Morokami le Phafoga!—Dimakasine tše di Lego Nakong tša Therešo

“O ntopolotše, oo Jehofa Modimo wa therešo.”—PSALME 31:5, NW.

1, 2. (a) Kgaetšedi o ile a ikwa bjang ka selo se sengwe se a ilego a se bala ka go Morokami? (b) Ke dipotšišo dife tšeo di botšišwago mabapi le dimakasine tša rena?

KGAETŠEDI wa Mokriste o ile a ngwala gore: “Ke le leboga kudu bakeng sa tsebišo yeo e lego ka sehlogong sa Morokami se se rego, ‘O ka Hwetša Khomotšo Dinakong tša Manyami.’a Tše dintši tša dintlha tše le di tšweleditšego di be di bolela tlwaa ka maikwelo ao ke bego ke ile ka swanela go lebeletšana le ona; go bjalo ka ge eka sehlogo se se be se ngwaletšwe nna ka go lebanya. Ge ke se bala ka lekga la mathomo, ke ile ka tlala megokgo ka mahlong a-ka. Ke mo go kgahlišago go lemoga gore motho yo mongwe o tseba kamoo ke ikwago ka gona! Ke leboga kudu ge ke le yo mongwe wa Dihlatse tša Jehofa. Ke kae mo gongwe moo re ka hwetšago dikholofetšo tša bophelo bjo bo sa felego Paradeiseng bokamosong bjo bo lego kgaufsi, gomme gona bjale ke khomotšo e kaakang go rena! Ke a le leboga. Ga ke fetše go le leboga.”

² Na o kile wa ikwa ka tsela yeo? Na go kile gwa bonala eka se sengwe ka go makasine wa Morokami le woo o sepedišana le wona, e lego Phafoga!, se be se ngwaletšwe wena ka mo go kgethegilego? Ke’ng ka dimakasine tša rena seo se tanyago dipelo tša batho? Re ka thuša ba bangwe bjang go holwa ke molaetša wo o phološago bophelo woo di nago le wona?—1 Timotheo 4:16.

Dimakasine Tšeo di Emelago Therešo

3. Ke ka baka la lebaka lefe le lebotse leo ka lona dimakasine tša Morokami le tša Phafoga! di ilego tša kgoma dipelo tša babadi ba bantši?

³ Jehofa ke “Modimo wa therešo.” (Psalme 31:5, NW) Lentšu la Gagwe Beibele, ke puku ya therešo. (Johane 17:17) Batho ba dipelo tše di botegago ba arabela therešong. (Bapiša le Johane 4:23, 24.) Lebaka le lengwe leo ka lona Morokami le Phafoga! di ilego tša kgoma dipelo tša babadi ba dimilione ke gore ke dimakasine tšeo di nago le potego le therešo. Ge e le gabotse, e bile ka baka la kgang mabapi le go botegela therešo ya Beibele ge Morokami o tla thoma go gatišwa.

4, 5. (a) Ke maemo afe ao a ilego a lebiša tabeng ya gore C. T. Russell a gatiše Watch Tower? (b) Makasine wa Morokami o dirišwa bjang ke “molaki e a bôtêxaxo yo bohlale”?

⁴ Ka 1876, Charles T. Russell o ile a ikopanya le Nelson H. Barbour wa Rochester, New York. Russell o ile a neela ka ditšhelete bakeng sa go tsošološa go gatišwa ga kgatišo-baka ya bodumedi ya Barbour ya Herald of the Morning, gotee le Barbour e le morulaganyi-phare-phare gomme Russell e le motlatša-morulaganyi. Lega go le bjalo, mo e ka bago ngwaga le seripa ka morago, tokollong ya August 1878 ya Herald, Barbour o ile a ngwala sehlogo seo se bego se gana mohola wa topollo wa lehu la Kriste. Russell, yo a bego a nyakile go ba o monyenyane ka nywaga e 30 go Barbour, o ile a arabela ka sehlogo ka tokollong e latetšego seo se bego se thekga topollo, yeo a ilego a e bolela e le “e nngwe ya dithuto tše bohlokwa kudu tša Lentšu la Modimo.” (Mateo 20:28) Ka morago ga go dira maiteko a leboelela a go bontšhana mabaka ka Mangwalo le Barbour, mafelelong Russell o ile a phetha ka go kgaola ditlemo le Herald. Go thoma ka tokollo ya June 1879 ya makasine woo, leina la Russell, e le motlatša-morulaganyi, le ile la se sa hlwa le tšwelela. Kgwedi ka morago, Russell wa nywaga e 27 o ile a thoma go gatiša Zion’s Watch Tower and Herald of Christ’s Presence (yeo bjale e tsebjago e le Morokami o Tsebatša Mmušo wa Jehofa), yeo go tloga mathomong e ilego ya thekga therešo ya Mangwalo, e bjalo ka topollo.

⁵ Nywageng e 114 e fetilego, Morokami, ka go swana le ramolao yo a nago le bokgoni, o ile wa itlhatsela e le mothekgi wa therešo le thuto ya Beibele. Ge e le gare e dira bjalo, e ile ya thopa kgodišego ya babadi ba dimilione bao ba nago le tebogo. E sa dutše e thekga topollo ka tsela e matla. (Ka mohlala, bona tokollo ya February 15, 1991.) Le gona, e tšwela pele e le sedirišwa sa motheo sa “molaki e a bôtêxaxo yo bohlale” le Sehlopha se Bušago sa gagwe sa go tsebatša Mmušo wo o hlomilwego wa Jehofa le go phatlalatša dijo tša moya “ka lebaka la xôna.”—Mateo 24:14, 45.

6, 7. Nepo-kgolo yeo e bego e boletšwe ya The Golden Age ke efe, gomme ke eng seo se bontšhago gore batho bao ba naganago ba ile ba arabela molaetšeng wa yona?

⁶ Go thwe’ng ka makasine wa Phafoga!? Go tloga mathomong a yona, Phafoga! le yona e ile ya thekga therešo. Makasine wo, woo mathomong o bego o bitšwa The Golden Age, o be o reretšwe go abja go batho bohle. Mabapi le morero wa wona, tokollo ya pele ya October 1, 1919, e ile ya re: “Morero wa wona ke go hlalosa seo se bolelwago e le ka kgonthe ke tiragalo e kgolo ya mehleng yeno seetšeng sa bohlale bjo bo tšwago go Modimo le go kgonthišetša batho bao ba nago le tlhaologanyo ka bohlatse bjo bo sa ganetšegego le bjo bo kgodišago bja gore mehla ya tšhegofatšo e kgolo ya batho e batametše.” Batho bao ba naganago ba ile ba arabela molaetšeng wa The Golden Age. Ka nywaga e mentši, kabo ya yona e be e bile e feta ya Morokami.b

⁷ Lega go le bjalo, go ipiletša ga Morokami le Phafoga! go fetela ka kua ga therešo ya gore di phatlalatša ditherešo tša thuto ya bodumedi le go hlalosa seo se bolelwago ke maemo a lefase. Kudu-kudu nywaga e lesome e fetilego goba e masome-pedi dimakasine tša rena di ile tša thopa dipelo tša batho ka baka la lebaka le lengwe gape.

Dihlogo Tšeo di Lego Nakong Tšeo di Kgomago Maphelo a Batho

8. Ke phetogo efe tabeng ya go ngwala yeo Juda a ilego a e dira, a kgothaletša babadi ba gagwe go gana ditutuetšo dife ka gare ga phuthego?

⁸ Mo e ka bago nywaga e 30 ka morago ga lehu le tsogo tša Jesu Kriste, mongwadi wa Beibele Juda o ile a lebana le boemo bjo thata. Batho ba boitshwaro bjo bo gobogilego, bao ba bego ba itshwere sephoofolo, ba be ba khukhunetše gare ga Bakriste. Juda o be a rerile go ngwalela Bakriste-gotee le yena ka taba mabapi le thuto ya bodumedi—e lego phološo yeo Bakriste ba tloditšwego ka moka ga bona ba e holofetšego. Go e na le moo, ka go hlahlwa ke moya o mokgethwa, o ile a hwetša go swanetše gore a opeletše babadi ba gagwe gore ba pheme ditutuetšo tše di gobošago ka gare ga phuthego. (Juda 3, 4, 19-23) Juda o ile a itumelelanya le boemo gomme a nea keletšo e lego nakong yeo e ilego ya kgotsofatša dinyakwa tša banababo ba Bakriste.

9. Ke’ng seo se akaretšwago tabeng ya go lokišetša dihlogo tšeo di lego nakong tša dimakasine tša rena?

⁹ Ka mo go swanago, go lokišetša dihlogo tše di lego nakong bakeng sa dimakasine tša rena ke boikarabelo bjo bo hlohlago. Mehla e a fetoga gomme le batho ba dira bjalo—dinyakwa tša bona le dikgahlego tša bona ga di swane le tša nywageng e lesome goba e masome-pedi e fetilego. Molebeledi wa mosepedi morago bjale o boletše gore: “Ge ke be ke e-ba Hlatse morago kua ka bo-1950, tsela yeo re bego re thoma go ithuta Beibele ka yona le batho kudu-kudu e be e le mabapi le thuto ya bodumedi—re ba ruta therešo mabapi le Boraro botee, mollo wa dihele, moya [soul] le tše dingwe. Eupja gona bjale go bonala eka go na le mathata a mantši kudu maphelong a batho moo re swanelago ke go ba ruta kamoo ba swanetšego go phela ka gona.” Ke ka baka la’ng go le bjalo?

10. Ke ka baka la’ng go sa swanela go re makatša gore go bile le go senyega mo go sa kgaotšego ditabeng tša batho ga e sa le go tloga ka 1914?

¹⁰ Mabapi le ‘mehla ya bofelo,’ Beibele e boletše e sa le pele gore: “Batho ba babe le baaroši, bobe bya bôná bo tlo fêla bò xola bò e-ya, bà fora ba bangwê, le bôná bà forwa.” (2 Timotheo 3:1, 13) Ka baka leo, ga se gwa swanela go re makatša ge go bile le go senyega mo go sa kgaotšego ditabeng tša batho ga e sa le mehla ya bofelo e thoma ka 1914. Sathane, yoo nako ya gagwe yeo e šetšego e lego e kopana go feta lege e le neng pele, o tukela lekoko la batho bogale go feta lege e le neng pele. (Kutollo 12:9, 12) Ka baka leo, ditekanyetšo tša boitshwaro ka kakaretšo le tša lapa di fapana kudu le tšeo di bego di le gona nywageng e 30 goba e 40 feela e fetilego. Batho ka kakaretšo ga ba sa sekametše bodumeding go etša nywaga-someng e fetilego. Bosenyi bo ata kudu moo batho ba gatago megato ya go itšhireletša yeo e bego e sa tsebje nywageng e 20 goba e 30 feela e fetilego.—Mateo 24:12.

11. (a) Ke ditaba tša mohuta ofe tšeo di lego ka menaganong ya batho, gomme sehlopha sa molaki yo a botegago yo bohlale se arabetše bjang go dinyakwa tše? (b) Nea mohlala wa sehlogo sa Morokami goba sa Phafoga! seo se ilego sa kgoma bophelo bja gago.

¹¹ Ka gona, ga go makatše ge ditaba mabapi le maikwelo, tša leago le lapa di le menaganong ya batho ba bantši. Sehlopha sa molaki yo a botegago yo bohlale se arabetše ka sebete ka go Morokami le Phafoga! ka go gatiša dihlogo tše di lego nakong tšeo di ilego tša ahla-ahla dinyakwa tša kgonthe tša batho le tšeo di ilego tša kgoma maphelo a bona e le ka kgonthe. Ela hloko mehlala e mengwe.

12. (a) Ke ka baka la’ng dihlogo tšeo di lego mabapi le malapa a batswadi bao ba se nago balekane di ile tša lokišetšwa bakeng sa Morokami wa 1981? (b) Kgaetšedi yo mongwe o hlalositše bjang tebogo ya gagwe ya go leboga dihlogo tša mabapi le malapa a batswadi bao ba se nago balekane?

¹² Ditaba mabapi le lapa. Ge dipego tša lefase ka bophara di be di bontšha koketšego ya ka bjako ya palo ya malapa a motswadi o tee, dihlogo tšeo di kgahlišago tša taba e rego, “Go Fenya Mathata Lefaseng la Lehono ge Motswadi e le o Tee” di ile tša lokišetšwa bakeng sa Morokami wa March 1, 1981. Dihlogo tše di be di na le merero yeo e lego gabedi: (1) go thuša batswadi ba se nago balekane gore ba lebeletšane ka katlego le mathata ao a kgethegilego ao ba lebanago le ona le (2) go thuša ba bangwe gore ba hwetše tshedimošo e kaone e le gore ba kgone go bontšha ‘kwelobohloko’ le “xo hlôla” malapa a motswadi o tee e le ka kgonthe. (1 Petro 3:8; Jakobo 1:27) Babadi ba bantši ba ngwadile gore ba bontšha tebogo bakeng sa dihlogo tše. Motswadi yo mongwe yo a se nago molekane o ngwadile gore: “Ruri se se ile sa rothiša megokgo mahlong a-ka ge ke bona letlakala la ka ntle, gomme ge ke bula makasine le go bala tsebišo ya wona, pelo ya-ka e ile ya phophoma ka tebogo ya go leboga Jehofa bakeng sa go nea tsebišo e bjalo ka nako yeo e nyakegago.”

13. Ke taba efe e nabilego mabapi le kgateletšego yeo e ilego ya gatišwa ka go Awake! ka 1981, gomme mmadi yo mongwe o ile a re’ng?

¹³ Ditaba mabapi le maikwelo. Taba ya kgateletšego e ile ya ahla-ahlwa ka go Morokami le Awake! ga e sa le go tloga ka bo-1960. (1 Ba-Thesalonika 5:14) Eupja pono e mpsha le ye e lebanego ka taba e ile ya bontšhwa ka lelokelelong la dihlogo tša sehlogo sa ka ntle sa “O ka Lwantšha Kgateletšego!” sa Awake! ya September 8, 1981. Go se go ye kae mangwalo a tebogo a ile a tla ka bontši go Mokgatlo wa Watch Tower go tšwa lefaseng ka moka. Kgaetšedi yo mongwe o ngwadile gore, “Nka hlalosa bjang maikwelo a pelo ya-ka ka go ngwala? Ke na le nywaga e 24, gomme nywageng e lesome e fetilego ke bile ka tlase ga kgateletšego ka dinako tše dintši. Eupja gona bjale ke ikwa ke le kgaufsi kudu le Jehofa gomme ke leboga ge a arabile dinyakwa tša batho bao ba gateletšegilego ka dihlogo tše tše lerato, gomme ke be ke rata go le botša seo.”

14, 15. (a) Taba ya go gobošwa ga bana e ile ya ahla-ahlwa bjang ka dimakasineng tša rena? (b) Ke dihlogo dife tša makasine tšeo di ilego tša kgahla mokatiši wa dipere kua Australia?

¹⁴ Ditaba tša phedišano. Beibele e boletše e sa le pele gore “mehleng ya bofêlô” batho “e tlo ba ba xo ithata, . . . E tlo ba ba-hlala-leratô, . . . ba ba sa tsebexo xo ithswara, manaba a tše boló.” (2 Timotheo 3:1-3) Ka baka leo, ga se ra swanela go makatšwa ke ge go gobošwa ga bana e le mokgwa wo o dirwago ka tekanyo e kgolo lehono. Taba yeo e ile ya ahla-ahlwa ka tsela e lebantšhago ditherešo ka sehlogong se se rego, “Thušo go Bao ba Sentšwego ke ba Moloko ka go Robala le Bona” ka go Morokami wa March 1, 1984. Nywaga e seswai ka morago lelokelelo la dihlogo tša ka mathomong tša taba e rego, “Go Fodiša Dintho tša go Gobošwa ga Bana” ka go Phafoga! ya October 8, 1991 le ile la lokišetšwa ka kelohloko go nea kwešišo le kholofelo bakeng sa bahlaselwa gotee le go sedimoša ba bangwe e le gore ba kgone go nea thušo e holago. Lelokelelo le la dihlogo le ile la hlohleletša karabelo e kgolo ka go fetišiša ya babadi historing ya dimakasine tša rena. Mmadi yo mongwe o ngwadile gore: “Mafelelo a matla kudu go hlaphogelweng ga-ka e bile dikgopolo tše di homotšago le ditšhupetšo tša Mangwalo tše di lego ka dihlogong tše. Go tseba gore Jehofa ga se a ntlhokomologa e bile kimollo e kgolo. Go tseba gore ke be ke se noši e bile mo go homotšago ka mo go swanago.”

¹⁵ Mokatiši wa dipere kua Melbourne, Australia, o ile a letša mogala wa monabo o motelele go ya ofising ya Sydney ya Mokgatlo wa Watch Tower, a bolela kamoo a šišimišwago ka gona ke tikologo ya mokato wa dipere. O boletše gore o be a sa tšwa go bala Phafoga! ya March 8, 1993 ka “Go Katwa—Selo se se Tšhošago Kudu go Mosadi” le gore le gatee o be a sa dumele ge go be go e-na le makasine o bjalo. O ile a botšiša dipotšišo mo e ka bago ka metsotso e 30 gomme o ile a thabišwa ke go kwa dikarabo tše di ilego tša newa.

16. O ka bontšha tebogo ya gago ya go leboga dimakasine tša rena ka ditsela dife?

¹⁶ Go thwe’ng ka wena? Na bophelo bja gago bo ile bja kgongwa ke sehlogo se itšego seo se gatišitšwego ka go Morokami le Phafoga!? Ge e ba go le bjalo, gona ga go na pelaelo gore o ikwa o e-na le tebogo bakeng sa dimakasine tša rena. O ka bontšha bjang tebogo ya gago? Ruri e ka ba ka gore wena ka noši o bale kopi e nngwe le e nngwe. Gape o ka ba le karolo go abeng dimakasine tše tša bohlokwa ka gohle ka mo go kgonegago. Se se ka dirwa bjang?

Di Abelane le ba Bangwe!

17. Diphuthego di ka dira’ng gore di oketše kabo ya dimakasine?

¹⁷ Sa pele, go na le selo se sengwe seo phuthego e nngwe le e nngwe e ka se dirago. Tokollo ya October 1952 ya Informant (yeo gabjale e lego Tirelo ya Rena ya Mmušo) e itše: “Tsela e atlegago kudu ya go aba dimakasine ke go ya ka ntlo le ntlo le go tsena lebenkele ka lebenkele. Ka gona, Mokgatlo o kgothaletša gore ditsela tše tša go aba dimakasine e be karolo ya ka mehla ya modiro wa Letšatši la Dimakasine.” Keletšo yeo e sa dutše e šoma le lehono. Diphuthego di ka rulaganya Letšatši la Dimakasine la ka mehla, e lego letšatši leo le kgethetšwego go nea bohlatse ka dimakasine ka mo go kgethegilego. Go diphuthego tše dintši ga go na pelaelo gore Mekibelo e itšego e tla ba nako e botse. Ee, anke phuthego ye nngwe le ye nngwe e bee matšatši a kgethegilego goba mantšiboa bakeng sa go nea bohlatse ka dimakasine—ka ntlo le ntlo, ka lebenkele le lebenkele, modirong wa setarateng le ditsejaneng tša dimakasine. Go oketša moo, na wena mogoeledi wa Mmušo o ka dira’ng go thuša go oketša kabo ya dimakasine?

18, 19. (a) Go kgomega ka Morokami le Phafoga! go ka go thuša bjang go sepediša dimakasine? (b) Mohola wa thero e kopana le ye e lebantšhago taba ke ofe ge re sepediša dimakasine? (c) Ke’ng seo se bontšhago bohlokwa bja go iša dimakasine ka magaeng a batho?

¹⁸ Go ba yo a kgomegilego ka “Morokami” le “Phafoga!” ke mogato wa pele. Bala dimakasine pele ga nako. Ge o dutše o bala sehlogo se sengwe le se sengwe, ipotšiše, ‘Sehlogo se se ka kgahla bomang?’ Nagana ka mantšu a sego kae ao o ka a bolelago gore o tsoše kgahlego bakeng sa sehlogo. Ka ntle le go thekga Letšatši la Dimakasine la ka mehla, ke ka baka la’ng o sa dule o e-na le dikopi e le gore o tle o diriše sebaka se sengwe le se sengwe ka mo go holago bakeng sa go di abelana le ba bangwe—ge o le leetong goba o reka mabenkeleng, le ge o bolela le bašomi-gotee le wena, baagišani, bao o tsenago le bona sekolo goba barutiši?

¹⁹ Go boloka thero e le e bonolo ke tšhišinyo ya bobedi. Watchtower ya December 1, 1956, e itše: “Thero e bonolo le e lebantšhago taba ke e kaone ge o sepediša dimakasine. Nepo-kgolo ke go sepediša dikopi tše dintši. Tšona di tla ‘ipolelela.’” Bagoeledi ba bangwe ba hweditše e le mo go atlegago gore ba kgethe kgopolo e tee sehlogong, ba e bee ka mantšu a sego kae, gomme ba sepediša makasine. Ge dimakasine di šetše di amogetšwe ka legaeng, mo gongwe di ka “bolela” le bangwe ka ntle le motho yoo a di amogetšego go wena. Kua Ireland morutwana yo mofsa wa yunibesithi o ile a bala tokollo ya September 1, 1991 ya Morokami, woo tatagwe a bego a o hweditše go Hlatse. Sehlogo mabapi poledišano le ditaba tše dingwe di ile tša tsoša kgahlego ya gagwe. Kapejana ka morago ga ge a badile makasine, o ile a leletša Dihlatse mogala, a diriša lelokelelo la dinomoro tšeo di lego ka pukung ya dinomoro tša mogala. Go se go ye kae thuto ya Beibele e ile ya thongwa, gomme ngwanenyana yoo o ile a kolobetšwa Kopanong ya Selete ya “Thuto ya Modimo” ya July 1993. Ka mešego feela, anke re išeng dimakasine ka magaeng, moo di ka ‘bolelago’ le batho! Molebeledi wa mosepedi o neile tšhišinyo e nngwe e bonolo: “Ntšha dimakasine ka mokotleng wa gago wa dipuku.” Ka kgonthe, ge e ba seo o se bolelago se sa tanye kgahlego ya mong wa ntlo, gona mohlomongwe diswantšho tše di botse tša tšona tša ka ntle di tla go sepedišetša dimakasine.

20, 21. (a) O ka feto-fetoga bjang le maemo ge o le modirong wa dimakasine? (b) O ka dira’ng gore o sepediše dimakasine tše di oketšegilego kgwedi ye nngwe le ye nngwe?

²⁰ Tšhišinyo ya boraro ke go feto-fetoga le maemo. (Bapiša le 1 Ba-Korinthe 9:19-23.) Lokišetša dithero tše sego kae tše kopana. E-ba o nagana ka sehlogo se tee seo se tlago go kgahla banna, se sengwe e be seo se tlago go kgahla basadi. Go bafsa mo gongwe o ka bontšha sehlogo se se rego, “Bafsa ba a Botšiša . . . .” Le gona, e-ba yo a fetogago le maemo mabapi le nako yeo o bago le karolo ka yona modirong wa dimakasine. Go tlaleletša go Letšatši la Dimakasine, mo gongwe o ka hwetša go nea bohlatse mantšiboa go nea sebaka se sebotse kudu sa go sepediša dimakasine ka ntlo le ntlo.

²¹ Tšhišinyo ya bone ke go ipeela pakane. Pampišana ya ka gare e rego “Dimakasine di Šupa Tsela ya go ya Bophelong,” yeo e lego ka go Tirelo ya Rena ya Mmušo ya May 1984, e itše: “E le keletšo feela, bagoeledi mo gongwe ba ka ba le pakane ya mo e ka bago go sepediša dimakasine tše 10 ka kgwedi go ithekgile ka maemo a bona; babulamadibogo ba ka katanela tše 90. Ke therešo gore bagoeledi ba bangwe ba ka kgona go sepediša dimakasine tše oketšegilego ka kgwedi gomme ba tla ipeela pakane ye e lego godingwana. Lega go le bjalo, ka baka la bophelo bjo bo fokolago, mohuta wa tšhemo, goba mabaka a mangwe a kwalago, mo gongwe pakane ya ba bangwe e ka ba tlase. Fela, tirelo ya bona go Jehofa e sa dutše e le e bohlokwa. (Mat. 13:23; Luka 21:3, 4) Selo se bohlokwa ke go ipeela pakane.”

22. Ke tsela efe yeo ka yona re ka bontšhago gore re leboga Jehofa bakeng sa dimakasine tša rena tše di lego nakong tša therešo?

²² Re leboga gakaakang ge Jehofa “Modimo wa therešo,” a dirišitše sehlopha sa molaki yo a botegago yo bohlale le Sehlopha se Bušago sa gagwe go re nea dimakasine tše tše di lego nakong! (Psalme 31:5, NW) Ge feela Jehofa a sa dutše a rata, dimakasine tše di tla tšwela pele di ahla-ahla dinyakwa tša kgonthe tša batho. Di tla tšwela pele di kgomaretše ditekanyetšo tše phagamego tša Jehofa tša boitshwaro. Di ka se kgaotše go tšwetša pele thuto e lokilego. Le gona, di tla phegelela go lebiša tlhokomelo go phethagaleng ga boporofeta bjo bo swayago mehla ya rena e le nako yeo Mmušo wa Modimo o bušago ka yona gomme thato ya Modimo e dirwago mo lefaseng go feta lege e le neng pele ke palo e oketšegago ya barapedi ba kgonthe ba Jehofa. (Mateo 6:10; Kutollo 11:15) A lehumo le bohlokwa gakaakang leo re nago le lona ka go Morokami le Phafoga! Anke re dirišeng sebaka se sengwe le se sengwe ka mo go holago bakeng sa go abelana le batho ba dipelo tše bonolo dimakasine tše tše bohlokwa tšeo di kgomago maphelo a batho le go thekga ditherešo tša Mmušo.

[Mengwalo ya tlase]

Karabo ya Gago ke Efe?

◻ Ke’ng seo se bontšhago gore Morokami le Phafoga! ke dimakasine tša therešo?

◻ Morokami le Phafoga! di kgomile bjang maphelo batho?

◻ Diphuthego di ka dira’ng go oketša kabo ya dimakasine?

◻ Ke ditšhišinyo dife tšeo di ka go thušago go sepediša dimakasine tše di oketšegilego?

[Lepokisi go letlakala 22]

Dihlogo tše Dingwe Tšeo di Ilego tša Kgoma Maphelo a Batho

Go theoša le nywaga babadi ba bantši ba ile ba ngwala ba hlalosa ditebogo tša bona tša go leboga dihlogo tše di itšego tše di gatišwago ka go Morokami le Phafoga! Ka mo tlase go lokeleditšwe tše sego kae tša dihlogo tše dintši tšeo di ilego tša kgoma babadi ba rena. Na dihlogo tše goba tše dingwe di ile tša fetola bophelo bja gago?

Morokami

“Amogela Thušo ya Modimo Gore o Fenye Diphošo tša ka Sephiring” (April 15, 1985)

“Go Bontšha Borapedi go Batswadi ba Tšofetšego” (June 1, 1987)

“Thuto Yeo e Nago le Morero” (November 1, 1992)

Phafoga!

“O ka Lwantšha Kgateletšego!” (September 8, 1981, Awake!)

“Ge Motho yo o mo Ratago a E-hwa . . .” (April 22, 1985, Awake!)

“Šireletša Bana ba Gago!” (October 8, 1993)

[Seswantšho go letlakala 23]

Canada—go dira boboledi ka ntlo le ntlo ka dimakasine

[Seswantšho go letlakala 24]

Myanmar—go sepediša dimakasine tšeo di šupago tsela e išago bophelong