Beke e Fetotšego Lefase

“Xo rêtwe e a tlaxo ka Leina la Morêna.”​—MATEO 21:9.

1. Ke dihlopha dife tše pedi tše di fapanego tšeo di ilego tša kgongwa ke ditiragalo ka August e fetilego?

“MATŠATŠI A MARARO A BOHLOKO KUDU AO A ŠIŠINTŠEGO LEFASE.” Ka August 1991, dihlogo tša ditaba tše di swanago le se di ile tša gatelela therešo ya gore lefase le ka tsenywa tlhakahlakanong e kgolo ka nako ya matšatšinyana feela. Ka kgonthe, matšatši a mafelelo a August e be e le a tletšego ditiragalo kudu e sego feela bakeng sa lefase, eupja gape le bakeng sa sehlopha seo Jesu a boletšego ka sona gore: ‘Ga se ba lefase.’ Sehlopha se se tsebja lehono e le Dihlatse tša Jehofa.​—Johane 17:14.

2, 3. (a) Tokologo e ile ya gatelelwa bjang kua Zagreb go sa šetšwe maru a ntwa? (b) Tumelo e tiilego e ile ya putswa bjang kua Odessa?

² Kopano ya mathomo ya ditšhaba-tšhaba ya Dihlatse tša Jehofa yeo e kilego ya lokišeletšwa Yugoslavia e be e rulaganyeditšwe bakeng sa August 16 go ya go 18. Bjalo ka ge go ile gwa ipontšha go le bjalo, e be e tla ba gape kopano ya mathomo e kgolo ya batho ba Jehofa setšhabeng seo se bego se le dintšhing tša ntwa ya selegae. Dihlatse tša lefelong leo gotee le baithapi ba tšwago dinageng tša kgaufsi, ba ile ba šoma ka thata ka dikgwedi tše pedi ba mpshafatša ka mo go feletšego lepatlelo la papadi ya kgwele ya maoto la HAŠK Građanski kua Zagreb. Le be le tloga le hlwekile kudu, e le lefelo le le swanetšego bakeng sa go swarela Kopano ya “Barati ba Tokologo ya Modimo.” Baemedi ba dikete ba ditšhaba-tšhaba ba be ba rerile go ba gona, go akaretša ba 600 ba tšwago United States. Ge maru a ntwa ya selegae a ipontšha a nyaka go hlasela, go ile gwa phatlalatšwa lentšu la gore: “Ma-Amerika a ka se ke a tla le gatee.” Eupja ba ile ba tla, ba tla gotee le baemedi ba tšwago dinageng tše dingwe tše dintši. Go be go letetšwe palo ya batho ba tlago go ba gona ba 10 000, eupja ba 14 684 ba be ba le lepatlelong letšatšing la mafelelo! Bohle ba be ba šegofaditšwe kudu ka gobane ba sa ka ba ‘ngala go phuthega ga bona gotee.’​—Ba-Hebere 10:25.

³ Matšatšing a mararo ka morago ga kopano ya Zagreb, maano a go leka go menola mmušo ao a sa kago a atlega a ile a dirwa kua Soviet Union. Ka nako yeo, barati ba tokologo ya Modimo ba be ba dira ditokišetšo tša mafelelo bakeng sa kopano ya Odessa kua Ukraine. Na kopano e be e ka swarwa? Ka tumelo e matla, banababo rena ba ile ba dira dithulaganyo tša go phetha tša go feleletša mpshafatšo ya lepatlelo, gomme baemedi ba tšwela pele ba e-tla. Go le bjalo ka ge eka ke ka mohlolo, maano a go menola mmušo a ile a kgaotša. Kopano e thabišago e ile ya swarwa ka August 24, 25 go e-na le ba 12 115 ba tlilego gomme ba 1 943​—e lego 16 lekgolong ya tlhora ya ba bilego gona—​ba kolobetšwa! Dihlatse tše tše difsa gotee le bakgomaredi ba potego ba nako e telele, ba ile ba thabela gore ba tlile kopanong yeo ba bota Jehofa ka mo go tletšego.​—Diema 3:​5, 6.

4. Dihlatse kua Bohlabela bja Yuropa di be di latela mohlala ofe o beilwego ke Jesu?

⁴ Dihlatse tše tše di botegago di be di latela mohlala wo o beilwego ke Mohlala wa rena, Jesu Kriste. Le ka mohla ga se a ka a hlokomologa go ya menyanyeng yeo e bego e laetšwe ke Jehofa, gaešita lege ba-Juda ba be ba tsoma go mmolaya. Ge a be a e-tla Jerusalema bakeng sa Paseka ya gagwe ya mafelelo, batho ba ba be ba eme go dikologa tempele ba botšiša: “Le re’ng xe Le bôna? A a ka se tle monyanyeng?” (Johane 11:​56) Eupja o ile a tla e le ka kgonthe! Se se ile sa bula tsela bakeng sa beke yeo e feleleditšego ka go fetošwa ga tsela ya histori ya motho. Na ga bjale re ka hlahloba tše dingwe tša ditiragalo tše dikgolo tša beke yeo​—Nisani 8 go ya go 14 almanakeng ya Sejuda?

Nisani 8

5. Ke’ng seo Jesu a bego a se tseba ge a be a e-ya Bethania ka Nisani 8, 33 C.E.?

⁵ Letšatšing le Jesu le barutiwa ba gagwe ba fihla Bethania. Mo Jesu o tla fetša mašego a tshelelago a le legaeng la mogwera wa gagwe yo a rategago Latsaro, yo Jesu a sa tšwago go mo tsoša bahung. Bethania e kgaufsi le Jerusalema. Ka thopeng, Jesu o be a šetše a tsebišitše barutiwa ba gagwe gore: “Byale re rotoxêla Jerusalêma; ’me Morwa-motho ó tlo xafêlwa baperisita ba baxolo le ba-mangwalô, ’me ba tlo mo ahlolêla polaô. Ba tlo mo xafêla diatleng tša ba-ntlê, xore a kwêrwê, a otliwê, a bapolwê sefapanong; fêla, ka ’tšatši la boraro ó tlo tsoxa.” (Mateo 20:​18, 19) Jesu o tloga a lemoga ka mo go feletšego gore bjale o swanetše go lebeletšana le diteko tše bohloko. Lega go le bjalo, ge nako yeo ya teko e kgolo kudu e batamela, ga a ipabalele le gatee ge a hlankela banababo ka lerato. Eka ka mehla re ka ba ba “kxopolo . . . yeo e bexo e le xo Kriste Jesu.”​—Ba-Filipi 2:​1-5; 1 Johane 3:16.

Nisani 9

6. Mantšiboeng a Nisani 9, Maria o dirile’ng, gomme ke’ng seo Jesu a se boditšego Judase?

⁶ Ka morago ga ge letšatši le diketše, ge Nisani 9 e thoma, Jesu o ba dijong legaeng la Simone yo e bego e le molephera. Ke mo moo Maria kgaetšedi ya Latsaro a tšhollelago oli e nkgago monate ya theko ya godimo hlogong ya Jesu le maotong gomme ka boikokobetšo a phumola maoto a Jesu ka moriri wa gagwe. Ge Judase a ganetša seo, Jesu o re: “Mo lesê! Ó di diretše letšatši la xo bolokwa xa-ka lebitleng.” Ka go kwa gore ba-Juda ba bantši ba ya Bethania le gore ba dumela Jesu, baperisita ba bagolo ba rera go mmolaya le go bolaya Latsaro.​—Johane 12:1-7.

7. Mesong ya Nisani 9, leina la Jehofa le ile la godišwa bjang, gomme ke’ng seo Jesu a ilego a se bolela e sa le pele?

⁷ Jesu o thoma leeto la go ya Jerusalema e sa le gosasa kudu. Mašaba a a tšwa go ya go mo gahlanetša, ba mo tšokoletša dikala tša mopalema gomme ba goeletša ba re: “Hosiana, xo rêtwê e a tlaxo ka Leina la Morêna, Kxoši ya Isiraele.” Bjale Jesu o phethagatša boporofeta bja Sakaria 9:9 ka go ya motseng a nametše pokolo. Ge a batamela Jerusalema, o a e llela, a bolelela pele gore ba-Roma ba tla e dikanetša ka legora la diphate tše di nago le dintlha gomme ba o senya ka mo go feletšego​—boporofeta bjo bo bego bo tla ba le phethagatšo ya bjona e makatšago nywaga e 37 ka morago. (Se gape se bolela kotsi go Bojakane, bjo bo hlanogilego ka go latela mohlala wa Jerusalema ya bogologolo.) Babuši ba ba-Juda ga ba nyake Jesu bjalo ka kgoši ya bona. Ka go befelwa ba goeletša ka gore: “Lebelelang! . . . lefase ka moka le mo šetše nthaxo.”​—Johane 12:​13, 19.

Nisani 10

8. Ka Nisani 10, Jesu o ile a bontšha bjang tlhompho e kgolo ya go hlompha ngwako wa Jehofa wa thapelo, gomme ke’ng seo se ilego sa latela?

⁸ Jesu o etela tempele gape. Ka lekga la bobedi, o leleka babapatši ba megabaru le baananyi ba ditšhelete. Moya wa thekišetšano​—“lerato la tšhelete”—​ga se wa swanela go tšwetšwa pele ka ngwakong wa Jehofa wa borapedi! (1 Timotheo 6:​9, 10, NW) Jesu o tla hwa go se go ye kae. O bolela ka go bjalwa ga peu go swantšha se. Peu ya mathomo e a hwa, eupja e a hloga ya tšweletša lehlaka leo le enywago dithoro tše dintši. Ka mo go swanago, lehu la Jesu le tla feleletša ka bophelo bjo bo sa felego bakeng sa mašaba ao a bontšhago tumelo go yena. A tshwentšwe ke go nagana ka lehu la gagwe leo le batamelago, Jesu o rapela gore eka leina la Tatagwe le ka kgethagatšwa ke seo. Ka go arabela seo, lentšu la Modimo le duma bjalo ka modumo wa legadima le tšwa legodimong bakeng sa gore bohle ba lego gona ba kwe: “Ke le neile letaxô; ’me ke sa tlo boela kè le nea letaxô.”​—Johane 12:​27, 28.

Nisani 11​—Letšatši la Leema-ema

9. (a) E sa le ka pela letšatšing la Nisani 11, Jesu o ile a diriša bjang diswantšho go sola ba-Juda ba bahlanogi? (b) Ka go dumelelana le papišo ya Jesu, ke bomang bao ba lahlegetšwego ke sebaka se sebotse kudu?

⁹ Jesu le barutiwa ba gagwe ba tloga Bethania gape bakeng sa letšatši le legolo la leema-ema. Jesu o diriša diswantšho tše tharo go bontšha lebaka leo ka lona ba-Juda ba bahlanogi ba lahlilwego. O rogakile sehlare sa mogo se se sa enywego dienywa gomme boemo bja sona bja go omelela bo swantšha go lahla ga gagwe setšhaba se se se nago tumelo le se se sa enywego dienywa sa ba-Juda. Ge a tsena ka tempeleng, o hlalolsa kamoo balemi bao e sego ba selo ba tšhemo ya merara ya mong wa bona mafelelong ba bolayago morwa wa mong wa bona yo e bilego e le moja-bohwa​—a swantšha go lahla ga ba-Juda kholofelo ya bona go Jehofa, mo go swanetšego go fihlišwa seremong ke go bolaya ga bona Jesu. O hlalosa monyanya wa lenyalo wo o rulagantšwego ke kgoši​—Jehofa—​yo batho bao a ba laleditšego (ba-Juda) ba iphahlelelago ka mabaka a boithati a go se be gona monyanyeng. Ka baka leo, taletšo e ya go batho ba ka ntle​—Ba-ntle—​bao ba bangwe ba bona ba arabelago. Eupja monna yo a hwetšwago a se na seaparo sa monyanya o lahlelwa ntle. O swantšhetša Bakriste ba maaka ba Bojakane. Ba-Juda ba bantši ba mehleng ya Jesu ba be ba laleditšwe “[eupja] bahlaolwa xa ba nene,” bao ba tlago go ba gare ga ba 144 000 ba swailwego bao ba jago bohwa bja Mmušo wa legodimo.​—Mateo 22:​14; Kutollo 7:4.

10-12. (a) Ke ka baka la’ng Jesu a ile a omanya baruti ba ba-Juda, gomme ke kgalemelo efe e bohloko kudu yeo a ilego a e phara godimo ga baikaketši bao? (b) Kahlolo e ile ya phethwa bjang mafelelong godimo ga ba-Juda ba bahlanogi?

¹⁰ Baruti ba ba-Juda ba baikaketši ba tsoma sebaka sa go swara Jesu, eupja o araba dipotšišo tša bona tše dintši tša boradia gomme o ba tlogela ba gakanegile pele ga batho. Ao, ba-Juda bao ba bakgelogi ba bodumedi! Jesu o ba omanya ka go lebanya gakaakang! Ba kganyoga botumo, diaparo tše di ba hlaolago, maina a phagamego, a bjalo ka “Rabi” le “Tate,” go swana le baruti ba bantši ba mehleng ya rena. Jesu o bolela molao wo: “Wa xo ikxodiša ó tlo kokobetšwa, wa xo ikokobetša ó tlo xodišwa.”​—Mateo 23:12.

¹¹ Jesu o kgalema ka thata baetapele bao ba bodumedi. Ka makga a šupago o bolela ka matla gore: “Le ba madi-mabe,” a ba bitša difofu tšeo di hlahlago difofu le baikaketši. Le gona nako e nngwe le e nngwe o nea lebaka le le kwalago la go ba sola ga gagwe. Ba thibela tsela ya go tsena Mmušong wa magodimo. Ge ba tanya mosokologi, e ba yo a swanelwago ke Gehenna gabedi, mohlomongwe a šetše a le lelokelelong la go fedišwa ka baka la sebe sa pele se segolo goba go fišegela thoko. Jesu o bolela se, “Lena ditlaêla le difofu!,” ka gobane Bafarisei ba beile tlhokomelo gauteng ya tempele go e na le tabeng ya go thekga borapedi bjo bo sekilego moo. Ba hlokomologa toka, kgaugelo le potego ge ba lefa sa lesome sa leroto (mint) leo le bego le kganyogwa, lenonya le lehloko, eupja ba hlokomologa ditaba tša bohlokwa tša Molao. Go hlapa ka mokgwa wa tirelo ya borapedi go ka se ke gwa tloša tšhila ya bona yeo e lego ka gare​—ke feela pelo yeo e hlatswitšwego ka tumelo sehlabelong seo se bego se le kgaufsi le go newa sa Jesu ye e bego e ka kgona go dira seo. Boikaketši bja bona bja ka gare le go hloka molao ga bona go bontšha ‘go bogega lege e le gofe’ ga ka ntle e le ga lefeela.​—Mateo 23:​13-29.

¹² Ee, ruri e tloga e le madimabe go Bafarisei, bao e tlogago e le “bana ba babolai ba baporofeta” ba kgale! Ke dinoga, bana ba bo-marabe, bao ba ahloletšwego Gehenna ka gobane ba ka se ke ba bolaya Jesu feela, eupja gape le bao a ba romago. Ye ke kahlolo yeo e swanetšego go phethwa godimo ga “moloko wó.” Go phethagatša se, Jerusalema e ile ya senywa ka mo go feletšego nywaga e 37 ka morago.​—Mateo 23:​30-36.

13. Dipolelo tša Jesu mabapi le meneelo ya tempele di bonagatšwa maemong afe lehono?

¹³ Pele a tloga tempeleng, Jesu o bolela mohlologadi wa mohloki yo a lahlelago ditšheletšana tše pedi tše nyenyane polokelong ka go mo reta​—‘o ntšhitše bohumaneging bja gagwe, a tšhela tšohle tše a bego a tlo phela ka tšona.’ Ruri se ke se se fapanego kudu le bahumi ba megabaru, bao ba tšhelago karolwana e nyenyane feela ya meneelo! Go swana le mohlologadi yola wa mohloki, Dihlatse tša Jehofa lehono di gafa ka go rata nako ya tšona, matla le ditšhelete e le gore di thekge le go katološa modiro wa Mmušo wa lefase ka bophara. Ke mo go fapanego kudu gakaakang le baebangedi ba gobogilego ba TV bao ba jeletšago mehlape ya bona ka go aga maemo a phagamego a lehumo la bona ka noši!​—Luka 20:​45–21:4.

Ge Nisani 11 e Batamela Bofelong

14. Ke manyami afe ao Jesu a ilego a a bontšha, gomme o ile a araba bjang dipotšišo tše oketšegilego tša barutiwa ba gagwe?

¹⁴ Jesu o llela Jerusalema le batho ba yona gomme o re: “Le ka se hlwê Lè mpôna xo fihla xe Le tlo re: Xo rêtwê e a tlaxo ka Leina la Morêna.” (Mateo 23:​37-39) Ka morago, ge ba dutše Thabeng ya Mehlware, barutiwa ba gagwe bao a gweranego kgaufsi le bona ba botšiša ka se, gomme ge Jesu a ba araba o hlalosa pontšho yeo e tlago go swaya go ba gona ga gagwe matleng a Mmušo le go swaya bofelo bja tshepedišo e kgopo ya dilo ya Sathane.​—Mateo 24:1–25:​46; Mareka 13:​1-37; Luka 21:​5-36.

15. Ke pontšho efe yeo Jesu a ilego a e nea mabapi le go ba gona ga gagwe bakeng sa kahlolo, gomme e phethagaditšwe go tloga neng?

¹⁵ Ge a šupa go kahlolo ya Jehofa yeo e tla tlogago e tlišwa godimo ga tempele, Jesu o bontšha gore se se swantšhetša ditiragalo tša nakong e tlago tše senyago bofelong bja tshepedišo ka moka ya dilo. Nako yeo ya go ba gona ga gagwe e tla swawa ke go tsoga ga ntwa ka tekanyo e sa kago ya ba gona, gaešita le ditlala, ditšhišinyego tša lefase le leuba la malwetši gotee le go hloka lerato le go hloka molao. Se e bile therešo gakaakang ka lefase la rena la lekgolong la bo-20 la nywaga ga e sa le go tloga ka 1914!

16, 17. Ke ditiragalo dife tša lefase tšeo Jesu a ilego a di hlalosa, gomme Bakriste ba swanetše go itshwara bjang ge e le ka boporofeta?

¹⁶ Seremo se tla fihlelelwa ‘masetla-pelong a magolo ao a sešogo a bonwa go tloga mola lefase le thomago go ba gona, a ka se kego a ba gona le ka mohla o mongwe.’ Ka ge se e tla ba se se senyago go swana le Meetse-fula a mehleng ya Noage, Jesu o lemoša malebana le go nwelela medirong ya lefase. “Ké xôna phakxamang, xobane nakô ya xo tla xa Morêna wa lena xa Le e tsebe.” Re ka thaba gakaakang gore Mong wa rena o kgethile “molaki e a bôtêxaxo yo bohlale” yo a tloditšwego gore a goeletše temošo le go nea dijo tše dintši tša moya bakeng sa mehla ye ya go ba gona ga gagwe!​—Mateo 24:​21, 42, 45-47.

¹⁷ Lekgolong la rena la bo-20 la nywaga, re bone ‘tlalelo ditšhabeng. Di gakanegile . . . batho ba nologile moko ka poifo le ka go dula ba re lefase le sa tlo welwa ke eng?’ Eupja Jesu o a re botša: “E re xe tšeo di thôma xo dirêxa, Le inamoloxê, Le tsošê dihlôxô tša lena, ka xobane xo tlo ba xò batamêla topollô ya lena.” Le gona o a re lemoša: “Le itôtê xore dipelo tša lena di se kê tša imêlwa ke bohori le xo boiwa, le dipelaêlô tša bophelô byono ’me letšatši leo la tlo Le wêla sehloxo.” Ke feela ka go dula re phakgame moo re ka dulago re amogelega go Jesu, “Morwa-motho,” nakong ya go ba gona ga gagwe.​—Luka 21:​25-28, 34-36.

18. Ke kgothatšo efe yeo re ka e hwetšago diswantšhong tša Jesu tša dikgarebe tše lesome le tša ditalente?

¹⁸ Ge a ruma polelelo-pele ya gagwe e makatšago ka ditiragalo tša mehleng yeno, Jesu o nea diswantšho tše tharo. Sa pele, papišong ya dikgarebe tše lesome, o gatelela gape go nyakega ga ‘go phakgama.’ Ka morago, seswantšhong sa bahlanka le ditalente, o bontšha kamoo go ba mafolofolo go putswago ka gona ka taletšo ya go “Tsêna thabong ya mong wa xaxo.” Bakriste ba tloditšwego bao ba swantšhetšwago dipapišong tše, gotee le dinku tše dingwe ba ka hwetša kgothatšo e kgolo ditlhalosong tše tše kwalago.​—Mateo 25:​1-30.

19, 20. Ke tswalano efe ya lethabo ya mehleng yeno yeo e bontšhwago seswantšhong sa Jesu sa dinku le dipudi?

¹⁹ Seswantšho sa boraro se šupa go go ba gona ga Jesu matleng a Mmušo ka morago ga ge a fihlile le go dula sedulong sa gagwe sa bogoši sa letago sa legodimong. Ke nako ya go ahlola ditšhaba le ya go kgethologanya batho ba lefase ka dihlopha tše pedi, se sengwe e le sa batho ba ikokobeditšego ba swanago le dinku, gomme se sengwe e le sa batho ba dinganga ba go swana le dipudi. Dinku di dira boiteko bjo oketšegilego go ipontšha e le tše thekgago banababo Kgoši​—mašaledi a ba tloditšwego bao ba lego lefaseng mo nakong ye ya bofelo bja lefase. Dinku tše di putswa ka bophelo, mola dipudi tše di se nago tebogo di e-ya tshenyegong ya ka mo go sa felego.​—Mateo 25:​31-46.

²⁰ A tswalano e botse gakaakang yeo re e bonago magareng ga dinku tše dingwe le banababo Kgoši bofelong bjo bja tshepedišo ya dilo! Gaešita lege mašaledi a tloditšwego a be a rwala boikarabelo bjo bogolo bja modiro mathomong a go ba gona ga Kgoši, dimilione tša dinku tše dingwe mo nakong ye di bopa 99,8 lekgolong ya bahlanka ba Modimo lefaseng. (Johane 10:​16) Le bona ba ipontšhitše ba ikemišeditše go kgotlelela ‘tlala, lenyora, go se be le diaparo, bolwetši le kgolego’ e le bagwera ba batlotšwa bao ba kgomarelago potego.a

Nisani 12

21. Ke’ng seo se ilego sa ipha matla ka Nisani 12, gomme bjang?

²¹ Maano-mabe a go bolaya Jesu a tšwela pele. Judase o etela baperisita ba bagolo tempeleng, a dumela go eka Jesu ka ditsekana tše 30 tša silifera. Gaešita le se se be se porofetilwe.​—Sakaria 11:12.

Nisani 13

22. Ke tokišetšo efe yeo e ilego ya dirwa ka Nisani 13?

²² Jesu, yo a tšwelago pele a le Bethania, mohlomongwe e le bakeng sa go rapela le go naganišiša, o roma barutiwa ba gagwe gore ba ye Jerusalema go “Mokêtê.” Legaeng la monna yo, phapošing e kgolo ya ka godimo, ba lokiša Paseka. (Mateo 26:​17-19) Ge letšatši le dikela ka Nisani 13, Jesu o ba le bona moo bakeng sa monyanya wa bohlokwa kudu historing ka moka. Bjale ke’ng se se letilego ka Nisani 14? Sehlogo sa rena se se latelago se tla re botša.

[Mongwalo wa tlase]

O tla Akaretša Bjang?

◻ Ke botho le kamogelo efe tšeo ba bangwe ba ilego ba di direla Jesu nakong ya Nisani 8 go ya go 10?

◻ Jesu o ile a pepentšha bjang baruti ba baikaketši ka Nisani 11?

◻ Ke boporofeta bofe bjo bogolo bjo Jesu a ilego a bo nea, gomme bo phethagatšwa bjang lehono?

◻ Ditiragalo di ile tša leba bjang seremong ka Nisani 12 le 13?

[Seswantšho go letlakala 12]

Jesu o reta mohlologadi wa mohloki yo a neetšego ditšheletšana tše pedi tše nyenyane​—e lego sohle seo a bego a e-na le sona