Go Phegelela Pakane e Beilwego ge ke E-na le Nywaga e Tshelelago

KA GE GO ANEGA SANDRA COWAN

BATSWADI ba bantši ba kgethela bana ba bona modiro wa bophelo ka moka, bjalo ka mmino goba ballet, gomme ba thomiša go ba tlwaetša e sa le ba banyenyane kudu. Se ke sona seo mma a se dirilego go nna. Go tloga nakong ya ge ke be ke sa na le dibeke tše pedi ke be ke kukwa ke išwa dibokeng ka moka tša Bokriste le bodireding bja tšhemo.

GE KE be ke e-na le nywaga e mene, Mma o be a nagana gore ke be ke loketše go bolela ditaba ka bonna. Ke gopola boiteko bja mathomo gabotse. Re be re ile motseng o mogolo wa polaseng ka koloi, gomme mola Mma le ba bangwe ba be ba letile ka koloing, ke ile ka tšwa gomme ka ya mojakong. Mosadi yo botho o ile a theetša mola ke mo neela dipukwana tše lesome. O ile a di lefelela ka setena se segolo sa sesepe. Sona se be se nyaka gore ke se rwale ka diatla tša-ka tše pedi. Ke be ke thabile!

Ngwaga wona woo, 1943, Sekolo sa Beibele sa Watchtower sa Gilead se ile sa bula mejako ya sona bakeng sa go tlwaeletša badiredi ba nako e tleletšego ba babulamadibogo modiro wa boromiwa. Mma o ile a nkgothaletša gore ke dire tirelo ya boromiwa pakane ya-ka bophelong. Ntwa ya II ya Lefase e be e iphile matla kua Yuropa, ka gona, mma o ile a mmpotša ka bana ba Dihlatse kua Yuropa bao ba bego ba tšewa go batswadi ba bona. O be a nyaka gore nna ke tie ka mo go lekanego gore ke tle ke kgotlelele teko ya mohuta lege e le ofe.

Selemong sa 1946 ke ile ka kolobetšwa kopanong ya ditšhaba-tšhaba kua Cleveland, Ohio. Gaešita lege ke be ke e-na le nywaga e tshelelago feela, ke be ke ikemišeditše go phetha boineelo bja-ka go Jehofa. Selemong seo ke ile ka šoma ke le mmulamadibogo la mathomo. Ke gopola mesong e mengwe ke sepediša dimakasine tše 40 bathong ba ba bego ba le Lefelong la Mabenkele, kua San Diego, California. Ke kgolwa gore go ba yo monyenyane ga-ka le go bolela kudu ke tšona di ntirilego gore ke kgone.

Gantši re be re bolela kgaufsi le Beth-Sarim, e lego moo mookamedi yo a babjago wa Mokgatlo wa Watch Tower, Ngwanabo rena Rutherford a feditšego marega gona pele ga lehu la gagwe ka 1942. Re be re etela ka mehla e bile re e-ja dijo tša mosegare gotee le bahlanka ba nako e tletšego gona moo. Maeto a bjalo ao a thabišago a ile a ntira gore ke phethe ka gore tsela ye ruri e be e le mohuta wa bophelo bjo ke bego ke bo nyaka. Ka nako yeo ke ile ka dira Sekolo sa Gilead pakane ya-ka bophelong.

Ngwageng o latelago batswadi ba-ka ba ile ba hlalana, eupja boemo bja lapa bjo bo fetogilego ga se bja senya boemo bja rena bja moya. Mma e be e le mmulamadibogo gomme a kgomegile kudu ka go tlwaetša nna le ngwanešo. Kharabane ya rena e nyenyane e be dula e bontšha bophelo ka diketelo tša banababo rena ba Bakriste le dikgaetšedi. Mma o be a dira boiteko bjo bo kgethegilego bja go nkopanya le dialoga tša Gilead. Tše dingwe tša dialoga tše bjalo e bile Lloyd le Melba Barry bao ba bego ba etetše ka modiro wa bosepedi ge ba sa letetše kabelo ya bona ya kua Japane. Ba be ba diriša nako ba nkgothatša​—nna ngwanenyana yo a bego a fišegela go ba moromiwa—​gomme seo se be se tloga se nkgahla.

Ge ke be ke e-na le nywaga e lesome, Mma o ile a nyalana le Hlatse e kgahlišago yeo e bego e le modiredi wa mmulamadibogo. O ile a se tšee nna le ngwanešo ka lengwalo la bohlatse feela eupja le ka pelo ya gagwe. Lerato la gagwe la go rata Jehofa le go fišegela ga gagwe tirelo di be di fetela kudu.

Mma le Tate ba be ba šoma ka botee go hlahla rena bana ba bona ka bobedi nywageng e thata ya bofsa. Legae la rena e be e le lefelo la moya leo ke le gopolago ka go le rata. Go bona go bula madibogo ba hwetša moputsonyana o monyenyane mola ba godiša bana ba babedi go be go se bonolo; go ile gwa nyaka boikgafo. Eupja Mma le Tate ba be ba ithekgile ka Jehofa gomme ba etišitše Mmušo pele.

Ke gopola gabotse gakaakang  kopano ya ditšhaba-tšhaba kua New York City ka 1950! Tate o ile a hwetša tšhelete ka kadimo pankeng, gomme a nametša banamedi ba bararo bakeng sa go thuša go lefelela ditshenyagalelo. Nna, Mma, Tate le ngwanešo, ka moka ga rena re ile ra dula ka madulong a ka pele go tloga San Diego go ya New York, mola ba bangwe ba dutše ka morago. Ka ge mothwadi wa Tate a be a ganne go mo fa maikhutšo a lebaka la dibeke tše pedi modirong, go ba kopanong yeo go ile gwa mo lobiša modiro. Eupja, bjalo ka ge Tate a re kgonthišeditše, Jehofa o be a tla re nea dinyakwa tša rena, gomme O dirile bjalo. Tate o ile a rekiša koloi gore a lefelele tšhelete ya kadimo ya pankeng gomme ka morago a hwetša modiro o  mokaone. Phihlelo ye le tše dingwe tše di swanago le yona di itlhatsetše e le tša bohlokwa kudu nywageng ya ka morago ge nna le monna wa-ka re be re lebana le maemo a thata.

Leetong la rena la go boa New York, re ile ra etela Kingdom Farm, moo ke ilego ka kgona go bona Sekolo sa Gilead ka lekga la mathomo. Ke gopola ke eme ka go e nngwe ya diphapoši gomme ke ipotša gore, ‘Ga sešo ke be le nywaga e 11. Nka se tsoge ke tlile mo. Haramagedone e tla tla pele.’ Eupja leeto leo le ile la tloga le ntira gore ke ikemišetše go feta lege e le neng pele gore ke dire Gilead pakane ya-ka.

Go Katanela Pakane Ya-ka

Maikhutšong a mangwe le a mangwe a selemo ge ke le sekolong, go tloga mphatong wa mathomo go ya pele, ke be ke bula madibogo. Ka gona, dibeke tše pedi ka morago ga go aloga sekolong se phagamego ka June 1957, ke ile ka ba mmulabadibogo wa ka mehla.

Seboka sa kopanong ya selete bakeng sa bao ba bego kgahlegela Gilead kopanong ya Los Angeles ka 1957 e bile seo se kgethegilego go nna. Ge ke tsena ka tenteng ya seboka, ke ile ka kopana le Bill, e lego ngwanabo rena o mofsa yo ke mo tsebilego mola ke be ke e-na le nywaga e tsheletšego. Nywageng ye e bego e fetile o be a se gona a šoma moo go nyakegago thušo e kgolo gona kua Louisiana. Re ile ra tlabja ke ge re hwetša gore bobedi bja rena re be re kgahlišwa gakaakang ke tirelo ya boromiwa. Dikgwedi tše tshelelago ka morago re ile ra phetha ka gore re go dire modiro wa mohlakanelwa. Re ile ra ngwalela Mokgatlo re kgopela kabelo, gomme kgwedi pele ga lenyalo la rena re ile ra amogela kabelo ya Romney, ka Bodikela bja Virginia.

Re ile ra ya moo ge re be re le tseleng ya rena ya go ya kopanong kua New York ka 1958. Ge re le kopanong, re ile ra ba sebokeng sa bao ba kgahlegelago Gilead. Go be go e-na le ba makgolo. Ge re lebelela re ile ra ikwa gore ditebelelo tša go biletšwa Gilead di be di fokola e le ka kgonthe. Lega go le bjalo, re ile ra iša kgopelo ya mathomo gaešita lege re be re re e-na le dibeke tše 11 re nyalane. Ngwageng o latelago kopanong ya selete ya Philadelphia, re ile ra romela kgopelo ya bobedi.

Nna le Bill re ile ra ithuta kua Romney go ithekga ka Jehofa gore a re thuše gare ga maemo a thata. Romney e be e le toropo ya badudi ba e ka bago ba 2 000. Go hwetša modiro go be go sa kgonege. Re be re dula ka kharabaneng ya maitirelo ya dimithara tše hlano ye e bego e hlametšwe boemo bja California bja leratadima. Re be re se na meetse a sepelago ka diphaephe, go se na sa go ruthufatša, go se na le setšidifatši. Go ile gwa tonya kudu ka mo gare moo re ilego ra swanelwa ke go pšhatla lehlwa la meetse a kgahlilego ka paketeng gore re hwetše meetse. Banababo rena ba ile ba re thuša ka mo ba ka kgonago ka gona, ba ngwathelana le rena dijo tšeo ba di tsomilego. Re be re e-ja kgama, raccoon le sehlora. Ke go feta gatee re ilego ra nagana gore re ka se be le sa go ja letšatši ka moka, gomme ka morago ge re be re fihla gae go tšwa tirelong, re hwetša diapola le tšhese di tlogetšwe pele ga lemati la rena.

Re ile ra tshwenyega dikgwedi tše senyane re phela ka go hwetša tšheletšana e nyenyane nako le nako. Mafelelong re ile ra phetha ka gore e tla ba bohlale go hudugela Baltimore, Maryland, moo Bill a bego a ka hwetša modiro gona. Ge re botša banababo rena ka phetho ya rena ba ile ba lla gomme le rena ra lla. Ka gona, re ile ra phetha ka gore re kgotlelele ganyenyane.

Kapejana ka morago ga moo Hlatse yeo e bego e le molaodi wa supermarket kua Westernport, Maryland mo e ka bago bokgole bja dikhilomithara tše 60, o ile a nea Bill modiro wa lebakanyana. Ka gona, barutwana ba rena ba Beibele ba ile ba re nea ntlwana e botsana e nago le phahlo le setofo se segolo sa malahla. E bile nakong yeo moo Maleaki 3:​10 e bilego yeo ke e ratago kudu. Jehofa o be a re tšholletše ka tšhegofatšo go feta kamoo re bego re letetše ka gona.

Gilead Mafelelong!

Le lengwe la matšatši ao a thabišago kudu bophelong bja-ka e bile letšatši la November 1959, ge re be re amogetše taletšo ya rena ya go laleletšwa Gilead. Re ile ra laleletšwa gore re tsenele sehlopha sa bo-35, e lego sa mafelelo seo se ilego sa swarelwa Kingdom Farm. Ge ke be ke eme ka phapošing yeo ke ilego ka ema ka go yona ge ke sa le ngwana, ke ile ka ikwa ke e-na le maikwelo a borutho le lethabo tšeo go se nago mantšu ao a ka di hlalosago ka tshwanelo.

Gilead e be e le lefelo le le nonnego la moya. E be e swana le go phela lefaseng le lefsa ka dikgwedi tše hlano. Ke ka sewelo mo re letelago selo se sengwe ka nywaga e mentši gomme ka morago ra hwetša gore ke se sekaone go feta kamoo re bego re letetše ka gona. Eupja Gilead e be e fo ba bjalo.

Re ile ra abelwa India, eupja mafelelong ra tingwa di-visa. Ka gona, ka morago ga go leta ngwaga kua New York City, Mokgatlo wa Watch Tower o ile wa re abela ka lefsa kua Morocco, Leboa la Afrika.

Baromiwa Morocco

Re ile ra fetša nywaga e 24 e thabišago kua Morocco, re ratana le batho ge re sa tšwa go fihla. Re ithutile Sefora le Sepaniše, e lego maleme ao a re thušitšego go boledišana le batho ba ditšhaba tše dintši bao ba dulago moo. Bontši bja bao ba ilego ba arabela gabotse molaetšeng wa Mmušo e be e le ba go tšwa dinageng tše dingwe.

Mosadi yo mongwe yo ke bego ke ithuta Beibele le yena e be le motantshi wa flamenco ya Sepania yo a bego a thwetšwe lebenkeleng la bjalwa kua Casablanca. Ka morago ga go ithuta melao ya motheo ya Beibele, o ile a tlogela mong wa lebenkele la bjalwa yo a bego a dula le yena gomme a boela Sepania. Moo o ile a nea ba lapa labo bohlatse gomme ba bangwe ba ile ba amogela ditherešo tša Beibele tše a bego a ba abela tšona. Ka morago o ile a boela Casablanca, moo a ilego a dula gona a botegela Modimo go fihla lehung la gagwe ka 1990.

Nywaga ya rena e sego kae ya pele kua Morocco e ile ya ba le koketšego ya palo ya bagoeledi ba Mmušo. Lega go le bjalo, ge go thoma go thatafalela batho ba dinaga di šele gore ba hwetše modiro le tumelelo ya madulo, Dihlatse di ile tša hudugela Yuropa. Ba bangwe ba bao re ithutilego le bona mo nakong ye ba kua New Zealand, Canada, United States, Bulgaria, Russia, le Fora, gomme ba tšea karolo bodireding bja nako e tletšego.

Ka bjako, ka April 1973 modiro wa rena wa boboledi kua Morocco o ile wa thibelwa. E bile manyami a makaakang! Mantšiboeng a mangwe a Labone re be re le lešaba le le thabilego Holong ya Mmušo, re itšeetše mehlamo go fihla mabone a tingwa go re tsebiša gore e be e le nako ya go ya gae. Le gatee re be re sa tsebe gore re ka se sa hlwa re sa bona mabone ao a tuka sebokeng se bjalo sa phatlalatša sa Bokriste. Ka tlase ga maemo a thibelo, diboka tša rena le dikopano tša tikologo di be di lekanetšwa ka dihlotswana malapeng a batho. E le gore di be dikopanong, Dihlatse di be di e-ya Fora goba Sepania.

Ge palo ya rena e dutše e fokotšega, Dihlatse tše sego kae tšeo di bego di šetše Morocco di ile tša kgomarelana kgaufsi kudu. Ka gona, ge Mokgatlo wa Watch Tower mafelelong o be o phetha ka go tswalela lekala le go re abela lefelong le lengwe, ka moka re ile ra lla kudu.

Go Leba Bogareng bja Afrika

Kabelo ya rena e mpsha e bile Repabliki ya Bogareng bja Afrika. A phetogo e kgolo gakaakang go tšwa Leboa la Afrika! Lege Morocco e be e e-na le tlelaemete e swanago le ya ka borwa bja California, mo nakong ye re ile ra ikhwetša re le melatšatšing ye e fišago le ya monola.

Go bile le mathata a mafsa ao go bego go tla lebanwa le ona. Ka mohlala ke ile ka swanela go laola go boifa ga-ka dibopiwa tše di gagabago. Mabakeng a mararo makgaditswane o ile wa nkwela hlogong ge ke feta mojakong. Ka nako e nngwe ge ke be ke swere thuto ya Beibele, legotlo le be le tla phetha ka gore le re tlatše thutong! Lege ke be ke nyaka go fofa le go tšhaba, ke ile ka ithuta gore ke itshware, ke sa tloše mahlo go Mna. Legotlo e bile ke tlošitše mokotla wa-ka wa dipuku le maoto fase go fihla ge a phetha ka go tloga. Ke ile ka hwetša gore o ka tlwaelana le selo ge e ba o sa langwe.

Ge re be re bile moo ka dikgwedi tše tshelelago, tsebišo ya go re modiro wa rena o thibetšwe e ile ya tsebišwa radiong. Ka gona, Diholo tša rena tša Mmušo di ile tša tswalelwa gomme baromiwa ba laelwa gore ba tloge. Ke rena le banyalani ba bangwe feela bao re ilego ra kgona go dula lekaleng nywaga e mengwe e meraro. Ka morago mesong e mengwe ya Sontaga Thutong ya rena ya Morokami, maphodisa ao a itlhamilego a ile a tla gomme a re tšea a re iša ntlong-kgolo ya maphodisa. Ba ile ba lokolla basadi le bana, eupja ba golega banababo rena ba 23, go akaretša le monna wa-ka Bill. Ka morago ga matšatši e tshelelago ba ile ba mo lokolla gore a ye gae gomme a phuthe se e lego sa gagwe; matšatši a mararo ka morago re ile ra tloga nageng ka taelo ya maphodisa, ka May 1989. E bile go tloga go gongwe mo go llišago kudu boemafofaneng, moo banababo rena ba bantši ba lerato ba ilego ba tla go re laela.

Mafelelong, go Leba Sierra Leone

Kabelo ya rena ya gona bjale ke Sierra Leone, Afrika Bodikela, e lego naga e botsana e nago le mabopo a mabotse a lešabašaba le lešweu. Batho ba na le bogwera kudu gomme bodiredi bja tšhemo bo a thabiša. Re laletšwa gore re dule fase ntlong e nngwe le e nngwe, gantši ka tlase ga mohlare wa dimanko goba mopalema wa dikhokhonate. Batho ba rata go bolela ka Modimo le go tšea dikopi tša bona tša Beibele gore ba latela ge re bala.

Nna le Bill, bobedi bja rena re šoma Legaeng la Bethele ya Freetown. Ke šoma bjalo ka moamogedi wa baeng, gape le go šoma ka dipeeletšo le diakhaonte tša diphuthego. Ka morago ga nywaga e 16 ya go šoma dinageng tšeo go tšona modiro o thibetšwego, e be e le mo go thabišago go šoma nageng e lokologilego le e atlegago.

Ke feditše nywaga e 30 ya tirelo ya boromiwa ka June 1991. Ka kgonthe Mma o beile pakane e holago pele ga-ka! Ge nkabe a sa phela, ke be ke tla rata go mmotša gape gore, “Ke a go leboga, Mma!” Ka lethabo ke sa dutše nka re: “Ke a leboga, Tate!”

[Seswantšho go letlakala 28]

Kopano ya New York, 1958

[Seswantšho go letlakala 30]

Bill le Sandra Cowan, 1991