Ekišang Kgaugelo ya Modimo Lehono

“A nke re weleng diatleng tša Morêna, ka xobane kxauxêlô ya xaxwe ké e kxolo.”—2 SAMUELE 24:14.

1. Dafida o ile a ikwa bjang ka kgaugelo ya Modimo, gona ka baka la’ng?

KGOŠI DAFIDA o be a tseba go tšwa phihlelong gore Jehofa o gaugela kudu go feta batho. Ka go kgonthišega gore ditsela tša Modimo ke tše di phalago tšohle, Dafida o ile a hlologela go ithuta ditsela tša Gagwe le go sepela therešong ya Gagwe. (1 Koronika 21:13; Psalme 25:4, 5) Na o ikwa ka tsela yeo Dafida a ikwelego ka yona?

2. Ke keletšo efe yeo Jesu a e neilego go Mateo 18:15-17 mabapi le go rarolla taba ya sebe se segolo?

² Beibele e re lemoša ka kgopolo ya Modimo gaešita le ditabeng tšeo di lego mabapi le seo re swanetšego go se dira ge motho o mongwe a re fošeditše. Jesu o boditše baapostola ba gagwe bao ka morago e bego e tla ba balebeledi ba Bakriste gore: “Gomme ge ngwaneno a senya go wene, e-ya o mo sole o na le yena a nnoši; e tlo re ge a go kwa, o tlo ba o ruile ngwaneno.” Phošo yeo e bego e akaretšwa mo e be e se phošo feela yeo e sa rego selo, eupja ke sebe se segolo, se se bjalo ka boradia goba go neanya. Jesu o itše ge e ba kgato ye e sa rarolle bothata le gona ge e ba dihlatse di le gona, gona yo a fošeditšwego o swanetše go ya le tšona bakeng sa go hlatsela gore phošo e dirilwe. Na ye ke kgato ya mafelelo ya go lokiša taba? Aowa. “Ge [modira-dibe] a gana go kwa bona, o botše phuthego, gomme ge a gana go kwa le yona phuthego, a a be go wene bjalo ka moheitene le wa lekgetho.”—Mateo 18:15–17, PK.

3. Jesu o be a bolela’ng ge a be a re mofoši yo a sa sokologego o be a swanetše go ba “bjalo ka moheitene le wa lekgetho”?

³ Ka ge e be e le ba-Juda, baapostola ba be ba tla kwešiša seo se bego se bolelwa ke go swara modira-dibe “bjalo ka moheitene le wa lekgetho.” Ba-Juda ba be ba široga go gwerana le batho ba ditšhaba gomme ba be ba nyatša ba-Juda bao ba bego ba dira e le balekgetho ba Roma.a (Johane 4:9; Ditiro 10:28) Ka go rialo, Jesu o be a eletša barutiwa gore ge phuthego e ntšhitše modira-dibe, ba be ba swanetše go kgaotša go gwerana le yena. Bjale seo se dumelelana bjang le go dula ga Jesu le balekgetho ka dinako tše dingwe?

4. Go ya ka mantšu a gagwe go Mateo 18:17, ke ka baka la’ng Jesu a be a ka ba le ditirišano le balekgetho le badira-dibe ba bangwe?

⁴ Luka 15:1 e re: “Ba lekxêthô le ba-dira-dibe bohle, e be e le bôná ba ba bexo ba mmatamêla ba mo kwa.” E be e se molekgetho o mongwe le o mongwe goba modira-dibe o mongwe le o mongwe yo a bego a le gona moo, eupja e bile “bohle” ka kgopolo ya gore e be e le ba bantši. (Bapiša le Luka 4:40.) Bafe? Bao ba bego ba rata gore dibe tša bona di lebalelwe. Ba bangwe ba bao e be e le bao ba ilego ba kgahlwa ke molaetša wa Johane Mokolobetši wa tshokologo. (Luka 3:12; 7:29) Ka gona, ge batho ba bangwe ba be ba e-tla go Jesu, go ba ruta ga gagwe go be go sa fapane le keletšo ya gagwe e lego go Mateo 18:17. Ela hloko gore ‘balekgetho ba bantši le badira-dibe [ba kwele Jesu] gomme ba mo latela.’ (Mareka 2:15) Ba e be e se bao ba bego ba rata go tšwela pele ka tsela e mpe ya bophelo gaešita le go gana thušo lege e ka ba efe. Go e na le moo, ba kwele molaetša wa Jesu gomme dipelo tša bona di ile tša kgomega. Lege ba be ba sa dutše ba dira dibe, mo gongwe ba bile ba leka go dira diphetogo, “modiša yo boló” ka go ba ruta ga gagwe o be a ekiša Tatagwe yo a gaugelago.—Johane 10:14.

Go Lebalela ke Tlamo ya Mokriste

5. Boemo bja Modimo bja motheo mabapi le tebalelo ke bofe?

⁵ Re na le dikgonthišetšo tše tše lerato tša go rata go lebalela ga Tatago rena: “Xe re ipolêla dibe tša rena, xôna ka xe Yêna è le wa pôtêxô le tokô, ó re lebalêla dibe a re hlatswa bokxôpô ka moka.” “Ke Le ngwalêla ditaba tšé, xore Le se kê la dira dibe. Xe xo ka ba le e a diraxo dibe, xôna re na le Morapeledi xo Tata wešo, Jesu Kriste Yêna Moloki.” (1 Johane 1:9; 2:1) Na tebalelo e a hwetšagala bakeng sa motho yo a kgaotšwego?

6. Ke bjang motho yo a kgaotšwego a ka lebalelwago le go bušetšwa?

⁶ Ee. Ka nako ya ge bagolo bao ba emelago phuthego ba kgaola motho ka baka la sebe seo a sa itsholego go sona, ba mo hlalosetša gore go a kgonega go sokologa le go lebalelwa ke Modimo. A ka ba gona dibokeng Holong ya Mmušo moo a tlago go kwa melao ya Beibele yeo e ka mo thušago gore a sokologe. (Bapiša le 1 Ba-Korinthe 14:23-25.) Ge nako e dutše e e-ya, a ka rata go bušetšwa ka phuthegong e hlwekilego. Ka morago ge bagolo ba kopana le yena ba ka rata go bona ge e ba a sokologile gomme a tlogetše tsela ya gagwe ya sebe. (Mateo 18:18) Ge e ba go le bjalo, a ka bušetšwa ka go dumelelana le mohlala wo o lego go 2 Ba-Korinthe 2:5-8. Ge e ba e le nywaga e mentši a kgaotšwe, gona o tla swanelwa ke go dira boiteko bjo bo tiilego bja gore a dire tšwelopele. Le gona, ka morago ga fao a ka nyaka thušo e kgolo bakeng sa go aga tsebo ya gagwe ya Beibele le tebogo e le gore a ka ba Mokriste yo a tiilego moyeng.

Go Boela go Jehofa

7, 8. Ke mohlala ofe woo Modimo a ilego a o nea mabapi le batho ba gagwe bao ba bego ba thopilwe?

⁷ Eupja na bagolo ka bobona ba ka thoma go ikopanya le motho yo a kgaotšwego? Ee. Beibele e bontšha gore kgaugelo e bontšhwa e sego feela ka go kgaotša go otla eupja gantši ka ditiro tše dibotse. Re na le mohlala wa Jehofa. Pele a ka iša batho ba gagwe bao ba sa botegego bothopja, o ile a bolela e sa le pele kholofelo ya go boa ga bona, ka gore: “Hee Jakobo! Hee Isiraele! Se lebalê xe O le mohlanka wa-ka; . . . Dikaroxô tša xaxo ke di široša boka leru; dibe tša xaxo ke di fediša wa meuwane. Boêla xo Nna, xobane ke Xo lopolotše.”—Jesaya 44:21, 22.

⁸ Ka gona, nakong ya go thopja Jehofa o ile a gata megato e tšwelago pele, a dirišana le bona gabotse. O ile a romela baporofeta, e lego baemedi ba gagwe, go laletša ba-Isiraele gore ba ‘mo tsome le go mo hwetša.’ (Jeremia 29:1, 10-14) Go Hesekiele 34:16, o ile a itshwantšha le modiši gomme batho ba setšhaba sa Isiraele a ba swantšha le dinku tše di lahlegilego: “Tše di timetšexo ke tlo di nyaka; tše di tšitlanexo ke tlo di buša.” Go Jeremia 31:10, Jehofa gape o dirišitše seswantšho sa go ba ga gagwe modiši wa ba-Isiraele. Aowa, ga se a ka a itshwantšha le modiši yo a emego lešakeng la dinku yo a emetšego gore nku yeo e lahlegilego e boe; go e na le moo, o ipontšhitše e le modiši yo a tsomago tšeo di lahlegilego. Ela hloko gore gaešita lege batho ka kakaretšo ba be ba sa sokologe ba bile ba le bothopja, Modimo o ile a dira maiteko a pele a go tsoma gore ba boe. Le gona ka go dumelelana le Maleaki 3:6, Modimo o be a ka se ke a fetola tsela ya gagwe ya go dirišana thulaganyong ya Bokriste.

9. Mohlala wa Modimo o ile wa latelwa bjang ka phuthegong ya Bokriste?

⁹ Na se ga se bontšhe gore go ka ba bohlale go ba ba pele ba go gata megato mabapi le bao ba kgaotšwego bao mo nakong ye ba ka bago ba sokologile? Gopola gore moapostola Paulo o laetše gore go tlošwe motho o mobe phuthegong ya Korinthe. Ka morago o ile a kgothaletša phuthego go tiiša lerato la yona go monna yoo ka baka la go sokologa ga gagwe, e lego seo se dirilego gore ka morago a bušetšwe ka phuthegong.—1 Ba-Korinthe 5:9-13; 2 Ba-Korinthe 2:5-11.

10. (a) Ke eng seo se swanetšego go tutuetša boiteko lege e le bofe bja go kopana le batho ba bangwe bao ba kgaotšwego? (b) Ke ka baka la’ng ba leloko bao e lego Bakriste e ka se ke ya ba bona ba pele ba go ikopanya le batho ba bjalo?

¹⁰ Encyclopedia yeo e tsopotšwego pejana e itše: ‘Lebaka la motheo la go kgaola e be e le go šireletša boemo bja sehlopha: “Komelo e nyenyane e bediša hlama ka moka” (1 Ba-Kor. 5:6). Tutuetšo ye ke yeo e lego molaleng ka ditemaneng tše dintši-ntši tša Beibele le ditemaneng tšeo di sa akaretšwego mangwalong ao a ngwadilwego ka go ya ka molao wa kereke, eupja go kgomega ka motho, gaešita le ka morago ga go rakwa, e be e le wona motheo wa kgopelo ya Paulo go 2 Ba-Kor. 2:7-10.’ (Mongwalo o sekamego ke wa rena.) Ka gona, go kgomega ga mohuta wo ka mo go kwalago go swanetše go bontšhwa ke badiši ba mohlape lehono. (Ditiro 20:28; 1 Petro 5:2) Bao pele e bego e le bagwera gaešita le ba meloko ba ka holofela gore motho yo a kgaotšwego o tla boa; lega go le bjalo, ka baka la go hlompha taelo yeo e lego go 1 Ba-Korinthe 5:11, ga ba gwerane le motho yo a kgaotšwego.b Ba tlogelela taba go badiši bao ba kgethilwego e le gore ba ka gata mogato wa pele wa go bona ge e ba motho yo bjalo a rata go boa.

11, 12. Ke batho ba mohuta ofe bao ba kgaotšwego bao gaešita le bagolo ba sa swanelago go kopana le bona, eupja ke ba mohuta ofe bao ba ka ba etelago?

¹¹ E tla ba mo go sa swanelago gaešita le bakeng sa bagolo go gata mogato wa pele bakeng sa ba bangwe bao ba kgaotšwego, ba bjalo ka bahlanogi, bao ba ‘bolelago ditaba dišele gore ba goge barutiwa ba tloge le bona.’ Ba ke ‘baruti ba maaka ba go tliša dikarogo le ba go fora ka dipolelo tša maano.’ (Ditiro 20:30; 2 Petro 2:1, 3) Le gona Beibele le gatee ga e thekge taba ya go tsoma batho ba ba kgaotšwego bao e lego bo-radintwa le bao ba kgothaletšago sebe.—2 Ba-Thesalonika 2:3; 1 Timotheo 4:1; 2 Johane 9-11; Juda 4, 11.

¹² Lega go le bjalo, batho ba bantši bao ba kgaotšwego ga ba bjalo. Mohlomongwe motho a ka ba a tlogetše phošo e kgolo yeo a kgaotšwego ka baka la yona. Mohlomongwe o mongwe a ka ba a be a diriša motšoko goba nakong e fetilego a ka ba a be a e-nwa kudu eupja mo nakong ye a sa leke go tutueletša ba bangwe go dira sebe. Gopola gore gaešita le pele ga ge ba-Isiraele bao ba thopilwego ba ka boela go Modimo, o ile a romela baemedi go ba kgothaletša gore ba boe. Beibele ga e re botše ge e ba Paulo goba bagolo kua phuthegong ya Korinthe ba ile ba gata megato ya pele bakeng sa go ya go hlola monna yo a kgaotšwego. Nakong ya ge monna yoo a sokologile gomme a tlogetše boitshwaro bja gagwe bjo bo gobogilego, Paulo o ile a laela phuthego go mo amogela.

13, 14. (a) Ke’ng seo se bontšhago gore ba bangwe bao ba kgaotšwego ba ka arabela megatong ya pele ya go bontšha kgaugelo? (b) Sehlopha sa bagolo se ka rulaganya bjang bakeng sa gore go be le go kopana?

¹³ Mehleng ya morago bjale go bile le dinako tšeo ka tšona go ilego gwa direga gore mogolo a kopane le motho yo a kgaotšwego.c Mo go bego go nyakega, modiši o ile a akaretša ka boripana megato yeo e swanetšego go tšewa bakeng sa go bušetšwa. Batho ba ba ba bjalo ba ile ba sokologa gomme ba bušetšwa. Mafelelo a bjalo a thabišago a bontšha gore go ka ba le batho bao ba kgaotšwego goba bao ba ikarotšego bao ba ka amogelago patamelo e nago le kwelobohloko yeo e dirwago ke badiši. Eupja bagolo ba ka swara taba ye bjang? Bonyenyane gatee ka ngwaga, sehlopha sa bagolo se swanetše go nyakišiša ge e ba go e-na le batho ba ba bjalo bao ba dulago tikologong ya bona.d Bagolo ba tla lebiša tlhokomelo go bao ba kgaotšwego ka nako e dirago ngwaga o tee. Go ya ka maemo, ge e ba go nyakega, ba ka roma bagolo ba babedi (kudu-kudu bao ba tlwaelanego le boemo) go yo etela motho yo bjalo. Ga go na ketelo yeo e tlago go dirwa go bao ba bontšhago kgopolo ya go nyatša goba bao ba dirilego gore go tsebje gore ga ba nyake thušo.—Ba-Roma 16:17, 18; 1 Timotheo 1:20; 2 Timotheo 2:16-18.

¹⁴ Badiši ba babedi ba ka letša mogala gomme ba kgopela go dira ketelo e kopana, goba ba ka dira ketelo e kopana ka nako e swanetšego. Nakong ya ketelo, ga se ba swanela go ba bogale gaešita le go ba bodutu, eupja ka borutho ba swanetše go bontšha go kgomega go go nago le kwelobohloko. Go e na le go tsupulla taba e fetilego, ba ka bolela ka ditemana tša Beibele tše bjalo ka Jesaya 1:18 le 55:6, 7 le Jakobo 5:20. Ge e ba motho a rata go boela mohlapeng wa Modimo, ba ka mo hlalosetša ka botho megato yeo a swanetšego go e tšea, e bjalo ka go bala Beibele le dipuku tša Mokgatlo wa Watch Tower le go ba gona dibokeng Holong ya Mmušo.

15. Ke’ng seo bagolo bao ba kopanago le motho yo a kgaotšwego ba swanetšego go se gopola?

¹⁵ Bagolo ba ba swanetše go ba le bohlale le temogo bakeng sa go bona ge e ba go e-na le sešupo sa go bontšha tshokologo le ge e ba ketelo e nngwe gape e ka nyakega. Ee, ba swanetše go gopola gore batho ba bangwe bao ba kgaotšwego le ka mohla ba ka se ke ba ‘išwa tshokologong.’ (Ba-Hebere 6:4-6; 2 Petro 2:20-22) Ka morago ga ketelo, bagolo ba babedi ba tla begela Komiti ya Tirelo ya Phuthego. Ka morago bona ba tla tsebiša sehlopha sa bagolo sebokeng sa bona se se latelago. Go gata ga bagolo mogato wa pele wa kwelobohloko go tla ba go bontšhitše pono ya Modimo, e rego: “Boêlang xo Nna, ke tseb’o boêla xo lena!—Ó r’yalo Morêna wa mašaba.”—Maleaki 3:7.

Dithuto tše Dingwe tša Kgaugelo

16, 17. Re swanetše go lebelela bjang Bakriste bao e lego ba leloko la gabo motho yo a kgaotšwego?

¹⁶ Go thwe’ng ka ba bangwe ba rena bao e sego balebeledi gomme ba ka se kego ba gata mogato o bjalo wa pele mabapi le batho bao ba kgaotšwego? Re ka dira eng ka go dumelelana le thulaganyo ye le tabeng ya go ekiša Jehofa?

¹⁷ Ge feela motho a kgaotšwe goba a ikarotše, re swanetše go latela keletšo ye: “Le se kê la hlakana le motho yo Le rexo ké ngwana weno, moka a ba seotswa, a ba wa mexabaru, a ba wa medimo e šele, a ba wa maroxa, a ba letaxwa, a ba mohlakodi. Motho wa mohuta woo, le xo ja Le se kê la ja le yêna.” (1 Ba-Korinthe 5:11) Eupja taelo ye ya Beibele ga se ya swanela go kgoma pono ya rena ka ditho tša lapa la Bokriste tšeo di dulago le motho yo a kgaotšwego. Ba-Juda ba bogologolo ba itshwere ka tsela e šoro kudu go balekgetho moo e lego gore lehloyo la bona le ile la ba la fetela gaešita le lapeng la molekgetho. Jesu ga se a ka a thekga seo. O itše modira-dibe yo a ganago thušo o swanetše go swarwa “bjalo ka moheitene le wa lekgetho”; ga se a ka a re ditho tša lapa la Bokriste di be di swanetše go swarwa ka tsela yeo.—Mateo 18:17, PK.

18, 19. Ke ditsela dife tše dingwe tšeo ka tšona re ka bontšhago Bokriste bja rena go ba leloko la gabo motho yo a kgaotšwego ba ba botegago?

¹⁸ Re swanetše go thekga ka kudu ditho tša lapa tšeo e lego Bakriste ba botegago. Ba ka ba ba šetše ba lebane le manyami le ditšhitišo ka baka la go dula ka gae le motho yo a kgaotšwego yo a ka šitišago e le ka kgonthe mediro ya bona ya moya. Mohlomongwe a ka nyaka gore Bakriste ba se etele ka gae; goba ge e ba ba e-tla go bona ditho tša lapa tše botegago, a ka bontšha lenyatšo ka go se katologe baeti. A ka šitiša gape le maiteko a lapa a go ya dibokeng ka moka tša Bokriste le dikopanong. (Bapiša le Mateo 23:13.) Ruri re swanetše go gaugela Bakriste bao ba imetšwego ka tsela yeo.—2 Ba-Korinthe 1:3, 4.

¹⁹ Tsela e nngwe yeo ka yona re ka bontšhago kgaugelo yeo e nago le kwelobohloko ke ka ‘go bolela mantšu a khomotšo’ le go ba le dipoledišano tšeo di kgothatšago le batho bao ba botegago ka lapeng. (1 Ba-Thesalonika 5:14, NW) Gape go na le dibaka tše dibotse tša go nea kgothatšo pele le ka morago ga diboka, ge re le tirelong ya tšhemo goba ka dinako tše dingwe ge re le gotee. Ga re a swanela go bolela ka go kgaolwa eupja re ka bolela ka dilo tše dintši tšeo di agago. (Diema 25:11; Ba-Kolose 1:2-4) Gaešita lege bagolo ba tla tšwela pele ba diša Bakriste ka lapeng, re ka hwetša gore le rena gape re ka etela ka ntle le go ba le ditirišano le motho yo a kgaotšwego. Ge motho yo a kgaotšwego a ka araba ge re etela goba re letša mogala, gona re ka fo kgopela Mokriste wa leloko yo re mo nyakago. Ka dinako tše dingwe ditho tša lapa la Bokriste di ka laletšwa lapeng la rena bakeng sa bogwera. Taba ke gore: Bona—ba bafsa le ba bagolo—ke bahlanka-gotee le rena, ditho tše rategago tša phuthego ya Modimo, ga se ba swanela go beelwa thoko.—Psalme 10:14.

20, 21. Re swanetše go ikwa bjang gaešita le go itshwara bjang ge e ba motho a bušeditšwe?

²⁰ Karolo e nngwe yeo re ka bontšhago kgaugelo go yona e itšweletša ge motho yo a kgaotšwego a bušetšwa. Diswantšho tša Jesu di gatelela lethabo leo le bago gona legodimong ge ‘modira-dibe o tee a sokologa.’ (Luka 15:7, 10) Paulo o ile a ngwalela ba-Korinthe mabapi le monna yo a bego a kgaotšwe, ka gore: “Ké xôna Le ka upya la mo lebalêla, la mo homotša, xore motho eo a se tlo metšwa ke nyamô xe e mo xolêla. Kè ka ’baka leo ke Le kxopêlaxo, xore Le mo dirê ka leratô.” (2 Ba-Korinthe 2:7, 8) Anke re dirišeng keletšo yeo ka moya o fodilego le ka lerato matšatšing le dibekeng tšeo ka morago ga tšona motho yoo a bušeditšwego.

²¹ Seswantšho sa Jesu sa morwa wa lehlaswa se rotoša kotsi yeo re swanetšego go e široga. Morwa o mogolo ga se a ka a thabela go boa ga morwa wa lehlaswa eupja o ile a kgopišega. Anke re se ke ra ba bjalo, ra boloka sekgopi sa phošo e fetilego goba ra ba le mona ka baka la go bušetšwa ga motho yoo. Go e na le moo, pakane ya rena ke go swana le tate, yo a swantšheditšego karabelo ya Jehofa. Tate o ile a thabela gore morwa wa gagwe yo a bego a timetše, gomme go bonagala eka o hwile, o ile a hwetšagala goba o ile a phela. (Luka 15:25-32) Ka go rialo, re tla bolela ka bolokologi le ngwanabo rena yo a bušeditšwego goba ka ntle le moo ra mo kgothatša. Ee, re swanetše go dira gore go bonagale gore re bontšha kgaugelo go etša Tate wa rena wa legodimong yo a lebalelago le yo a gaugelago.—Mateo 5:7.

22. Go ekiša ga rena Jehofa Modimo go akaretša eng?

²² Ga go na pelaelo ya gore ge e ba re rata go ekiša Modimo wa rena, re swanetše go bontšha kgaugelo ka go dumelelana le ditaelo tša gagwe le toka ya gagwe. Mopsalme o mo hlalosa ka tsela ye: “Morêna ké yo mabobo le kxauxêlô, wa xo se fêle pelo, wa botho byo boxolo. Morêna ké mo-setša-bohle, kxauxêlô ya xaxwe e ukametše tšohle tše a di dirilexo.” (Psalme 145:8, 9) A mohlala o lerato wo Bakriste ba swanetšego go o ekiša!

[Mengwalo ya tlase]

Na o Etše Hloko Dintlha tše?

◻ Ba-Juda ba ile ba swara balekgetho le badira-dibe bjang, eupja ke ka baka la’ng Jesu a ile a ba le ditirišano le ba bangwe ba batho ba bjalo?

◻ Ke thekgo efe ya Mangwalo yeo e lego gona mabapi le go gata mogato wa pele wa kwelobohloko go ba bantši bao ba lahlegilego?

◻ Ke bjang sehlopha sa bagolo se ka gatago mogato o bjalo wa pele, gona go bomang?

◻ Re swanetše go bontšha kwelobohloko bjang go bao ba bušeditšwego gotee le go ba leloko la gabo batho bao ba kgaotšwego?

[Lepokisi go letlakala 23]

Motho lege e ka ba ofe yo e bego e le karolo ya phuthego ya Modimo e hlwekilego le e thabilego eupja gona bjale a kgaotšwe goba a ikarotše ga se a swanela go dula a le boemong bjo bjalo. Go e na le moo, motho yo bjalo a ka sokologa gomme a gata mogato wa pele ka go boledišana le bagolo ba phuthego. Tsela ya go boela e bulegile.

[Picture Credit Line on page 24]

Garo Nalbandian