Letago la Bohlogo-pududu

GO TLA kgahliša gakaakang go bolela le banna le basadi ba botegago ba bogologolo! Akanya fela o boledišana le banna ba swanago le Noage, Aborahama, Moše le Johane Mokolobetši, gaešita le basadi ba swanago le Sara, Rahaba, Ruthe le Debora! Na o ka se ke wa gapeletša go ba theetša ge ba anega dipego tše ba di bonego tša ditiragalo tše kgolo tša mehleng ya bogologolo?

Gaešita le lehono, na o ka se thabele go theetša batšofadi ba botegago ba anega diphihlelo tša bona mabapi le kamoo bona le ba bangwe ba ilego ba kgomarela potego ya bona go Modimo ka tlase ga diteko, tše akaretšago dithibelo, go bethwa gantši le go golegwa ka baka la go loka? Ka ntle le pelaelo o be o tla thabela seo! Lerato la rena la go rata Modimo le go ba hlompha di tla oketšega ge ba dutše ba re botša maikwelo a bona, gomme se se tla ba bjalo kudu-kudu ge ba re botša tebogo ya bona e tšwago pelong bakeng sa tlhokomelo e lerato ya Jehofa.

Magareng ga batho ba Modimo, bakgalabje le bakgekolo ba botegago ka mehla ba be ba hlompšha ka baka la boitemogelo, tsebo le bohlale tša bona. Ge e le gabotse, taelo e latelago e akareditšwe Molaong wo Modimo a o neilego ba-Isiraele: “Xe O lebana le hlôxô e pududu O êmê; sefahloxô sa mokxalabyê O se hlomphê; xomme O boifê Modimo wa xaxo, Nna Morêna.” (Lefitiko 19:32) Lentšu la Sehebere bakeng sa bogolo goba botšofadi le tšwa modung wo o bolelago “go mela meriri e meputswa” gape le fetolelwa e le “hlogo-pududu.” Ka gona ba-Isiraele go be go letetšwe gore ba eme e le sešupo sa tlhompho go motho yo a tšofetšego, ba dira bjalo ka poifo e bontšhago go hlompha Modimo.

Na mokgwa woo wa go bontšha tlhompho o gona lehono? Ka mohlala, na bafsa ka botho ba bulela batšofadi mabati? Na bafsa goba batho ba bagolwane ba tle ba šuthelele motho yo a tšofetšego mo lifiting ya mo moagong ge e tletše ka batho? Goba na batho ba bafsa ka kakaretšo ba emelela madulong a bona gore batšofadi ba dule fase ka mo peseng goba setimeleng seo se tletšego? Go palelwa ke go dira dilo tše di bjalo go bile go lemogilwe gaešita le magareng ga Bakriste.

Lega go le bjalo, gore ba thabiše Jehofa Modimo, Bakriste ba swanetše go itshwara ka go dumelelana le kgopolo ya gagwe, gomme ba pheme kgopolo, polelo le mekgwa ya bao e lego ‘baithati, ba go se kwe batswadi, ba go se leboge le ba sa ratego go loka.’ (2 Timotheo 3:1-5) Ka gona, Lentšu la Modimo le re’ng ka bofsa ge bo bapišwa le go ba hlogo-pududu?

Matla a Bofsa

Beibele e ela hloko matla a bofsa le mehola ya ona, e bolela gore: “Seala sa thsoxana ké matla a bôná.” (Diema 20:29) Isiraeleng ya bogologolo matla a ba-Lefi ba bafsa a be a dirišwa ka tempeleng, gantši bakeng sa mediro e mentši e boima. Lehono, mešomo e mentši ka difeketoring, magaeng a Bethele le meagong ya Mokgatlo wa Watch Tower e dirwa ke masogana le dikgarebe bao ba gafilego matla a bona le bokgoni bja bona gore ba tšwetše pele dikgahlego tša Mmušo. (Mateo 6:33) Ka mokgwa wo ba thabela ditokelo tše botse tirelong ya Modimo.

Seema se se sa tšwago go tsopolwa se feleletša ka mantšu a, “mofaphahlôxô wa baxolo kê hlôxô e pududu.” Ge matla a bofsa a kopantšwe le boitemogelo le bohlale tšeo di hweditšwego ka baka la nywaga e mentši ya bophelo di bopa kopano e matla kudu.

Ka mohlala: Mmetli yo mofsa yo a sa ithutago yo a kgopetšwego go kokotela mapolanka o nyaka go dira mošomo wa gagwe ka matla a bofsa. Mmetli yo mogolo yo a nago le boitemogelo bjo bontši o lemoga gore go sa šetšwe matla a gagwe, mothuši yo mofsa o kokotela sepikiri ka makga a mantši pele se felelela ka gare. Mošomi yo mogolo o nyaka gore lesogana le swarele noto mo go felelago mpheng wa yona go e na le go e swarela kgaufsi le hlogo ya yona ya tšhipi. Seo se dira gore motho yo mofsa a kokotele sepikiri ka matla a magolo, gomme a boloke nako le matla.

Ka mo go swanago, kgarebe e nago le matla e ka ithuta go tšwa diphošong tša yona gore diaparo tše dingwe di tla senyega ge e ba di sa hlatswiwe go ya ka ditaelo tša gona. Lega go le bjalo, mosadi yo a nago le boitemogelo o tseba bohlokwa bja go tšea nako a hlopha diaparo, gomme a hlatswetša tše dingwe ka thoko. O ithutile gape le gore a ka phema go šidila diaparo tše dingwe ka go di mena ge a di tloša mo a di anegilego gona goba ge a di ntšha ka motšheneng wa go omiša diaparo.

Go ithuta bathong bao ba nago le boitemogelo go ka dira gore bophelo bo be bonolo. Lega go le bjalo, go ba le nako yeo, gaešita le motho yo a nago le boitemogelo a ka palelwago ke go phetha mešomo yeo a ilego a e phetha gabonolo nywaga e sego kae e fetilego. Mongwadi yo mongwe o ile a hlokomela ka mo go swanetšego gore: “Go be go tla ba botse gakaakang ge nkabe bafsa ba e-na le tsebo, gomme batšofadi ba e-na le matla.” Eupja ke mo go botse gakaakang ge batho ba ba tšofetšego ba leboga matla a bafsa, gomme ka go se fele pelo ba ba ngwathela boitemogelo bjo ba bo hweditšego ka nywaga e mentši—gomme bafsa ba amogela dikeletšo ka boikokobetšo! Ka tsela ye, dihlopha ka bobedi tša nywaga di a holega.

Go Hwetša Letago

Go gola fela ga se gwa lekana. Lesogana Elihu o itše “ba baxolo xa se bôná ba bohlale; batsebi ba tokô xa se bakxalabyê.” (Jobo 32:9; Mmoledi 4:13) Gore a hlompšhe ka baka la hlogo e pududu, motho yo a tšofetšego o tla swanelwa ke go ba a dirile dilo tše dintši bophelong bja gagwe go e na le go senya matšatši a gagwe a bophelo ka bobodu a bogetše thelebišene, a e-ya dipapading goba ge a sa dire bjalo a duletše maipshino. Le gona gaešita le nywageng ya bogolo batšofadi ba swanetše go tšwela pele ba ithuta.

Batho ba bangwe ba ikgantšha ka go dira dilo ka tsela ya bona, goba ba re: “Bohlale bo tšwa lebading.” Lega go le bjalo, Lentšu la Modimo le eletša ka gore: “Yo bohlale ó tlo di kwa, a atêlwa ke mahlale; le wa [kwešišo] a huma dikeletšô.” (Diema 1:5; bapiša le 1 Ba-Korinthe 10:11.) Ga se ka mehla moo bohlale bo tšwago lebading ka gobane re ka ithuta go tšwa diphošong tša ba bangwe ka ntle le go dira diphošo tše ba di dirilego. Go feta moo, Mokriste o tla nyaka go gopola gore “hlôxô-pududu ké ’ala sa bothšepi; se hwetšwa tseleng ya xo loka.” (Diema 16:31) Bophelo bjo bo ilego bja dirišetšwa tirelong e botegago ya Jehofa ke bjo bo kgahlišago go ya ka pono ya gagwe gomme bo swanelwa ke go hlompšha ke ba bangwe e le mohlala o mobotse. Ee, go ithuta ka Modimo le go hwetša boitemogelo “tseleng ya go loka” go ka thoma e sa le ka pela bophelong, gomme e swanetše go ba tsela ye e se nago mafelelo.—Ba-Roma 11:33, 34.

Se se ka bonwa tabeng ya mošemane wa nywaga e šupago kua Sweden. O ile a botšiša molebeledi wa Sekolo sa Bodiredi sa Pušo ya Modimo ka phuthegong ge e ba a ka tšea karolo mo sekolong. Molebeledi o ile a botšiša gore, “Ka baka la’ng?” Ge a araba, ngwana yo o ile a re: “Motho ga se a swanela go phela a sa dire selo!” (Mmoledi 12:1) A mohlala o mobotse gakaakang bakeng sa ba bafsa le ba bagolo ka mo go swanago!

Go Hlompha Bohlogo-pududu

Mokgwa wo o tshwenyago mo setšhabeng sa mehleng ye ke go hlokomela kudu go tia mmeleng le bokgoni, gomme batšofadi ba a nyatšwa. Kgopolo ya Mokriste mabapi le batho ba dihlogo tše pududu ka phuthegong e swanetše go ba efe?

Go e na le go hlokomologa Bakriste ba tšofetšego, re swanetše go ba hlokomela, gomme re diriše nako re e-na le bona. Ka mohlala, dibokeng tša beke le beke tša Dihlatse tša Jehofa Holong ya Mmušo, na o kgonthiša gore o dumediša batšofadi? Ba leboga e le ruri ditumedišo tša bafsa le ba bangwe. Le gona, batšofadi ba thabela gakaakang go ba gona dipokanong tša bogwera tša Bakriste-gotee le bona ba nywaga e fapanego! Le ge banyalani ba bafsa ba ka rata dilo tše dintši tše swanago le tša batho ba bangwe ba ba nyetšego ba nywaga ya bona, e tla ba mo go putsago go akaretša batšofadi dipokanong tše bjalo tša lethabo.—1 Ba-Thesalonika 3:12; 5:15.

Go bohlokwa gakaakang go naganela ge re boledišana le batšofadi! Ge ngwanabo rena yo a tšofetšego yo a nago le nywaga e 40 a le tirelong ya Jehofa a be a boledišana le mogolo yo mongwe mabapi le kamoo a ka dirišwago ka gona ka phuthegong, lesogana le itše: “O ka se kgone go thuša ka selo.” A phetolo e sa bontšhego botho gakaakang! Ngwanabo rena yo a tšofetšego o be a e-na le matla a manyenyane ge a bapišwa le ao a kilego a ba le ona, karolo ya gagwe bodireding bja tšhemo e fokotšegile ka tekanyo e itšego, gomme ditokelo tše dingwe tša bolebeledi go bonagala e be e le tše boima bakeng sa bokgoni bja gagwe ka nako yeo; lega go le bjalo, o be a ka thuša kudu. O be a e-na le nywaga yeo ka yona a ilego a hwetša bohlale le boitemogelo tseleng ya go loka. Ka gobane batšofadi ba ba bjalo ba šomile ka thata e le bagoeledi ba Mmušo, ba kgotleletše tlaišego, ba ile ba rwala merwalo e boima ya boikarabelo bja Bokriste, gomme ba tlwaeditše ba bangwe, batho ba Modimo mo nakong ye ba thabela mokgatlo o tiilego wo o thekgilwego ke moya wa gagwe. Ka gona, eka re ka hlompha batšofadi ba ka go ba tšea e le baeletši ba bohlale, badiši ba lerato le barutiši ba kgonago.

Go na le lebaka le lengwe le lebotse la go hlokomela kudu ditšhišinyo tša batho ba ba tšofetšego. Ka mohlala, ngwanabo rena yo a nago le boitemogelo o ile a šišinya gore lemati la Holo e nngwe ya Mmušo le se ke la bewa ka lehlakoreng la bodikela bja moago. Banababo rena ba bafsa ba naganne kudu ka botse bjo ba bo naganelago bja moago ga se ba latela tšhišinyo ya gagwe. Lega go le bjalo, ka morago ga nywaga e sego kae lemati le ile la swanelwa ke go bewa lefelong le lengwe ka gobane phefo le pula tšeo di bego di e-ba gona ka mehla go tšwa bodikela di be di le sentše. Bohlale bjo kwagalago bja boitemogelo bo phala mabaka a go kgahlwa ke bobotse bja dilo. Ge e ba batho ba bafsa ba hlompha batšofadi ka go theetša ditšhišinyo tša bona le bohlale bja bona bjo bo kwagalago, se se ka boloka nako le tšhelete. Gaešita lege tšhišinyo ya motšofadi e sa latelwe, a ka hlompšha ka go tsebišwa gore e ile ya newa šedi, eupja mabaka a mangwe a ile a dira gore go fihlelelwe phetho e nngwe.—Bapiša le Diema 1:8.

Lebelela Pele, e Sego Morago

Batšofadi ba bangwe ba nagana ka tsela ye: “Ga go na nako e swanago le mehla ya bogologolo ge nna le wena re be re sa le ba bafsa.” Lega go le bjalo, go e na le go nagana ka mehla e fetilego, batšofadi ba ba bjalo ba ka kgothaletšwa go lebelela pele nakong yeo ka yona ba tlago go amogela moputso wa bona wa legodimong goba ba tlago go hwetša matla a bofsa gape ka tlase ga pušo ya Mmušo wa Modimo. Go sa dutše go le bjalo, ba swanetše go hlokomela mellwane ya bona ka baka la nywaga. Temogo ye le go rata metlae kudu ga di hole ka selo ge go bonagala gore motšofadi o a hlokomologwa bakeng sa ditokelo tša tirelo.

Ka mohlala, ngwanabo rena yo a tšofetšego mohlomongwe o be a dirišwa ka mehla mananeong a dikopano tša selete nywageng e fetilego. Mo nakong ye go na le bagolo ba bantši ba kgonago le banna ba bantši bao ba ka kgethwago ba ba nago le bokgoni bja go ruta. Le ge e sa le ba bafsa kudu, ba bangwe ba bagolo ba ba bontšhitše gabotse phišego le bokgoni, ba ka ruta gabotse le go nea tayo ka botho, gomme ba kgona go kgothatša ba bangwe. (1 Ba-Thesalonika 5:12, 13; 1 Timotheo 5:17) Ka lebaka leo, ngwanabo rena yo a tšofetšego ge a sa tšwelele mo lenaneong la kopano a ka nagana gore o hlokomologilwe, gomme a ka fo se thabele gore ditokelo di neilwe bagolo ba bafsa. Lega go le bjalo, maikwelo a fošagetšego a bakwago ke go se phethege ga motho a ka fenywa. Ge e le gabotse, ka moka ka phuthegong ba ka thuša ka go tsebiša batšofadi gore ba bohlokwa le gore ba a ratwa ka baka la potego ya bona, gomme ditšhišinyo tša bona di a lebogwa.

Ee, motho yo a tšofetšego o swanetše go gopola gore barapedi-gotee le yena ba swanetše go hlompšha bjale ka ge a nyaka gore a hlompšhe. (Mateo 7:12; Ba-Roma 12:10) Go e na le go ikwa o ka re ba gapeleditšwe go rola boikarabelo ka baka la nywaga ya bona le go tshwenywa ke dikgopolo tše fošagetšego, batšofadi ba swanetše go thabela nywaga ya bona ya tirelo e botegago. Le gona, ruri ka moka ga rena re swanetše go leboga gore ka baka la tšhegofatšo ya Jehofa, go na le palo e oketšegago ya balebeledi ba swanelegago gore ba arolelane morwalo wa mošomo le go rwala boikarabelo bja phuthego ge lešaba la “dinku tše dingwê” le kgeregela phuthegong ya Bokriste.—Johane 10:16; Jesaya 60:8, 22; 2 Timotheo 2:2.

Ka baka la dihlabi, go fokola goba mabaka a mangwe, diputswa ka dinako tše dingwe di ka tenega. Se se nyaka kwešišo le kwelobohloko ka lehlakoreng la ditho tše dingwe tša lapa goba phuthego. Go nyaka gape gore batšofadi ba katanele go ba le kgopolo e nepagetšego, go boloka ponagalo ya bofsa. Ge motho o mofsa yo a dulago phapošing e tee le setho sa Sehlopha se Bušago sa Dihlatse tša Jehofa a be a tloga Bethele nywageng e fetilego, mokgalabje o ile a mo kgopela gore a dire tšhišišinyo ya yo a ka tšeago sekgoba sa gagwe, gomme a bolela gore o be a ka rata ngwanabo rena yo a budulego yo e lego mofsa go mo thuša gore a dule e le yo mofsa le yo mafolofolo. Ngwanabo rena yo a tloditšwego yo a tšofetšego ga a ka a ikemišetša go rola boikarabelo goba go nyefiša diatla, ka gobane go be go e-na le modiro wo o swanetšego go dirwa. A mohlala o mobotse gakaakang wa go lebelela pele le go boloka pono e lokilego!

Ka ntle le pelaelo, “seala sa thsoxana ké matla a bôná; mofaphahlôxô wa baxolo kê hlôxô e pududu.” Go kgahliša gakaakang ge bafsa ba diriša matla a bona gomme batšofadi ba diriša bohlale bja bona tabeng ya go phegelela tsela ya toko! Bakriste ba ba tšofetšego le ba bafsa ka go swana ba ba le lethabo le legolo ge ba dutše ba tšwetša pele ba kopane borapedi bja therešo bja Jehofa Modimo, “Motála-wa-mabaka.”—Daniele 7:13.

[Seswantšho go letlakala 28]

Bakriste ba hlogo tše pududu ba na le mo gontši mo ba ka go neago gore ba hole ba bangwe