwe ge a re: “Ke tlo Xo xodiša, Wene Modimo wa-ka, Wene O lexo Kxoši. Ke tlo rêta leina la xaxo ka mehla le neng le neng.” (Psalme 145:1) Dihlatse tša Jehofa di godiša leina la Modimo le go mo tumiša lefaseng ka bophara ka tlhompho e swanago. Bophelo bja rena bo a humišwa ge re e-ba le karolo modirong o bjalo. Ka go swana le Dafida, re swanetše go kwa le go ikokobeletša Jehofa e le ‘Modimo wa rena yo e lego kgoši.’ Ke ka baka la’ng re sa swanela go se dire bjalo? Ke yena ‘Kgoši ya ka mo go sa felego.’ (Kutollo 15:3) Go feta moo, Dafida o Mogolo, Jesu Kriste, yo a bego a dutše a buša a le Thabeng ya Sione ya legodimong ga e sa le go tloga ka 1914, o re nea mohlala o mobotse-botse wa go ikokobeletša Jehofa, Kgoši ya ka mo go sa Felego.

4. Re ka ‘reta leina la Modimo’ bjang?

⁴ Dafida o itše o tla ‘reta leina la Modimo.’ Motho feela a ka kgona seo bjang? Ee, gare ga dilo tše dingwe, go reta motho o mongwe ke go bolela gabotse ka yena. Go reta leina la Modimo go bontšha gore re na le lerato le matla la go rata yena le leina la gagwe le lekgethwa, Jehofa. Le ka mohla ga re belaele ka Modimo, ga re mo swaye diphošo, ga re belaele go loka ga gagwe. Ke feela ge re e-na le kgopolo yeo, re ineetše go Jehofa, gomme re kgomarela potego re le Dihlatse tša gagwe tše kolobeditšwego mo re ka bolelago gotee le Dafida gore re ‘tla reta leina la Modimo ka mo go sa felego.’ Ge e ba re dula re le leratong la Modimo, re tla amogela mpho ya bophelo bjo bo sa felego gomme ka go rialo ra kgona go tumiša Jehofa ka mo go sa felego.​—Juda 20, 21.

5. Kganyogo ya go tumiša Jehofa ‘letšatši ka moka’ e swanetše go re kgoma bjang?

⁵ Ge e-ba re rata Monei wa rena wa Bophelo e le ka kgonthe, re tla bolela gotee le Dafida gore: “Ke tlo go reta ka matšatši ka moka, [“Letšatši ka moka,” “NW”] ke tlo tumiša leina la gago ka mehla le ka mo go sa felego.” (Psalme 145:2, Phetolelo ya Kgale) Letšatši e ka ba le le nyamišago gakaakang ge le ka ba la feta re sa ka ra tumiša Modimo! Le ka mohla anke re se ke ra swarega kudu goba ra belaela kudu ka dilo tše di bonagalago moo re bilego re lebala go bolela gabotse ka Tatago rena wa legodimong goba go mo rapela letšatši le letšatši. Jesu o be a e-ra gore re swanetše go rapela letšatši le lengwe le lengwe ge a be a bolela thapelong ya gagwe ya mohlala gore: “O re fê lehono boxôbê bya rena bya ka mehla.” (Luka 11:3) Ba bantši bao ba lego tirelong ya nako e tletšego ba tumiša Modimo letšatši le letšatši ge ba e-ba le karolo bodireding bja Bokriste. Eupja go sa šetšwe maemo a rena, dipelo tša rena di swanetše go re tutueletša go tumiša Modimo ka tsela e itšego letšatšing le lengwe le le lengwe. Nagana feela! Ka ge re le Dihlatse tša Jehofa tšeo di nago le kholofelo ya bophelo bjo bo sa felego, re na le tebelelo e botse kudu ya go tumiša leina la gagwe ka mo go sa felego.​—Johane 17:3.

6. Ke ka baka la’ng Jehofa e le “Morêtwa wa paala”?

⁶ Ruri re na le lebaka la go tumiša Modimo letšatši ka moka, ka gobane Dafida o okeditše ka gore: “Morêna ké Yêna yo moxolo, Morêtwa wa paala, yo moxolo a se naxo mo-ka-Yêna.” (Psalme 145:​3) Jehofa ke o mogolo kudu moo e lego gore ga a lekanywe ka selo, gomme bogoši bja gagwe ke bjo bo phethagetšego. Kgoši ya Babele, Nebukadinetsara, o ile a swanelwa ke go dumela gore: “Xa xo e a kaxo phêma letsôxô la xaxwe, le e a kaxo mo re: O dira’ng?” (Daniele 4:​34, 35) Jehofa “ké Yêna Mmoifexi mo xo medimo yohle.” (Psalme 96:4) Ga go makatše ge e le “Morêtwa wa paala.” Ee, mantšu lege e ka ba afe a tumišo ke ao a swanetšego ge go retwa Jehofa! O swanelwa ke tumišo e sa lekanyetšwago, ya ka mo go sa felego.

7. Ke’ng seo se hlatselago gore Modimo ‘ga a na mo-ka Yena’ ka bogolo?

⁷ Jehofa ‘o hloka mo-ka-Yena.’ Go sa šetšwe gore ke o mogolo gakaakang ka mmele, feela bogolo bja gagwe bo ithekgile ka mohuta wa Modimo yo a lego yena. Ee, dilo tšeo a di bopilego di bopilwe wa matete kudu gore re ka di kwešiša, gomme rena ka noši re ‘bopilwe wa matete-tete.’ (Psalme 139:​14; Jobo 9:​10; 37:5) Go feta moo, Jehofa Modimo o itshwara ka tsela e phagamego gakaakang! O boloka dikholofetšo tša gagwe ka go botega le go utolla merero ya gagwe ka lerato. Lega go le bjalo, re ka se tsebe dilo ka moka mabapi le Modimo. Go iša mehleng ya neng le neng, re tla kgona go gola tsebong ya go tseba yena, tlholo ya gagwe le merero ya gagwe.​— Ba-Roma 11:​33-36.

Retang Mediro ya Jehofa

8. (a) Ke bjang “meloko-loko” e ilego ya reta mediro ya Jehofa? (b) Ge re ruta bana ba rena ka mediro le ditiro tša Jehofa, go na le kgonagalo ya gore ba lebelele borapedi bja gagwe bjang? (c) Bjalo ka ‘moloko’ o thabilego, ke’ng seo mašaledi a tloditšwego a se dirilego?

⁸ Go ka bolelwa mo gontši tabeng ya go tumiša Modimo wa rena yo mogolo ka mo go sa lekanywego ka selo moo Dafida a ilego a tutueletšega gore: “Meloko le meloko-loko e tlo tsebanya ditirô tša xaxwe, e tlo botšana tša matla a xaxwe.” (Psalme 145:4) Meloko e latelelanago ya batho e ile ya reta mediro ya Jehofa le go laodiša ditiro tša gagwe tše matla. Ke tokelo e kaakang go laodišetša bao re swarago dithuto tša Beibele tša legae le bona dilo tše! Ka mohlala, re ka ba botša gore Modimo o bopile dilo ka moka. (Genesi 1:​1–2:​25; Kutollo 4:​11) Re ka bolela ka ditiro tša gagwe tše matla nakong ya ge a be a phološa ba-Isiraele bohlankeng Egipita, a ba thuša go fenya manaba a bona a ba-Kanana, a ba phološa go bolayaneng e le meloko kua Peresia le go feta moo. (Ekisodo 13:​8-10; Baahlodi 4:​15; Esitere 9:​15:-17) Le gona, na ga re tutueletšege go botša bana ba rena ka mediro le ditiro tša Jehofa? Ge e ba re nea bana ba rena thuto e bjalo gomme ba re bona re direla Modimo ka lethabo, le bona go na le kgonagalo ya gore ba lebelele borapedi bja gagwe e le bjo bo thabišago gomme ge ba dutše ba gola, ‘go thabela Jehofa e be matla a bona.’ (Nehemia 8:​10; Psalme 78:​1-4) Mašaledi a tloditšwego a bopa ‘moloko’ o tee o thabilego wa Dihlatse tša Jehofa tšeo di tumišago mediro ya Modimo go “lešaba le lexolo” leo e lego karolo ya moloko woo o tlago go dula lefaseng la Paradeise.​—Kutollo 7:9.

9. Ge re naganišiša ka mediro le ditiro tše matla tša Modimo, ke’ng seo re ka kgodišegago ka sona?

⁹ Ge re dutše re naganišiša ka mediro e matla ya Jehofa, re thoma go kgodišega kudu gore “Morêna Yêna a ka se kê a lahla sethšaba sa xaxwe ka ’baka la boxolo bya leina la xaxwe.” (1 Samuele 12:​22; Psalme 94:​14) Ge re lebana le meleko, mathata le tlaišo, re ka ba le khutšo le kholofelo ya gore “khutšô ya Modimo” e tla šireletša dipelo tša rena le matla a go nagana. (Ba-Filipi 4:​6, 7) Ka gona, ke mo go swanetšego gakaakang gore re botše ba bangwe ka Tatago rena yo lerato yo a šireletšago wa legodimong!

10. ‘Mediro ya matete’ ya Jehofa e akaretša’ng, gomme re holega bjang ka go naganišiša ka yona?

¹⁰ Re swanetše go diriša nako re naganišiša ka bogolo bja Jehofa le mediro ya gagwe, ka gobane Dafida o okeditše ka gore: “Ke tlo tumiša letago la borena bja gago, ke bolela tša gago tša matete.” (Psalme 145:5, Phetolelo ya Kgale) Seriti sa

Modimo se a boifiša e bile ga go na seo se lekanago le sona. (Jobo 37:​22; Psalme 148:​13) Ka gona, Dafida o ile a tumiša bogolo bjo bo makatšago bja seriti sa Modimo. Mopsalme gape o ile a iša megopolo le ‘mediro ya matete ya Modimo.’ Mediro ye e akaretša go diriša ga Modimo toka ya gagwe tabeng ya go fediša badira-dibe le go šireletša bao ba boifago Modimo, go etša Meetse-fuleng. (Genesi 7:​20-24; 2 Petro 2:9) Go naganišiša ka dilo tše bjalo go matlafatša kwano ya rena le Jehofa le go re dira gore re kgone go botša ba bangwe ka seriti sa gagwe le mediro ya gagwe ya matete. Matšatšing a 40 a ge Jesu a be a le lešokeng, o ile a matlafatšwa malebana le moleko ka go naganišiša ka dilo tšeo magodimo a bulegilego a di tlišitšego tlhokomelong ya gagwe. (Mateo 3:​13–4:​11) Ka morago ga moo o ile a bolela le ba bangwe ka seriti sa Jehofa le ka mediro ya gagwe ya matete.

11. (a) Ke ka baka la’ng poifo e ile ya wela baagi ba Jeriko? (b) Dihlatse tša Jehofa di anega ‘tša matla a šiišago; a Modimo le “boxolo” bja gagwe ka moya ofe?

¹¹ Ge re bolela ka seriti le mediro ya Modimo, re tutueletša ba bangwe gore ba bolele ka tšona. Dafida o itše: “A ba bolêlê tša matla a xaxo a šiišaxo, ’me ba ke ba anêxêlê batho boxolo bya xaxo.” (Psalme 145:6) Rahaba o ile a bolela ka poifo yeo e ilego ya wela baagi ba Jeriko ge ba be ba e-kwa kamoo Jehofa a ilego a phološa ba-Isiraele ka gona Lewatleng le Lekhubedu gomme a ba dira gore ba fenye dikgoši tše pedi tša ba-Amoro. Go swanetše go ba go be go bolelwa kudu ka ‘ditiro tše bjalo tše šiišago’ kua Jeriko. (Jošua 2:​9-11) Ka kgonthe ‘masetla-pelo a magolo’ ao a batametšego e tla ba a boifišago. (Mateo 24:​21) Eupja dilo tšeo di šiišago kudu go batho bao ba lego kgole le Modimo di tutueletša “Xo boifa Morêna” dipelong tše di lokilego, e lego go mmoifa ka poifo e botse. (Diema 1:7) Ka moya o bjalo wa poifo e nago le tlhompho, Dihlatse tša Jehofa di bolela ka go bonagatšwa ga matla a Modimo. Ee, Modira-Matete o mogolo ke taba-kgolo yeo go boledišanwago ka

yona magareng ga batlotšwa le bagwera ba bona ba lego lefaseng! Gaešita le tlaišo ga e ba thibele go botša ba bangwe ka dilo tše le “boxolo” bja Jehofa.​—Ditiro 4:​18-31; 5:29.

Tumišang Jehofa Bakeng sa Botho bja Gagwe

12. Botho bja Jehofa bo re dira bjang gore re ‘phophome’?

¹² Modimo o swanetše go tumišwa e sego feela bakeng sa bogolo bja gagwe eupja gape le bakeng sa botho le go loka ga gagwe. Dafida o boletše gore: “A ba kwatšê [“ba tla phophoma,” “NW”] ’taba tša boxolo bya botho bya xaxo, ba hlalalêlê xo loka xa xaxo.” (Psalme 145:7) Botho bja Jehofa ke bjo bogolo kudu moo e lego gore re “phophoma” dipolelo tša lethabo mabapi le bjona. Ka Sehebere kgopolo ke ya meetse ao a tšhologago sedibeng. Ka gona, e ka re ka phophoma ka tumišo ya tebogo ya go leboga Modimo bjalo ka noka. (Diema 18:4) Ba-Isiraele ba ile ba lebala botho bja Modimo, e lego seo se ilego sa lebiša go gobaleng ga bona moyeng. (Psalme 106:​13-43) Eupja anke dipelo tša rena di phophome ka tebogo e bjalo ka baka la gore ba bangwe ba sokologa ka morago ga ge ba ithutile kamoo Jehofa e lego yo botho ka gona go Dihlatse tša gagwe tše di ineetšego.​—Ba-Roma 2:4.

13. Go bonagatšwa ga toka le toko tša Modimo go swanetše go ba le mafelelo afe go rena?

¹³ Eka go bonagatšwa ga toka le toko ya Modimo go ka re tutueletša go goeletša ka lethabo. Ge e ba re ikwa ka tsela ye, ka mehla re tla tsoma e sego feela Mmušo wa Modimo pele eupja le toko ya gagwe. Ka mehla re tla nyaka gore boitshwaro bja rena bo tliše tumišo go Jehofa. Ee, re tla ba bagoeledi ba Mmušo ba ba tšwago ka mehla bao ba dirago mo gontši tirelong ya Modimo. Re ka se ke ra lesa go tumiša Jehofa le ka mohla.​—Mateo 6:​33; 1 Ba-Korinthe 15:​58; Ba-Hebere 10:23.

Jehofa ke yo a Gaugelago

14. Ke bohlatse bofe bjo bo lego gona bja gore ‘Jehofa ke yo mabobo le yo kgaugelo’?

¹⁴ Ge a bolela dika tše dingwe tšeo di swanetšego go tumišwa, Dafida o itše: “Morêna ké yo mabobo le kxauxêlô, wa xo se fele pelo, wa botho byo boxolo.” (Psalme 145:8) Modimo ke yo lešoko ka gore ke yo a lokilego le yo botho ka mo go feletšego. (Mateo 19:​17; Jakobo 1:5) O direla gaešita le bao ba sa mo hlankelego dilo tše dibotse. (Ditiro 14:​14-17) Jehofa gape ke yo a gaugelago le yo a kwelago bohloko, “xa a lebale xe re le lerole.” Ga a nyatše pelo e setlegilego goba go dirišana le rena ka go ya ka dibe tša rena, eupja ke yo a gaugelago kudu go feta tate wa motho yo lerato kudu. (Psalme 51:​17; 103:​10-14) Ee, ka pontšho e kgolo kudu ya kgaugelo, o ile a romela Morwa wa gagwe yo a rategago gore a tle a re hwele e le gore re tle re boelanywe le Modimo gomme re latswe kgaugelo ya gagwe e le ka kgonthe!​—Ba-Roma 5:​6-11.

15. Ke ka baka la’ng go ka bolelwa gore Jehofa Modimo o “diega go galefa” gomme ‘o na le botho bjo bogolo’?

¹⁵ Tatago rena wa legodimong o diega go galefa. Ga a bontšhe kgalefo yeo e se nago kgaugelo. Jehofa gape o ‘na le botho bjo bogolo.’ Mo Sehebere se bolela botho bjo bo tšwago leratong gomme bja ikgomaretša selong. Bo dira bjalo go fihlela morero wa bjona ka selo seo o phethega. Phetolelo e nngwe e swanago ke “lerato le botegago.” Gare ga dilo tše dingwe, botho bjo lerato bja Modimo goba lerato le botegago bo bontšhwa ditirong tša go phološa, go boloka, go šireletša, go imolla mathateng, le go ntšhwa sebeng ka topollo. (Psalme 6:4; 25:7; 31:​16, 21; 40:​11; 61:7; 119:​88, 159; 143:​12; Johane 3:​16) Therešo ya gore Jehofa ga se a tliša Haramagedone ka morago ga ‘ntwa ya legodimong’ e dira gore mašaba a kgone go hwetša phologo, e lego pontšho e kgolo ya botho bjo lerato bja Modimo.​—Kutollo 12:​7-12; 2 Petro 3:15.

16. Jehofa o itlhatsetše bjang e le “mo-setša-bohle”?

¹⁶ Ka baka la kgaugelo ya Modimo, go ka bolelwa gore o na le pelo e kgolo. Dafida o itše: “Morêna ké mo-setša-bohle, kxauxêlô ya xaxwe e ukametše tšohle tše a di dirilexo.” (Psalme 145:9) Ee, Modimo e bile yo botho go ba-Isiraele. Ka baka leo, “letšatši la xaxwe ó le hlabišetša ba babe le ba boló; le pula ya xaxwe ó e nešetša baloki le bakxôpô.” (Mateo 5:​43-45) Kua Edene, Jehofa o holofeditše “peu” yeo e bego e tla ba tšhegofatšo. Ka morago o ile a botša Aborahama gore: “Xomme dithšaba ka moka tša lefase di tlo šexofala ka peu ya xaxo.” (Genesi 3:​15; 22:​18) Le gona, botho bja Modimo ke bjo bogolo kudu ‘mehleng ye ya bofelo’ moo o mongwe le o mongwe a ka tlago ‘a tšea meetse a bophelo a sa lefe selo.’ (Daniele 12:​4; Kutollo 22:​17) Jehofa o ikemišeditše go dira botse go dibopiwa ka moka tše bohlale, gomme botho bja gagwe bo swanetše go re batametša go yena ka mehla.

17. Ke ka kgopolo efe ‘kgaugelo ya Jehofa e ukametšego tše a di dirilego ka moka’?

¹⁷ ‘Kgaugelo ya Jehofa e ukametše tšohle tšeo a di dirilego’ ka gobane o dira dijo tše di lekanego bakeng sa diphoofolo le batho. O ‘fepa nama yohle ka dijo.’ (Psalme 136:​25; 147:9) Modimo ga a godiše bahumi gomme a nyatša bao ba gateletšwego, a phagamiša baikgogomoši gomme a nyatša baikokobetši, a phagamiša mašilo gomme a goboša ba bohlale. Batho ba nago le sebe ba dira bjalo eupja e sego Tatago rena wa legodimong yo a gaugelago. (Psalme 102:​17; Tsefanya 3:​11, 12; Mmoledi 10:​5-7) Le gona, kgaugelo, go loka le botho bjo lerato tša Modimo ke tše dikgolo gakaakang ka go dira gore phologo e kgonege ka sehlabelo sa topollo sa Morwa-moratwa wa gagwe!​—1 Johane 4:​9, 10.

Ba Botegago ba Tumiša Jehofa

18. (a) Mediro ya Modimo e mo “reta” bjang? (b) Ke neng moo re swanetšego go tutueletšega go reta Jehofa?

¹⁸ Modimo o swanetše go tumišwa go tšwa lehlakoreng le lengwe le le lengwe. Go bjalo ka ge Dafida a beile se ka gore: “Jehofa, mediro ya gago ka moka e tla go reta, Gomme babotegi ba gago ba tla go tumiša.” (Psalme 145:​10, NW) Mediro ya Modimo ya tlholo e a mo “reta” go etša ge ntlo yeo e agilwego gabotse e tlišetša moagi wa yona tlhompho gomme sebjana se se kgahlišago se tliša tumišo go mmopi wa sona yo a kgonago. (Bapiša le Ba-Hebere 3:4; Jesaya 29:​16; 64:8.) Mediro ya Jehofa ya tlholo ke e mebotse kudu moo e tutueleditšego barongwa gotee le batho go mo tumiša. Barwa ba Modimo ba barongwa ba ile ba opa magofsi ka go hlalala ge a be a bopa lefase. (Jobo 38:​4-7) Dafida o boletše gore: “Maxodimo a re anêxêla boxolo bya Modimo; medirô ya ’atla tša xaxwe e rêtwa ke leratadima.” (Psalme 19:​1-6) Re ka reta Jehofa ka mo go swanetšego ge re bona pekwa e akaletše sebaka-bakeng goba tshepe e namelela mmotong wa dihlare tše di tala. (Jobo 39:​29, Phetolelo ya Kgale; Sefela sa Difela 2:​17) Tumišo ke e swanetšego ge re buna dibjalo goba re thabela dijo le bagwera. (Psalme 72:​16; Diema 15:​17) Mebele ya rena yeo e bopilwego ka mo go makatšago le yona e ka tutueletša dipolelo tša tumišo ya go leboga Modimo.​—Psalme 139:​14-16.

19. “Babotegi” ke bomang, gomme ba dira’ng?

¹⁹ Lehono ba ba tloditšwego ka moya ba Jehofa ba lego mo lefaseng ba a mo tumiša. Ba bolela gabotse ka yena gomme ba hlologetše go bona thato ya gagwe e dirwa mo lefaseng bjalo ka ge e dirwa legodimong. (Mateo 6:​9, 10) Ge batlotšwa ba botša ba bangwe ka mediro e mebotse ya go makatša ya Modimo, lešaba le legolo le arabela ka dipalo tšeo di tšwelago pele di oketšega ka mehla. Ba le gotee le batlotšwa ba ba botegago, ba dira ka phišego e le bagoeledi ba Mmušo. Na tebogo e go tutueletša go ba le karolo ka mehla modirong wo bakeng sa go tumiša Modimo?

20. (a) Leina la Jehofa le tla kgethagatšwa bjang? (b) Ke dipotšišo dife tšeo di šetšego gore di hlahlobje mabapi le Psalme 145?

²⁰ Bjalo ka Dihlatse tša Jehofa, re swana le Dafida tabeng ya go tumiša Modimo. Go rena go kgethagatšwa ga leina la Jehofa le lekgethwa le go le tumiša ke ditaba tše bohlokwa kudu tšeo di swanetšego go hlokomelwa. Ka ge leina la Modimo le tla kgethagatšwa ka Mmušo wa Modimo, thuto ye ya Beibele ya Mmušo ke karolo e kgolo ya ditaba tše di lokilego tšeo re di bolelago. Na Psalme 145 e nea tshedimošo ya moya tabeng ye? Go ahla-ahla ga rena Psalme ye ka moka go tla utolla’ng? Ke ka ditsela dife tše dingwe moo e hlatselago gore Jehofa o swanetšwe ke go tumišwa ka mo go sa felego?

Dihlaloso tša Gago ke Dife?

◻ Re ka tumiša leina la Jehofa bjang?

◻ E mengwe ya mediro ya Modimo yeo e tumišegago ke efe?

◻ Re tla itshwara bjang ge e ba re leboga botho bja Jehofa?

◻ Kgaugelo ya Modimo e bontšhitšwe ka ditsela dife?

[Seswantšho go letlakala 12]

Na o botša bana ba gago ka ditiro tše matla tša Jehofa, bjalo ka ge batswadi ba ba boifago Modimo ba dirile Isiraeleng ya bogologolo?

[Seswantšho go letlakala 15]

Bjalo ka ge ntlo yeo e agilwego gabotse e tumiša moagi wa yona, mediro ya Jehofa ya tlholo le yona e a Mo tumiša