Na O Bala Dimakasine?
1 Banyalani ba baromiwa Afrika ba ile ba bolela se ka dimakasine tša rena: “Morokami o re thuša gore re dule re phafogile moyeng tšhemong ya rena. Tokollong e nngwe le e nngwe re hwetša kgothatšo le matla.” Na o na le tebogo e swanago e tseneletšego ka dimakasine tša rena? Le gona na o fagahlela ka mo go swanago go di bala?
2 Go tšea nako e ntši kudu go lokišetša dihlogo tša dimakasine tšeo di ka balwago ka metsotso e sego kae feela. Ge o tseba se, na o ka fo kga dihlogo ka godimo, wa lebelela diswantšho goba wa bala ka sewelo sehlogo seo go diregago gore se tanye mahlo a gago? Re ba bohlale ge e ba re dira se se fetago seo. Re swanetše go tšea nako bakeng sa go bala le go hlahloba dihlogo ka moka tokollong e nngwe le e nngwe ya dimakasine tša rena. Morokami ke makasine wa rena wa motheo bakeng sa go nea dijo tša moya tše di lego nakong. Phafoga! e na le dihlogo tše kgahlišago le tše di rutago tšeo di lego mabapi le ditaba tše fapa-fapanego. Seo re ithutago sona ka go bala dimakasine tše ga se re matlafatše feela moyeng eupša gape se re lokišeletša bakeng sa go ba le karolo ka mo go atlegilego kudu bodireding. Ka go ba ga rena babadi ba ikemišeditšego, re tla ba ba mafolofolo go neeng ba bangwe dimakasine.
3 Kamoo go ka Kaonefatšwago Mekgwa ya go Bala: Na o ka dira kaone go sepedišaneng le go bala ga gago dimakasine? Ditšhišinyo tše pedi tšeo di šomelago ba bantši šidi. (1) E-ba le thulaganyo ya ka mehla ya go bala. Ka go beela ka thoko gaešita le ka metsotso e 10 goba e 15 letšatši le lengwe le le lengwe o bala, o tla makatšwa ke go bona gore o ka bala go gontši gakaakang ka beke. (2) E-ba le tshepedišo ya go lota mohlala wa seo o se badilego. Mohlomongwe o ka bea leswao mathomong a sehlogo se sengwe le se sengwe seo o se balago. Ka ntle le se, o ka taboga go bala dihlogo tše dingwe goba gaešita le makasine ka moka. Ke gabohlokwa go hloma mokgwa wa ka mehla wa go bala wo o go šomelago gomme o o kgomarele.—Bapiša le Ba-Filipi 3:16.
4 “Molaki e a bôtêxaxo yo bohlale” o arabetše ka bohlale dinakong tše di fetogago ka go gatiša dihlogo tšeo di bolelago ka dinyakwa tša kgonthe tša batho. (Mat. 24:45) Ka kgonthe, dimakasine di kgomile maphelo a rena. Tekanyo ya tšwelopele ya rena ya moya e laolwa ka karolo e kgolo ke boemo bja rena bja mekgwa ya rena ya go bala ya pušo ya Modimo. Tšhegofatšo e humilego ya moya e boloketšwe bao ba iphago nako ya go bala dimakasine ka moka.