Na o a Gopola?

Na o ile wa thabela go bala ditokollo tša morago bjale tša Morokami? Ge e ba go le bjalo, o tla hwetša e le mo go kgahlišago go gopola tše di latelago:

▫ Ke ka baka la’ng dihlodi tša Isiraele di ile tša kgetha go dula ngwakong wa Rahaba wa seotswa?

Dihlodi tša Isiraele di be di phela ka Molao wa Modimo, ka gona ga se tša dula ngwakong wa Rahaba ka mabaka a boitshwaro bjo bo gobogilego. Mohlomongwe ba ile ba ipotša gore go ba ga bona ka ngwakong wa seotswa ga go bonale go be go tla tsoša pelaelo mo motseng. Gore ngwako wa gagwe o be o agilwe morakong wa motse go be go ka dira gore go phonyokga go be bonolo. Eupja ka godimo ga tšohle, Jehofa o ile a ba hlahla go ya go modiradibe yo pelo ya gagwe e bego e kgomilwe gabotse ke dipego tša ditirišano tša Modimo le ba-Isiraele moo a ilego a itshola le go fetola ditsela tša gagwe.—12/15, matlakala 24-5.

▫ Kgalefo e ka kgoma maphelo a rena bjang?

Dinyakišišo di bontšha gore kgalefo e tšweletša dihomoune tša kgateletšo. Go galefa o šoro ga leboelela go ka baka go se leka-lekane magareng ga dibopego tše di šireletšegilego le tše di lego kotsi tša cholesterol, gwa re bea kotsing ya bolwetši bja methapo ya pelo le madi.—12/15, letlakala 32.

▫ Ke ditšhišinyo dife tše di tlago go re thuša go oketša go aba ga rena dimakasine tša Morokami le Phafoga!?

Kgomega ka Morokami le Phafoga!; boloka thero e le e bonolo; e-ba yo a feto-fetogago ka go lokišetša dithero tše sego kae tše kopana; ipeele pakane.—1/1, matlakala 24-5.

▫ Ke ka baka la’ng Moše e le mohlala o mobotse kudu wa motho wa pušo ya Modimo bakeng sa rena go ka o latela?

Moše o ile a tsoma tlhahlo ya Jehofa ditabeng. O be a sa inyakele botumo bja gagwe ka noši, eupja o be a kgomega ka letago la Jehofa. O be a e-na le tumelo e tiilego, gomme le ka mohla ga se a ka a lebala gore Jehofa e be e le Mmuši wa kgonthe wa setšhaba sa Isiraele.—1/15, letlakala 11.

▫ Ke ditsela dife tše dingwe tšeo ka tšona thuto ya Modimo e fenyago?

Thuto ya Modimo e fenya ka go nea batho ba Jehofa kwešišo ye e tšwelago pele ya therešo. E tliša batho seetšeng sa moya gomme e laetša ba ikokobeditšego kamoo ba ka rapelago Modimo “ka môya le ka xo rereša.” (Johane 4:24) Thuto ya Modimo gape e fenya diteko le lefase le kgopo.—2/1, matlakala 10-12.

▫ Senotlelo sa go nea keletšo ka mo go atlegilego ke sefe?

Senotlelo ke tlhompho e swanetšego bakeng sa motho yo mongwe le tshwanelo ya gagwe ya go swarwa ka mokgwa wa seriti. Ka gona, moeletši wa Mokriste o swanetše go ba yo botho le yo a tiilego eupja a apeše moamogedi ka seriti.—2/1, letlakala 28.

▫ Go tlile bjang gore Kereke ya Roma Katholika e amogele Thotogelo ya Maria bjalo ka thuto ya kereke?

Makgolong a pele a nywaga ka morago ga lehu la Jesu, kgopolo ya go Rotogela ga Maria legodimong e be e sa tsebje ka mo go feletšego megopolong ya Bakriste. Lega go le bjalo, ka morago ga ge thuto ya Boraro botee e fetogile thuto ya semmušo ya kereke, Maria o ile a newa karolo ya bohlokwa ka mo go oketšegilego. Thuto ya Thotogelo ya Maria e be e sa amogelwe bjalo ka thuto ya kereke go ba go fihla ka November 1, 1950, ge Mopapa Pius XII a tsebiša gore: “Re e hlalosa e le thuto ya kereke ye e utolotšwego ke Modimo.”—Munificentissimus Deus.—2/15, matlakala 26-7.

▫ Go Jeremia kgaolo 24, ke’ng seo diroto tše pedi tša mago, e lego mago a mabotse le a mabe di se emelago?

Mago a mabotse a be a emela ba-Juda bao pele ba ilego ba išwa bothopja Babele, moo mašaledi a bego a tla boa gona a boela Juda. Mago a mabe a be a emela Kgoši Tsedekia le bao a bego a na le bona bao ba ilego ba rabela malebana le Kgoši Nebukadinetsara go sa šetšwe keno yeo ba bego ba e dirile ka leina la Modimo. Ka mo go swanago, mehleng yeno re hwetša mašaledi a Isiraele ya moya, ao a tšweleditšego dienywa tše di botse maphelong a ona ka go fapana le baruti ba Bojakane bao ba tšweleditšego dienywa tša go bola.—3/1, matlakala 14-16.

▫ Ma-Quartodeciman e be e le bomang, gomme ke ka baka la’ng e le ba ba kgahlišago go Bakriste lehono?

Ka morago ga mehla ya baapostola, go be go na le ba bangwe bao ba bego ba bina Selalelo sa Morena ka Nisani 14 ngwaga o mongwe le o mongwe, ba latela mohlala wa baapostola. Ba ile ba ba ba tsebja e le “Bo-ra-lesome-nne,” goba ma-Quartodeciman. Se ke se se kgahlišago lehono, ka gobane se bontšha gore gaešita le ka morago ga ge baapostola ba hwile, go be go e-na le ba bangwe bao ba ilego ba swara ka tsela e swanetšego ya go gopola lehu la Jesu gatee ka ngwaga ka Nisani 14.—3/15, matlakala 4-5.

▫ William Whiston e be e le mang?

E be e le moithuti yo bohlale wa lekgolong la bo-18 la nywaga kua Engelane, mogwera wa kgaufsi wa Mohlomphegi Isaac Newton. Whiston o fetoletše Mangwalo a Bakriste a Segerika, a ganetša phatlalatša thuto ya tumelo ya Boraro botee gomme e be e le mofahloši ka tša thuta-naledi le dipalo. Eupja Whiston mohlomongwe o gopolwa kudu ka go fetolela ga gagwe Seisemaneng mengwalo ya ra-dihistori wa mo-Juda Flavius Josephus.—3/15, matlakala 26-8.

▫ Motho o dirilwe bjang ka seswantšho sa Modimo? (Genesi 1:27)

Motho o bopilwe a e-na le bokgoni bja go diriša dika tše dikgolo tša Modimo tša lerato, toka, bohlale le matla—gotee le dika tše dingwe.—4/1, letlakala 25.