Katanela go Dira Gore Lapa la Gago le Phologele Lefaseng le Lefsa la Modimo

“Wene Jehofa, o tlo ba hlakodiša, wa ba lota ka mehla molokong wo.”​—PSALME 12:8, PK.

1, 2. (a) Malapa a mangwe a atlega bjang ka tlase ga dikgateletšo tša mehla ye ya bofelo? (b) Malapa a Bakriste a ka tsoma bjang go pho­loga?

MOGOLO yo mongwe wa Mokriste yo a bitšwago John o ile a bolela gore: “Lehono pelo ya-ka e tletše lethabo!” Ke’ng seo se bakago lethabo le? O laodiša ka gore: “Morwa wa-ka wa nywaga e 14 le morwedi wa-ka wa nywaga e 12 ba kolobeditšwe.” Eupja lethabo la gagwe ga le a felela moo. O oketša ka gore: “Morwa wa-ka wa nywaga e 17 le morwedi wa nywaga e 16 ka bobedi bja bona e bile babulamadibogo ba go thuša ngwagola.”

² Malapa a mantši gare ga rena a ba le mafelelo a swanago a mabotse ge ba diriša melao ya motheo ya Beibele. Lega go le bjalo, ba bangwe ba na le mathata. Banyalani ba bangwe ba Bakriste ba re: “Re na le bana ba bahlano gomme go ba hlokomela go thomile go ba thata kudu. Re šetše re lobile o tee wa bona ka go metšwa ke tshepedišo ye ya kgale. Bafsa ba rena ba ba lego mahlalagading ke bona bao ba hlaselwago kudu gona bjale.” Gape go na le banyalani bao ba bago le mathata a lenyalo, ao ka dinako tše dingwe a feleletšago ka go arogana goba tlhalo. Lega go le bjalo, malapa ao a medišago dika tša Bokriste a ka phologa ‘masetla-pelo a magolo’ gomme a phološetšwa lefaseng le lefsa le le tlago la Modimo. (Mateo 24:21; 2 Petro 3:13) Ka gona, ke’ng seo se ka dirwago bakeng sa go kgonthiša gore lapa la gago le a phologa?

Go Kaonefatša Poledišano

3, 4. (a) Poledišano e bohlokwa gakaaka’ng bophelong bja lapa, gomme ke ka baka la’ng mathata a fela a rotoga mabapi le yona? (b) Ke ka baka la’ng banna ba swanetše go katanela go ba batheetši ba babotse?

³ Poledišano e botse ke madi a phedišago a lapa leo le phelago gabotse; ge e se gona, kgateletšo le mathata di a oketšega. Diema 15:​22 e re, “Maanô a padile, xò se keletšanô.” Ka mo go kgahlišago, moeletši wa manyalo o bega gore: “Pelaelo e tlwaelegilego kudu yeo ke e kwago go basadi bao ke ba eletšago ke gore ‘Monna wa-ka ga a mpolediše,’ le gore ‘Ga a ntheetše.’ Ge ke boledišana le banna ba bona ka pelaelo ye, le nna ba ka se nkwe.”

⁴ Ke’ng seo se bakago go hlokega ga poledišano? Lebaka le lengwe ke gore banna le basadi ga ba swane, gomme gantši ba na le mekgwa e fapanego kudu ya go fetišetša molaetša. Sehlogo se sengwe se boletše gore monna “o rata go lebantšha taba le go opa kgomo lenaka” dipoledišanong tša gagwe, mola “seo [mosadi] a se nyakago kudu go feta dilo ka moka e le motheetši yo a ipeago maemong a ba bangwe.” Ge e ba se e le bothata lenyalong la lena, katanelang go kaonefatša ditaba. Monna wa Mokriste mo gongwe a ka swanelwa ke go šoma ka matla gore e be motheetši yo botse. Jakobo o re: “Motho a a akxofišê xo kwa, a diêxê xo bolêla.” (Jakobo 1:19) Ithute go široga go nea ditaelo, go sola goba go kgalema mola mosadi wa gago a nyaka feela ‘kwelobohloko.’ (1 Petro 3:8) Diema 17:​27 e re: “E a nago le tsebo ya ruri, o thibela mantšu a gagwe.”​—PK.

5. Ke ditsela dife tše dingwe tšeo ka tšona banna ba ka kaonefatšago tabeng ya go ntšha dikgopolo tša bona le maikwelo a bona?

⁵ Ka lehlakoreng le lengwe, “xo bolêla xo na le mohla wa xôna” gomme o ka swanelwa ke go ithuta go ntšha dikgopolo tša gago le maikwelo a gago. (Mmoledi 3:7) Ka mohlala, na nako le nako o reta mosadi wa gago bakeng sa seo a se dirilego? (Diema 31:28) Na o ipontšha o leboga modiro o thata woo a o dirago bakeng sa go go thuša le go hlokomela lapa? (Bapiša le Ba-Kolose 3:15.) Goba mohlomongwe o swanetše go kaonefatša tabeng ya go bolela “dipolelo tša lerato.” (Sefela sa Difela 1:2, NW) Go dira bjalo mathomong go ka bonala e le kgwara go wena, eupja go ka thuša go dira gore mosadi wa gago a ikwe a lotegile leratong la gago go yena.

6. Ke’ng seo basadi ba ka se dirago bakeng sa go kaonefatša poledišano ya lapa?

⁶ Go thwe’ng ka basadi ba Bakriste? Mosadi yo mongwe o tsopotšwe a bolela gore monna wa gagwe o a tseba gore o a mo rata, ka gona ga go nyakege gore a mmotše gore o a mo rata. Lega go le bjalo, banna le bona ba a ipshina ge ba lebogwa, ge ba retwa le ge ba tumišwa. (Diema 12:8) Na o swanelwa ke go bontšha ka go bolela tabeng ye? Ka lehlakoreng le lengwe, mohlomongwe o swanetše go hlokomela kudu tsela yeo o theetšago ka yona. Ge e ba monna wa gago a hwetša go le thata go bolela ka bolokologi ka mathata a gagwe, dilo tšeo di mo tshwenyago, goba dipelaelo tša gagwe, na o ithutile go mo dira gore a go botše sa mafahleng a gagwe, o diriša boleta le bohlale?

7. Ke’ng seo se ka bakelago gore go tsoge dithulano lenyalong, gomme di ka thibelwa bjang?

⁷ Ke therešo gore gaešita le banyalani bao gantši ba phedišanago gabotse ka dinako tše dingwe poledišano e ka senyega. Maikwelo a pipa lebaka, goba poledišano e fodilego ka bjako e ka fetoga ngangišano e šoro. (Diema 15:1) “Re ba xo foša xa-ntši ka moka xa rena”; lega go le bjalo, go ba le thulano lenyalong le gatee ga go bolele gore lenyalo le fedile. (Jakobo 3:2) Eupja “mašata, le maroxa” ga se a swanela e bile a ka senya tswalano e nngwe le e nngwe. (Ba-Efeso 4:31) Akgofelang go dira khutšo ge e ba le ile la hlabana ka mantšu. (Mateo 5:​23, 24) Dithulano gantši di ka thibelwa ge e ba sa mathomo ka bobedi bja lena le diriša keletšo ya mantšu a Paulo go Ba-Efeso 4:26: “A letšatši le se dikêlê Lè sa xalefile.” Ee, boledišanang ka mathata ge e sa dutše e le a manyenyane e bile a sa laolega; le se ke la leta go fihla maikwelo a lena a sa laolege. Go diriša metsotso e sego kae letšatši le lengwe le le lengwe le bolela ka ditaba tšeo di sa le swarego gabotse go ka thuša kudu go dira gore poledišano e dule e le gona le go thibela go se kwešišane.

‘Go Etetša ka tša Jehofa’

8. Ke ka baka la’ng bafsa ba bangwe ba ka tlogela therešo?

⁸ Go bonala eka batswadi ba bangwe ba kgotsofatšwa ke ge bana ba bona ba fo ba latela. Bana ba ba gona dibokeng e bile ba ya tirelong ya tšhemo, eupja gantši ga se ba aga tswalano ya bona ka noši le Modimo. Ge nako e dutše e e-ya “kxanyoxô ya nama, le kxanyoxô ya mahlo” di ka ntšha bontši bja bafsa ba bjalo therešong. (1 Johane 2:16) E tla ba mo go nyamišago gakaakang gore batswadi ba phologe Haramagedone eupja ka baka la go se šetše ga nakong e fetilego ba tlogela bana ba bona morago ba wetšwe ke kotsi!

9, 10. (a) Go godiša bana ‘ka go ba etetša le go ba ruta tša Morena’ go akaretša’ng? (b) Ke ka baka la’ng go le bohlokwa go dumelela bana gore ba ntšhe maikwelo a bona ka bolokologi?

⁹ Ka gona, Paulo o ngwadile gore: “Le lena Bô-tata-xo-bana! Le se kê la befediša bana ba lena; sa lena a e bê xo ba etetša ka xo ba ruta le xo ba eletša tša Morêna.” (Ba-Efeso 6:4) Gore le dire bjalo, lena ka noši le swanetše go tseba melao ya Jehofa ka botlalo. Le swanetše go bea mohlala o mobotse ge go tliwa dilong tše bjalo ka boithabišo bjo le bo kgethago, thuto ya motho ka noši, go ba gona dibokeng, le tirelo ya tšhemo. Mantšu a Paulo gape a bolela gore motswadi o swanetše (1) go ba mohlokomedi yo bohlale wa bana ba gagwe le gore (2) ka mehla a be le poledišano e botse le bona. Ke ge o dira bjalo feela mo o ka tsebago gore ke kae moo ba swanetšego ‘go etetšwa’ gona.

¹⁰ Ke ga tlhago gore bafsa bao ba lego mahlalagading ba leke go hwetša tekanyo e itšego ya boitaolo. Lega go le bjalo, le swanetše go phafogela dipontšho tšeo di lego molaleng tša dipolelo tša bona, tsela ya bona ya go nagana, moaparo le go itokiša le bagwera bao ba ba kgethago tšeo di tutuetšwago ke lefase. Tate yo bohlale o boletše bjalo ka ge go ngwadilwe go Diema 23:​26 gore: “Ngwan’a-ka! Nneêlê pelo y’axo.” Na bana ba gago ba ikwa ba sa tšhabe go go botša seo ba se naganago le maikwelo a bona? Ge e ba bana ba sa boife gore ba tla solwa ka pela, ba ka tlwaela go utolla tsela yeo ba ikwago ka yona ka ditaba tše bjalo ka mediro ya ka morago ga lenaneo-thuto, go beana mabaka, thuto e phagamego goba therešo ya Beibele ka boyona.

11, 12. (a) Dinako tša dijo di ka dirišwa bjang bakeng sa go hlohleletša poledišano ya lapa? (b) Ke’ng seo se ka diregago ge motswadi a phegelela go dira maiteko a go hlohleletša gore go be le poledišano magareng ga gagwe le bana ba gagwe?

¹¹ Dinageng tše dintši ke mokgwa o tlwaetšwego gore malapa a je gotee. Ka gona, dijo tše dikgolo tša letšatši di ka nea sebaka se sebotse sa gore ditho ka moka tša lapa di sware mehlamo e agago. Gantši ge lapa le le dijong le šitišwa ke TV le dilo tše dingwe. Lega go le bjalo, ka diiri tše dintši-ntši bana ba gago ba bile boemong bjo e ka rego ba bokgobeng sekolong gomme ba lebana le tsela ya lefase ya go nagana. Dinako tša go ja ke sebaka se sebotse sa go boledišana le bana ba gago. Motswadi o mongwe o re: “Re diriša nako ya go ja bakeng sa go bolela ka dilo tšeo di diregilego mosegare. Lega go le bjalo, dinako tša dijo ga se tša swanela go ba dinako tša tayo yeo e lešago dihlong goba ya go botšiša dipotšišo tše di fatollago. Dirang gore go dulwe go phuthologilwe e bile go thabilwe!

¹² Go dira gore bana ba bolele le wena ka bolokologi go thata gomme go ka nyaka pelo e telele kudu. Lega go le bjalo, ge nako e dutše e e-ya o ka bona mafelelo a ruthetšago pelo. Mma yo mongwe yo a tshwenyegilego o a gopola: “Morwa wa rena wa nywaga e 14 o ile a nyama kudu gomme a ipea lekata. Ka dithapelo tša rena le ka go phegelela o thomile go ba le kgahlego le go bolela!”

Thuto ya Lapa Yeo e Agago

13. Ke ka baka la’ng go tlwaetša bana go tloga bjaneng go le bohlokwa gakaakaa?

¹³ ‘Go etetša’ gape go akaretša thuto e rulagantšwego ya Lentšu la Modimo. Bjalo ka tabeng ya Timotheo, tlwaetšo e bjalo e swanetše go dirwa “xo tloxa byaneng.” (2 Timotheo 3:​15) Tlwaetšo ya bjaneng e matlafatša bana bakeng sa diteko tša tumelo tšeo di ka tlago nywageng ya go tsena sekolo​—menyanya ya matswalo, menyanya ya borata-naga goba matšatši a maikhutšo a bodumedi. Ka ntle le go lokišeletša diteko tše bjalo, tumelo ya ngwana e ka hlaselwa. Ka gona, diriša ka botlalo didirišwa ka moka tšeo Mokgatlo wa Watch Tower o di lokišeditšego bakeng sa bana ba banyenyane, tše bjalo ka dipuku Go Theeletša Morutiši o Mogolo le Puku Ya-ka ya Ditaba tša Beibele.a

14. Ke’ng seo se ka dirwago go dira gore thuto ya lapa e be gona ka mehla, gomme ke’ng seo o se dirilego gore o be le thuto ya ka mehla ya lapa?

¹⁴ Se sengwe seo se swanetšego go hlokomelwa ke thuto ya lapa yeo go ka diregago gabonolo gore e swarwe ka sewelo goba ya ba taba e sa kwagalego ya go ithola kgwara, yeo e sa thabišego batswadi gotee le bana. Le ka kaonefatša ditaba bjang? Sa pele, le swanetše go ‘thakanela sebaka’ bakeng sa thuto, le se ke la dumela gore e pipetšwe ke dipontšho tša TV goba ditšhitišo tše dingwe. (Ba-Efeso 5:​15-17) Hlogo e nngwe ya lapa e ipobola ka gore, “re na le bothata bja go dira gore thuto ya rena ya lapa e tšwele pele ka mehla. Re ile ra leka dinako tše fapa-fapanego go fihla ge mafelelong re hwetša nako yeo e bego e re lokela mantšiboa. ­Bjale thuto ya rena ya lapa e swarwa ka mehla.”

15. O ka rulaganya bjang thuto ya lapa gore e bape le dinyakwa tša lapa la gago?

¹⁵ Se se latelago, nagana ka dinyakwa tše itšego tša lapa la gago. Malapa a mantši a thabela go lokišetša thuto ya bona ya beke le beke ya Morokami gotee. Lega go le bjalo, nako le nako lapa la gago le ka ba le ditaba tše itšego tšeo di swanetšego go ahla-ahlwa, go akaretša le mathata ao ba lebeletšanago le ona sekolong. Puku ya Dipotšišo tša Bafsa le Dikarabo tše Šomago le dihlogo tše di lego ka go Morokami le ka go Phafoga! di ka kgotsofatša senyakwa se. Tate yo mongwe o re: “Ge e ba re bona mekgwa e mengwe yeo e swanetšego go lokišwa go bašemane ba rena re lebiša tlhokomelo kgaolong e itšego ka go puku ya Dipotšišo tša Bafsa yeo e bolelago ka yona.” Mosadi wa gagwe o oketša ka gore: “Re leka go feto-fetoga le maemo. Ge e ba re rulaganyeditše se sengwe bakeng sa thuto ya rena, gomme gwa rotoga boemo bja gore re bolele ka se sengwe se se fapanego, gona re fetola ditaba go ya ka seo se nyakegago.”

16. (a) O ka kgonthišega bjang gore bana ba gago ba kwešiša seo ba ithutago sona? (b) Ke’ng seo gantši se swanetšego go širogwa ge go swarwa thuto ya lapa?

¹⁶ O ka kgonthišega bjang gore bana ba gago ba tloga ba kwešiša seo ba ithutago sona? Jesu, Morutiši yo Mogolo o ile a botšiša dipotšišo tšeo di nyakago pono ya motho, tše bjalo ka, “Xo bya’ng xe O bôna?” (Mateo 17:25) Ka go dira se se swanago, leka go hwetša seo ge e le gabotse bana ba gago ba se naganago. Kgothaletša ngwana yo mongwe le yo mongwe gore a arabe ka mantšu a gagwe. Ke therešo gore ge e ba o galefišwa goba o makalela seo ba se bolelago ka go botega ba ka thatafalelwa ke go lokologa gape ge ba bolela le wena. Ka gona dula o thekgile ditho. O se ke wa fetola nako ya thuto ya lapa sebaka sa go kgalema. E swanetše go thabiša le go aga. Tate yo mongwe o re: “Ge e ba ke lemoga gore yo mongwe wa bana ba-ka o na le bothata, ke bo rarolla nakong e nngwe.” Mma o oketša ka gore, “ge ngwana a eletšwa ka thoko, gona ngwana yoo ga a hlabje ke dihlong gomme o akgofela go bolela ka bolokologi go e na le ge a eletšwa nakong ya thuto ya lapa.”

17. Ke’ng seo se ka dirwago bakeng sa go dira gore thuto ya lapa e be yeo e thabišago, gomme ke’ng seo se ilego sa hola lapa la gago?

¹⁷ Go dira gore bana ba tšee karolo thutong ya lapa e ka ba bothata, kudu-kudu ge e ba e le bana ba nywaga e fapanego. Bana ba banyenyane gantši ga ba dudišege, ga ba kgosele e bile ga ba kgone go theetša ka nako e telele. Ke’ng seo le ka se dirago? Lekang go dira gore go phuthologwe nakong ya thuto. Ge bana ba gago ba sa kgone go theetša ka nako e telele, leka go ba le thuto e kopana eupja ka makga a mantšinyana. Gape go a thuša ge e ba o fišega. “E a laolaxo a dirê ka phišexô.” (Ba-Roma 12:8) Dirang gore yo mongwe le yo mongwe a akaretšwe tabeng. Bana ba banyenyane ba ka kgona go nea ditlhaloso ka diswantšho goba ba araba dipotšišo tše bonolo. Bafsa bao ba lego mahlalagading ba ka kgopelwa gore ba dire nyakišišo e oketšegilego goba ba bontšhe kamoo taba yeo go boledišanwago ka yona e ka dirišwago ka gona.

18. Ke bjang batswadi ba ka rutago Lentšu la Modimo ka sebaka se sengwe le se sengwe, gomme ka mafelelo afe?

¹⁸ Lega go le bjalo, le se ke la beela thuto ya moya iri e tee feela bekeng. Nweletšang Lentšu la Modimo go bana ba lena ka sebaka se sengwe le se sengwe. (Doiteronomio 6:7) E-bang le nako ya go ba theetša. Ba eletšeng le go ba homotša ge e ba go nyakega. (Bapiša 1 Ba-Thesalonika 2:11.) E-bang le kwelobohloko le kgaugelo. (Psalme 103:13; Maleaki 3:17) Ka go dira bjalo le tla ‘thabišwa’ ke bana ba lena le go thekga go phološetšwa ga bona lefaseng le lefsa la Modimo.​—Diema 29:17.

‘Mohla wa go Sega’

19, 20. (a) Boitapološo bo bapala karolo efe bophelong bja lapa? (b) Ditsela tše dingwe tšeo ka tšona batswadi ba ka rulaganyetšago lapa la bona boitapološo ke dife?

¹⁹ Go na le ‘mohla wa go sega le mohla wa go gerula.’ (Mmoledi 3:4) Lentšu la Sehebere bakeng sa “xo sêxa” le ka fetolelwa gape e le “go bina,” “go bapala,” “go dira papadi,” goba gaešita le “go ipshina.” (2 Samuele 6:​21, NW; Jobo 41:​5, NW; Baahlodi 16:​25, NW; Ekisodo 32:​6, NW; Genesi 26:8, NW) Go bapala e ka ba mo go holago kudu, gomme go bohlokwa go bana le bafsa. Mehleng ya Beibele batswadi ba be ba rulaganya boithabišo le boitapološo bakeng sa malapa a bona. (Bapiša le Luka 15:25.) Na o dira se se swanago?

²⁰ Monna yo mongwe wa Mokriste o re: “Re diriša diphaka tša batho bohle ka mo go holago. Re laletša ba bangwe ba banababo rena ba bafsa gomme ra bapala papadi ya kgwele le go dira pikiniki. Ba a ipshina le go thabela bogwera bjo bobotse.” Motswadi o mongwe o oketša ka gore: “Re rulaganya dilo tšeo re ka di dirago le bašemane ba rena. Re ya go rutha, ra bapala kgwele le go tšea maikhutšo. Eupja re bea boithabišo boemong bjo bo swanetšego. Ke gatelela go nyakega ga gore re boloke teka-tekano.” Boitapološo bjo bobotse, bjo bjalo ka dipokano tše swanetšego goba maeto a go ya dirapeng tša diphoofolo le mebusiamong di ka dira go gontši bakeng sa go thibela bana gore ba se kgahlwe ke maipshino a lefase.

21. Batswadi ba ka dira’ng gore ba thibele bana ba bona go ikwa ba tingwa se sengwe ka baka la gore ba sa bine menyanya ya maikhutšo ya lefase?

²¹ Gape go bohlokwa gore bana ba gago ba se ikwe ba tingwa se sengwe ka gobane ba sa bine matšatši a matswalo goba matšatši a maikhutšo ao e sego a Bokriste. Ka go rulaganya ga gago ba ka lebelela pele dinakong tše dintši tše di thabišago ngwaga ka moka. Ee, motswadi yo botse ga a nyake letšatši la maikhutšo bakeng sa go bontšha lerato la gagwe ka go nea dilo tše di bonagalago. Bjalo ka Tatagwe wa legodimong, o ‘tseba go nea bana ba gagwe dineo tše botse’​—neng goba neng.​—Mateo 7:​11.

Go Bolokela Lapa la Gago Bokamoso bjo bo sa Felego

22, 23. (a) Ge masetla-pelo a magolo a dutše a batamela, ke’ng seo malapa ao a boifago Modimo a ka kgodišegago ka sona? (b) Ke’ng seo malapa a ka se dirago ge a dutše a katanela go phologela lefaseng le lefsa la Modimo?

²² Mopsalme o ile a rapela ka gore: “Wene Morêna, O tlo ba leta; O tlo fêla O re namolêla diatleng tša mohuta woo.” (Psalme 12:7) Kgateletšo e tšwago go Sathane ruri e tla oketšega​—kudu-kudu malebana le malapa a Dihlatse tša Jehofa. Lega go le bjalo, go a kgonega go emelana le tlhaselo ye yeo e oketšegago ka mehla. Ka thušo ya Jehofa le boikemišetšo bjo bogolo le go šoma ka matla ga banna, basadi le bana, e lego malapa​—go akaretša le lapa la gago—​o ka ba le kholofelo ya go phološwa nakong ya masetla-pelo a magolo.

²³ Banna le basadi dirang gore go be le khutšo le kwano manyalong a lena ka go phetha dikarolo tša lena tšeo le di abetšwego ke Modimo. Batswadi, tšwelang pele le beela bana ba lena mohlala o mobotse, le thakanele sebaka bakeng sa go ba nea tlwaetšo le tayo yeo ba e nyakago kudu. Bolelang le bona. Ba theetšeng. Maphelo a bona a kotsing! Bana, theetšang batswadi ba lena gomme le ba kwe. Ka thušo ya Jehofa le ka atlega gomme la ipolokela bokamoso bjo bo sa felego lefaseng le lefsa la Modimo le le tlago.

[Mengwalo ya tlase]

Na o a Gopola?

◻ Banna le basadi ba ka kaonefatša bjang poledišano ya bona?

◻ Batswadi ba ka godiša bana bjang ‘ka go ba etetša le go ba eletša tša Morena’? (Ba-Efeso 6:4)

◻ Ditsela tše dingwe tša go dira gore thuto ya lapa e be yeo e agago le e kgahlišago kudu ke dife?

◻ Ke’ng seo batswadi ba ka se dirago ge ba rulaganyetša malapa a bona boitapološo le boithabišo?

[Lepokisi go letlakala 16]

Moopelo​—Tutuetšo E Matla

Mongwadi wa puku yeo e lego mabapi le go godiša bana o re: “Ge e ba ke be nka ema pele ga batheetši . . . gomme ka sepetša meletlo ya mašata ya matagwa, ka diriša sehlare-tagi sa cocaine, pot, goba dihlare-tagi tše dingwe tšeo di šarakanyago monagano, ba be ba tla makala kudu ge ba mpona. . . . [Eupja] batswadi gantši ba nea bana ba bona tšhelete gore ba reke direkhoto goba dikhasete tšeo di thekgago dilo tše bjalo ka go lebanya.” (Raising Positive Kids in a Negative World, ka Zig Ziglar) Ka mohlala, kua United States mmino wa rap wa ditaba tša lerato woo o bolelago ka dikopano tša botona le botshadi tše di gobogilego o boa-boetšwa ke bafsa ba bantši. Na o ruta bana ba gago gore e be bao ba kgethago moopelong woo ba o ratago?

[Seswantšho go letlakala 15]

Dinako tša dijo e ka ba dinako tše thabišago tšeo di godišago botee bja lapa le poledišano