Poledišano Bodireding bja Bokriste

“Ké xôna yang Le dirê dithšaba ka moka barutiwa.”​—MATEO 28:19.

1. Ke thomo efe ya Kriste yeo e bolelago go nyakega ga go fetiša molaetša?

THOMO ya Jesu e tsopotšwego ka mo godimo e re hlohla gore re boledišane le batho bodireding bja rena ge re dutše re e-ya ka ntlo le ntlo, re dira maeto a go boela le go ba le karolo dibopegong tše dingwe ka moka tša go bolela ditaba tše di lokilego tša Mmušo. Thomong yeo go akaretšwa boikarabelo bja go tsebatša therešo mabapi le Jehofa Modimo, Jesu Kriste le Mmušo wa Mesia, woo Jesu a bušago go wona gona bjale.​—Mateo 25:​31-33.

2. Re nyaka eng gore re fetiše molaetša ka mo go atlegago?

² Re ka fetiša bjang molaetša ka katlego? Sa pele, re swanetše go dumela molaetša woo re o bolelago. Ka mantšu a mangwe, re swanetše go ba le tumelo e matla ya gore Jehofa ke Modimo a nnoši wa therešo, gore Beibele ka kgonthe ke Lentšu la Modimo le gore Mmušo wa Modimo ke kholofelo e nnoši bakeng sa batho. Ka tsela yeo, seo re se rutago e tla ba se se tšwago pelong, gomme re tla ba re e-kwa keletšo ya Paulo go Timotheo: “Se O swanetšexo xo se phexêlêla ké xore Modimo a bônê Ò le mmotexi, Ò le modiri e a se naxo bosodi, e a tsebaxo xo ratha Lentšu la therešô à sa kxopamiše.”​—2 Timotheo 2:15.

Go Fetiša Molaetša ka Ntle le go Ntšha Lentšu

3-5. (a) Re ka fetiša molaetša bjang ka ntle le go ntšha lentšu? (b) Ke diphihlelo dife tšeo di hlatselago se?

³ Poledišano gantši e akaretša mantšu. Eupja, ge e le gabotse, re fetišetša molaetša go batho gaešita le pele re bolela le bona. Bjang? Ka boitshwaro bja rena le tsela yeo re aparago le go itokiša ka yona. Nywaga e mentši e fetilego sealoga sa moromiwa sa Sekolo sa Beibele sa Watchtower sa Gilead se be sepela ka sekepe go ya kabelong ya sona ya nageng e šele. Ka morago ga matšatši a sego kae a le ka lewatleng, motho yo a sa mo tsebego o ile mmotšiša lebaka leo ka lona e lego yo a fapanego kudu le ba bangwe ka moka ka sekepeng. Moromiwa yo o be a fetiša molaetša ka selo se sengwe se se bego se lemogega​—ke gore e be e le yo a nago le ditekanyetšo tše fapanego le yo a swanelwago ke go batamelwa​—feela ka ponagalo ya gagwe le boitshwaro. Se se buletše moromiwa sebaka se sebotse sa go nea bohlatse.

⁴ Gape, kgaetšedi o mongwe yo a bego a eme setarateng a sepedišetša mofeti dipuku tša Beibele o ile a nywanywetša mosadi yo a bego a feta kgaufsi le yena ka bogwera. Mosadi yo o ile a thoma go theogela ka seteišeneng sa ka tlase ga mmu ka manamelo. Ka morago o ile a fetola monagano, a boela go kgaetšedi gomme a kgopela thuto ya lapa ya Beibele. Ke eng seo se bego se mo kgahlile? Gaešita lege a be a se a newa puku ya Beibele eupja o ile a nywanywetšwa ka bogwera ke Hlatse yeo e bego e dira modiro wa setarateng.

⁵ Mohlala wa boraro: Sehlopha sa bafsa ba Dihlatse se be e-ja dijo ka lebenkeleng la bojelo gomme ba makatšwa ke ge motho yo ba sa mo tsebego a batamela tafoleng ya bona gomme a ba lefelela dijo tša bona. Ke ka baka la’ng a dirile seo? O be a kgahlilwe ke boitshwaro bja bona. Bafsa ba Bakriste ba fetišitše molaetša wa gore e be e le batho ba ba boifago Modimo ka ntle le go bolela lentšu go motho yo ba sa mo tsebego. Go molaleng gore ka boitshwaro, ponagalo le bogwera, re fetiša molaetša pele re ntšha lentšu.​—Bapiša le 1 Petro 3:​1, 2.

Go Nea Mabaka go Bohlokwa Poledišanong

6. Bontšha kamoo go nea mabaka e lego gabohlokwa ka gona.

⁶ Gore re tle re fetišetše molaetša wa ditaba tše di lokilego go batho ka molomo, re swanetše go ba bao ba itokišeditšego, e sego go ba gapeletša dikgopolo tša rena, eupja re ba nee mabaka. Re bala leboelela gore Paulo o ile a nea bao a bego a leka go fetišetša ditaba tše di lokilego go bona mabaka. (Ditiro 17:​2, 17; 18:19) Re ka latela mohlala wa gagwe bjang? Ee, maemo a a senyegago a lefase mo gongwe a ka ba a dirile gore ba bangwe ba feleletše ka go belaela go ba gona ga Modimo yo e lego ra-matla-ohle le yo lerato le yo a nago le taba le batho. Lega go le bjalo, mo gongwe re ka ba fa lebaka la gore Modimo o na le nako ya go dira se sengwe le se sengwe. (Mmoledi 3:​1-8) Ka gona, Ba-Galatia 4:4 e bolela gore ge nako e swanetšego ya Modimo e e-tla, o ile a romela Morwa wa gagwe lefaseng. Se se diregile ka morago ga nywaga e dikete a holofeditše la mathomo go dira bjalo. Ka go mo swanago, ge nako ya gagwe e swanetšego e e-tla, o tla fediša tlaišego le bokgopo. Go feta moo, Lentšu la Modimo le bontšha gore go na le mabaka a a mo gapeletšago go dumelela bokgopo gore bo tšwele pele ka nako e telele gakaakaa. (Bapiša le Ekisodo 9:16.) Go nea mabaka o dutše o nagana ka se, gomme o thekga mabaka ka dipapišo le bohlatse bjo bo tiilego bja Mangwalo go tla thuša batho ba botegago gore ba lemoge gore go ata ga bokgopo go ka se dirišwe e le go thekga gore Jehofa ga a gona goba ga a na taba.​—Ba-Roma 9:​14-18.

7, 8. Go nea mabaka go ka re thuša bjang go boledišana le mo-Juda wa Orthodox?

⁷ Anke re re mohlomongwe ge o e-ya ka ntlo le ntlo, mong wa ntlo o re go wena: “Ke mo-Juda. Ga ke thabele.” O be o ka tšwela pele bjang? Ngwanabo rena o bega gore o atlegile ka go diriša matseno a: Ke kgolwa gore o tla dumelelana le nna ge ke re Moše e bile o mongwe wa ba baporofeta ba bagolo kudu bao Modimo a kilego a ba diriša. Na o be o tseba gore, bjalo ka ge go ngwadilwe go Doiteronomio 31:​29, o boletše gore: “Ke [a] tseba xore xe ke hwile . . . Le tlo aroxa tseleng ye ke Le laetšexo yôna; xomme Le y’o hlakana le mabošula mehleng e tlaxo”? Moše e be e le moporofeta wa kgonthe, ka gona mantšu a gagwe a be a swanetše go phethega. Na e ka ba e le gore a phethegile ge Modimo a romela Mesia go ba-Juda le gore ke ka baka leo ba-Juda ba ilego ba se mo amogele? Go swanetše go ba go bile ka tsela yeo. Bjale, ge e ba go le bjalo gomme ba dirile phošo, na go na le lebaka lege e le lefe leo ka lona nna le wena re swanetšego go dira phošo e swanago?

⁸ Le gona, gopola gore ba-Juda ba tlaišitšwe kudu diatleng tša Bojakane, kudu-kudu lekgolong le la nywaga. Ka gona, mo gongwe o ka rata go botša mong wa ntlo gore rena ga se ra tsenya letsogo go seo. Ka mohlala, mo gongwe o ka rata gore: ‘Na o be o tseba gore ge Hitler a be a buša Dihlatse tša Jehofa di ile tša se kwane le go tlaišwa ga ba-Juda? Le gona di ganne gore “Heil Hitler“ le go hlankela bohlabaning bja gagwe.a

9, 10. Go nea mabaka go ka dirišwa bjang go thuša motho yo a dumelago go mollo wa dihele?

⁹ Tabeng ya go leka go boledišana le motho yo a dumelago go mollo wa dihele, mo gongwe o ka bolela gore ge e ba motho a swanetše go tlaišega diheleng ka mo go sa felego, gona o swanetše go ba a e-na le moya (soul) wo o sa hwego. Yo a dumelago go mollo wa dihele o tla dumela ka ntle le tika-tiko. Bjale o ka bolela ka pego ya go bopja ga Adama le Efa gomme wa botšiša ka botho ge e ba a lemogile go bolelwa lege e le gofe mo go bjalo ga moya o sa hwego pegong yeo. Ge o tšwela pele ka mabaka ao o a neago, mo gongwe ka morago o ka lebiša tlhokomelo ya gagwe go Genesi 2:7, moo Beibele e re botšago gore Adama o ile a ba moya (soul) o phelago. Le gona, elelwa gore seo Modimo a se boletšego e be e tla ba mafelelo a sebe sa Adama: “Boxôbê O tlo bo ja ka dikudumêla tša sefahloxô sa hloxô ya xaxo; wa bá wa boêla mmung; ka xobane O nthšitšwe mmung; O lerole; ’me sa xaxo ké xo boêla leroleng.” (Genesi 3:19) Ka gona, Adama o boetše leroleng.

¹⁰ Le gona, o ka lebiša tlhokomelo therešong ya gore pegong ya Genesi ga go na mo Modimo a bolelago ka go tlaišega ka mo go sa felego mollong wa dihele. Ge Modimo a lemoša Adama gore a se ke a ja seenywa se se bego se ileditšwe, o itše: “Mohla ò tl’o xo se ja O tlo hwa lehu.” (Genesi 2:17) Ga go bolelwe ka mollo wa dihele! Ge e ba mafelelo a kgonthe a sebe sa Adama e be e ka se be lehu, e lego ‘go boela leroleng,’ eupja e tla ba tlaišego ya ka mo go sa felego, go ya ka toka yohle, na Modimo o be a ka se hlalose se ka mo go kwalago? Ka gona, go nea mabaka ka kelohloko le ka botho go ka thuša motho yo a botegago go lemoga go se kwagale ga tumelo ya gagwe. Anke le ka mohla re se ke ra hlokomologa bohlokwa bja go nea mabaka ge re dutše re abelana le ba bangwe therešo ya Lentšu la Modimo.​—Bapiša le 2 Timotheo 2:​24-26; 1 Johane 4:​8, 16.

Dika Tšeo di Nyakegago Bakeng sa Poledišano e Atlegago

11-13. Ke dika dife tša Bokriste tšeo di ka re thušago go fetišetša molaetša ka katlego?

¹¹ Bjale, ke dika dife tšeo re swanetšego go di hlagolela e le gore go fetiša ga rena molaetša wa ditherešo tša Mmušo e be mo go atlegago kudu? Ee, na mohlala wa Jesu o re botša’ng? Go Mateo 11:​28-30, re bala seo a se boletšego: “Tlang xo Nna bohle bao Le lapišitšwexo, ba le imêlwaxo; Nna ke tlo Le khutšiša. Le ithwešê yoko ya-ka, Le rutwe ke Nna; xobane ke yo boló le wa pelo e kokobetšexo: ’me Le tlo hwetša khutšô ya meôya ya lena. Xobane yoko ya-ka xa e robe, morwalô wa-ka ké o bohwêfê.” Moo re bona se sengwe sa dinotlelo tša katlego ya Jesu go fetišeng molaetša. E be e le yo bolo le wa pelo e kokobetšego. Batho ba dipelo tše dibotse ba mo hweditše e le yo a lapološago. Moapostola Paulo le yena o beile mohlala, o mobotse ka gobane, go etša ge a boditše bagolo ba Efeso, go tloga letšatšing la mathomo leo a tlilego go bona ka lona, o be a hlankela Morena ka “boikokobetšo ka moka.”​—Ditiro 20:​19, PK.

¹² Ka go bonagatša ga rena boipoetšo le boikokobetšo ka mehla, ba bangwe ba tla hwetša gore le rena re bao ba lapološago, gomme se se tla re nolofaletša go boledišana le bona. Kgopolo lege e le efe e fapanego e tla rotoša lepheko magareng ga rena le bao re lekago go fetišetša molaetša go bona. Ka kgonthe, “bohlale bo na le moipoetši.”​—Diema 11:2.

¹³ Gore re fetiše molaetša ka katlego, le rena re swanetše go ba bao ba sa felego pelo le ba dirišago bohlale. Ruri moapostola Paulo o be a diriša bohlale ge a be a nea bohlatse go bo-radifilosofi bao ba bego ba bokane pele ga gagwe Mmotong wa Mars. O neetše ditaba tše di lokilego ka tsela yeo ba bego ba ka e kwešiša. (Ditiro 17:18, 22-31) Ge e ba re rata go fetišetša molaetša ka katlego go batheetši ba rena, gona re swanetše go kwa keletšo ya moapostola Paulo yeo a e neilego ba-Kolose ge a be a re: “Anke poledišano ya lena e be e botho ka mehla, gomme le ka mohla e se ke ya ba e tapilego: ithuteng kamoo le ka boledišanago gakaone kudu le mang le mang yo le gahlanago le yena.” (Ba-Kolose 4:​6, The New English Bible) Polelo ya rena ka mehla e swanetše go ba e kgahlišago. Polelo e bjalo e tla bula menagano ya batheetši ba rena, mola dipolelo tša bošilo di tla ba dira gore ba tswalele menagano ya bona.

14. Poledišano yeo e dirwago ka go thekga ditho e ka re thuša bjang go fetišetša molaetša go bangwe?

¹⁴ Re swanetše go bonagala re le bao ba thekgilego ditho ka dinako tšohle. Se se dira gore batheetši ba rena ba lokologe. Go thekga ditho ga go bolele go tshwenyega kudu ka gore o tla bolela o nnoši. Go e na le moo, ka mokgwa wa go se itlhaganele le dipotšišo tša bogwera, re nea batheetši ba rena sebaka sa go ntšha sa mafahleng a bona. Kudu-kudu ge re nea bohlatse bjo bo sa rulaganyetšwago ke gabohlale go kgothaletša motho o mongwe gore a bolele. Ka mohlala Hlatse e nngwe e ile ya ikhwetša e dutše kgaufsi le moperisita wa Roma Katholika ka sefofaneng. Hlatse ile ya tšwela pele e mo hlohla ka bohlale ka dipotšišo ka nako ya go feta iri, gomme moperisita, ge a araba, ya ba yena yo a bolelago go gontši. Eupja ge go fihla nako ya go arogana, moperisita o be a hweditše dipuku tše mmalwa tša Beibele. Go bolela ka mokgwa o bjalo ka go se fele pelo go tla re thuša go diriša seka se sengwe se nyakegago, e lego go ipea boemong bja ba bangwe.

15, 16. Go ipea boemong bja ba bangwe go ka re thuša bjang go fetišetša molaetša?

¹⁵ Moapostola Paulo o be a lemoga ka mo go tletšego go nyakega ga go ipea boemong bja ba bangwe ka ge go ka bonwa go tšwa go seo a se ngwaletšego ba-Korinthe: “Le xe ke le molokoloxi ruri, ke itirile mohlanka wa bohle, xore ke ruê ba bantši. Ba-Juda ba nkhweditše kè le wa xabô, è le xore ke ruê Ba-Juda, ba xo bušwa ke Molaô ba nkhwetša kè le wa xabô, è le xore ke ruê bôná ba xo bušwa ke Molaô. Ba e sexo ba Molaô ba nkhwetša ké le wa xabô, le xe Molaô wola wa Modimo ò sa mpuša, Ò mpuša ka Molaô wa Kriste; ke r’yalo xore ke ruê bôná ba e sexo ba Molaô. Bafokodi ba nkhweditše kè le wa xabô, è le xore ke ruê bafokodi. Bohle ba nkhweditše kè le wa bôná, è le xore mo xo fêla ke bê le ba ke ba ruaxo.”​—1 Ba-Korinthe 9:​19-22.

¹⁶ Gore re ekiše Paulo ditabeng tše, re swanetše go ba bohlale, re be le temogo le go ela hloko. Go ipea boemong bja ba bangwe go tla re thuša go fetišetša molaetša wa therešo go batheetši ba rena go ya ka tsela yeo ba naganago ka yona le ka mo ba ikwago ka gona. Puku ya Go Boledišana ka Mangwalo e nea thušo e ntši tabeng ye. E-ba le yona ka mehla bodireding bja gago.

Lerato ke Thušo Poledišanong

17. Go dika ka moka tša Bokriste ke sefe seo e lego sa bohlokwa-hlokwa tabeng go fetiša molaetša wa therešo ka mo go atlegago, gomme se bontšhwa bjang?

¹⁷ Boipoetšo, boikokobetšo, go se fele pelo le go ipea boemong bja ba bangwe, ke tša bohlokwa tabeng ya go fetišetša tsebišo go ba bangwe ka mo go atlegago. Lega go le bjalo, ka godimo ga tšohle, lerato la go hloka boithati le tla re thuša go ba ba atlegago go fihleleleng dipelo tša ba bangwe. Jesu o ile a šokela batho ka gobane ba be ba “lapile, bà lahlexile wa dinku tše di se naxo modiši.” Ke lerato leo le tutueditšego Jesu gore a re: “Tlang xo Nna bohle ba le lapišitšwexo, ba le imêlwaxo; Nna ke tlo Le khutšiša [“ke tlo le lapološa,” NW].” (Mateo 9:36; 11:28) Le rena ka ge re rata batho, ke ka moo re nyakago go ba lapološa le go ba thuša gore ba tsene tseleng yeo e išago bophelong. Molaetša wa rena ke wa lerato, ka gona, anke re tšweleng pele re o bolela ka tsela e lerato. Lerato le le iponagatša ka go nywanywa ka bogwera, ka botho le bonolo, ka lethabo le borutho.

18. Re ka ekiša Paulo bjang, go etša ge a ekišitše Mong wa gagwe?

¹⁸ Tabeng ye moapostola Paulo e bile moekiši o mobotse wa Mong wa gagwe, Jesu Kriste. Ke ka baka la’ng a be a atlega gakaakaa tabeng ya go hloma diphuthego ka go latelana? Na ke ka baka la phišego ya gagwe? Ee. Eupja le ka baka la lerato leo a bego a le bonagatša. Ela hloko mantšu a lerato le borutho mabapi le phuthego yeo e bego e sa tšwa go ba gona ya Thesalonika: “Se re bexo rè na nasô’ rè le makxatheng a lena ké bonôlô bya mma xo bana xe a amuša ngwana wa xaxwe. Ka thloloxêlô e kaakaa re be re re re Le neê tšohle, e sexo Ebangedi yeo ya Modimo fêla, re bê re re re Le neê le bophêlô bya rena; xobane Lè le baratiwa ba rena.” Go ekiša Paulo go tla re thuša maitekong a rena a go fetiša molaetša.​—1 Ba-Thesalonika 2:​7, 8.

19. Ke ka baka la’ng re sa swanela go dumelela tšhemo e sa arabelego gabotse e re nyamiša?

¹⁹ Ge e ba re dirile sohle se re ka se kgonago go fetišetša molaetša gomme re paletšwe ke go hwetša mafelelo a a nyakegago, na re swanetše go nolega moko? Le gatee-tee. Barutwana ba Beibele (ka ge Dihlatse tša Jehofa di be di bitšwa bjalo pele) ba be be e-hlwa ba bolela gore, gore batho ba tle ba amogele therešo ba swanetše go ba le dika tše tharo. Go nyakega gore e be ba botegago, ba ikokobetšago le bao ba swerwego ke tlala ya moya. Re ka se ke ra letela gore batho ba ba sa botegego ba arabele gabotse therešong; lege e le go letela gore batho ba makoko le baikgantšhi ba theetše ditaba tše di lokilego. Go feta moo, gaešita lege motho a e-na le tekanyo e itšego ya potego le boikokobetšo, go bonala a ka se amogele therešo ge e ba a se a swarwa ke tlala moyeng.

20. Ke ka baka la’ng ka mehla go ka bolelwa gore maiteko a rena ga se ya ba a lefeela?

²⁰ Ga go na pelaelo gore ba bantši ba o tlago go gahlana le bona tšhemong e tla ba bao ba hlokago se tee sa dika tše tharo goba go feta moo. Moporofeta Jeremia o bile le phihlelo e swanago. (Jeremia 1:​17-19; bapiša le Mateo 5:3.) Lega go le bjalo, maiteko a rena le ka mohla ga e be a lefeela. Ka baka la’ng? Ka gobane re tsebatša leina la Jehofa le Mmušo. Ka go bolela ga rena ditaba tše di lokilego le go ba ga rena tšhemong, re nea ba kgopo temošo. (Hesekiele 33:​33) Le ka mohla o se ke wa lebala gore ka maiteko a rena a go fetišetša therešo go ba bangwe, re a ikhola. (1 Timotheo 4:16) Re boloka tumelo ya rena e tiile gomme kholofelo ya rena ya Mmušo e le e phadimago. Go feta moo, re kgomarela potego ya rena gomme ka go rialo re ba le karolo go kgethagatšeng leina la Jehofa Modimo, ra thabiša pelo ya gagwe.​—Diema 27:11.

21. Go ka bolelwa eng e le go akaretša?

²¹ Go akaretša ditaba: Poledišano ke go fetiša molaetša ka mo go atlegago. Bokgoni bja poledišano ke selo sa bohlokwa gomme ge poledišano e senyega go feleletša ka kotsi e kgolo. Re bone gore Jehofa Modimo le Jesu Kriste ke bafetiši ba bagolo-golo ba molaetša le gore Jesu Kriste o laola mokero wa go fetiša molaetša bakeng sa mehla ya rena. Re lemogile gape gore ka moaparo le boitshwaro bja rena re fetišetša melaetša go ba bangwe. Re ithutile gore go nea mabaka go tšea karolo e bohlokwa go lekeng ga rena go boledišana le ba bangwe le gore, gore re fetiše molaetša ka mo go atlegago, go nyakega gore re be bao ba ba ipoetšago le ba ikokobetšago, re bonagatše go ipea boemong bja ba bangwe, re bontšhe go se fele pelo, gomme godimo ga tšeo ka moka, re tutuetšwe ke pelo e tletšego lerato. Ge e ba re hlagolela dika tše gomme re latela mehlala ya Beibele, re tla ba bafetiši ba molaetša ba ba atlegago ba Bakriste.​—Ba-Roma 12:​8-11.

[Mengwalo ya tlase]

O tla Araba Bjang?

◻ Ke ka tsela efe go fetiša molaetša go thomago pele go ka ntšhwa lentšu?

◻ Mehlala e mengwe ya go fetiša molaetša ka go nea mabaka ka mo go atlegago ke efe?

◻ Ke dika dife tšeo di dirilego gore Jesu Kriste le Paulo ba kgone go fetiša molaetša ka mo go atlegago?

◻ Ke ka baka la’ng re sa swanela go nolega moko ge mafelelo a mabotse a e-tla ka go nanya?