Go Sepela ka Pelo e Kopanego

“Jehofa o nthute . . . kopanya pelo ya-ka le poifo ya leina la gago.”​—PSALME 86:11, PK.

1. Jehofa o putsa bjang batho ba gagwe ba botegago?

‘OO JEHOFA, o Modimo, wena o nnoši.’ (Psalme 86:​8, 10) Dafida o ile a tumiša Modimo go tšwa pelong yeo e phophomago tebogo. Gaešita le pele Dafida e e-ba kgoši Isiraeleng ka moka, Jehofa o be a mo phološitše go Saulo le go ba-Filisita. Ka gona o be a ka opela ka gore: “Lentswê la-ka, sebô sa-ka, le Monamoledi wa-ka ké Morêna. Yo botho [yo a botegago, NW] O mo kwiša botho [o mo dira ka potego, NW].” (2 Samuele 22:​2, 26) Jehofa o ile a phološa bahlanka ba gagwe ba botegago melekong e mentši. Dafida o be a ka bota le go holofela Modimo wa gagwe yo a botegago, eupja o be a nyaka tlhahlo e tšwelago pele. Bjale Dafida o ile a kgopela Modimo ka gore: “Jehofa [oo Jehofa, NW] o nthute tsela ya gago.”​—Psalme 86:11, PK.

2. Jehofa o dirile bjang ditokišetšo gore re rutwe ke yena?

² Dafida o be a sa nyake go kwa selo ka dikgopolo tša lefase goba difilosofi. O be a nyaka ‘go rutwa ke Jehofa,’ bjalo ka ge moporofeta wa Modimo ka morago a ile a bontšha. (Jesaya 54:​13) Ke dipuku tše senyane feela tša Beibele tšeo di bego di le gona tšeo Dafida a bego a ka naganišiša ka tšona. Lega go le bjalo, thuto yeo e tšwago go Jehofa e be e le bohlokwa go yena! Rena ge re rutwa lehono re ka thabela dipuku ka moka tše 66 tša Beibele, gotee le dipuku tše dintši kudu tša Mmušo tšeo di newago ka “molaki e a bôtêxaxo yo bohlale.” (Mateo 24:​45) Bjalo ka Dafida anke re kgopeleng Jehofa gore moya wa gagwe o re thuše go nyakišiša “tše Modimo a di lokišeditšexo ba ba mo rataxo, . . . ôna madiba a diphiri tša Modimo.”​—1 Ba-Korinthe 2:​9, 10.

3. Thuto ya Beibele e ka re hola ka ditsela dife?

³ Beibele e na le karabo bakeng sa potšišo e nngwe le e nngwe goba bothata bjo bo ka rotogago maphelong a rena. “Xobane tše di ngwadilwexo kxalê, di ngwaletšwe xo ruta rena, xore re hwetšê kholofêlô ka xo tiišwa le ka xo homotšwa ka ôna mangwalô.” (Ba-Roma 15:4) Go monya thuto yeo e tšwago go Jehofa go tla re matlafaletša gore re kgotlelele mathata, gwa re homotša dinakong tša kgateletšego, gomme gwa dira gore kholofelo ya Mmušo e dule e phadima dipelong tša rena. Eka re ka thabela go bala Lentšu la Modimo le go naganišiša ka lona “mosexare le bošexo,” ka gobane bohlale bjo bo theilwego Beibeleng e ba “sehlare sa bophêlô sa ba bo swerexo; wà [bo] swara wa tiiša, O tlo ba wa mahlatse.”​—Psalme 1:​1-3; Diema 3:​13-18; bona gape le Johane 17:3.

4. Ge e le ka ditiro tša rena, ke mohlala ofe woo Jesu a ilego a re beela wona?

⁴ Morwa wa Modimo Jesu, yo gape a bitšwago “Morwa-Dafida,” ka mehla o be a nyaka thuto go Jehofa. (Mateo 9:​27)a O itše: “Xa xo se morwa a kxônaxo xo se dira ka la xaxwe; xobane tše Tat’axwe a di diraxo, ké tšôna tše le Morwa a di diraxo.” “Xa ke dire selô ka la-ka, le xore ke bolêla ka mo Tate a nthutilexo.” (Johane 5:​19; 8:​28) Jesu o re tlogeletše mohlala ‘gore re tšee ka mohlala wa gagwe.’ (1 Petro 2:​21) Anke o nagane feela! Ge e ba re ithuta bjalo ka ge Jesu a swanetše go ba a dirile, boemong bjo bongwe le bjo bongwe re tla kgona go dira kamoo Jehofa a bego a tla nyaka re dira ka gona. Tsela ya Jehofa ka mehla ke yona e lokilego.

5. “Therešô” ke’ng?

⁵ Se se latelago Dafida o bolela gore: “Ke tlo sepela therešong ya gago.” (Psalme 86:​11, PK) Nywaga e sekete ka morago, Pilato o ile a botšiša a lebišitše go Morwa wa Dafida, e lego Jesu gore: “Therešô ké eng?” Eupja Jesu o be a sa tšwa go araba potšišo yeo ka go botša Pilato gore “Mmušo wa-ka xa se o tšwaxo ’faseng leno,” a oketša ka gore: “O boletše; ke kxoši. Ké se ke se tswáletšwexo; ke tletše sôna lefaseng xore ke bê hlatse ya therešô.” (Johane 18:​33-38) Ka gona Jesu o tsebišitše gore therešo e lebiša Mmušong wa Mesia. Ka kgonthe, sehlogo ka moka sa Beibele ke go kgethagatšwa ga leina la Jehofa ka Mmušo woo.​—Hesekiele 38:​23; Mateo 6:​9, 10; Kutollo 11:15.

6. Ge re sepela therešong, ke’ng seo re swanetšego go se ela hloko?

⁶ Go sepela thešong go bolela’ng? Go bolela go dira kholofelo ya Mmušo selo se segolo maphelong a rena. Re swanetše go phela ka therešo ya Mmušo. Re swanetše go ba ka pelo ka moka tabeng ya go bea dikgahlego tša Mmušo pele, re ekiše Jesu ka go fišegela go hlatsela therešo ya Mmušo go ya ka dibaka tšeo re di hwetšago. (Mateo 6:​33; Johane 18:​37) Ga se ra swanela go sepela therešong ka karolo e itšego ya nako, re neela tirelo ya go ithola kgwara le go fela re ikgahliša ka go fapoga tseleng bakeng sa go nwelela boithabišong bjo bo feteletšego goba ra tsenela mošomo wo o jago nako goba ra “hlankêla . . . Mamôna.” (Mateo 6:​24) Re ka timela go e nngwe ya ditsela tše tše di fapogago, gomme ra se sa kgona go boela ‘tseleng e pitlaganego e išago bophelong.’ Anke re se fapoge tseleng yeo! (Mateo 7:​13, 14) Mohlahli wa rena yo Mogolo, e lego Jehofa ka Lentšu la gagwe le mokgatlo wa gagwe o re edišetša tsela, o re: “Tsela šé! Tšeang ka yôna! le se fapoxêlê ka xo le letona le xe e le xo la ntsôxôšô!”​—Jesaya 30:21.

Poifo e Swanetšego

7. Re ka “kopanya” dipelo tša rena bjang?

⁷ Thapelo ya Dafida go temana 11 e tšwela pele ka gore: “Kopanya pelo ya-ka le poifo ya leina la gago.” Ka go swana le Dafida, re swanetše go nyaka go se be pelo-pedi, re be le pelo e feletšego go direng thato ya Modimo. Se se dumelelana le keletšo ya Moše: “Xomme, byalo, Isiraele, Morêna Modimo wa xaxo O nyaka’ng xo wêna, xe e se xore o boifê Morêna Modimo wa xaxo, O sepelê ditseleng tša xaxwe mo xo fêla, O mo ratê, O dirêlê Morêna Modimo wa xaxo ka pelo ka moka le ka matla ka moka. O hlôkômêlê ditaêlô tša xaxwe le melaô ya xaxwe ye ke Xo hlathollêlaxo yôna lehono, xore O lêtlêxe?” (Doiteronomio 10:​12, 13) Ruri ke rena re holegago ge re tšhollela dipelo tša rena le meoya go direleng Jehofa. Ka go rialo re bontšha poifo e swanetšego bakeng sa leina la gagwe le hlomphegago. Leina la Jehofa ka go lebanya le ra gore “O Dira Gore Dilo di be Gona,” kudu-kudu mabapi le go phetha merero ya gagwe e megolo. Le bile le emela matla a gagwe a phagametšego legohle ka moka. Ge re hlankela ka go boifa bogolo bja Modimo, re ka se ke ra fapošwa ke go boifa motho. Re ka se be pelo-pedi. Go e na le moo, re tla boifa go dira se sengwe le se sengwe seo se tlago go nyamiša Jehofa, Moahlodi yo a Phagamego le Morena yo a Phagamego, yo a swerego maphelo a ­rena ka diatleng tša gagwe.​—Jesaya 12:2; 33:22.

8, 9. (a) Ke’ng seo se bolelwago ke ‘go se be wa lefase’? (b) Ke megato efe yeo re swanetšego go e gata ka gobane re le “seboxelo”?

⁸ Gaešita lege re lebeletšane le kgobošo le tlaišo, re tla latela mohlala wa Jesu wa go se boife tabeng ya go se be karolo ya lefase le kgopo leo le re dikologilego. (Johane 15:​17-21) Se ga se bolele gore barutiwa ba Jesu ba swanetše go phela bjalo ka baitlami goba ba iphihle lefelong la baitlaimi. Jesu ge a rapela Tatagwe o itše: “Xa ke kxopele xore O ba tlošê lefaseng; ke ba kxopêlêla xo phêmêlwa bobe. Bôna xa se ba lefase, byalo ka Nna kè se wa lefase. Ba kxêthê therešong ya xaxo; Lentšu la xaxo ké yôna therešô. Ke ba roma xore ba yê le lefase, bo-ka mola Ò nthoma ka tla lefaseng.” (Johane 17:​15-18) Ka go swana le Jesu, re romilwe gore re ye go goeletša therešo ya Mmušo. Jesu o be a batamelega. Batho ba be ba lapološwa ke tsela ya gagwe ya go ruta. (Bapiša le Mateo 7:​28, 29; 11:​28, 29; Johane 7:​46.) Go swanetše go ba bjalo le ka rena.

⁹ Go ba ga rena le bogwera bjo borutho, moaparo wa rena le ponagalo e kgahlišago, poledišano e botho le e hlwekilego, di swanetše go dira gore rena gotee le molaetša wa rena re amogelege go batho ba dipelo tše di lokilego. Re swanetše go phema bošaedi, moaparo wo e sego wa bothakga, bogwera bjo bo ka lebišago go kopaneleng dilong tša lefase le boitshwarong bjo bo gobogilego le tsela ya bophelo ya go se latele melao ya motheo yeo re e bonago lefaseng leo le re dikologilego. Ka ge re le “seboxêlô sa lefase le sa Barongwa le sa batho,” re swanetše go hlankela le go phela re le Bakriste ba ba bontšhago mohlala o mobotse ka diiri tše 24 letšatšing le lengwe le le lengwe. (1 Ba-Korinthe 4:9; Ba-Efeso 5:​1-4; Ba-Filipi 4:​8, 9; Ba-Kolose 4:5, 6) Pelo ya rena e swanetše go ba e kopanego gore re fihlelele seo.

10. Jehofa o gopola bjang bao ba kopanyago dipelo tša bona tirelong e kgethwa?

¹⁰ Rena bao re dirago gore dipelo tša rena e be tše kopanego ka go boifa leina la Jehofa, re naganišiša ka merero ya gagwe ya bohlokwa le go tlatša maphelo a rena ka tirelo e kgethwa, re tla gopolwa ke Jehofa. “Xobane mahlô a Morêna a tsepeletše lefase ka moka, xore a bônatšê matla a xaxwe ka bao ba lebeletšexo Yêna ka pelo ka moka.” (2 Koronika 16:9) Ge e bolela ka mokgwa wa boporofeta ka mehla ya rena, puku ya Maleaki 3:​16 e balega ka gore: “Ba-šia-Modimo, xe bôná ba boledišana, Morêna ó a theeetša, ó a di kwa; ’me ba ba mmoifaxo ba ngwaletšwe puku ya kxopotšô pel’a xaxwe, ya ba sa lebalexo ’ina l’axwe.” Eka dipelo tša rena e ka ba tšeo di kopanego poifong yeo e botse ya go boifa Jehofa!

Botho bjo Lerato bja Jehofa

11. Botho bjo lerato bja Jehofa bo tla bontšhwa bjang go batho ba botegago?

¹¹ Thapelo ya Dafida ke e tšwago pelong gakaakang! O tšwela pele ka gore: “Ke Xo leboxa ka pelo ka moka, Modimo [oo Jehofa, NW] Mong’a-ka; nka se kxaotše xo rêta leina la xaxo. Xobane botho byo O ntiraxo ka byôna ké byo boxolo; O phološitše môya wa-ka sekoting sa bo-dula-bahu.” (Psalme 86:​12, 13) Ka lekga la bobedi psalmeng ye, Dafida o reta Jehofa bakeng sa botho bja Gagwe bjo lerato​—lerato la Gagwe le botegago. Lerato le ke le legolo kudu mo e lego gore le ka phološa maemong ao go bonalago go sa kgonege. Ge Saulo a be a mo rakediša lešokeng, Dafida o swanetše go ba a ile a ikwa eka a ka gogobela sekhutlong gore a hwe. Go be go etša go lebana le bodula-bahu bjo bo išago fase kudu​—go iša ga lebitla. Eupja Jehofa o ile a mo phološa! Ka tsela e swanago, Jehofa gantši o ile a hlakodiša bahlanka ba gagwe ba mehleng yeno ka ditsela tše makatšago, le gona o ile a ba a thekga babotegi bao ba ilego ba kgotlelela ka potego go ba go fihla lehung. Batho ka moka bao ba botegago ba na le moputso wa bona gaešita le go fihla lehung.​—Bapiša le Jobo 1:​6-12; 2:​1-6, 9, 10; 27:5; 42:10; Diema 27:11; Mateo 24:​9, 13; Kutollo 2:10.b

12. Ke bjang baruti e bilego baikgogomoši le bagateledi, gomme moputso wa bona e tla ba eng?

¹² Mabapi le batlaiši Dafida o goeletša ka gore: “Modimo, ke tsoxetšwe ke ba sehloxo; ke tsongwa ke lešaba la dinokwane; ké bao ba xo se lebane naxô’.” (Psalme 86:14) Lehono, ba bangwe ba batlaiši ke baruti ba Bojakane. Ba ba ipolela gore ba rapela Modimo eupja ba diriša lentšu “Morêna” legatong la leina la gagwe le lekgethwa, gomme ba mo tšweletša e le Boraro botee bja sephiri bjoo ge e le gabotse go se nago mo go bolelwago ka bjona ka Beibeleng. A boikgodišo bjo bokaakang! Go oketša go se, ba leka go phegelela mebušo ya bopolitiki gore e thibele Dihlatse tša Jehofa le go di tswalelela kgolegong, bjalo ka ge se se sa dutše se dirwa dinageng tše dintši kudu go dikologa lefase. Bo-radipurapura ba bao e lego barogi ba leina la Modimo ba tla hwetša moputso wa bona gotee le dihlotswana ka moka tšeo di swanago le seotswa tša Babele o Mogolo.​—Kutollo 17:​1, 2, 15-18; 19:​1-3.

13. Ke dika dife tšeo Jehofa a di bontšhago ge a tsebiša go loka ga gagwe?

¹³ Ka tsela e fapanego ka mo go thabišago thapelo ya Dafida e tšwela pele ka gore: “ ’Me Wêna Mong’a-ka [Oo Jehofa, NW], O Modimo wa lešôkô le wa kxauxêlô, wa xo se fêle pelo, Ra-mabobo, Ra-pôtêxô.” (Psalme 86:​15) Ruri dika tšeo tša Modimo ga di na tšeo di swanago le tšona. Mantšu a a re bušetša morago Thabeng ya Sinai nakong ya ge Moše a be a kgopela go bona letago la Jehofa. Jehofa o ile a araba ka gore: “Botse bya-ka ka moka ke tlo bo fetiša pele xa xaxo; ka kwatša leina la Morêna pele xa xaxo.” Eupja o ile a lemoša Moše ka gore: “Sefahloxô sa-ka O ka se kê wa kxôna xo se bôna; ka xobane motho a ka se kê a mpôna a phela.” Ka morago ga moo, Jehofa o ile a tla ka leru, a hlaboša lentšu a re: “Morêna, Morêna, Modimo yo mabobo le kxauxêlô, wa xo se fêlê pelo, wa botho byo boxolo le therešo.” (Ekisodo 33:​18-20; 34:​5, 6) Dafida o tsopotše mantšu a thapelong ya gagwe. Dika tše bjalo tša Jehofa di bohlokwa kudu go rena go feta ponagalo lege e le efe ya mmele! Go tšwa phihlelong ya rena ka noši, na ga re leboge go loka ga Jehofa bjalo ka ge go bontšhwa dikeng tše tše botse?

‘Seka sa Tšhetšo’

14, 15. Jehofa o direla bjang bahlanka ba gagwe ‘seka sa tšhetšo’?

¹⁴ Dafida o buša gape o kgopela tšhegofatšo ya Jehofa, o re: “Mpoêlê ’me O nkxauxêle. Nna molata w’axo O mphê matla ’axo, O mphološê, nna ngwan’a molata w’axo. Bea seka ka nna ka xo nthšetša, banthloi ba šexamê xe ba bôna Ò [oo Jehofa, NW] nthušitše, Ò nkhomoditše.” (Psalme 86:​16, 17) Dafida o lemoga gore ka ge a le bjalo ka ‘ngwana wa molata wa Jehofa,’ le yena e swanetše go ba wa Jehofa. Se se bjalo le ka rena ka moka lehono bao re neetšego maphelo a rena go Jehofa le bao re hlankelago tirelong ya gagwe. Re nyaka matla a phološago a Jehofa ka moya wa gagwe o mokgethwa. Ka gona, re kgopela Modimo wa rena gore a dire ka rena ‘seka sa tšhetšo.’ Go loka ga Jehofa go akaretša dika tše botse tšeo re sa tšwago go boledišana ka tšona. Motheong wo, ke seka sefe goba pontšho efe yeo re ka letelago gore Jehofa a re nee yona?

¹⁵ Jehofa ke Monei wa “ ’Neo tšohle tše botse, le ’mphô tšôhle [tše] di tletšexo” gomme bjalo ka ge Jesu a re kgonthišetša, o nea ka bolokologi bjo bogolo ‘moya o mokgethwa go bao ba mo kgopelago.’ (Jakobo 1:​17; Luka 11:​13) Moya o mokgethwa ke mpho e kgolo gakaakang yeo e tšwago go Jehofa! Ka moya o mokgethwa, Jehofa o nea lethabo la pelo, gaešita le nakong ya tlaišego. Ka gona, baapostola ba Jesu, nakong ya ge maphelo a bona a le kotsing, ba be ba ka bolela ka lethabo gore Modimo o nea bao ba mo kwago bjalo ka mmuši moya wa gagwe o mokgethwa. (Ditiro 5:​27-32) Lethabo la moya o mokgethwa le dira ka bona ‘seka sa tšhetšo.’​—Ba-Roma 14:​17, 18.

16, 17. (a) Ke seka sefe sa go loka ga gagwe seo Jehofa a ilego a se nea Paulo le Baranaba? (b) Ke seka sefe seo se ilego sa newa ba-Thesalonika bao ba bego ba tlaišwa?

¹⁶ Nakong ya leeto la bona la boromiwa kua Asia Minor ka moka, Paulo le Baranaba ba ile ba kopana le mathata, gaešita le tlaišo e šoro. Ge ba be ba kwatša ditaba tše di lokilego kua Antiokia le Pisidia, ba-Juda ba ile ba gana molaetša wa bona. Ka gona, ba ile ba retologela go batho ba ba-ntle. Go ile gwa direga eng? “Ba-ntlê ba di kwa ba thaba; ba tumiša Lentšu La Morêna; xwa dumêla bohle ba ba hlaoletšwexo bophelô byo bo sa felexo.” Eupja ba-Juda ba ile ba tsoša marole, mo e lego gore baromiwa bao ba ile ba ntšhetšwa ka ntle ga naga. Na bona gotee le badumedi ba bafsa ba ile ba nyema moko ka baka la se? Le gatee! Go e na le moo, ‘barutiwa ba ile ba tlala lethabo le moya o mokgethwa.’ (Ditiro 13:​48, 52) Jehofa o ba neile seka seo sa go loka ga gagwe.

¹⁷ Ka morago, phuthego e mpsha kua Thesalonika e ile ya ba ka tlase ga tlaišo. Se se ile sa dira gore moapostola Paulo a ngwale lengwalo la khomotšo, a reta kgotlelelo ya bona ka tlase ga masetla-pelo. Ba be ba ile ba “amoxêla Lentšu ka lethabô la Môya-mokxêthwa mola ditlaišexo è le tše ntši.” (1 Ba-Thesalonika 1:6) “Lethabô la Môya-mokxêthwa” le ile la tšwela pele ka go ba matlafatša e le pontšho e bonagalago e tšwago go Modimo yo a nago le kgaugelo le lešoko, yo a diegago go galefa le yo a tletšego botho bjo lerato le therešo.

18. Banababo rena ba Bohlabela bja Yuropa ba bontšhitše bjang tebogo ya bona bakeng sa go loka ga Jehofa?

¹⁸ Morago bjale, Jehofa o bontšhitše go loka ga gagwe go banababo rena ba botegago kua Bohlabela bja Yuropa, a hlabiša bao ba bego ba ba hloile dihlong​—bao e bego e le batlaiši ba bona. Gaešita le ge ba sa tšwa go lokollwa kgateletšong yeo e tšerego masome-some a nywaga, bana ba babo rena ba rategago ba sa dutše ba swanetše go kgotlelela, ka gobane ba bantši ba bona ba sa dutše ba lebeletšane le mathata a šoro a tša boiphedišo. Lega go le bjalo, ‘lethabo la bona la moya o mokgethwa’ le a ba homotša. Ke’ng seo se ka ba thabišago kudu go feta go diriša ditokologo tša bona tšeo ba sa tšwago go di hwetša tabeng ya go phatlalatša bohlatse? Batho ba bantši ba a ba theetša, bjalo ka ge dipego tše di lego mabapi le dikopano le dikolobetšo di bontšha.​—Bapiša le Ditiro 9:31.

19. Re ka dira bjang gore mantšu a Psalme 86:11 e be a rena ka noši?

¹⁹ Sohle seo go boledišanwego ka sona sehlogong se le go se se fetilego se boeletša thapelo ya Dafida e tšwago pelong yeo e lebišitšwego go Jehofa: “Jehofa, O nthute tsela ya gago, . . . kopanya pelo ya-ka le poifo ya leina la gago.” (Psalme 86:​11, PK) Anke re direng gore mantšu ao a temana ya rena ya ngwaga ya 1993 e be a rena ka noši ge re dutše re šoma ka pelo ka moka tabeng ya go thekga dikgahlego tša Mmušo le ka go leboga go loka ga Modimo o tee wa rena, Morena Mmuši Jehofa.

[Mengwalo ya tlase]

O tla Araba Bjang?

◻ Ke’ng seo re se bontšhago ka go rapela ka gore, “Jehofa, o nthute”?

◻ Ke’ng seo se bolelwago ke gore dipelo tša rena di kopanywe le go boifa leina la Jehofa?

◻ Jehofa o tla bontšha bjang botho bja gagwe bjo lerato go batho ka moka bao ba botegago?

◻ Jehofa o dira bjang ‘seka sa tšhetšo’ ka rena?

[Lepokisi go letlakala 16]

Temana ya ngwaga wa 1993:

“Jehofa, o nthute . . . Kopanya pelo ya-ka le poifo ya leina la gago.”​—Psalme 86:11, PK.

[Seswantšho go letlakala 15]

Jehofa ke lentswe le sebo go bao ba sepelago ka go loka therešong

[Seswantšho go letlakala 18]

Kopanong ya Ditšhaba-tšhaba ya Dihlatse tša Jehofa ya “Barwadi ba Seetša” kua St. Petersburg, Russia, ka June, ba 46 214 ba bile gona gomme ba 3 256 ba ile ba kolobetšwa. Ba ba itšweletša ka mo go makatšago gakaakang gore ba hwetše go loka ga Jehofa ka “lethabo la Môya-mokgethwa”!