Kgotlelelo Yeo e Fenyago

“Le nyaka kgotlelelo, e le gore ka morago ga ge le dirile thato ya Modimo, e be gona le ka amogelago phethagatšo ya kholofetšo.”​—BA-HEBERE 10:36, NW.

1. Ke ka baka la’ng kgotlelelo e nyakega go mongwe le o mongwe yo a direlago Jehofa Modimo lehono?

LEFASE le le rapaletše ka tlase ga matla a modimo wa lerabele. Mmuši wa lona yo a sa bonagalego e lego Sathane Diabolo o lebiša maiteko a gagwe ka moka kudu-kudu go ganetšeng Jehofa le go lwantšheng go phagamišwa ga bogoši bja legohle bja Jehofa ka Mmušo wa Mesia. Se se dira gore e be taba e ka se phemegego gore motho lege e le ofe yo a ineelago go Modimo gomme a ema ka lehlakoreng la Gagwe la kgang ya bogoši, o tla ganetšwa ke lefase le ka mo go sa kgaotšego. (Johane 15:​18-20; 1 Johane 5:19) Ka gona o mongwe le o mongwe o swanetše go ikemišetša go kgotlelela go fihla ge lefase le senyetšwa ruri phenyong e feletšego ka Haramagedone. Gore re be gare ga bafenyi ba Modimo bao ba fenyago lefase ka potego ya bona le tumelo, re swanetše go phegelela ka boikemišetšo bjo tiilego go fihla bofelong. (1 Johane 5:4) Re ka dira bjang seo?

2, 3. Ke bjang Jehofa Modimo le Jesu Kriste e lego mehlala e megolo kudu ya kgotlelelo?

² Se sengwe ke gore re ka tsoma kgothatšo mehlaleng e mebedi e megolo ya kgotlelelo. Mehlala ye ke bomang? O mongwe ke Jesu Kriste, “tháka-letswálô yá dibopya tšohle,” yoo a kgotleletšego ka potego tirelong ya Modimo ga e sa le go tloga ge a hlodilwe nakong e sa tsebjego e fetilego. Kgotlelelong ya gagwe ya go direla Modimo ka potego, Jesu e bile mohlala bakeng sa dibopiwa ka moka tše bohlale tšeo ka morago di ilego tša hlolwa legodimong le lefaseng. (Ba-Kolose 1:​15, 16) Lega go le bjalo, mohlala o mogolo kudu wa kgotlelelo ke Jehofa Modimo, yo a kgotleletšego borabele malebana le pušo ya gagwe ya legohle ka nako e telele gomme e le yo a tlago go tšwela pele a dira bjalo go fihla ge a gata mogato wa go rarollela kgang ya bogoši sa ruri.

³ Jehofa o kgotleletše ka tsela e beago mohlala ditabeng tšeo go tšona seriti sa gagwe le maikwelo a gagwe a tseneletšego di bego di akaretšwa. O ile a itshwara ge a lebeletšane le go rumolwa mo gogolo, gomme a ithiba gore a se gate mogato malebana le bao ba mo nyaditšego​—go akaretša le Sathane Diabolo. Re leboga kgotlelelo ya Modimo le kgaugelo ya gagwe. Ka ntle le tšona re be re ka se be gona le gatee. Ka kgonthe, Jehofa Modimo o itlhaotše e le yo a ka se bapišwego le motho ka kgotlelelo ya gagwe.

4, 5. (a) Seswantšho sa Paulo sa mmopi wa letsopa se bontšha bjang kgotlelelo ya Modimo le kgaugelo ya gagwe? (b) Kgaugelo ya Modimo e tla ipontšha bjang e se yeo e dirišeditšwego lefeela?

⁴ Moapostola Paulo o bolela ka bobedi kgotlelelo le kgaugelo tša Modimo ge a re: “A xa se mmopi e a laolaxo letsopa, sebya se se tumišwaxo le se se nyatšêxaxo a di bopa ka letsopa le tee? Byale, xe Modimo a ratile xo bônaxatša boxale bya xaxwe le xo tsebatša matla a xaxwe, ké xore dibya tšeo tša xo bônaxatša boxale ka tšôna, tše di diretšwexo xo senyêxa, ó di neneketša ka pelo-telele. A xa se xore a bônaxatše lehumô la letaxô la xaxwe ka dibya tšeo tša xo bônaxatša kxauxêlô, tše a di lokišeditšexo xo tlo išwa letaxong? Ké bô-rena bao, ba re biditšwexo ke Yêna; a se bitše Ba-Juda fêla, a bitša le ba-ntle.”​—Ba-Roma 9:​21-24.

⁵ Bjalo ka ge mantšu a a bontšha, nakong ye ya go kgotlelela ga gagwe, Jehofa o tšwela pele ka morero wa gagwe wa letago le go bontšha kgaugelo godimo ga dibjana tše itšego tše e lego batho. O lokišetša dibjana tše letago le le sa felego gomme ka go rialo a senya merero e mebe ya moganetši wa gagwe o mogolo, Sathane Diabolo, gotee le ya badirišani ba gagwe ka moka. Ga se batho ka moka bao ba fetogilego dibjana tša bogale tšeo di swanetšwego ke go senywa. Seo se hlatsela gabotse go kgotlelela ka go se fele pelo ga Modimo Ra-matla-ohle. Kgaugelo ya gagwe e ka se be ya lefeela. E tla feleletša ka (1) lapa la Mmušo la letago kua magodimong ka tlase ga Morwa yo a ratwago wa Jehofa, Jesu Kriste, le (2) moloko o tsošološitšwego le wo o phethagaditšwego wa dibopiwa tša batho lefaseng la paradeise, bao bohle e lego maja-bohwa a bophelo bjo bo sa felego.

Go Kgotlelela Go Fihla Bofelong

6. (a) Ke ka baka la’ng Bakriste ba ka se ke ba phema teko ya kgotlelelo? (b) Lentšu la Segerika bakeng sa “kgotlelelo” ka tlwaelo le bolela’ng?

⁶ Re e-na le kholofelo e bjalo e kgahlišago ka pele ga rena, re swanetše go dula re gopola mantšu a a matlafatšago a Jesu, a a rego: “E a tl’o xo tiišetša xo fihla bofelong, ké yêna a tl’o xo phološwa.” (Mateo 24:13) Go bohlokwa go thoma gabotse ka tsela ya go ba morutiwa wa Mokriste. Eupja mafelelong se e lego taba-taba ke tsela yeo re kgotlelelago ka yona, kamoo re phethago tsela ya rena ka gona. Moapostola Paulo o gateletše se ge a be a re: “Le nyaka kgotlelelo, e le gore ka morago ga ge le dirile thato ya Modimo, e be gona le ka amogelago phethagatšo ya kholofetšo.” (Ba-Hebere 10:​36, NW) Lentšu la Segerika le le fetoletšwego mo e le “kgotlelelo” ke hy·po·mo·neʹ. Lona gantši le šupa go kgotlelelo ya sebete, ya go tiišetša goba ya go se fele pelo yeo e sa felelwego ke kholofelo ge go lebeletšanwe le mapheko, ditlaišo, diteko le meleko. Ge e ba re holofela go rua phološo mafelelong, re swanetše go dumelela go lekwa ga kgotlelelo e le karolo ya tokišetšo e nyakegago bakeng sa phološo yeo.

7. Ke go iphora gofe go re swanetšego go go phema, gomme ke mohlala wa bomang o tlago go re thuša go kgotlelela?

⁷ Ga se ra swanela go iphora ka kgopolo ya go ipea pelwana-tšhwaana ya gore re ka feta molekong ka bjako. E le gore kgang ya bogoši bja legohle le ya potego ya motho di tle di rarollwe ka mo go sa belaetšego, Jehofa ga se a ka a ipabalela. O kgotleletše dilo tše di sa thabišego gaešita lege a ka be a ile a di fediša gatee-tee. Jesu Kriste le yena e be e le mohlala wa kgotlelelo. (1 Petro 2:21; bapiša le Ba-Roma 15:​3-5.) Ka ge re e-na le mehlala ye e phadimago ka pele ga rena, ruri le rena re ikemišeditše go kgotlelela go fihla bofelong.​—Ba-Hebere 12:​2, 3.

Tshwanelego Yeo e Nyakegago

8. Ke seka sefe seo ka moka ga rena re se nyakago seo moapostola Paulo a se bontšhitšego?

⁸ Ga go na mohlanka wa Modimo, gaešita le mehleng ya pele, yoo a ilego a lokollwa tabeng ya go nyakega ga go hlatsela potego ya gagwe ka go kgotlelela. Batho ba ba tumilego kudu historing ya Beibele bao ba ilego ba dula ba botega go fihla lehung gomme ba swanelegela bophelo bjo bo sa felego magodimong, ba ile ba swanelwa ke go bontšha go se tekeme ga bona. Ka mohlala, Saulo wa Tareso yo pele e bego e le Mofarisei, o itše go ba-Korinthe: “Le xe ke se selô, xa xo na mo ke phalwaxo ke baapostola bao ba xo bata bonatla. Xe e le mabohlatse a Moapostola a bonetše mo xare xa lena ka kxotlêlêlô le ka mehlôlô le ka matete le ka ditirô tše matla.” (2 Ba-Korinthe 12:​11, 12) Go sa šetšwe boima bja modiro, Paulo o be a lebelela bodiredi bja gagwe e le bja bohlokwa kudu moo a ilego a kgotlelela dilo tše dintši gomme a katanela go se tliše kgobošo lege e le efe go bjona.​—2 Ba-Korinthe 6:​3, 4, 9.

9. (a) Mašaledi a tloditšwego a bontšhitše bjang kgotlelelo, gomme ka mafelelo afe? (b) Ke eng seo se dirago e le tutuetšo go rena gore re tšwele pele ka potego tirelong ya Modimo?

⁹ Mehleng ye ya lehono, Bakriste ba tloditšwego bao ba bego ba hlankela Modimo pele ga ntwa ya pele ya lefase ba be ba tseba gore 1914 e be e tla swaya bofelo bja Mabaka a Ba-ntle, gomme ba bantši ba bona ba be lebeletše go amogela moputso wa bona wa legodimong ngwageng woo o sa lebalegego. Eupja se ga se sa direga. Bjalo ka ge ditherešo mo nakong ye di bontšha, ba okeleditšwe ka masome a nywaga. Nakong ye ya go oketšwa mo go bego go sa letelwa ga tsela ya bona ya bophelo bja lefaseng, ba ile ba hlwekišwa ke Jehofa Modimo. (Sakaria 13:9; Maleaki 3:​2, 3) Kgotlelelo e tšwetšego pele e ile ya ba kaonefatša. Bjalo ka bahlanka ba Jehofa, ba ile ba thabela go hlaolwa e le batho ba leina la gagwe. (Jesaya 43:​10-12; Ditiro 15:14) Lehono ka ge ba fetišitšwe dintweng tše pedi tša lefase le ditwantšhanong tše dintši tše dinyenyane, ba thabela go thušwa go phatlalatšeng ditaba tše di lokilego ke lešaba le legolo leo le golago la dinku tše dingwe, leo mo nakong ye le fetago dimilione tše nne ka palo. Paradeise ya moya yeo ba e thabelago e aparetše lefase ka bophara, gaešita le dihlakahlakeng tša kgole tša lewatle. Go swarwa mo ka kgaugelo, moo re go lebogago kudu le go feta ge re dutše re phela, go dirile bjalo ka tutuetšo ya go tšwela pele ka potego tirelong ya Modimo go fihla ge thato ya Jehofa le morero wa gagwe di phethilwe ka botlalo.

10. Ke’ng seo se nyakegago ka mehla e le gore re se ke ra baka go fokola lege e le gofe?

¹⁰ Ka ge moputso wa rena o ithekgile ka go tiišetša ga rena, gona ka mehla re nyaka kgothatšo tabeng ye ya bohlokwa. (1 Ba-Korinthe 15:58; Ba-Kolose 1:23) E le gore go se ke gwa ba le go fokola gare ga batho ba Jehofa, re swanetše go kgothatšwa ka mehla gore re kgomarele therešo le tokelo e bohlokwa ya go phatlalatša therešo, go fo swana lege diphuthego tše di bego di sa tšwa go hlongwa tša lekgolong la pele la nywaga di ile tša kgothatšwa ke maeto a go boela a moapotola Paulo le Baranaba. (Ditiro 14:​21, 22) Anke e be phetho ya rena e tiilego le boikemišetšo gore go etša ge moapostola Johane a bea se, therešo e dule ka go rena, ‘e dule e na le rena go ya go ile.’​—2 Johane 2.

Go Leta ka Kgotlelelo e sa Šišinyegego

11. Ke’ng seo se bonalago e le tshepedišo ya Modimo ka bahlanka ba gagwe, gomme se bontšhitšwe bjang tabeng ya Josefa?

¹¹ Go tšea nako gore moleko wo o lego mabapi le rena o phethwe. (Jakobo 1:​2-4) Letang! Letang! Letang! go bonala e be e le tshepedišo ya Modimo ka bahlanka ba gagwe ba kgale ge ba be ba lekwa mabapi le go ikemišetša ga bona go tšwela pele ba le tumelong. Eupja go leta mo ka mehla go feleditše ka go itlhatsela e le mo go putsago go bahlanka bao ba botegago. Ka mohlala, Josefa o ile a swanela go leta nywaga e 13 e le mohlanka e bile e le mogolegwa, eupja phihlelo ye e ile ya kaonefatša semelo sa gagwe.​—Psalme 105:​17-19.

12, 13. (a) Aborahama o bile bjang mohlala wa go kgotlelela ka potego? (b) Ke ka tsela efe tumelo le kgotlelelo tša Aborahama di tšweleditšwego e le mohlala go rena?

¹² Aborahama o be a šetše a e-na le nywaga e 75 ge Modimo a mmitša gore a tšwe Uri ya Kaladea le gore a ye Nageng e Holofeditšwego. O be a e-na le mo e ka bago nywaga e 125 ge a be a amogela kgonthišetšo e tiišeditšwego ka keno ya kholofetšo ya Modimo​—yeo e dirilwego kapejana ka morago ga ge Aborahama a bontšhitše matla a tumelo ya gagwe go fihla bokgoleng bja go gafa morwa wa gagwe yo a ratwago, Isaka, a emišwa feela ke ge morongwa wa Jehofa a thibela seatla sa gagwe le go thibela sehlabelo seo. (Genesi 22:​1-18) Nywaga e 50 e be e le nako e telele go Aborahama gore a lete e le modiiledi nageng e šele, eupja o ile a kgotlelela nywaga e mengwe gape e 50 go fihla ge a e-hwa a e-na le nywaga e 175. Lebakeng leo ka moka, Aborahama e be e le hlatse e botegago le moporofeta wa Jehofa Modimo.​—Psalme 105:​9-15.

¹³ Tumelo ya Aborahama le kgotlelelo di tšweletšwa e le mohlala go bahlanka ka moka ba Modimo bao ba nyakago go hwetša ditšhegofatšo tše di holofeditšwego ka Jesu Kriste, Peu ya Aborahama. (Ba-Hebere 11:​8-10, 17-19) Mabapi le yena re bala go Ba-Hebere 6:​11-15 gore: “Se re se dumaxo ké xore ka moka xa lena Le bônwê Lè na phišêxô e byalo, xo fêlê xo phêthêxa se re se holofetšexo, xo bê xo fihlê bofêlô. Xore Le se kê la ba ba botšwá, eupya ka tumêlô le kxôtlêlêlê Le bê baetši ba bao ba ruilexo tše di holofeditšwexo. Xobane mola Modimo à nea Aborahama dikholofetšô, xo bê xo se e moxolwane yo Modimo a kaxo êna ka yêna, ’me a êna ka Yêna mong, A re: Ke tlo Xo šexofatša wa xo šexofatša; bana ba xaxo ke tlo ba atiša xa-xolo. Xomme Aborahama a se fêlê pelo, a bá a tlêlwa ke tše a di holofeditšwexo.”

14. Ke ka baka la’ng re sa swanela go nagana gore teko ya kgotlelelo ke yeo e sa felego le gore moputso wa yona ke go huparela phefo?

¹⁴ Mašaledi a batlotšwa a šetše a bone nywaga e 77 e feta ga e sa le go tloga bofelong bja Mehla ya Ba-ntle ka 1914, ge bangwe ba bona ba be ba letetše go phagamišetšwa ga phuthego ya therešo ya Bokriste letagong la legodimo. Ga re tsebe gore mašaledi a swanetše go leta nako e kaaka’ng. Ka gona, na re swanetše go tekema gomme re nagane gore go leta ke ga ka mo go sa felego le gore go holofela moputso ke go huparela phefo? Aowa! Seo le ka mohla se be se ka se phagamiše bogoši bja Modimo goba go godiša leina la gagwe. O be a ka se lokafatšwe pele ga lefase ge a re nea phenyo le moputso wo o tlišwago ke yona wa bophelo bjo sa felego. Go sa šetšwe botelele bja nako yeo e tšewago, mašaledi gotee le bagwera ba bona ba swanago le dinku, ba ikemišeditše go letela Jehofa gore a gate mogato ka nako ya gagwe. Ka go bontšha kgotlelelo e bjalo e beago mohlala, ba latela tsela ya Aborahama.​—Ba-Roma 8:​23-25.

15. (a) Moano wa rena ke ofe, gomme ke diphihlelong dife moo Modimo a ilego re thekga ka phenyo? (b) Ke kgothatšo efe ka Paulo ye e sa dutšego e swanetše mehla ya rena?

¹⁵ Ka gona, moano wa bona e sa dutše e le kgotlelelo e sa šišinyegego go direng thato ya Modimo. (Ba-Roma 2:​6, 7) Nakong e fetilego o re thekgile gare ga ditlaišego tše šoro, go akaretša go golegwa le dikampa tša tshwenyo, gomme o re fetišitše go tšona ka phenyo bakeng sa go tumiša leina la gagwe le morero.a Nakong ye e sa šetšego bakeng sa gore teko ya rena e phethwe, Jehofa o tla tšwela pele a dira se se swanago. Kgothatšo ya Paulo e sa dutše e le swanelago mehla ya rena: “Ka gobane le nyaka go se fele pelo mo go tiilego le kgotlelelo, e le gore le ka ba ba dirago le go phetha thato ya Modimo ka botlalo, gomme ka go rialo le amogele le go rwala le go thabela ka botlalo seo se holofeditšwego.”​—Ba-Hebere 10:​36, The Amplified Bible; Ba-Roma 8:37.

16. Ke ka baka la’ng re sa swanela go lebelela boineelo bja rena go Jehofa ka tsela e lekaneditšwego feela goba e le bjo bo nago le go ipabalela?

¹⁶ Ge feela Jehofa a sa dutše a e-na le modiro wo re swanetšego go o dira lefaseng le le kgopo, gona ka go latela mohlala wa Jesu re rata go swarega modirong woo go ba go fihla ge o phethilwe. (Johane 17:4) Boineelo bja rena go Jehofa e be e se tumelelano ya gore re be re tla mo direla ka lebakanyana feela gomme ka morago Haramagedone ya tla. Boineelo bja rena e be e le bja ka mo go sa felego. Modiro wa Modimo bakeng sa rena o ka se fele le ntwa ya Haramagedone. Lega go le bjalo, e tla ba feela ka morago ga ge re phethile modiro wo o swanetšego go dirwa pele ga Haramagedone moo re tlago go bona dilo tše dikgolo tše di tlago go latela ka kua ga ntwa yeo e kgolo. Ka gona, go tlaleletša tokelong e thabišago ya go tšwela pele ka go dira modiro wa gagwe, re tla putswa ka ditšhegofatšo tšeo a di holofeditšego tše e lego kgale di holofetšwe.​—Ba-Roma 8:32.

Lerato la go Rata Modimo le re Thuša go Kgotlelela

17, 18. (a) Dinakong tša mathata, ke’ng se se tlago go re thuša go kgotlelela re dutše re amogelwa ke Modimo? (b) Ke’ng se se tlago go re thuša gore re hwetše phenyo, gomme ke’ng se re sa se bolelego ka nako ye e šetšego?

¹⁷ Mohlomongwe ge dinako e le tše gateletšago re ka ipotšiša: ‘Ke bjang re ka tšwelago pele re kgotlelela?’ Karabo ke efe? Ka go rata Modimo ka pelo ya rena ka moka, ka monagano, moya le matla a rena ka moka. “Leratô xa le fêle pelo. Leratô ké le botho. Leratô xa le tsebe môná; xa le na xo ikxanthša, xa le ikxoxomoše. Le bipa tšohle; le dumêla tšohle; le holofêla tšohle; le kxotlêlêla tšohle.” (1 Ba-Korinthe 13:​4, 7, 8) Ge e se feela ge re kgotlelela ka baka la go rata Modimo, gona kgotlelelo ya rena ga e na mohola. Eupja ge e ba re kgotlelela ka tlase ga mathata ka baka la boineelo bja rena go Jehofa, gona kgotlelelo ya rena e feleletša ka go godiša lerato la rena go yena. Lerato la go rata Modimo Tatagwe le ile la dira gore Jesu a kgone go kgotlelela. (Johane 14:​30, 31; Ba-Hebere 12:2) Ge e ba tutuetšo ya rena ya kgonthe e le go rata Modimo Tatago rena, gona ke’ng seo re ka se kgonego go se kgotlelela?

¹⁸ Ke lerato la rena le le sa šišinyegego la go rata Jehofa Modimo leo le dirilego gore re kgone go dula re fenya lefase mehleng ye e thata kudu ya teko. Le gona, Jehofa ka Jesu Kriste, o tla tšwela pele a re nea thušo ye re e nyakago go sa šetšwe gore tshepedišo ye ya kgale ya dilo e dumelelwa go tšwela pele e le gona ka nako e kakaa’ng. (1 Petro 5:10) Ee, ga re bolelele pele bogolo bja nako yeo e sa šetšego, e bile ga re bee tšatši-kgwedi e itšego. Seo re se tlogelela Mmoloki o Mogolo wa Nako, e lego Jehofa Modimo.​—Psalme 31:15.

19, 20. (a) Re swanetše go lebelela bjang letšatši le lengwe le lengwe le le fetago leo re le kgotlelelago? (b) Ke bošilo bofe bjoo re nyakago go bo phema, gomme ka baka la’ng?

¹⁹ Lega go le bjalo, moloko wo o boletšwego e sa pele gore o tla bona le go latswa “bofelo bja tshepedišo ya dilo,” mo nakong ye o tšofetše kudu. (Mateo 24:​3, 32-35, bapiša le NW.) Ka gona anke le ka mohla re se ke ra lebala gore letšatši le lengwe le lengwe le le fetago leo re le kgotlelelago le fokotša nako ya Sathane le batemona ba gagwe ya go šilafatša legohle ka go ba gona mo ga bona ka letšatši le tee, gomme re batamela ka le letšatši le tee nako yeo Jehofa a ka se sa hlwago a kgotlelela go ba gona ga ‘dibja tša go bonagatša bogale, tše di diretšwego go tlo senywa.’ (Ba-Roma 9:22) Kapejana ge go se fele pelo ga Jehofa go fihla bofelong, o tla tšholella bogale bja gagwe go banna le basadi bao ba sa mmoifego. Ka gona o tla bontšha go se amogele ga gagwe tsela ya bona ya go dira dilo gaešita lege a ba dumeletše go tšwela pele ba le gona nako ye ka moka.

²⁰ E be e tla ba bošilo bjo bogolo kudu go rena go kgaotša maiteko a rena a lerato a go hwetša moputso wa letago wo o newago ka Jesu Kriste. Go e na le moo, re ikemišeditše go tšwela pele ka potego re le Dihlatse tša Jehofa mehleng ye ya bohlokwa-hlokwa ge Jehofa a tla tloga a iphagamiša e le Mmuši wa Legohle.

[Mongwalo wa tlase]

O tla Araba Bjang?

◻ Ke ka baka la’ng re ka se ke ra phema go lekwa ga kgotlelelo ya rena?

◻ Ke go iphora gofe go re swanetšego go go phema?

◻ Go phema go baka go fokola lege e le gofe, re swanetše go dira’ng?

◻ Moano wa rena ke ofe?

◻ Ke’ng se se tlago go re thuša go kgotlelela dinakong tša mathata?

[Seswantšho go letlakala 11]

Batho ba Modimo, go swana le Dihlatse tše tše di lego Port of Spain, Trinidad, ka mehla ba be ba ikemišeditše go letela Jehofa