Jehofa o Šegofaditše Maikemišetšo A-ka

KA GE GO ANEGA RICHARD WUTTKE

“Otlile go hwa pele dikgwedi tše tharo di fela!”

“O ra go re’ng?”

Morwarre William a araba ka gore: “Ke boditšwe ke ngaka ye o bego o ile go yona kua Assis.”

EUPJA ke be ke nyaka go phela, e sego go hwa. Ka lekga la mathomo, ke ile ka kgopela thušo go Modimo ka thapelo. Ka mo go thabišago, ka morago ga nywaga e 46, lege ngaka e sa ka ya bolela gore ke be ke swerwe ke eng, nka bolela gore tlhahlobo ya gagwe e be e fošagetše. Lega go le bjalo, poifo e ile ya ntira gore ke nagane ka morero wa-ka bophelong le go nyakega ga go direla Mmopi wa rena.

Lapa le a Khuduga

Ge ke be ke belegwa ka November 11, 1921, batswadi ba-ka ba be ba dula kua Grosen, e lego torotswana yeo e bego e le ka bohlabatšatši bja Jeremane. Ba be ba belegwe ke bafaladi ba Majeremane kua Russia. Eupja ge phetogelo ya Bolshevik e tsenya Bokomanisi ka 1917, bona gotee le ba bangwe bao setlogong sa bona e bego e le Majeremane ba ile ba thopja gomme ba loba dithoto tša bona ka moka. Ka morago ga leeto le letelele ka setimela sa go rwala dithoto, batswadi ba-ka gotee le bana ba bona ba banyenyane ba ile ba fihla mollwaneng wa Jeremane. Lega go le bjalo, ba ile ba ganetšwa go tsena gomme ba swanelwa ke go tšea leeto la go boela Russia. Ge ba fihla fao ba ile ba ganetšwa go tsena gape, ka gona ba swanelwa ke go boela Jeremane. Ka morago ga go kalokana ka dikgwedi tše dintši, mafelelong ba ile ba dumelelwa go tsena ka nageng.

Ge ke be ke e-na le nywaga e lesome, tate o ile a hwa. Nywaga e mebedi ka morago, ka 1933, Hitler o ile a thoma go buša, gomme ke ile ka gapeletšwa go tsenela mokgatlo wa Bafsa wa Nazi. Nakong ya pušo ya Hitler, Majeremane ao a bego a belegetšwe dinageng tše dingwe a be a e-na le mathata, gomme go be go le molaleng gore Jeremane e be e itokišeletša ntwa e nngwe gape. Ka gona re ile ra dira phetho ya gore re khudugele Brazil, re kgothaleditšwe ke ba bangwe bao ba bego ba šetše ba khudugetše gona kua. Re gorogile kua Santos, Brazil, ka May 1936.

Ka morago ga go šoma dikgwedi tše sego kae lefelong la mašemo a kofi, re ile ra reka polasa e nyenyane lefelong leo le nonnego kgaufsi le Maracaí seleteng sa São Paulo. Ge re be re le gare re aga ntlo ya rena, re be re dula lapeng la moruti wa Luthere. O ile a re kgothaletša go tsena kereke ya gagwe eupja ge yena, ka morago le mohlatlami wa gagwe, ba thoma go tsenya dipolitiki ditherong tša bona, re ile ra tlogela kereke.

Lekga la Mathomo ke Kopana le Therešo ya Beibele

E bile ka yona nako ye moo morwarre a ilego a mpotša ka tlhahlobo e boifišago ya ngaka. Ka gona ke ile ka leba São Paulo go ya go nyaka kakanyo ya bobedi. Ge ke be ke le fao, lapa leo ke bego ke dula le lona le ile la etelwa ke mogwera wa lona, e lego Otto Erbert. E be e le o mongwe wa Dihlatse tša Jehofa, gomme o ile a thoma go re neela bohlatse. Eupja lapa ga se la ka la thabela seo a bego a se bolela, gomme ba ile ba tšwa ba hlomagane ka phapošing, ba ntlogela le moeng wa bona.

Otto o ile a boledišana le nna mo e ka bago diiri tše pedi ka taba ya mollo wa dihele; go se hwe ga moya; Modimo wa therešo Jehofa; Mmušo wa gagwe; le ka kholofelo ya go phela ka mo go sa felego lefaseng la paradeise. O ile a nnea pono ya bokamoso bjo bobotse gakaakang! Seo se be se fapane gakaakang le seo ke bego ke ithutile sona Kerekeng ya Luthere! Mafelelong Otto o ile a botšiša: “Na o dumela dithuto tša maaka tša Bojakane goba Beibele?”

Ke ile ka araba ka gore: “Ke dumela Beibele.”

O ile a nkgothatša ka gore: “Gona ithute yona!” gomme a oketša ka gore: “Ge e ba o nyaka go ithuta ka mo go oketšegilego ka yona, e-tla o bonane le nna.” Ka ge ke ile ka rata seo ke bego ke se kwa, kudu-kudu mabapi le go phela lefaseng ka mo go sa felego, ke ile ka ya go yena letšatšing le le latelago. Poledišano yeo ya bobedi e ile ya nkgodiša gore ke hweditše ‘therešo ye e lokollago batho.’ (Johane 8:​32) Ke ile ka tloga ke swere pukwana yeo e rego Health and Life le taletšo ya go ya thutong ya Beibele yeo e swarwago ka Sejeremane.

Go Kgotsofatša Kganyogo Ya-ka e Kgolo

Go sa le bjalo, ke ile ka hwetša kalafo e swanetšego gomme ka kgona go boela gae. Ke ile ka tloga le Otto Erbert go ya maikhutšong. Mma o be a thabišitšwe kudu ke taba ya gore ke be ke ithuta Beibele, e lego puku yeo ka dinako tšohle e bego e dula e le godimo ga tafola ya rena eupja e sa ke e balwa. Ka morago ga gore Otto a boele São Paulo, ke ile ka leka ka matla gore ke sware thuto ya Beibele le lapa lešo mo e ka bago mantšiboeng a mangwe le a mangwe. Ke ile ka thaba kudu ge mma, morwarre Robert gotee le kgaetšedi ya-ka Olga, ka moka ga bona ba amogela molaetša wa therešo. Legae la rena le be le kile la ba lefelo leo batho ba bego ba fela ba bokana go lona ka mehla, eupja ka morago ga dikgwedi tše pedi re nea bohlatse, go be go nyaka go se na batho. O mongwe wa bao ba bego ba e-hlwa ba e-tla ga gešo o ile a re: “Ge le ka tšwela pele ka tsela ye, le tla feleletša le le lefelong la digafa!”

Lega go le bjalo, kganyogo ya-ka ya go hlankela Jehofa e ile ya tšwela pele e gola. Ke ile ka hwetša dipuku tše di oketšegilego gomme ke be ke bala go fihla mašego-gare. Eupja dipuku ka moka di be di ngwadilwe ka Sejeremane, gomme ke ile ka lemoga gore, gore ke tle ke kgone go ruta ba bangwe, ke swanetše go ithuta Sepotokisi. Ka gona, ka 1945, ke ile ka khudugela kua São Paulo go ya go ithuta Sepotokisi. Ke ile ka dula le Otto Erbert, yo ka morago a ilego a nyala kgaetšedi ya-ka Olga.

Ke ile ka thoma go ba gona dibokeng Holong ya Mmušo yeo e bego e le yona feela kua São Paulo gotee le ba bangwe ba ka bago 50. Phuthego yeo e tee mo nakong ye e gotše go ba go fihla go diphuthego tše 510 kua São Paulo e kgolwanyane, yeo e nago le bagoeledi ba Mmušo ba fetago 50 000. Ka January 6, 1946, ke ile ka kolobetšwa go bontšha boineelo bja-ka bakeng sa go dira thato ya Modimo. Ngwageng wona woo ke ile ka ba kopanong ya-ka ya mathomo e kgolo ya Pušo ya Legodimo ya “Ditšhaba tše Thabilego” kua São Paulo. Go be go kgahliša gakaakang go bona batho ba 1 700 ba le gona ka Sontaga! Kopanong ye ke ile ka gahlana le Otto Estelmann, yo a ilego a nkgothatša ka gore: “Richard, o sa le o mofsa; o phetše gabotse; ka gona e-ba mmulamadibogo.”

Ke be ke ile ka nagana ka bodiredi bja nako e tletšego pele, eupja bjale ke ile ka naganišiša kudu ka bjona. Nna gotee le ba bangwe ba babedi re ile ra ipeela nako e tlago ya dikgwedi tše tshelelago bakeng sa go thoma. Ge nako e fihla, ke ile ka ba botšiša: “Na le loketše go tloga?” Go be go se yo a itokišeditšego. Ka gona ke ile ka ba botša gore lega go le bjalo nna ke a thoma. Ba ile ba ntemoša ka gore: “O tlo ba le mathata.” Eupja ke ile ka kgomarela phetho ya-ka. Ka May 24, 1947, ke ile ka newa kabelo ya go ba mmulamadibogo wa ka mehla.

Mejako e Mefsa ya Tirelo e a Bulega

Tšhemo ya-ka e be e le e kgolo kudu, e akaretša dikarolo tša bodulo le tša kgwebo tša São Paulo. Ke ile ka sepediša dipuku le dipukwana tše makgolo-kgolo kgweding e nngwe le e nngwe. Mesong e mengwe ke ile ka tsena ka phapošing e kgolo yeo go yona go bego go šoma banna ba sego kae. Ke ile ka ya go monna wa pele gomme ka mo nea puku ya “The Truth Shall Make You Free.”

O ile a botšiša gore: “O swere dipuku tše kae ka mokotleng wa gago?”

Ka araba ka gore: “Tše ka bago 20.” O ile a di tšea ka moka gomme a nea o mongwe le o mongwe wa banna bao ba lego fao e tee e tee. Kanthe ke meago ya mmasepala!

Lega go le bjalo, seo ke bego ke se thabela kudu e be e le go swara dithuto tša magae tša Beibele. Ka nywaga e mene, ka thušo ya Jehofa, ba 38 go bao ke bego ke ithuta le bona ba ile ba kolobetšwa. Ba sego kae ba ile ba tsenela bodiredi bja nako e tletšego. O mongwe wa bona e be e le Afonso Grigalhunas yo a ilego a dira ka nywaga e fetago e lesome e le mmulamadibogo yo a thušago, go fihla lehung la gagwe ka 1988​—a dira bjalo a sepela ka leoto le le hlometšwego. Lapa le lengwe e be e le la ga Ciuffa. Morwa wa bona Francisco, o ile a dira ka nywaga e mentši e le molebeledi wa mosepedi, gomme kgaetšedi ya gagwe Ângela, e sa dutše e le mmulamadibogo.

Ka 1951 ke ile ka bitšwa gore ke tle ke be molebeledi wa mosepedi. Kabelo ya-ka e be e akaretša dikarolo tše kgolo tša dilete tša Rio Grande do Sul le Santa Catarina. Batho ba dikete-kete ba ma-Yuropa ba be ba dula gona fao ka borwa bja Brazil. Gantši go be go etelwa batho ba dulago mafelong a ka thoko gotee le dihlopha, ka ge go be go e-na le diphuthego tše sego kae feela ka nako yeo. Go be go e-na le dinoka tše dintši eupja maporogo e le a sego kae, e lego seo se bego se nyaka gore ke putle dinoka tše dinyenyane ke boputše sutukheisi ya-ka gomme ke swere motšhene wa-ka wa go tlanya le mokotla wa dipuku ka diatla. Ditsela di be di se tša alwa ka mafsika gomme di be di tletše mekoti. Gore ke šireletše diaparo tša-ka maroleng, ke ile ka apara lešela le bohwefo la go šireletša diaparo. Se se ile sa dira gore ba bangwe ba nagane gore ke moruti wa bona e mofsa, gomme ba be ba leka go nkatla seatleng.

Go Lwela Dikgahlego Tša Mmušo

Ge ke dutše ke leka go lebeledišiša mathata gabotse, ke be ke latela molao wo wa motheo: Ge e ba batho ba bangwe ba kgona go phela kgole gakaakaa le ditoropo, ba kgona go sepela ditselaneng tše le go sela dinoka tše, ke ka baka la’ng nna ke swanetše go palelwa ke go dira se se swanago, kudu-kudu ka ge ke swanetše go tliša molaetša o bohlokwa gakaaka?

Ditorotswaneng tše dinyenyane gantši go be go rotoga mathata a mohuta o fapanego. Ka mohlala, ka nako e nngwe re ile ra dira ditokišetšo tša go ba le seboka sekolong se sengwe sa moo kgaufsi le phaka. Ka lehlakoreng le lengwe la phaka go be go e-na le para e nyenyane le kereke ya Katholika. Ge ke bona morutiši a sa tle go bula sekolo, ke ile ka dira phetho ya go neela polelo phakeng. Kapejana ka morago ga gore polelo e thome, banna ba tshelelago ba ile ba tšwa ka pareng gomme ba thoma go hlaba lešata le go šupašupa. Re ile ra kwa ka morago gore ba be ba lefša ke moruti gore ba dire bjalo.

Ke ile ka thoma go bolelela godimo, ke bolela ke lebišitše go bona. Ba ile ba kgaotša, gomme o mongwe a re: “O bolela ka Modimo. Ke ka baka la’ng moruti a re ke wa Diabolo?” Ge moruti a bona gore banna ba ga ba senye seboka, o ile a tsena ka koloing ya gagwe gomme a dikologa phaka a goeletša gore: “Mang le mang yo e lego Mokatholika ga se a swanela go ba sebokeng se!” Ga go na motho yo a ilego a šutha, gomme seboka se ile sa phethwa gabotse.

Kua Mirante do Paranapanema, São Paulo, ke ile ka etela molaodi wa maphodisa gore ke hlalose mohuta wa modiro wa rena le go kgopela gore re diriše holo bakeng sa polelo ya phatlalatša. O ile a re rulaganyetša gore re diriše holo ya dipapadi. Re ile ra mmotša le gore re be re tla lokišetša dipampišana tša go laletša bakeng sa go tsebiša polelo. O ile a botšiša gore: “Le tla di aba karolong efe ya toropo?” Ge re mmoditše, o ile a kgopela gore ba bangwe ba di abe karolong e nngwe ya toropo. Ka Sontaga o ile a tla polelong a e-na le maphodisa a mangwe a mabedi, ka ge a be a re ke bakeng sa “go boloka taolo.”

O ile a botšiša gore: “Na o nyaka gore ke role polelo ya gago?”

Ke ile ka araba ka gore: “Nka leboga, eupja e re ke hlalose tsela yeo re rolago diboledi tša rena ka yona.” Ka morago ga gore a nthole, o ile a dula sethaleng gore a theetše. Ruri e be e le batheetši ba ba itshwerego setho. Ga se ra ka ra ba le mathata lefelong leo ka ge re be re e-na le maphodisa a mabedi lebating le molaodi sethaleng!

Ka March 1956 ke ile ka kgethwa go ba molebeledi wa selete gomme ka direla dikopano Brazil ka moka. Maeto ao ke bego ke a tšea e be e le a matelele kudu. Ka nako e nngwe go ile gwa ntšea matšatši a mararo go tloga kopanong e nngwe go ya go e nngwe. Karolong ya ka leboa ya naga, ka nako e nngwe ke be be sepela ka karikana. Di be di se na mafasetere, ka gona di tsenwa ke moya gabotse; e lego kakanyo e botse ka ge re be re nametša dikgogo le dikolobe!

Gilead e Matlafatša Boikemišetšo Bja-ka

Ke ile ka thaba gakaakang ge ka 1958 ke e-ba gona Sekolong sa Beibele sa Watchtower sa Gilead! Sehlopha sa rena se ile sa aloga nakong ya kopano ya kua Yankee Stadium le Polo Grounds selemong seo, moo batho ba 253 922 ba tšwago dinageng tše 123 tše fapa-fapanego ba ilego ba ba gona polelong ya phatlalatša. Go be go le botse gakaakang! Ka morago ke ile ka boela Brazil, ke ikemišeditše go feta lege e ka ba neng pele go tšwela pele ke goeletša Mmušo wa Jehofa.

Ka 1962 ke ile ka nyala Ruth Honemann, yo a bego a šetše a dirile ka nywaga e tshelelago e le moromiwa Brazil. Ga e sa le go tloga ge re nyalana, ke tšwetše pele go thabela ditokelo tše di oketšegilego tša tirelo, go ruta Sekolong sa Bodiredi sa Pušo ya legodimo le Sekolong sa Tirelo sa Bobulamadibogo, gaešita le go eta pele go rulaganyetšeng dikopano tša setšhaba le tša ditšhaba ka moka gaešita le go agweng ga Holo ya mathomo ya Kopano ya São Paulo.

Mo nakong ye re thabela tokelo e kgolo kudu ya mediro ya rena ya pušo ya legodimo re le ditho tša lapa la Bethele la Brazil. Ge ke gadima morago nywageng e fetago 40 ya tirelo ya nako e tletšego, yeo go e 35 ya yona ke bego ke le molebeledi wa mosepedi, nka bolela gore e be e tletše ka mediro e thabišago le e holago. (Diema 10:​22) Ke ithutile mo gontši phuthegong ya Jehofa, go akaretša le go bontšha kwelobohloko, go ba mogwera e sego molaodi, le go se be yo a swaregilego kudu go ka hlokomela dinyakwa tša ba bangwe. Go ruma taba ye, ke rata go botša kudu-kudu bafsa, seo Ngwanabo rena Estelmann a ilego a se botša nna: “Le ba bafsa; le phetše gabotse; ka gona e-bang babulamadibogo!”

[Seswantšho go letlakala 29]

Bethele ya Brazil, legae la rena la mo nakong ye