Go Kitima Lebelo ka Kgotlelelo

“Anke . . . re kitimeng lebelo le le beilwego pele ga rena ka kgotlelelo.”​—BA-HEBERE 12:1, NW.

1. (a) Ke eng seo se bewago ka pele ga rena ge re ineela go Jehofa Modimo? (b) Mokriste o swanetše go itokišetša lebelo la mohuta mang?

GE RE be re ineela go Jehofa ka Jesu Kriste, ge re bolela ka tsela ya seswantšhetšo, Modimo o ile a bea lebelo ka pele ga rena. Bofelong bja lebelo, moputso o tla newa bohle bao ba fetšago ka katlego. Ke moputso ofe? Bophelo bjo bo sa felego! E le gore mokitimi wa Mokriste a thope moputso wo o mogolo kudu, o swanetše go itokišetša e sego feela go kitima lebelo le lekopana la lephefo, eupja go kitima lebelo la monabo o motelele. Ka gona o tla nyaka kgotlelelo. O tla swanelwa ke go kgotlelela go katana ka nako e telele ga lebelo ka bolona le mapheko a itšweletšago nakong ya lebelo.

2, 3. (a) Ke’ng seo se tlago go re thuša go kitima lebelo la Bokriste go fihla bofelong? (b) Lethabo le thušitše bjang Jesu go kitima lebelo ka kgotlelelo?

² Ke’ng seo se tlago go re thuša gore re kitime lebelo le le bjalo go fihla bofelong? Ke’ng seo se ilego sa thuša Jesu go kgotlelela ge e be e le motho lefaseng? O ile a hwetša matla a ka gare go tšwa sekeng sa lethabo. Ba-Hebere 12:​1-3 (NW) e balega ka gore: “Ka gona, ka ge re e-na le leru la lekaakaa le dihlatse, anke gape re roleng boima lege e le bofe le sebe se se re raretšago gabonolo, gomme re kitimeng lebelo le le beilwego pele ga rena ka kgotlelelo, ge re dutše re lebeletše ka kelohloko go Moemedi o Mogolo le Mophethagatši wa tumelo ya rena, e lego Jesu. Ka baka la lethabo leo le bego le beilwe pele ga gagwe o ile a kgotlelela kota ya tlhokofatšo, dihlong tše nyatšišago gomme o dutše ka letsogong le letona la sedulo sa bogoši sa Modimo. Ka kgonthe, elang hloko kudu yo a kgotleletšego dipolelo tša kganetšo ka badira-dibe bao a bego a sa ba kgahle, e le gore le se ke la lapa gomme la kgaotša meoyeng ya lena.”

³ Bodireding bja gagwe ka moka, Jesu o ile a kgona go tšwela pele a kitima lebelo ka baka la lethabo la Jehofa. (Bapiša le Nehemia 8:10.) Lethabo la gagwe le mo thušitše go kgotlelela gaešita le lehu le le gobošago koteng ya tlhokofatšo, leo ka morago ga lona a ilego a latswa lethabo le le sa hlalosegego la go tsoga bahung le go rotogela letsogong le letona la Tatagwe, a le fao gore a dire modiro wa Modimo go fihla o phethwa. Ka go kgotlelela ga gagwe e le motho yo a lego ka lehlakoreng la Modimo, o ile a kgomarela tshwanelo ya gagwe ya bophelo bjo bo sa felego. Ee, go bjalo ka ge Luka 21:​19 e bolela gore: “Bophelô bya lena Le tlo bo rua ka kxôtlêlêlô.”

4. Jesu o beetše bakitimi-gotee le yena mohlala wa mohuta mang, gomme re swanetše go dula re gopola ka eng?

⁴ Jesu Kriste o beetše bakitimi-gotee le yena mohlala o mobotse kudu, gomme mohlala wa gagwe o re kgonthišetša gore le rena re ka ba bathopa-sefoka. (1 Petro 2:21) Seo Jesu a re kgopelago gore re se dire, re ka se dira. Bjalo ka ge a ile a kgotlelela, le rena re ka kgotlelela. Le gona, ge re dutše re kgomaretše ka go tia go mo ekišeng, re swanetše go dula re nagana ka mabaka ao re nago le ona a go ba bao ba thabilego. (Johane 15:​11, 20, 21) Lethabo le tla re matlafaletša go phegelela go kitima lebelo tirelong ya Jehofa go fihla ge moputso wa letago wa bophelo bjo bo sa felego o hwetšwa.​—Ba-Kolose 1:​10, 11.

5. Re ka ba bjang ba ba thabilego le ba ba matlafaleditšwego lebelo leo le lego ka pele ga rena?

⁵ Go re thuša gore re kgotlelele lebelong, Jehofa o re nea matla ao a fetago a tlhago. Ge re tlaišwa, matla ao le go tseba lebaka leo ka lona re nago le tokelo ya go tlaišwa, di a re matlafatša. (2 Ba-Korinthe 4:​7-9) Selo lege e le sefe se re ka se kgotlelelago ka baka la go godiša leina le Modimo le go thekga bogoši bja gagwe ke lona lebaka la go ba le lethabo le re ka se kego ra le amogwa ke motho. (Johane 16:22) Seo se hlalosa lebaka leo ka lona baapostola ka morago ga go bethwa ka go ya ka taelo ya lekgotla la Sanhedrine, ba bethelwa go nea bohlatse ka dilo tše di makatšago tšeo Jehofa Modimo a di phethilego mabapi le Jesu, ba ilego ba thaba “ka xo re, xe ba xobošitšwe ka ’baka la Leina la Jesu, ke xôna xe ba xodišitšwe.” (Ditiro 5:​41, 42) Lethabo la bona ga se la hwetšwa tlaišong ka boyona eupja ba le hweditšwe kgotsofalong e kgolo ya ka gare ya go tseba gore ba be ba kgahla Jehofa le Jesu.

6, 7. Ke ka baka la’ng mokitimi wa Mokriste a ka hlalala gaešita lege a e-na le ditlaišego, gomme ka mafelelo afe?

⁶ Matla a mangwe gape ao a re thekgago maphelong a rena ke kholofelo yeo Modimo a e beilego ka pele ga rena. Go bjalo ka ge Paulo a bea taba ka gore: “Xe re lokafaditšwe ka tumêlô, ké xôna xe re boelantšwe le Modimo ke Mong ’a rena Jesu Kriste. Ké Yêna yo re bonexo tsela ka Yêna, tsela ya xo fihlêla kxauxêlo ye re emexo ka yôna rè kxanthša letaxô la Modimo le re le holofetšexo. E sexo fao fêla; re kxanthša le ditlaišêxô rè tseba xore di tšweletša kxôtlêlêlô. Kxôtlêlêlô ya tlo tšweletša pôtêxô [“boemo bja go amogelwa,” NW]; pôtêxo ya tlo tšweletša kholofêlô. Xomme kholofêlô xa e lahletše.”​—Ba-Roma 5:​1-5.

⁷ Ditlaišego ka botšona ga di thabiše, eupja dienywa tša khutšo tšeo di di tšweletšago ka morago di a thabiša. Dienywa tše ke kgotlelelo, boemo bja go amogelwa, kholofelo le go phethagatšwa ga kholofelo yeo. Kgotlelelo ya rena e iša go amogelweng ke Modimo. Ge re amogelwa ke Modimo, re ka holofela ka kgodišego phethagatšo ya dikholofetšo tšeo a di dirilego. Kholofelo ye e re boloka re le tseleng e swanetšego gomme ya re kgothatša ka tlase ga ditlhokofatšo go fihla ge kholofelo e phethagatšwa.​—2 Ba-Korinthe 4:​16-18.

Go Thaba Bao ba Kgotlelelago!

8. Ke ka baka la’ng nako ye ya go leta e se go itshenyetša nako?

⁸ Ge re sa letetše nako yeo e beilwego ke Modimo ya go abela bakitimi meputso, go na le diphetogo tšeo re bago le tšona. Tšona ke dikaonefatšo boemong bja moya tše di bakwago ke go lebeletšana le diteko ka katlego, gomme di re dira gore re amogelwe kudu ke Modimo. Di bontšha seo re lego sona le go re nea sebaka sa go diriša dika tše di botse tše di swanago le tšeo babotegi ba mehleng ya kgale ba di bontšhitšego, kudu-kudu tšeo di bontšhitšwego ke Mohlala wa rena, Jesu Kriste. Morutiwa Jakobo o re: “Bana bešo, xe Le wêla melekong ya mehuta-huta, Le re: ké lethabô fêla. Le fêlê Le tseba xore xo lekwa xa tumêlô xo tšweletša kxôtlêlêlô. Kxôtlêlelô yôna a e bê le modirô wo o tletšexo, xore Le bê ba-boló-ka-tlalô ba ba se naxo senyalô, Le se bê le mo Le hlaetšaxo.” (Jakobo 1:​2-4) Ee, re ka letela go ba le diteko tše di fapa-fapanego, eupja diteko tše di tla dira gore re tšwele pele re hlagolela dika tše di swanetšego. Ka go rialo re bontšha gore re tla dula re le lebelong le go fihla ge moputso o hwetšwa, go sa šetšwe mapheko ao re gahlanago le wona.

9, 10. (a) Ke ka baka la’ng bao ba kgotlelelago diteko e le ba ba thabilego, gomme re swanetše go lebeletšana bjang le diteko? (b) Batho ba bogologolo bao ba bego ba thabile e be e le bomang, gomme re ka balelwa bjang gare ga bona?

⁹ Ka gona, ga go makatše ge Jakobo a itše: “Wa lehlôxônôlô ké monna wa xo kxôtlêlêla melekong; xobane xe a bonwe xo bôtêxa, o tlo fiwa mphapahlôxô wa bophelô, wo Modimo a o holofeditšexo ba ba Mo rataxo”! (Jakobo 1:​12) Anke re lebeletšaneng le diteko ka go tsepama, re itlhamile ka dika tša Modimo tšeo di tlago go re matlafatša gore re di fenye.​—2 Petro 1:​5-8.

¹⁰ Gopola gore tsela yeo Modimo a dirišanago le rena ka yona ga se e mpsha. ‘Leru le le botegago la dihlatse’ tša mehleng ya bogologolo go dirišwane le lona ka tsela e swanago ge ba be ba bontšha go tsepama ga bona go Modimo. (Ba-Hebere 12:1) Go amogelwa ga bona ke Modimo go ngwadilwe ka Lentšung la gagwe, gomme ka moka ga bona re ba lebelela e le ba lehlogonolo ka ge ba kgotleletše ka tlase ga teko. Jakobo o re: “Tšeang ka mohlala wa Baporofeta ba ba boletšexo ka Leina la Morêna, mohlala wa xo kxôtlêlêla le wa xo se fêlê pelo. Hleng re re: Ba lehlôxônôlô ke bakxôtlêlêdi! Kxôtlêlêlô ya Jobo Le e kwile. Phêlêtšô ya Morêna Le e bone; xobane Morêna ke wa dikxauxêlô tše ntši, ké yo pelo-thlomoxi.” (Jakobo 5:​10, 11) Go boletšwe e sa le pele gore nakong ya mehleng ye ya mathata, go be go tla ba le ba bangwe bao ba direlago Jehofa ka potego mo lefaseng go fo swana le ge baporofeta nywaga-kgolong ya bogologolo ba dirile. Na ga re thabišwe ke go ba bao ba dirago bjalo?​—Daniele 12:3; Kutollo 7:9.

Go Hwetša Thekgo Lentšung le le Kgothatšago la Jehofa

11. Lentšu la Modimo le ka re thuša bjang go kgotlelela, gomme ke ka baka la’ng re sa swanela go ba bjalo ka mafelo a lekgwara a seswantšho sa Kriste?

¹¹ Paulo o ile a bolela ka thušo e nngwe gape ya go kgotlelela ge a be a bolela gore ka “go kgotlelela ka go se fele pele, le ka kgothatšo e hwetšwago Mangwalong, re ka kgomarela ka go tia kholofelong ya rena.” (Ba-Roma 15:4, The Twentieth Century New Testament) Therešo, e lego Lentšu la Modimo, e swanetše go tsema medu ka go tia ka go rena e le gore re tle re hwetše ka go rena tsela ya go arabela ka mo go swanetšego ka dinako tšohle. Ga re holwe le gatee ke go ba bao ba swanago le lekgwara le le hlaloswago seswantšhong sa Jesu sa mobjadi: “Ba xo byalêlwa lekxwareng ké bao e rexo xe ba kwile Lentšu ba akxofa ba le amoxêla ka thabô. Fêla xa ba na medu dipelong tša bôná, ké ba lebakanyana fêla. Mohla xò tsoxa dihlokofatšô le tlaišo ka ’baka la lôna Lentšu ba tloxa bá ngala.” (Mareka 4:​16, 17) Therešo ya Lentšu la Modimo ga e tseme medu ka go tia go batho ba bjalo; ka gona, mehleng ya tlalelo ga ba kgone go ithekga ka lona le le bjalo ka mothopo wa kgonthe wa matla le kholofelo.

12. Ga se ra swanela go forwa ke eng ge re amogela ditaba tše di lokilego?

¹² Motho lege e le ofe yo amogelago ditaba tše lokilego tša Mmušo ga se a swanela go iphora ka seo se tlago latela. O tšea tsela ya bophelo yeo e tlago go mmakela tlhokofatšo goba tlaišo. (2 Timotheo 3:12) O swanetše go lebelela go ba le tokelo ya go tlelwa ke diteko tše fapa-fapanego ka baka la go kgomarela Lentšu la Modimo le go le botša ba bangwe e le “lethabô fêla.”​—Jakobo 1:​2, 3.

13. Ke bjang Paulo a ilego a thabišwa ke Bakriste ba Thesalonika, gomme ka baka la’ng?

¹³ Lekgolong la pele la nywaga baganetši kua Thesalonika ba ile ba hlola mpherefere ka baka la boboledi bja Paulo. Ge Paulo a be a e-ya Berea, batlaiši ba ba ile ba mo latelela moo gomme ba tsoša mpherefere o mongwe gape. Moapostola yo a bego a tlaišwa o ile a ngwalela babotegi bao ba bego ba šetše kua Thesalonika gore: “Xo re swanetše xe re Le leboxêla xo Modimo ka mehla, lena Bana bešo, xo swanetše, ka xobane tumêlô ya lena e tiêlêla è e-ya, le leratanô la lena bohle le fêla lè tlala, Lè tlala ka mokxwa wo le rena re kxônaxo xo kxanthša lena diphuthexong tša Modimo ka xo bôna kxôtlêlêlô ya lena, xe Le tia tumêlông xe ba le tlaiša bà Le hlokofatša. Ke bohlatse bya moahlolêlô wa Modimo, wa xore Le hwetšwê Le le ba ba swanelwaxo ke mmušô wa Modimo wo Le hlokofaletšwaxo wôna.” (2 Ba-Thesalonika 1:​3-5) Go sa šetšwe go tlaišwa ga Bakriste ba Thesalonika ke manaba, ba ile ba tšwela pele tabeng ya go swana le Kriste le go oketšega ka palo. Seo se kgonegile bjang? Ka gobane ba ile ba hwetša matla Lentšung le le kgothatšago la Jehofa. Ba ile ba kwa ditaelo tša Morena gomme ba kitima lebelo ka kgotlelelo.​—2 Ba-Thesalonika 2:​13-17.

Bakeng sa Phološo ya ba Bangwe

14. (a) Ke ka baka la mabaka afe re tšwelago pele ka lethabo re le bodireding go sa šetšwe mathata? (b) Re rapelela’ng, gomme ka baka la’ng?

¹⁴ Re kgotlelela mathata le ditlaišo ka potego e bile re sa ngongorege, kudu-kudu e le gore go tumišwe Modimo. Eupja go na le lebaka le lengwe le e sego la boithati leo ka lona re dumelelago go tlelwa ke dilo tše bjalo: gore re fetišetše ditaba tša Mmušo go ba bangwe e le gore bagoeledi bao ba oketšegilego ba Mmušo wa Modimo ba ka tšweletšwa ‘gore ba ipolele phatlalatša e le gore ba phološwe.’ (Ba-Roma 10:10, bapiša le NW.) Bao ba šomago tirelong ya Modimo ba swanetše go rapela gore Mong wa puno a šegofatše modiro wa bona ka go nea bagoeledi ba oketšegilego ba Mmušo. (Mateo 9:38) Paulo o ngwaletše Timotheo gore: “Tše O di kwilexo kè Xo botša xò na le dihlatse tše ntši, di xafêlê batho ba ba bôtêxaxo, ba ba tl’o xo kxôna xo ruta ba bangwê. ’Me le wêna O kxôtlêlêlê Ò le mohlabani o botse wa Jesu Kriste.”​—2 Timotheo 2:​2, 3.

15. Ke baka la’ng re swanetše go itshwara bjalo ka bahlabani le bao ba katanago “dipapading”?

¹⁵ Mohlabani o ikaroganya le bophelo bjo bo nago le dithibelo tše dinyenyane bja modudi yo e sego mohlabani. Ka mo go swanago, ga se ra swanela go itatetša ka ditaba tša bao ba sego madireng a Morena, eupja bao ge e le gabotse ba lego ka lehlakoreng la kganetšo. Ke ka baka leo Paulo a ngwaletšego Timotheo gore: “Mohlabani xa a itate ka ditaba tša bophelô byono; se a se rataxo ké xo kxahla eo a mo rapilexo. Xomme le xe motho a ka katana [dipapading, NW], a ka se rwešwe seala, xe a sa katane senna.” (2 Timotheo 2:​4, 5) Go kataneleng phenyo lebelong la go yo hwetša “mphapahlôxô wa bophelô,” bakitimi ba swanetše go itlwaetša boitshwaro le go phema merwalo yeo e se nago mohola le dilo tše di tatetšago. Ka tsela ye ba ka kgona go bea tlhokomelo tabeng ya go iša ditaba tše di lokilego tša phološo go ba bangwe.​—Jakobo 1:12; bapiša le 1 Ba-Korinthe 9:​24, 25.

16. Ke eng se se ka se kego sa tlengwa, gomme re kgotlelela bakeng sa go hola bomang?

¹⁶ Ka gobane re rata Modimo le batho ba swanago le dinku bao ba nyakago go mo hwetša, re kgotlelela go gontši re thabile e le gore re fihlelele ba bangwe ka ditaba tše di lokilego tša phološo. Mohlomongwe manaba a ka re tlema ka baka la go bolela Lentšu la Modimo. Eupja Lentšu la Modimo le ka se ke la tlengwa, le go bolelwa ga lona go ba bangwe go ka se tlengwe. Paulo o hlaloseditše Timotheo lebaka leo ka lona a bego a ikemišeditše go lebana le teko: “Xopola Jesu Kriste Mo-tsoxa-bahung, wa peu ya Dafida, ka mo Ebangedi ya-ka e bolêlaxo, Ye ke tlaišetšwaxo yôna, ka bá ka tlêngwa byalo ka mosenyi. Fêla, Lentšu la Modimo xa le tlêngwe. Kè ka ’baka leo ke kxôtlêlêlaxo kè dirêla bahlaolwa, xore le bôná ba bônê phološô ka Jesu Kriste le letaxo le le sa felexo.” (2 Timotheo 2:​8-10) Lehono ga re nagane feela ka mašaledi a manyenyane a bao ba lego boemong bja go ba Mmušong wa legodimo, eupja gape le ka lešaba le legolo la dinku tše dingwe tša Modiši yo Bolo, Jesu Kriste, e lego lešaba le legolo la bao ba hwetšago Paradeise ya lefaseng ka tlase ga Mmušo wa Kriste.​—Kutollo 7:​9-17.

17. Ke ka baka la’ng re sa swanela go kgaotša lebelo, gomme go feleletša ka eng ge e ba re tšwela pele re le lebelong go fihla bofelong?

¹⁷ Ge nkabe re kgaoditše, gona re be re ka se ithuše goba go thuša motho o mongwe go ya phološong. Ka go kgotlelela lebelong la Bokriste, go sa šetšwe mapheko ao go lebanwago le wona, re tšwela pele re ipeile boemong bja go hwetša moputso le gona re ka thuša ba bangwe ka go lebanya gore ba phologe, mola re dula re le mohlala o matla wa go tia go ba bangwe. Kgopolo ya Paulo ya ‘go kganyelela boyo, mo go lego mphapahlogo’ ke e botse yeo e swanetšego go ekišwa, go sa šetšwe ge e ba re e-na le kholofelo ya legodimo goba ya lefase.​—Ba-Filipi 3:​14, 15.

Go Tšwela Pele ka go Tiišetša Lebelong

18. Go thopa moputso go ithekgile ka eng, eupja gore re kgotlelele go fihla bofelong, ke’ng seo se swanetšego go phengwa?

¹⁸ Go fetša tsela ya rena ya Bokriste ka phenyo bakeng sa go tumiša Jehofa le go thopa moputso wo a re beetšego wona go ithekgile ka go tšwela pele ga rena ka tiišetšo monabong o tletšego wa lebelo. Ka gona, re ka se kgone go kgotlelela go fihla bofelong ge e ba re ikimetša ka dilo tše di sa thekgego go tšweletšwa ga toko. Gaešita lege re tlošitše dilo tše bjalo, dinyakwa e sa dutše e le tše kgolo kudu moo re nyakago matla ka moka ao re ka kgonago go a rapa. Ka gona, Paulo o eletša ka gore: “Anke gape re roleng boima lege e le bofe le sebe se se raretšago gabonolo gomme re kitimeng lebelo le le beilwego pele ga rena ka kgotlelelo.” (Ba-Hebere 12:1, NW) Go swana le Jesu, ga se ra swanela go godiša ka go fetišiša ditlaišego tšeo di swanetšego go kgotlelelwa eupja re swanetše re di lebelele e le tefo e nyenyane ya go lefelela moputso wo o thabišago.​—Bapiša le Ba-Roma 8:18.

19. (a) Ke kgodišego efe yeo Paulo a ilego a e bolela ge bofelo bja bophelo bja gagwe bo batamela? (b) Ge re dutše re batamela bofelo bja lebelo le le kgotlelelwago, re swanetše go ba le kgodišego efe mabapi le moputso wo o holofeditšwego?

¹⁹ Ge bofelo bja bophelo bja gagwe bo batamela, Paulo o ile a kgona gore: “Ke hlabane thlabanô e botse; ke feditše xo šiana; tumêlô ke e swere. Mphapahlôxô wa xo re ke lokile o šetše o beilwe pele xa-ka.” (2 Timotheo 4:​7, 8) Re lebelong le le kgotlelelwago e le gore re hwetše moputso wa bophelo bjo bo sa felego. Ge e ba kgotlelelo ya rena e fela ka baka la ge lebelo le bonala e le le letelele go feta ka mo re bego re letetše ka gona ge re be re le thoma, gona re tla palelwa re le kgaufsi le go hwetša moputso wo o holofeditšwego. O ka kgonthišega. Ga go na pelaelo ya gore moputso o gona.

20. Boikemišetšo bja rena e swanetše go ba bofe go fihla ge bofelo bja lebelo bo fihleletšwe?

²⁰ Ka gona anke mahlo a rena a se ke a lapišwa ke go lebelela go thoma ga masetla-pelo a magolo, pele a fediša Babele o Mogolo gomme ka morago a fediša thulaganyo ka moka ya Diabolo. (2 Petro 3:​11, 12) Ka baka la dipontšho ka moka tša bohlokwa tšeo di re dikologilego, eka re ka lebelela pele ka tumelo. Eka re ka itlhama matleng a rena a go kgotlelela, gomme ra tšwela pele ka sebete lebelong leo Jehofa Modimo a re beetšego lona ka pele go fihla ge bofelo bo fihleletšwe gomme moputso wo o thabišago o hweditšwe, e le gore Jehofa a tumišwe ka Jesu Kriste.

O tla Araba Bjang?

◻ Bakriste ba swanetše go itokišetša lebelo la mohuta mang?

◻ Ke ka baka la’ng lethabo e le la bohlokwa gakaakaa go kitimeng lebelo?

◻ Ke bakeng sa mabaka afe a motheo re dulago re le bodireding go sa šetšwe mathata?

◻ Ke ka baka la’ng re sa swanela go kgaotša lebelo leo Modimo a le beilego ka pele ga rena?

[Seswantšho go letlakala 15]

Go etša ge eka ba lebelong la monabo o motelele, Bakriste ba swanetše go kgotlelela

[Seswantšho go letlakala 17]

Go kataneleng “mphapa-hlôxô wa bophelô,” bakitimi ba swanetše go itlwaetša go itshwara