Batswadi Ba Rena Ba Re Rutile Go Rata Modimo

Ka Ge Go Anega Elizabeth Tracy

Banna bao ba itlhamilego, bao pejana letšatšing leo ba ilego ba laela sehlopha sa bahlola-mpherefere gore se re hlasele, ba ile ba gapeletša mma le tate go tšwa ka koloing. Nna le mogolo’aka re be re šetše re nnoši setulong sa ka morago, re ipotšiša ge e ba re tla ka ra bona batswadi ba rena gape. Ke eng seo se ilego sa lebiša phihlelong ye e boifišago kgaufsi le Selma, Alabama, U.S.A., ka 1941? Gomme dithuto tšeo re di amogetšego go batswadi ba rena di tswalana bjang le se?

TATE e lego Dewey Fountain, o godišitšwe ke wa leloko polaseng kua Texas ka morago ga gore batswadi ba gagwe ba hlokofale ge e be e sa le lesea. Ka morago o ile a šoma lefelong la go dira oli. Ka 1922 ge a be a e-na le nywaga e 23, o ile a nyala Winnie, mo-Texan yo mofsa yo botse, gomme ba thoma go dira ditokišetšo tša gore ba iketle gomme ba be le lapa.

O ile a aga ntlo lefelong la kota la ka bohlabela bja Texas kgaufsi le toropo e nyenyane ya Garrison. Moo o ile a bjala dibjalo tša mehuta-huta, go akaretša le leokodi le mabele. O ile a ba a rua le mehuta ka moka ya diphoofolo tše di ruiwago. Ge nako e dutše e e-ya, go ile gwa belegwa rena bana​—Dewey yo monyenyane ka May 1924, Edwena ka December 1925 gomme nna ka belegwa ka June 1929.

Go Ithuta Therešo ya Beibele

Mma le tate ba be ba nagana gore ba be ba kwešiša Beibele ka ge e be e le ditho tša Kereke ya Kriste. Eupša ka 1932, G. W. Cook o ile a tlogelela ramogolo Monroe Fountain puku ya Deliverance le ya Government tšeo di gatišitšwego ke Mokgatlo wa Watch Tower. A fagahletše go abelana le batswadi ba-ka seo a bego a ithuta sona, Monroe o be a fela a e-tla ka nako ya difihlolo, a bale sehlogo go tšwa go Morokami gomme ka “kotsi” a tlogele makasine. Ka morago ga moo, mma le tate ba be ba tla o bala.

Mesong e mengwe ka Sontaga Ramogolo Monroe o ile a laleletša tate ntlong ya moagišani bakeng sa thuto ya Beibele. O ile a mo kgonthišetša gore Mna. Cook o be a ka kgona go araba dipotšišo tša gagwe ka moka go tšwa ka Beibeleng. Ge tate a boa a e-tšwa thutong, o ile a botša lapa ka lethabo gore: “Dipotšišo tša-ka ka moka di arabilwe gomme ka ba ka hwetša le tsebišo e oketšegilego! Ke be ke nagana gore ke tseba sohle, eupša ge Mna. Cook a thoma go hlalosa ka dihele, moya, morero wa Modimo ka lefase le kamoo Mmušo wa Modimo o tlago go phethagatša morero wo, ke ile ka thoma go ikwa gore ge e le gabotse ke be ke sa tsebe selo ka Beibele!”

Legae la rena e be e le lefelo la bogwera. Ba leloko le bagwera ba be ba e-tla ba tlo eta, re dira di-fudge le di-popcorn gomme re opela gotee ge mma a bapala piano. Ganyenyane-ganyenyane ditiragalo tše di ile tša tšeelwa sebaka ke dipoledišano tša go boledišana ka ditaba tša Beibele. Gaešita le ge rena bana re be re sa kgone go kwešiša dilo ka moka tšeo di bego di ahla-ahlwa moo, lerato le tiilego la batswadi ba rena la go rata Modimo le Beibele le be le le molaleng kudu mo e lego gore yo mongwe le yo mongwe wa rena bana o ile a hlagolela lerato le swanago la go rata Modimo le Lentšu la gagwe.

Malapa a mangwe le wona ka mo go swanago a ile a bula magae a wona bakeng sa dipoledišano tša beke le beke tša Beibele tšeo gantši di bego di thewa sehlogong seo se lego ka makasineng wa Morokami wa morago-rago. Ge malapa a lego toropong yeo re agišanego le yona ya Appleby le ya Nacogdoches e le wona ao go swarelwago diboka go ona, re be re hlophelana ka gare ga Ford ya Model A ya rena gomme re e-ya moo, go sa šetšwe maemo a leratadima.

Go Šomela go Seo ba Ithutilego Sona

Ga se gwa ka gwa tšea batswadi ba rena nako e telele go bona bohlokwa bja go gata mogato. Lerato la Modimo le be le nyaka gore seo se ithutilwego se abelanwe le ba bangwe. (Ditiro 20:​35) Eupša mogato wo wa go bolela phatlalatša tumelo ya motho e be e le tlhohlo, kudu-kudu ka ge batswadi ba rena ba be ba na le dihlong ka tlhago, e le batho bao ba ikokobeditšego. Lega go le bjalo, lerato la bona la go rata Modimo le ile la ba tutuetša, gomme se se ile sa ba thuša gore ba re rute go bota Jehofa ka mo go tseneletšego. Tate o ile a e hlalosa ka mokgwa wo: “Jehofa o dira baboledi ka babjadi ba ditlhodi!” Ka 1933, mma le tate ba ile ba bontšha go ineela ga bona go Jehofa ka go kolobetšwa meetseng ka gare ga letamo la dihlapi kgaufsi le Henderson, Texas.

Pejana ka 1935, tate o ile a ngwalela Mokgatlo wa Watch Tower gomme a botšiša dipotšišo tše mmalwa mabapi le kholofelo ya Bakriste ya bophelo bjo bo sa felego. (Johane 14:2; 2 Timotheo 2:​11, 12; Kutollo 14:​1, 3; 20:6) O ile a amogela karabo e tšwago ka go lebanya go Joseph F. Rutherford, yoo ka nako yeo e bego e le mopresidente wa Mokgatlo. Go e na le go araba dipotšišo tša gagwe, Ngwanešo Rutherford o ile a laletša tate gore a be gona kopanong ya Dihlatse tša Jehofa kua Washington, D.C., ka May.

Tate o ile a nagana gore, ‘Go ka se kgonege! ‘Re balemi bao ba nago le dihektara tše 26 tšeo di bjetšwego merogo. Ka moka ga yona e tla be e loketše go bunwa gomme e išwe mmarakeng ka nako yeo.’ Lega go le bjalo, kapejana ka morago ga moo, lefula le ile la tla gomme la gogola maitshwarelelo a gagwe ka moka​—dibjalo, magora le maporogo. Ka gona, re ile ra tlatšana le Dihlatse tše dingwe ka peseng ye e hirilwego yeo e ilego ya re iša bokgole bja dikhilomithara tše 1 600 lefelong la kopano ka leboa-bohlabela.

Kopanong, mma le tate ba be ba thabišitšwe ke go theetša tlhaloso e kwagalago ya go hlaolwa ga “lešaba le lexolo” leo le tlago go phologa ‘tlaišego e kgolo.’ (Kutollo 7:​9, 14) Maphelong a bona ka moka, kholofelo ya bophelo bjo bo sa felego paradeiseng mo lefaseng e ile ya tutuetša mma le tate, gomme ba ile ba re kgothatša rena bana gore re “fihlêlê byo e lexo bophelô bya ruri,” bjoo go rena bo bolelago bophelo bjo bo sa felego lefaseng bjoo Jehofa a bo neago. (1 Timotheo 6:​19; Psalme 37:​29; Kutollo 21:​3, 4) Gaešita le ge ke be ke na le nywaga e mehlano feela, ke ile ka thabela e le ka kgonthe go ba le lapa lešo tiragalong ye e thabišago.

Ge re boa kopanong, lapa le ile la bjala dibjalo gape, gomme ka morago re ile ra ba le puno e botse kudu. Se ka kgonthe se ile sa thuša bakeng sa go kgodiša mma le tate gore go bota Jehofa ka mo go feletšego go ka se ke gwa dula go sa putswe. Ba ile ba tšea karolo e kgethegilego ya modiro wa boboledi woo go wona yo mongwe le yo mongwe a ilego a dumela go fetša diiri tše 52 ka kgwedi bodireding. Ka morago ge nako e latelago ya go bjala e fihla, ba ile ba rekiša sethunya! Tate o be a e-na le koloyana ye e ka bago bogolo bja dimithara tše 6 x 2,4 yeo e bego e agetšwe rena ba bahlano gore re dule ka gare ga yona gomme o ile a reka Ford e mpsha-mpsha ya mabati a mabedi bakeng sa go e goga. Ramogolo Monroe o ile a dira ka mo go swanago, gomme le yena o ile a hudugela ka koloyaneng le lapa la gagwe.

Go re Ruta Therešo

Tate le mma ba ile ba thoma go bula madibogo ka October 1936, bjalo ka ge bodiredi bja nako e tletšego bo bitšwa bjalo. Re le lapa, re ile ra thoma go bolela dinageng tša ka bohlabela bja Texas tšeo di bego di akaretšwa ka sewelo ka molaetša wa Mmušo. Mo e ka bago ka lebaka la ngwaga, re ile ra huduga go tloga lefelong le lengwe go ya go le lengwe, eupša ka kakaretšo re ile ra thabela bophelo bjo e le ka kgonthe. Mma le tate ba ile ba re ruta ka lentšu la bona le mohlala wa bona gore re be bjalo ka Bakriste ba pele bao ba ilego ba ikgafa bakeng sa go fetišetša therešo ya Beibele go ba bangwe.

Rena bana re ile ra hlompha mma kudu ka baka la boikgafo bjo a ilego a bo dira bja go tlogela legae la gagwe. Lega go le bjalo, go be go e-na le selo se tee seo a bego a sa kgaogane le sona, gomme selo seo e be e le motšhene wa gagwe wa go roka. E be e le phetho e bohlale. Ka bokgoni bja gagwe bjalo ka moroki, o be a dula a re apešitše gabotse. Kopanong e nngwe le e nngwe, re be re dula re e-na le diaparo tše mpsha tše di kgahlišago.

Ke sa dutše ke gopola gabotse ge Herman G. Henschel a be a e-tla le lapa la gagwe tikologong ya gabo rena ka lori e nago le digodiša-modumo ya Mokgatlo wa Watch Tower. Ba be ba tla emiša lori ya bona lefelong leo le nago le baagi ba bantši kudu, ba bapale polelo e kopana yeo e gatišitšwego, gomme ka morago ba etele batho ka noši bakeng sa go ba nea tsebišo e oketšegilego. Dewey yo monyenyane o ile a thabela segwera sa morwa wa Herman e lego Milton, yoo ka nako yeo a bego a le nywageng ya gagwe ya magareng ya mahlalagading. Ga bjale Milton ke mopresidente wa Mokgatlo wa Watch Tower.

Nakong ya kopano ka 1937 kua Columbus, Ohio, Edwena o ile a kolobetšwa gomme mma le tate ba ile ba newa tokelo ya go hlankela bjalo ka babulamadibogo ba kgethegilego. Ka nako yeo, modiro woo o be o akaretša go fetša bonyenyane diiri tše 200 ka kgwedi o le modirong wa boboledi. Ge ke lebelela morago, ke bona ka mokgwa woo mohlala o mobotse wa mma o nthušitšego go thekga monna wa-ka dikabelong tša gagwe tša Bokriste.

Ge tate a be a thomile thuto ya Beibele le lapa, o be a tla re tšea rena bana bakeng sa gore re beele bana ba bona mohlala o mobotse. O be a re badiša mangwalo a Beibele gomme re araba tše dingwe tša dipotšišo tša motheo. E le mafelelo a se, ba bantši ba bafsa bao re ilego ra ithuta le bona ba hlankela Jehofa ka potego go fihla le lehono. Ge e le gabotse, motheo o tiilego o ile wa thewa le bakeng sa rena gore re tšwele pele re rata Modimo.

Ge Dewey yo monyenyane a dutše a gola, o ile a hwetša go le thata go dula lefelong le pitlaganego kudu le dikgaetšedi tša gagwe tše pedi tše dinyenyane. Ka gona, ka 1940 o ile a kgetha go tloga gomme a tsenela modiro wa bobulamadibogo le Hlatse e nngwe. Mafelelong o ile a nyala Audrey Barron. Ka gona, Audrey le yena o be a rutilwe dilo tše dintši ke batswadi ba-ka gomme o ile a rata mma le tate kudu. Ka morago ga ge Dewey yo monyenyane a ile kgolegong ka 1944 ka baka la boema-gare bja gagwe bja Bokriste, Audrey o ile a tla go dula le rena lebakanyana ka koloyaneng e pitlaganego.

Ka 1941, kopanong e kgolo kua St. Louis, Missouri, Ngwanešo Rutherford o ile a bolela ka go lebanya le bana ba nywaga e 5 go ya go 18, bao ba bego ba dutše karolong e kgethegilego ka pele. Nna le Edwena re ile ra theetša lentšu la gagwe le fodilego le le kwagalago; o be a swana le tate yo lerato a laya bana ba gagwe ka gae. O ile a kgothatša batswadi ka gore: “Lehono Jesu Kriste o kgobokeditše batho ba gagwe ba kgwerano pele ga gagwe, gomme ka matla a magolo o ba botša gore ba hlahle bana ba bona tseleng ya go loka.” A tšwela pele ka gore: “Ba bolokeng ba le ka gae gomme le ba rute therešo!” Ka lethabo batswadi ba rena ba ile ba dira bjalo!

Kopanong yeo re ile ra amogela pukwana e mpsha e rego Jehovah’s Servants Defended, yeo e bego e bušeletša melato ya kgoro ya tsheko yeo Dihlatse tša Jehofa di ilego tša e fenya, go akaretša le ya Kgorong-kgolo ya Tsheko ya United States. Tate o ile a ithuta yona le rena re le lapa. Re be re sa tsebe gore re be re lokišeletšwa bakeng sa seo se ilego sa direga dibekeng tše mmalwa ka morago kua Selma, Alabama.

Tlhaselo ya Sehlopha sa Disenyi Kua Selma

Mesong yeo phihlelo yeo e boifišago e diregilego ka yona, tate o be a tšwa go iša dikopi tša lengwalo leo le hlalosago tshwanelo ya rena ya molao ya go tšwela pele ka bodiredi bja rena ka tlase ga tšhireletšo ya molao go motseta wa kgoro, ramotse le molaodi wa maphodisa kua Selma. Lega go le bjalo, ba ile ba phetha ka gore ba re tloše toropong ka kgapeletšo.

Ka mafsifsana, banna ba bahlano bao ba itlhamilego ba ile ba fihla koloyaneng ya rena gomme ba thopa mma, mogolo’aka le nna. Ba ile ba tšwela pele ba phuruphutša se sengwe le se sengwe ka gare, ba nyaka selo se itšego seo se senyago. Tate o be a le ka ntle, gomme ba ile ba mo laela gore a kgokelele koloyana koloing, ba mo šupile ka dithunya tša bona nako ye ka moka. Ka nako ye ke be ke se ka tšhoga. Go be go bonagala e le mo go se nago tlhaologanyo gore banna ba ba nagane gore re kotsi mo e lego gore nna le mogolo’aka re be re sega. Lega go le bjalo, kapejana re ile ra kgaotša ka morago ga go gerulwa ke tate.

Ge re be re itokišeleditše go tloga, banna ba ile ba nyaka gore nna le Edwena re namele le bona ka koloing ya bona. Tate o ile a gana nnang. O ile a re: “Seo se ka se direge le ganyenyane! Ka morago ga poledišano ya lebakanyana lapa lešo le ile la dumelelwa go sepela gotee, gomme banna bao ba itlhamilego ba re latela ka koloi ya bona. Bokgoleng bja dikhilomithara tše ka bago 25 ka ntle ga toropo, ba ile ba re direla sešupo sa gore re eme ka thoko ga tsela ya lephefo gomme ba tšea mma le tate. Banna ba ile ba leka go ba kgodiša: “Tlogelang bodumedi bjoo. Boelang polaseng gomme le godiše banenyana ba lena gabotse!” Tate o ile a leka go beelana mabaka le bona eupša gwa se thuše selo.

Mafelelong, monna yo mongwe o ile a re: “Sepelang, gomme ge le ka ba la boela Seleteng sa Dallas, re tla bolaya yo mongwe le yo mongwe wa lena!”

Re lokologile gomme re le gotee gape, re ile ra sepela diiri tše mmalwa gomme ra emiša koloi gore re robale bošegong bjoo. Re be re ile ra tšea dinomoro-polata tša bona. Kapejana tate o ile a begela Mokgatlo wa Watch Tower se sengwe le se sengwe, gomme ka morago ga dikgwedi banna bao ba ile ba tsebja gomme ba golegwa.

Go ya Sekolong sa Boromiwa sa Gilead

Edwena o ile a amogela taletšo ya go ba gona klaseng ya bo-7 ya Sekolo sa Beibele sa Watchtower sa Gilead kua South Lansing, New York, ka 1946. Albert Schroeder, e lego yo mongwe wa barutiši o ile a bolela ka dika tša gagwe tše botse go yo e bego e le mmulamadibogo-gotee le yena Bill Elrod, yoo ka nako yeo a bego a hlankela Bethele, ntlong-kgolo ya Dihlatse tša Jehofa kua Brooklyn, New York.a Edwena le Bill ba ile ba tsebana, gomme ka morago ga ngwaga a alogile Gilead ba ile ba nyalana. Ba ile ba dula bodireding bja nako e tletšego lebaka la nywaga e mentši, go akaretša go hlankela gotee ka nywaga e mehlano Bethele. Gomme letšatšing le lengwe ka 1959, Ngwanešo Schroeder o ile a tsebiša klase ya bo-34 ya Gilead gore mogwera wa gagwe yo a rategago ke tatago mafahla, mošemanyana le ngwanenyana.

Ge ke be ke sa hlankela le batswadi ba-ka kua Meridian, Mississippi, mafelelong a 1947, ka boraro bja rena re ile ra amogela taletšo ya go ba gona klaseng ya bo-11 ya Gilead. Re be re maketše ka gobane go ya ka dilo tše di bego di nyakega ke be ke le yo monyenyane kudu gomme mma le tate e be e le ba bagolo kudu. Lega go le bjalo, boemo bja rena bo ile bja swarwa ka tsela e kgethegilego gomme ra amogela tokelo yeo e sa re swanelago ya thuto e phagamego ya Beibele.

Tirelo ya Boromiwa ke E-na le Batswadi Ba-ka

Kabelo ya rena ya boromiwa e be e le Colombia, Amerika Borwa. Lega go le bjalo, e bile feela ka December 1949, lebaka la ka godimo ga ngwaga re alogile moo re ilego ra goroga Bogotá legaeng la baromiwa moo ba bangwe ba bararo ba bego ba šetše ba dula gona. La mathomo, tate o be a ile a nyaka a fetša ka la gore go be go tla ba bonolo go ruta batho Seisemane go e-na le gore yena a ithute Sepaniši! Ee, go be go na le diteko, eupša ditšhegofatšo e be e le tše dikgolo gakaakang! Go be go na le Dihlatse tše ka tlase ga tše lekgolo kua Colombia ka 1949, eupša ga bjale go na le tše ka godimo ga 100 000!

Ka morago ga go hlankela Bogotá ka nywaga e mehlano, mma le tate ba ile ba romelwa toropong ya Cali. Go sa dutše go le bjalo, ka 1952 ke ile ka nyalana le Robert Tracy, moromiwa-gotee le nna kua Colombia.b Re ile ra dula Colombia go fihla ka 1982, nako yeo ka yona re ilego ra romelwa Mexico, moo re hlanketšego gona ga e sa le go tloga ka nako yeo. Mafelelong, ka 1968, batswadi ba-ka ba ile ba swanelwa ke gore ba boele United States bakeng sa go alafša. Ka morago ga ge ba fodile, ba ile ba tšwela pele e le babulamadibogo ba kgethegilego kgaufsi le Mobile, Alabama.

Go Hlokomela Batswadi ba Rena

Ge nywaga e dutše e feta, mma le tate ba ile ba thoma go fokotša lebelo gomme ba be ba nyaka thekgo e oketšegilego le tlhokomelo. Ge ba kgopela, ba ile ba abelwa go yo hlankela kgaufsi le Edwena le Bill kua Athens, Alabama. Ka morago, kgaetšedi ya rena Dewey yo monyenyane o ile a nagana gore e be e tla ba gabohlale go dira gore lapa le dule kgaufsi le kgaufsi ka Borwa bja Carolina. Ka gona, Bill o ile a hudušetša lapa la gagwe kua Greenwood, gotee le mma le tate. Peakanyo ye e lerato e ile ya dira gore go kgonege gore nna le Robert re tšwele pele ka tirelo ya rena ya boromiwa kua Colombia, re tseba gore batswadi ba-ka ba be ba hlokometšwe gabotse.

Ka gona, ka 1985 tate o ile a hwa lehlakore moo go ilego gwa mo tlogela a sa kgone go bolela a bile a sa tsoge malaong. Re ile ra bokana bakeng sa go swara therišano ya lapa go ahla-ahla tsela e kaone yeo ka yona re bego re ka hlokomela batswadi ba rena. Go ile gwa phethwa ka gore Audrey e be e tla ba mohlokomedi yo mogolo wa tate le gore nna le Robert re be re ka thuša kudu ka go ngwalela lapa lengwalo beke e nngwe le e nngwe leo le nago le diphihlelo tše di kgothatšago le ka go etela leboelela ka mo go ka kgonegago.

Ketelo ya-ka ya mafelelo ya go etela tate e sa dutše e le gona ka mo monaganong wa-ka. O be a sa kgone go bolela go swana le mehleng, eupša ka morago ga ge re mmoditše gore re boela Mexico, ka tsela e itšego o ile a bolela ka maiteko a magolo le borutho lentšu le tee, “Adios!” Ka se re ile ra tseba gore ka pelong ya gagwe o be a thekga phetho ya rena ya go tšwela pele ka kabelo ya rena ya boromiwa. O hlokofetše ka July 1987 gomme mma a hlokofala dikgwedi tše senyane ka morago ga moo.

Lengwalo leo ke ilego ka le amogela go tšwa go ngwanešo wa mohlologadi le bontšha gabotse tebogo yeo yo mongwe le yo mongwe wa rena a nago le yona ka batswadi ba rena. “Ke tšeela godimo bohwa bja-ka bjo bo humilego bja Bokriste gomme le ka mohla ga nke ke ikwa gore nkabe ke thabile go feta mo ge nkabe batswadi ba rena ba be ba kgethile go re godiša ka tsela e fapanego. Mohlala wa bona wa go ba le tumelo e tiilego, go ikgafa le go bota ga bona Jehofa ka mo go feletšego o nthušitše go kgotlelela dinako tše thata bophelong bja-ka.” Edwena o phethile ka gore: “Ke leboga Jehofa ka batswadi bao ka lentšu le ka mohlala ba re bontšhitšego lethabo leo re ka bago le lona ge e ba re aga maphelo a rena go hlankeleng Modimo wa rena yo lerato Jehofa.”

[Mengwalo ya tlase]

[Mantšu ao a sepedišanago le seswantšho go letlakala

22]

Lapa la ga-Fountain: (go tloga go le letshadi go ya go le letona) Dewey, Edwena, Winnie, Elizabeth le Dewey yo monyenyane; le letona: Elizabeth le Dewey yo monyenyane ba dutše godimo ga dithiba-leraga tša lori e nago le digodiša-modumo ya ba ga-Henschel (1937); ka tlase go le letona: Elizabeth a dira modiro wa go nea bohlatse ka pampiri ya go athwa ge a na le nywaga e 16