Mafelo a Naga ya Kholofetšo

Sinai—Thaba ya Moše le Kgaugelo

GE O gopola ka Thaba ya Sinai, mo gongwe o ka nagana ka Moše. Ka baka la’ng? Ka gobane Moše o ile a amogela Molao wa Modimo a le thabeng Peninsuleng ya Sinai. Ke thaba efe? Go na le kgonagalo ya gore e be e le ye e bontšhitšwego ka mo godimo.a

Ka karolong ya ka borwa bja peninsula ye, mo e ka bago bogareng bja molomo wa Lewatle le le Khwibidu, go na le ntotoma yeo e nago le dintlha tše pedi. Ponagalo ya tikologo yeo ka kakaretšo e swanela dipego tša Beibele tše di lego mabapi le Moše. Ntlha e nngwe e bitšwa Jebel Musa, yeo e bolelago “Thaba ya Moše.”

Dipego tše fapa-fapanego tša Beibele di dira gore leina leo e be le le swanetšego. Na o sa gopola gore Moše o be a dišitše mohlape wa Jethero ge morongwa a tšwelela sethokgweng se se tukago mollo? E be e le kae? Beibele e bolela gore e be e le ‘thabeng ya Modimo Horebe,’ yeo gape e bitšwago Thaba ya Sinai. (Ekisodo 3:1-10; 1 Dikxoši 19:8) Ka morago ga gore Moše a ete batho ba Modimo pele go tšwa Egipita, o ile a ba tliša mo. Ekisodo 19:2, 3 e bolela gore “Ba-Isiraele ba . . . hlôma mešaša mo ba lebanexo le thaba. Mošê a namêla a ya xo Modimo [wa therešo]; Morêna a mmitša à le thabeng.”

Mo e be e le la mathomo Moše a namela Thaba ya Sinai, gomme o ile a se sepele go feta feela dipatogeng. Re bala gore: “Morêna ó be a foloxetše thabeng ya Sinai, mo nthleng ya thaba. A bitša Mošê xore a tlê nthleng ya thaba.”—Ekisodo 19:20.

Dikete-kete tša baeti ba bogago naga ba mehleng yeno di nameletše ka bothata bjo bogolo ge ba latela mehlala bošego gore ba fihle ntlheng, ba letela go bona ge letšatši le hlaba, gomme ka morago ba fologela tlase nakong ya dijo tša mosegare. Ga se gwa ba bjalo ka Moše. Modimo o ile a mmotša gore: “Rotoxêla xo Nna thabeng; O dulê nthse ke Xo neêlê diphaphathi tša mafsika, le melaô.” Ka nako yeo “Mošê . . . a fetša matšatši a masome a manê le mašexo a ôna à le mo thabeng.”—Ekisodo 24:12-18.

Ka gona go a kwešišega ge leina la Moše le gokaganywa le thaba ye, eupja ke ka baka la’ng “kxauxêlô” e gokaganywa le leina le? Ee ge Moše a be a le godimo a amogela Molao, batho mo tlase molaleng (mohlomongwe Molaleng wa er-Raha wo o lego mo seswantšhong) ba ile ba kgetha tsela ya bošilo. Ba ile ba gapeletša ngwanabo Moše gore a dire modimo. Arone a re: “Kxaolang mangina a xauta . . . Le a tlišê xo nna.” Ka gona ba ile ba dira namane ya gauta gore ba e rapele. Se se ile sa galefiša Modimo wa therešo gomme sa dira gore ba dikete ba bolawe. (Ekisodo 32:1-35) Eupja Arone o ile a bontšhwa kgaugelo gomme a se bolawe. Ka baka la’ng?

Mantšu a Modimo go Ekisodo 32:10 a bontšha gore ga se a tšea Arone bjalo ka mohlohleletši o mogolo wa bobe bja Isiraele. Le gona ge kahlolo e be e dirwa, “Ba-Lefi” ba ile ba kgetha lehlakore la Modimo, e lego seo ka ntle le pelaelo se ilego sa akaretša le Arone. (Ekisodo 32:26) Ka gona go sa šetšwe gore Arone o ile a ba le karolo molatong wo, o ile a gaugelwa ke Modimo patogeng ya Thaba ya Sinai.

Ka morago, Moše o ile a bolela gore o nyaka go tseba Jehofa gakaone le go bona letago la Gagwe. (Ekisodo 33:13, 18) Lege go be go sa kgonege gore Moše a bone sefahlego sa Modimo, Jehofa o ile a mmontšha karolo ya letago la Gagwe, a tiiša gore O “xauxêla yo [A] mo xauxêlaxo.” (Ekisodo 33:17–34:7) E be e le mo go swanetšego kudu gore Modimo a gatelele kgaugelo ya gagwe, ka gobane Beibele e diriša “kxauxêlô” leboelela mabapi le ditirišano tša Modimo le Isiraele, bao a ilego a ba tsenya kgweranong kua Sinai.—Psalme 103:7-13, 18.

Baeti bao ba etelago Thaba ya Sinai lehono ba hwetša lefelo la badula-noši la bodumedi mo patogeng ya yona, leo le ka se gopotšego motho ka borapedi bja therešo bjoo Moše a ilego a ithuta bjona thabeng yeo e lego ka mo godimo. Go e na le moo, bodumedi lefelong le la bodula-noši bo diriša diswantšho. Seo se bontšhitšwego mo “Manamelo a Išago Paradeiseng.” Se theilwe pukung yeo e ngwadilwego ke moitlami yo a tšwago Byzantium John Climacus. Ka morago ga go fetša nywaga e ka bago 40 a le ka seleng ya boitlami, o ile a ba mookamedi wa lefelo la bodula-noši gomme a ngwala ka manamelo a seswantšhetšo a yago legodimong. Eupja elelwa gore baruti ba bangwe ba swantšhitšwe ba gogwa ke batemona bao ba ba išago tlhokofatšong ya ka mo go sa felego mollong wa dihele. Ke seswantšho se matla eupja ga se dumelelane le mangwalo!—Mmoledi 9:5, 10; Jeremia 7:31.

Go fapana le thuto yeo ya maaka, therešo ke gore Ra-matla-ohle ke “Modimo yo mabobo le kxauxêlô, wa xo se fêlê pelo, wa botho byo boxolo le therešô.” (Ekisodo 34:6) Moše o ile a batamela kgaufsi le Modimo yo wa kgaugelo Thabeng ya Sinai.

[Mongwalo wa tlase]

[Picture Credit Line on page 8]

Pictorial Archive (Near Eastern History) Est.

[Picture Credit Line on page 9]

Pictorial Archive (Near Eastern History) Est.

[Picture Credit Line on page 9]

Pictorial Archive (Near Eastern History) Est.