Go Naganišiša Ka Matšatši A Mafelelo A Jesu Lefaseng

KE LETŠATŠI la bošupa la kgwedi ya Sejuda ya Nisani ngwageng wa 33 C.E. Akanya o bogetše ditiragalo profenseng ya Roma ya Judea. Jesu Kriste le barutiwa ba gagwe ge ba tloga Jeriko yeo e nago le dimela tša yona tša ntšhutha, ba sepela boima tseleng ya marole le ya manyokenyoke. Basepedi ba bangwe ba bantši le bona ba tseleng ya bona ya go ya Jerusalema bakeng sa monyanya wa ngwaga le ngwaga wa Paseka. Lega go le bjalo, barutiwa ba Kriste ba nagana ka se sengwe se se fetago go namelela mo mo go lapišago.

Ba-Juda ba be ba hlologetše Mesia yo a bego a ka tliša kimollo jokong ya ba-Roma. Ba bantši ba dumela Jesu wa Natsaretha e le Mophološi yo e lego kgale a letetšwe. O boletše ka Mmušo wa Modimo ka nywaga e meraro le seripa. O fodišitše balwetši le go fepa bao ba bego ba swerwe ke tlala. Ee, o tlišeditše batho khomotšo. Eupša baetapele ba bodumedi ba kgopišwa ke go solwa ka bogale ke Jesu gomme ba ikemišeditše go dira gore a bolawe. Lega go le bjalo, šolee o sepela ka boikemišetšo tseleng e omeletšego a le ka pele ga barutiwa ba gagwe.—Mareka 10:32.

Ge letšatši le dutše le sobelela ka morago ga Thaba ya Mehlware, Jesu le bagwera ba gagwe ba fihla motsaneng wa Bethania moo ba tlago go fetša mašego a latelago a tshelelago. Ba ba lego moo go ba amogela ke bagwera ba bona e lego Latsaro, Maria le Mareta. Mantšiboa a nea kimollo e fodilego leetong le le tšerwego phišong le go swaya mathomo a Sabatha ya Nisani 8.—Johane 12:1, 2.

Nisani 9

Ka morago ga Sabatha, Jerusalema e tletše lešata ka modiro. Dikete-kete tša baeng di be di šetše di bokane motseng bakeng sa Paseka. Eupša khuduego ya lešata yeo re e kwago ke e sa tlwaelegago kudu nakong ye ya ngwaga. Mašaba a fišegelago ditaba a kitima ditarateng tše pitlaganego go ya dikgorong tša motse. Ge ba dutše ba e-tšwa ka go šušulana dikgorong tše di pitlaganego, a semaka seo ba kopanago le sona! Batho ba bantši bao ba thabilego kudu ba fologa Thabeng ya Mehlware tseleng e tšwago Bethefage. (Luka 19:37) Se ka moka se bolela’ng?

Bona! Jesu wa Natsaretha o tla a nametše pokolwana. Batho ba ala diaparo mo tseleng ka pele ga gagwe. Ba bangwe ba tšokotša makala a sa tšwago go ripša a mepalema gomme ba goeletša ka lethabo ba re: “Hosiana, xo rêtwê e a tlaxo ka Leina la Morêna, Kxoši ya Isiraele.”—Johane 12:12-15.

Ge lešaba le batamela Jerusalema, Jesu o lebelela motse gomme o kgomega kudu. O thoma go lla, gomme re mo kwa a bolelela pele gore motse wo o tla fedišwa. Ge Jesu a fihla tempeleng lebaka le le sa fetšego pelo ka morago ga moo, o ruta mašaba le go fodiša difofu le digole tšeo di bego di e-tla go yena.—Mateo 21:14; Luka 19:41-44, 47.

Se se ile sa lemogwa ke baperisita ba bagolo le ba-mangwalo. Ba kgopišega gakaakang ge ba bona dilo tše kgahlišago tšeo Jesu a di dirago le go hlalala ga mašaba! Ka go se kgone go uta kgalefo ya bona, Bafarisei ba laela gore: “Moruti, kxalema barutiwa ba xaxo.” Jesu o fetola ka gore: “Ke a Le botša, xe bao ba ka homola, xo tlo xoa mafsika.” Pele a tloga, Jesu o bona go sepedišwa mediro ya kgwebo ka tempeleng.—Luka 19:39, 40; Mateo 21:15, 16; Mareka 11:11.

Nisani 10

Jesu o fihla tempeleng e sa le ka pela. Maabane ka ntle le pelaelo o ile a galefišwa ke papaletšano e kgolo yeo e bego e dirwa mabapi le borapedi bja Tatagwe, Jehofa Modimo. Ka gona, ka phišego e kgolo, o thoma go leleka bao ba rekago le go rekiša ka tempeleng. Ke moka o wiša ditafola tša baananyi ba tšhelete ba megabaru le dipanka tša bao ba rekišago maeba. Jesu o goeletša ka gore: “Xo ngwadilwe xwa thwe: Ngwakô waka o tlo bitšwa Ngwakô wa thapêlô; ’me lena, Le o dirile lexôlô la bahlakodi.”—Mateo 21:12, 13.

Baperisita ba bagolo, ba-mangwalo le banna ba bagolo ga ba kgone go kgotlelela ditiro tša Jesu le go ruta ga gagwe phatlalatša. Ba bolawa ke pelo gakaakang ya go mmolaya! Eupša ba šitišwa ke lešaba ka gobane batho ba tlabilwe ke thuto ya Jesu gomme ba tšwela pele “ba mo xomaretše, bà mo theetša.” (Luka 19:47, 48) Ge e thoma go ba mantšiboa, Jesu le bagwera ba gagwe ba thabela go sepela mo go thabišago ba boela Bethania bakeng sa go khutša mo go lapološago ga bošego.

Nisani 11

E sa le mesong gomme Jesu le barutiwa ba gagwe ba šetše ba le tseleng ya bona ya go feta Thabeng ya Mehlware ba e-ya Jerusalema. Ge ba fihla tempeleng, baperisita ba bagolo le banna ba bagolo ba akgofela go hlohla Jesu. Seo se sa dutšego se duma menaganong ya bona ke mogato wa gagwe malebana le baananyi ba ditšhelete le bagwebi ba ka tempeleng. Manaba a gagwe a ile a botšiša ka bogale gore: “Tše O di diraxo O di dira ka matla a fe? Ké mang a Xo filexo matla á?” Jesu o fetola ka gore: “Le Nna ke tlo Le botšiša taba e tee, ye e tl’o xo re xe Le mpotša yôna, le Nna ka Le botša xore ké matla mang a ke diraxo ka ôna. Kolobetšô ya Johane e be e tšwa kae? A e be e tšwa lexodimong, xoba e be e tšwa bathong?” Ge ba rerišana, baganetši ba bolela gore: “Xe re ka re e be e e-tšwa lexodimong, ó tlo re: Xe Le sa ka [la] mo dumêla Le be Le re’ng? Xe re ka re: E be e e-tšwa bathong, re boifa sethšaba; xobane ka moka ba re Johane ké moporofeta.” Ba gakanegile, ba araba ka mo go fokolago ba re: “Xa re tsebe.” Jesu o araba ka moya o fodilego o re: “Xôna le Nna xa ke Le botše xore ké matla mang a ke diraxo ka ôna.”—Mateo 21:23-27.

Bjale manaba a Jesu a leka go mo tanya gore a bolele selo seo ba bego ba ka dira gore a swarwe ka sona. Ba botšiša gore: “A xo re loketše xo nthšetša Kesara mothšêlô, xoba xa xo a re lokêla?” Jesu a araba ka gore: “Mponthšeng thšêlêtê ya lekxêthô.” O a botšiša: “Ké sa mang seswanthšô sé, le leina lé?” Ba re: “Ké tša Kesara.” A ba gakantšha, Jesu a bolela ka go kwagala gore bohle ba kwe, o re: “Xôna nthšetšang Kesara tše e lexo tša Kesara; Modimo Le Mo nthšetšê tše e lexo tša Modimo.”—Mateo 22:15-22.

Ka ge a homoditše manaba a gagwe ka polelo e sa ganetšegego, Jesu bjale o tšwela pele go sola a le pele ga mašaba le barutiwa ba gagwe. Theetša ge a dutše a sola ka ntle le poifo ba-mangwalo le Bafarisei. O re: “Le se kê la ba etša medirong ya bôná; xobane ba a bolêla, ’me xa ba dire.” O tsebatša lelokelelo la bomadimabe go bona ka sebete, a ba hlaola e le bahlahli ba difofu le baaketši. Jesu o re: “Hee lena dinôxa, matswinyana a marabê, kahlolô ya xo tlo Le iša moleteng wa mollô Le tlo e phônyôkxa bya’ng?”—Mateo 23:1-33.

Tsholo ye e bogale ga e bolele gore Jesu o tshediša dika tše dibotse tša ba bangwe mahlo. Ka morago o bona batho ba tšhela tšhelete ka dipolokelong tša matlotlo tša tempele. Ke mo go kgomago maikwelo gakaakang go bona mohlologadi wa modiidi a tšhela matlotlo a gagwe ka moka a go iphediša—e lego ditšheletiana tše pedi tša tšhipi tša matla a manyenyane kudu! Ka tebogo e borutho, Jesu o bontšha gore ge e le gabotse, mohlologadi o ntšhitše go fetiša kgole bohle bao ba ntšhitšego meneelo e mentši “xo tše di ba tlaletšexo.” Ka kwelobohloko ya gagwe e lerato, Jesu o leboga ka mo go tseneletšego selo le ge e le sefe seo motho a kgonago go se dira.—Luka 21:1-4.

Jesu bjale o tloga tempeleng ka lekga la mafelelo. Ba bangwe ba barutiwa ba gagwe ba bolela ka bobotse bja yona, gore e “thakgilwe ka mabje a mabotse le ka dineo.” (PK) Jesu o araba ka go ba tlaba ka gore: “Xo e-tla matšatši ao xo ka se kexo xwa šadišwa lebyê lè sa hlatlaxane le le lengwê, lè sa ka la šuthišwa.” (Luka 21:5, 6) Ge baapostola ba dutše ba latela Jesu ba e-tšwa motseng o pitlaganego, ba ipotšiša seo a ka bago a be a se bolela.

Ee, ka moragonyana Jesu le baapostola ba gagwe ba a dula le go thabela khutšo le go homola ga Thaba ya Mehlware. Ge ba dutše ba bogetše ponagalo e botse ya Jerusalema le tempele, Petro, Jakobo, Johane le Andrea ba nyaka tlhaloso ya polelelo-pele e makatšago ya Jesu. Ba re: “O k’O re botšê; tšeo di tlo dirêxa neng? O re botšê le mahlolá a re tl’o xo bôna ka ôna, xe xo fihla maboô a xaxo le bofêlô bya mabaka ano.”—Mateo 24:3; Mareka 13:3, 4.

Ge a araba Morutiši yo Mogolo o nea boporofeta bjo bo makatšago e le ka kgonthe. O bolelela pele dintwa tše šoro, ditšhišinyego tša lefase, tlhaelelo ya dijo le mauba a malwetši. Gape Jesu o bolela e sa le pele gore ditaba tše di lokilego tša Mmušo di tla bolelwa lefaseng ka moka. O lemoša ka gore: “Xobane ma-setla-pelo a mohla woo e tlo ba a maxolo, a a sešoxo a bônwa xo tloxa mola lefase lè thôma xo ba xôna, a a ka se kexo a ba xôna le ka mohla o mongwê.”—Mateo 24:7, 14, 21; Luka 21:10, 11.

Baapostola ba bane ba theeditše ka kelohloko ge Jesu a dutše a ahla-ahla dibopego tše dingwe tša ‘pontšho ya go ba gona ga gagwe.’ O gatelela go nyakega ga ‘go phakgama.’ Ka baka la’ng? O re: “Xobane nakô ya xo tla xa Morêna wa lena xa Le e tsebe.”—Mateo 24:42; Mareka 13:33, 35, 37.

Le e bile letšatši le le sa lebalegego go Jesu le baapostola ba gagwe. Ge e le gabotse, ke letšatši la mafelelo la bodiredi bja Jesu bja phatlalatša pele ga go swarwa ga gagwe, go sekišwa le go bolawa. Ka ge e thoma go ba bošego, ba thoma go boela morago monabonyana o mokopana ka mošola wa mmoto go ya Bethania.

Nisani 12 le 13

Jesu o fetša Nisani 12 ka boiketlo le barutiwa ba gagwe. O lemoga gore baetapele ba bodumedi ba tloga ba nyaka go mmolaya gomme ga a nyake ba šitiša monyanya wa gagwe wa Paseka mantšiboeng a latelago. (Mareka 14:1, 2) Letšatši le le latetšego, e lego Nisani 13 batho ba swaregile ka go dira dithulaganyo tša mafelelo tša Paseka. Ge e thoma go ba thapama, Jesu o roma Petro le Johane gore ba ba lokišeletše Paseka ka phapošing ya ka godimo Jerusalema. (Mareka 14:12-16; Luka 22:8) Pejana ga ge letšatši le sobela, Jesu le baapostola ba bangwe ba lesome ba kopana le bona moo bakeng sa monyanya wa bona wa mafelelo wa Paseka.

Nisani 14, ka Morago ga ge Letšatši le Sobetše

Jerusalema e apešitšwe ke seetša se se sego bogale sa šwahlane ge kgwedi e tletšego e rotoga ka godimo ga Thaba ya Mehlware. Ka phapošing e kgolo e lokišitšwego, Jesu le ba 12 ba dutše ba sekame tafoleng e lokišitšwego. O re: “Ke hloloxetšwe xa-xolo-xolo xo ja Paseka yé le lena kè sešo ka hlokofatšwa.” (Luka 22:14, 15) Ka morago ga lebaka baapostola ba tlabja ke go bona Jesu a emelela gomme a beela diaparo tša gagwe tša ka ntle ka thoko. A tšea toulo le sebjana se se nago le meetse, a thoma go ba hlapiša maoto. A thuto e sa lebalegego gakaakang mabapi le tirelo ya boikokobetšo!—Johane 13:2-15.

Lega go le bjalo, Jesu o tseba gore yo mongwe wa banna ba—e lego Judase Isikariothe—o be a šetše a rulagantše go mo eka go baetapele ba bodumedi. Ka mo go kwešišegago, Jesu o thoma go nyama kudu. O utolla gore: “E mongwê wa lena ó tlo nkêka.” Baapostola ba nyamišwa kudu ke se. (Mateo 26:21, 22) Ka morago ga go bina Paseka, Jesu o botša Judase gore: “Se O se diraxo, akxofiša xo se dira.”—Johane 13:27.

Gatee-tee ge Judase a tlogile, Jesu o hloma dijo tša go gopola lehu la gagwe leo le tlago. O tšea senkgwa se se sa omelwago, a leboga ka thapelo, a se ngwathaganya gomme a laela ba 11 gore ba je. O re: “Ké mmele wa-ka o newaxo ka ’baka la lena. Dirang byalo xore e bê xo nkxopola.” Ke moka a tšea senwelo sa beine e khwibidu. Ka morago ga ge a kgopetše tšhegofatšo, o fetišetša senwelo go bona a ba botša gore ba nwe go sona. Jesu o oketša ka gore: “Ké madi a-ka a Kxwêranô e mphsa, a thšollwaxo ka ’baka la ba bantši, e bê xo lebalêlwa dibe.”—Luka 22:19, 20; Mateo 26:26-28.

Mantšiboeng ao a bohlokwa, Jesu o ruta baapostola ba gagwe ba botegago dithuto tše dintši tša bohlokwa, gomme gare ga tše ke bohlokwa bja lerato la borwarre. (Johane 13:34, 35) O ba kgonthišetša gore ba tla hwetša “mothuši,” e lego moya o mokgethwa. O tla ba gopotša dilo ka moka tšeo a ba rutilego tšona. (Johane 14:26, NW) Ka morago mantšiboeng ao, ba swanetše go ba ba kgothatšwa kudu ke go kwa Jesu a rapela thapelo ya phišego legatong la bona. (Johane, kgaolo 17) Ka morago ga ge ba opetše dikopelo tša theto, ba tloga phapošing ya ka godimo gomme ba latela Jesu go tšwela ka ntle moyeng o fodilego wa bošego-gare.

Ba tshela Moedi wa Kidirone, Jesu le baapostola ba gagwe ba leba go le lengwe la mafelo a bona ao ba a ratago, e lego serapeng sa Getsemane. (Johane 18:1, 2) Ge baapostola ba gagwe ba dutše ba letile, Jesu o tšwela pele go ya kgojana gore a rapele. Kgateletšo ya gagwe ya maikwelo ga e hlalosege ge a dutše a lopa Modimo ka go tšwa pelong gore a thuše. (Luka 22:44) Go fo nagana ka kgobogo yeo e bego e tla pharwa go Tatagwe yo a rategago wa legodimong ge e ba a be a ka palelwa, ke mo go kwešago bohloko ka mo go feteletšego.

Jesu o be a se a hlwa a fetša go rapela ge Judase Isikariothe a fihla le lešaba le le swerego ditšhoša, melamo le dirumola. Judase a atla Jesu gabonolo o re: “Dumêla, Moruti!” Ye ke pontšho go banna gore ba sware Jesu. Gatee-tee, Petro o kgatikanya tšhoša ya gagwe gomme a ripa tsebe ya mohlanka wa moperisita yo mogolo. Jesu ge a dutše a fodiša tsebe ya monna yoo, o re: “Bušetša thšoša ya xaxo bodulong bya yôna; xobane e a swaraxo thšoša, ó tlo bolawa ka yôna.”—Mateo 26:47-52.

Selo se sengwe le se sengwe se direga ka lebelo! Jesu o a swarwa gomme o a tlengwa. Ka poifo le kgakanego, baapostola ba tlogela Mong wa bona gomme ba a tšhaba. Jesu o išwa go Hanna, yo e kilego ya ba moperisita yo mogolo. Ka morago a išwa go Kayafa, yo ka nako yeo e lego moperisita yo mogolo gore a sekišwe. Diiring tša mesong, Sanhedrine e latofatša Jesu ka maaka ka molato wa thogako. Se se latelago, Kayafa o mo iša go mmuši wa Roma Pontio Pilato. O romela Jesu go Heroda Antipase mmuši wa Galilea. Heroda le bahlapetši ba gagwe ba kwera Jesu. Ka morago o romelwa gape go Pilato. Go hloka molato ga Jesu go tiišetšwa ke Pilato. Eupša baetapele ba bodumedi ba ba-Juda ba mo gapeletša gore a ahlolele Jesu lehu. Ka morago ga go gobošwa mo gogolo ka mantšu le mmeleng, Jesu o išwa Golgotha moo a kokotelwago koteng ya tlhokofatšo ka go hloka kgaugelo le go hwa lehu le le kwešago bohloko.—Mareka 14:50–15:39; Luka 23:4-25.

E be e tla ba manyami a magolo historing ge nkabe lehu la Jesu le fedišetše bophelo bja gagwe sa ruri. Ka mo go thabišago, ga se gwa ka gwa ba bjalo. Ka Nisani 16, 33 C.E., barutiwa ba gagwe ba ile ba makatšwa ke go hwetša gore o be a tsošitšwe bahung. Ge nako e dutše e e-ya, batho ba fetago 500 ba ile ba kgona go tiišetša gore Jesu o be a phela gape. Matšatši a 40 ka morago ga tsogo ya gagwe, sehlopha sa balatedi ba botegago se ile sa mmona a rotogela legodimong.—Ditiro 1:9-11; 1 Ba-Korinthe 15:3-8.

Bophelo bja Jesu le Wena

Se se go kgoma bjang—ge e le gabotse, ka moka ga rena? Go ba gona, bodiredi bja Jesu, lehu le tsogo tša gagwe di godiša Jehofa Modimo gomme di bohlokwa go phethagatšweng ga morero wa Gagwe o mogolo. (Ba-Kolose 1:18-20) Ke tša bohlokwa kudu go rena ka gore re ka lebalelwa dibe tša rena motheong wa sehlabelo sa Jesu gomme ka go rialo re ka ba le tswalano ya motho ka noši le Jehofa Modimo.—Johane 14:6; 1 Johane 2:1, 2.

Gaešita le bahu ba a kgongwa. Tsogo ya Jesu e bula tsela ya go ba bušetša bophelong lefaseng la Paradeise le le holofeditšwego ke Modimo. (Luka 23:39-43; 1 Ba-Korinthe 15:20-22) Ge e ba o nyaka go tseba mo go oketšegilego ka ditaba tše bjalo, re go laletša gore o be gona Segopotšong sa lehu la Kriste ka April 11, 1998, Holong ya Mmušo ya Dihlatse tša Jehofa ya lefelong la geno.

[Lepokisi go letlakala 6]

“Lexôlô La Bahlakodi”

JESU o be a na le lebaka le le kwalago la go bolela gore babapatši ba megabaru ba be ba fetošitše tempele ya Modimo “lexôlô la bahlakodi.” (Mateo 21:12, 13) Gore ba lefe lekgetho la tempele, ba-Juda le basokologi ba ba tšwago dinageng tše dingwe ba be ba swanetše go fetošetša tšhelete ya bona e šele tšheleteng yeo e amogelegago. Pukung ya gagwe ya The Life and Times of Jesus the Messiah, Alfred Edersheim o hlalosa gore baananyi ba tšhelete ba be ba tlwaetše go hloma dikgwebo tša bona diprofenseng ka Adar 15, e lego kgwedi pele ga Paseka. Go thoma ka Adar 25, ba be ba hudugela lefelong la tempele Jerusalema gore ba ikhole ka go goroga mo gogolo ga ba-Juda le basokologi. Barekiši ba be ba na le kgwebo e atlegago, ba lefiša tšhelete bakeng sa karolo e nngwe le e nngwe ya tšhelete yeo e ananywago. Go bolela ga Jesu ka bona e le bahlakodi go šišinya gore ditefišo tša bona e be e le tše feteletšego kudu moo e lego gore ge e le gabotse ba be ba amoga badiidi tšhelete ka kgapeletšo.

Ba bangwe ba be ba sa kgone go tliša diphoofolo tša bona ka noši tša sehlabelo. Motho le ge e le ofe yo a bego a e-tla le phoofolo o be a swanetše go dira gore phoofolo e hlahlobje ke mohlahlobi tempeleng—bakeng sa tefo. Ba sa nyake go ba kotsing ya go ganwa ga phoofolo ka morago ga go tla le yona leeto le letelele, ba bantši ba be ba reka yeo e “dumeletšwego” ke ba-Lefi go barekiši ba sa botegego ka tempeleng. Seithuti se sengwe se re: “Balemi ba bantši ba badiidi ba be ba lefišwa ka mo go feteletšego kudu moo.”

Go na le bohlatse bja gore Hanna yo e kilego ya ba moperisita yo mogolo le lapa la gagwe ba be ba e-na le mašokotšo a beeleditšwego go babapatši ba tempeleng. Mengwalo ya bo-rabi e bolela ka “Dithekišo tša [tempeleng] tša barwa ba Hanna.” Lekgetho le le tšwago go baananyi ba ditšhelete le leo le tšwago thekišong ya diphoofolo ka mabaleng a tempele e be e le o mongwe wa methopo ya bona e megolo ya ditseno. Seithuti se sengwe se re mogato wa Jesu wa go leleka babapatši “o be o sa lebišwa feela seriting sa baperisita eupša o be o lebišitšwe le go methopo ya ditseno tša bona.” Go sa šetšwe ge seo se ka ba se le bjalo, manaba a gagwe a be a tloga a nyaka go mmolaya!—Luka 19:45-48.

[Lepokisi go letlakala 4]

Matšatši A Mafelelo A Bophelo Bja Jesu E Le Motho

Nisani 33 C.E. Ditiragalo Motho yo a Phagamego Kudu*

Mokibelo Sabatha (Mošupologo, April 6, 1998) 101, ser. 4

16 Sontaga Jesu o a tsošwa 128

* Mo go lokeleditšwe dinomoro tšeo di hlaolago dikgaolo pukung ya Motho yo a Phagamego Kudu yo a Kilego a Phela. Bakeng sa tšhate yeo e nago le ditšhupetšo tše di tletšego tša Mangwalo bakeng sa bodiredi bja Jesu bja mafelelo, bona ‘Mangwalo ka Moka a Buduletšwe ke Modimo Gomme a a Hola,’ letlakala 290. Dipuku tše di gatišitšwe ke Watchtower Bible and Tract Society of New York, Inc.