Malapa A Magolo A Kopane Tirelong Ya Modimo

Mopsalme O Ngwadile Gore: “Ka Kxonthe, Bana Ba Motho Ké Neô Ya Morêna; Kenyô Ya Mmele Ké Mphô. Ba Etša Mesêbê ’Atleng Tša Moxale; Ba Byalo Bana Ba Ba Tswáletšwexo Motho À Sa Le E Mofsa. Wa Lehlôxônôlô Ké Monna Wa Kxôpôtlô E Tletšexo Bôná-bao.”​—Psalme 127:​3-5.

EE, BANA e ka ba tšhegofatšo e tšwago go Jehofa. Le gona go fo etša ge mmetši wa mesebe a kgotsofatšwa ke go tseba kamoo a ka lebantšhago mesebe ya gagwe kgotlopong ya gagwe, ka mo go swanago le batswadi ba a thaba ge ba hlahla bana ba bona tseleng yeo e išago bophelong bjo bo sa felego.​—Mateo 7:14.

Kgale-kgale malapa ao ‘dikgotlopo [tša ona] di bego di tletše’ ka bana ba bantši a be a atile gare ga batho ba Modimo. Ka mohlala, nagana ka nywaga ya bona ya ge ba le bothopša Egipita: “Ba-Isiraele ba šala ba ata, ba ntšifala, ba ênêla, ya ba ba matla xa-xoloxolo, naxa ya tlala bôná.” (Ekisodo 1:7) Ge go bapišwa palo ya ba-Isiraele bao ba tsenego Egipita le ya bao ba tlogilego e bontšha gore malapa ao a bego a e-na le bana ba lesome e be e le a bogolo bjo bo lekanetšego!

Ka morago, Jesu o ile a golela ka lapeng leo ba bantši ba ka le lebelelago e le le legolo lehono. Jesu e be e le leitšibolo, eupša Josefa le Maria ba be ba e-na le barwa ba bangwe ba bane gotee le barwedi. (Mateo 13:​54-​56) Taba ya gore ba be ba e-na le bana ba bantši gakaakaa mo gongwe e hlalosa kamoo Maria le Josefa ba bego ba ka thoma leeto la go boela morago ba e-tšwa Jerusalema ka ntle le go lemoga gore Jesu o be a se gona sehlopheng.​​—Luka 2:​42-​46.

Malapa a Magolo Lehono

Lehono, Bakriste ba bantši ba kgetha go lekanetša malapa a bona ka baka la mabaka a moya, a tša boiphedišo, a tša leago le a mangwe. Lega go le bjalo, malapa a magolo a sa dutše a tlwaelegile ditšhabeng tše dintši. Go ya ka The State of the World’s Children 1997, tikologo yeo e nago le tekanyo e phagamego ya pelego ke Afrika ya ka borwa bja Sahara. Moo, mosadi yo a tlwaelegilego o belega bana ba tshela.

Bakeng sa batswadi ba Bakriste bao ba nago le malapa a magolo, go godiša bana ba bona e le gore ba rate Jehofa ga go bonolo, eupša ba bantši ba a atlega go dira bjalo. Katlego e ithekgile ka go ba ga lapa leo le nago le botee borapeding bjo bo sekilego. Mantšu a moapostola Paulo go phuthego ya Korinthe a šoma ka matla a swanago malapeng a Bakriste lehono. O ngwadile gore: “Xomme lena Bana-bešo, ke a Le rapêla, . . . ke re: Bohle bolêlang se tee, xore mo xo lena xo se bê le diphapang; Le bê ba xo bapêlana, kxopolô è le e tee, kêlêlô è le e tee.” (1 Ba-Korinthe 1:​10) Botee bjo bo bjalo bo ka fihlelelwa bjang?

Batswadi e Swanetše go ba Batho ba Moya

Lebaka la motheo ke gore batswadi ba swanetše go ineela ka mo go feletšego go Modimo. Ela hloko seo Moše a ilego a se botša Ba-Isiraele: “Theetša, Isiraele! Morêna Modimo wa rena ké Morêna à nnoši. Morêna Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka matla a xaxo ka moka. Mantšu a ke Xo laetšaxo lehono a a dulê a le pelong ya xaxo. O a tiišetšê bana ba xaxo; O bolêlê ôna Ò dutše ngwakong wa xaxo, le xe O le tseleng xe O y’o rôbala le xe Ò tsoxa.”​​—Doiteronomio 6:​4-7.

Hlokomela gore Moše o ile a hlalosa gore melao ya Modimo e be e swanetše go dula ‘dipelong’ tša batswadi. Ke feela ka go dira bjalo moo batswadi ba bego ba tla ba le tshekamelo ya go nea bana ba bona thuto ya ka mehla ya moya. Ge e le gabotse, ge batswadi ba tiile moyeng, ba fišegela go ruta bana ba bona dilong tša moya.

Gore motho e be motho wa moya le gore a rate Jehofa ka pelo ya gagwe ka moka, go bohlokwa gore a bale, a naganišiše ka Lentšu la Modimo le go le diriša ka mehla. Mopsalme o ngwadile gore motho yo a thabelago molao wa Jehofa le yo a o balago “mosexare le bošexo” o tla “swana le sehlare-se-šingwa-nokeng ya meetse, sa xo enywa dienywa lebaka la xôna, sa xo se pône matlakala; ’me tšohle tše a di diraxo di a lêtlêxa.”​—Psalme 1:​2, 3.

Go fo etša ge sehlare se enywa dienywa tše dibotse ge se nošetšwa ka mehla, ka mo go swanago, le malapa ao a fepšago moyeng a enywa dienywa tša go boifa Modimo bakeng sa go tumiša Jehofa. Lapa le le bjalo ke la Uwadiegwu yo a dulago Afrika Bodikela. Gaešita le ge Uwadiegwu le mosadi wa gagwe ba e-na le bana ba seswai, bobedi bja bona ba hlankela e le babulamadibogo ba ka mehla goba badiredi ba nako e tletšego ba Dihlatse tša Jehofa. O re: “Lapa la rena le kgomaretše thuto ya ka mehla ya Beibele ka lebaka le le fetago nywaga e 20. Re ile ra ruta bana Lentšu la Modimo go tloga ge e be e sa le masea, e sego feela nakong ya thuto ya rena ya lapa eupša le bodireding gotee le dinakong tše dingwe. Bana ba rena ka moka ke bagoeledi ba ditaba tše di lokilego tša Mmušo gomme ke yo monyenyane feela, yoo a nago le nywaga e tshela, yo a sešogo a kolobetšwa.”

Go Šoma Bjalo ka Sehlopha

Beibele e re: “Ngwakô ó axwa ka bohlale; ó thêwa ka thlaoloxanyô.” (Diema 24:3) Ka lapeng, bohlale bjo bo bjalo bo tšweletša go šoma ka sehlopha. “Moetapele” wa sehlopha sa lapa ke tate; ke yena hlogo ya lapa yeo e kgethilwego ke Modimo. (1 Ba-Korinthe 11:3) Moapostola yo a buduletšwego Paulo o ile a gatelela bogolo bja boikarabelo bja bohlogo ge a be a ngwala gore: “Xe motho a sa babalele b’abô, xaxolo ba lapeng la xabô, ó latola tumêlô; ó phalwa ke e a sa dumelexo.”​—1 Timotheo 5:8.

Ka go dumelelana le keletšo ye e tšwago Lentšung la Modimo, banna ba Bakriste ba swanetše go hlokomela boemo bja moya bja basadi ba bona. Ge e ba basadi ba imetšwa mešongwana ya ka gae, boemo bja bona bja moya bo tla fokola. Nageng e nngwe ya Afrika, Mokriste yo a bego a sa tšwa go kolobetšwa o ile a llela bagolo ba phuthegong ya gabo ka gore mosadi wa gagwe o be a bonala eka ga a thabele ditaba tša moya. Bagolo ba ile ba šišinya gore mosadi wa gagwe o be a nyaka thušo ya kgonthe. Ka gona monna o ile a thoma go mo thuša ka mešongwana ya ka gae. O ile a ba a fetša nako a mo thuša gore a kaonefatše go bala ga gagwe le tsebo ya gagwe ya Beibele. O ile a arabela gabotse gomme gona bjale lapa ka moka le kopane tirelong ya Modimo.

Bo-tate gape ba swanetše go tshwenyega ka boemo bja moya bja bana ba bona. Paulo o ngwadile gore: “Le lena Bô-tata-xo-bana! Le se kê la befediša bana ba lena; sa lena a e bê xo ba etetša ka xo ba ruta le xo ba eletša tša Morêna.” (Ba-Efeso 6:4) Ge e ba batswadi ba latela keletšo ya gore ba se ke ba befediša bana ba bona gotee le tlhahlo ya gore ba ba tlwaetše, bana ba ikwa e le karolo ya sehlopha sa lapa. Ka baka leo, bana mo gongwe ba tla thušana le go kgothaletšana go fihlelela dipakane tša moya.

Mošomo wa sehlopha o akaretša go nea bana boikarabelo ge ba šetše ba bo loketše. Tate yo mongwe yo e lego mogolo wa Mokriste yo a nago le bana ba 11, o tsoga e sa le ka pela mesong gomme a swara dithuto le ba mmalwa ba bona pele a e-ya mošomong. Ba bagolo ka morago ga ge ba kolobeditšwe ba šiedišana ka go thuša banababo bona le dikgaetšedi, e lego seo se akaretšago go kopaneleng go ba ruta Beibele. Tate o bea ditaba leihlo ke moka a reta maiteko a bona. Ba tshela ba bana ba kolobeditšwe gomme ba bangwe ba tšwela pele ba šomela go fihlelela pakane yeo.

Poledišano e Botse, Dipakane tše di Swanago

Selo se bohlokwa malapeng ao a nago le botee ke poledišano e lerato le dipakane tša moya tše di swanago. Gordon yo e lego mogolo wa Mokriste yo a dulago Nigeria, ke tate wa bana ba šupago ba nywaga e tlogago go e 11 go ya go e 27. Ba tshelelago ba bona ke babulamadibogo go etša batswadi ba bona. Yo monyenyane go bona yo a sa tšwago go kolobetšwa, o tšea karolo ka mehla modirong wa go dira barutiwa le lapa ka moka. Barwa ba babedi ba bagolo ke bahlanka ba bodiredi ka phuthegong.

Gordon o ile a swarela yo mongwe le yo mongwe wa bana ba gagwe thuto ya Beibele ka boyena. Ka ntle le moo, lapa le na le lenaneo leo le akaretšago bohle la thuto ya Beibele. Mesong e mengwe le e mengwe ba a bokana bakeng sa go hlahloba temana ya Beibele ke moka ba lokišetša diboka tša phuthego.

E nngwe ya dipakane tšeo di beetšwego setho se sengwe le se sengwe sa lapa ke go bala dihlogo ka moka dimakasineng tša Morokami le Phafoga! Morago bjale, ba okeditše ka mmalo wa Beibele wa letšatši le letšatši mokgweng wa bona wa ka mehla. Ka go bolela ka seo di se badilego, ditho tša lapa di kgothaletšana go tšwetša mokgwa wo pele.

Thuto ya beke le beke ya Beibele ya lapa ke e tsepamego kudu moo e lego gore ga go na yo a nyakago go gopotšwa​—yo mongwe le yo mongwe o a e fagahlela. Go theoša le nywaga, moko, sebopego le botelele bja nako ya thuto ya lapa di ile tša fapana go ya ka nywaga le dinyakwa tša bana. Lapa le batamelane le bahlanka ba bangwe ba botegago ba Modimo, gomme se se kgomile bana ka mo go holago.

Bjalo ka lapa, ba dira dilo gotee le go beela nako ka thoko bakeng sa boitapološo. Gatee mo bekeng ba thabela “mantšiboa a lapa” ao a nago le dipapadi tša go leka tlhaologanyo, metlae e kgahlišago, go bapala piano, go anega ditaba le go fo iketla. Ka dinako tše dingwe ba ya lebopong le mafelong a mangwe a kgahlišago.

Go Ithekga ka Jehofa

Ga go na le yo tee ka mo godimo yo a nyenyefatšago boima bja go godiša malapa a magolo. Mokriste yo mongwe o itše: “Go ba tate yo botse wa bana ba seswai ke tlhohlo e kgolo. Go nyakega dijo tše dintši tša nama le tša moya bakeng sa go ba fepa; ke swanetše go šoma ka thata gore ke hwetše tšhelete e lekanego bakeng sa go ba fepa. Bana ba bagolwanyane ba nywageng ya bona ya mahlalading gomme ba tsena sekolo ka moka ba le seswai. Ke a tseba gore tlwaetšo ya moya e bohlokwa, fela ba bangwe ba bana ba-ka ke dinganga e bile ga ba kwe. Ba a nnyamiša, eupša ke a tseba gore ka dinako tše dingwe ke dira dilo tšeo di nyamišago pelo ya Jehofa gomme o a ntebalela. Ka gona ke swanetše go tšwela pele ka go se fele pelo go phošolla bana ba-ka go fihlela ge ba hlaphogelwa.

“Ke leka go latela mohlala wa Jehofa ka gore ga a re felele pelo ka ge a rata gore bohle ba fihlelele boitsholo. Ke ithuta le lapa la-ka gomme ba bangwe ba bana ba-ka ba šomela pakaneng ya go kolobetšwa. Ga ke ithekge ka matla a-ka gore ke hwetše ditla-morago tše di kgahlišago; matla a-ka a phetha modiro o monyenyane. Ke leka go batamela kgaufsi kudu le Jehofa ka thapelo le go diriša seema se se rego: ‘Bôʹta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.’ Jehofa o tla nthuša go phetha tlwaetšo ya bana ba-ka.”​—Diema 3:​5, 6.

O se ke wa Langwa!

Ka dinako tše dingwe go tlwaetša bana go ka bonagala e le modiro wo o sa lebogwego, eupša o se ke wa langwa! O kgomarele! Ge e ba bana ba gago ba sa arabele ka mo go nepagetšego maitekong a gago gona bjale goba ba sa a leboge, mo gongwe ba ka dira bjalo ka morago. Go tšea nako gore ngwana a gole e be Mokriste yo a enywago dienywa tša moya.​​—Ba-Galatia 5:​22, 23.

Monica yo a dulago Kenya ke yo mongwe wa bana ba lesome. O re: “Batswadi ba-ka ba re rutile therešo ya Beibele go tloga boseeng bja rena. Tate o be a ithuta dikgatišo tša Bokriste le rena bekeng e nngwe le e nngwe. Ka baka la mošomo wa gagwe, thuto e be e sa be letšatšing le le swanago ka mehla. Ka dinako tše dingwe ge a be a e-tla gae a e-tšwa mošomong, o be a tla re bona re bapala ka ntle ke moka a re botše gore lebakeng la metsotso e mehlano bohle re tsene ka ntlong bakeng sa thuto ya rena ya Beibele. Ka morago ga thuto ya rena ya Beibele, re be re kgothaletšwa gore re botšiše dipotšišo goba re ahla-ahle mathata le ge e le afe.

“O be a kgonthišetša gore re gwerana le bana bao ba boifago Modimo. Tate o be a etela sekolong ka mehla go yo botšiša barutiši ka boitshwaro bja rena. Ketelong e nngwe o ile a kwa gore dikgaetšedi tša-ka tše tharo di be di lwele le bašemane ba bangwe le gore ka dinako tše dingwe di be di bontšha go hloka mekgwa. Tate o ile a ba otlela go hloka mekgwa, eupša o ile a ba a ipha nako a ba hlalosetša go tšwa Mangwalong lebaka leo ka lona ba bego ba swanetše go itshwara ka tsela ya go boifa Modimo.

“Batswadi ba rena ba re bontšhitše bohlokwa bja go ba gona dibokeng ka go lokišeletša dikarolo tša diboka le rena. Re ile ra tlwaeletšwa go ba badiredi ka go ba le mananeo a go itlwaetša ka gae. Go tloga boseeng re be re e-ya le batswadi ba rena tirelong ya tšhemo.

“Lehono, dikgaetšedi tša-ka tše pedi tše dikgolo ke babulamadibogo ba kgethegilego, ngwanešo o tee yo monyenyane ke mmulamadibogo wa ka mehla gomme yo mongwe yo mogolo yo a nyetšwego e bile a e-na le lapa ke Hlatse e fišegago. Banabešo ba babedi ba banyenyane ba nywaga e 18 le e 16 ke bagoeledi ba kolobeditšwego. Bašemane ba babedi ba banyenyane ba a tlwaetšwa. Ke be ke dutše ke hlankela ofising ya lekala ya Kenya ya Dihlatse tša Jehofa lebaka la nywaga e meraro. Ke rata batswadi ba-ka e bile ke a ba leboga ka gobane ke batho ba moya; ba re beetše mohlala o mobotse.”

Go sa šetšwe gore o na le bana ba bakae, o se ke wa langwa go ba thušeng tseleng e išago bophelong bjo bo sa felego. Ge Jehofa a dutše a šegofatša maiteko a gago, o tla boeletša mantšu a moapostola Johane mabapi le bana ba gagwe ba moya ge a re: “Nna xa ke na lethabô le le fetaxo leo la xe ke kwa xore bana ba-ka ba swere tsela ya therešô.”​—3 Johane 4.