Ithabeleng go Jehofa!

“Thabang Moreneng ka mehla. Ke boêla ke re Thabang!”—BA-FILIPI 4:4.

1. Ke ka baka la’ng re ka ipotšiša seo Paulo a bego a se bolela ge a be a bolela gore Bakriste ba swanetše go thaba ka mehla?

MATŠATŠING a, mabaka a go thaba a ka bonala e le a sego nene kudu. Batho bao ba dirilwego ka lerole, gaešita le Bakriste ba kgonthe ba thulana le maemo ao a ba bakelago manyami—go hloka mošomo, go se ipshine mmeleng, lehu la baratiwa, mathata a dimelo goba kganetšo ye e tšwago go ditho tša lapa tšeo di sa dumelego goba bao e kilego ya ba bagwera. Ka gona re swanetše go kwešiša bjang kgothatšo ya Paulo ya gore, ‘Thabang ka mehla’? Ka baka la maemo ao a sa thabišego le ao a lekago ao ka moka ga rena re swanetšego go lebeletšana le ona, na se ruri se a kgonega? Go ahla-ahla taba yeo e dikologilego mantšu a go tla thuša go hlalosa taba.

Thabang—Ka Baka La’ng Gomme Bjang?

2, 3. Bohlokwa bja lethabo ke bofe bjalo ka ge go bontšhitšwe boemong bja Jesu le bja ba-Isiraele ba bogologolo?

² “Thabang Moreneng ka mehla. Ke boêla ke re Thabang!” Se se ka re gopotša mantšu ao a bego a lebišitšwe go ba-Isiraele nywaga-kgolong e 24 ye e fetilego: “Lethabo la Jehofa ke sebo sa lena,” (NW) goba go ya ka phetolelo ya Moffatt: “Go thabela Mosafelego ke matla a lena.” (Nehemia 8:10) Lethabo le nea matla gomme le swana le sebo seo motho a ka tšhabelago go sona bakeng sa khomotšo le tšhireletšo. Lethabo ke lona le ilego la thuša gaešita le monna yo a phethagetšego Jesu gore a kgotlelele. “E a kxôtleletšexo sefapanô, le xe se se bexo se mo loketše e le lethabô [“ka baka la lethabo leo le bego le beilwe ka pele ga gagwe,” NW], a dumêla xo xobošwa, a kxôna xo y’o dula ka letsoxong le letona la sedulô sa boxoši bya Modimo.” (Ba-Hebere 12:2) Ka mo go kwagalago, go kgona go thaba ge o lebeletšane le mathata go bohlokwa bakeng sa phološo.

³ Pele ga go tsena Nageng ya Kholofetšo, ba-Isiraele ba be ba ile ba laelwa gore: “O kxônê xo thabêla tše botse ka moka tše Morêna Modimo wa xaxo a Xo filexo tšôna, Ò na le ba lapá la xaxo, le Mo-Lefi le modiiledi e a lexo xa xeno.” Mafelelo a go palelwa ke go hlankela Jehofa ka lethabo e be e tla ba a šoro. “Dithoxô tšé ka moka di tlo Xo wêla tša Xo latêla, tša Xo swara, wa bá wa fêlêla, . . . molato e tlo ba xe O sa ka wa dirêla Morêna Modimo wa xaxo ka thabô le ka pelo e wilexo mola Ò sa atetšwe ke tše botse.”—Doiteronomio 26:11; 28:45-47.

4. Ke ka baka la’ng re ka palelwa ke go thaba?

⁴ Ka baka leo, go bohlokwa kudu gore mašaledi a batlotšwa a lehono le bagwera ba ona ba “dinku tše dingwê” ba thabe! (Johane 10:16) Paulo, ka go boeletša keletšo ya gagwe ye e rego, “ke boêla ke re Thabang,” o gateletše bohlokwa bja go thabela botse bjohle bjo Jehofa a re diretšego bjona. Na re a bo thabela? Goba na re swarega kudu modirong wa letšatši le letšatši wa bophelo mo ka dinako tše dingwe re lahlegelwago ke pono ya mabaka a mantši ao re nago le ona a go thaba? Na mathata a a kgobelana kudu mo e lego gore a šira pono ya rena ya Mmušo le ditšhegofatšo tša wona? Na re dumelela dilo tše dingwe—go se kwe melao ya Modimo, go hlokomologa melao ya motheo ya Modimo goba go hlokomologa mediro ya Bokriste—di re amoga lethabo la rena?

5. Ke ka baka la’ng motho yo a se nago teka-tekano a hwetša go le thata go thaba?

⁵ “Anke teka-tekano ya lena e tsebje ke batho bohle. Morena o kgaufsi.” (Ba-Filipi 4:5, NW) Motho yo a se nago teka-tekano ga a na tekanyetšo. Mo gongwe a ka ba a palelwa ke go hlokomela bophelo bja gagwe bjo bobotse ka tshwanelo, a bea mmele wa gagwe kgateletšong goba pelaelong ye e sa swanelago ka mo go sa nyakegego. Mohlomongwe ga se a ithuta go amogela go palelwa ga gagwe le go phela ka go dumelelana le seo. A ka ipeela dipakane tše di phagamego kudu gomme a leka go di fihlelela go sa šetšwe seo se ka mo tlelago. Goba mo gongwe a ka diriša mafokodi a gagwe e le seširelo sa go gogela morago goba go nyefiša matsogo. Ka go hloka tekanyetšo le go se be le teka-tekano, o hwetša go le thata go thaba.

6. (a) Ke’ng seo Bakriste-gotee le rena ba swanetšego go se bona go rena, gomme ke neng feela mo se se tlago go ba bjalo? (b) Mantšu a Paulo go 2 Ba-Korinthe 1:24 le Ba-Roma 14:4 a re thuša bjang go ba ba leka-lekanego?

⁶ Gaešita lege baganetši ba re lebelela re le batho ba ba fišegelago thoko, fela Bakriste-gotee le rena ka mehla ba swanetše go kgona go bona go ba ga rena le teka-tekano. Le gona ba tla kgona go dira bjalo ge e ba re e-na le tekanyetšo gomme re sa letele go phethagala go rena ka noši goba go ba bangwe. Godimo ga tšohle, re swanetše go efoga go rweša ba bangwe merwalo yeo e fetelago ka kua ga seo Lentšu la Modimo le se nyakago. Moapostola Paulo o itše: “Xa se xo re re babuši ba tumêlô; ké xo re re badiriši ba lethabô la lena.” (2 Ba-Korinthe 1:24) Bjalo ka yo e kilego ya ba Mofarisei, Paulo o be a tseba gabotse gore melao e thata yeo e hlamilwego le go newa ke bao ba lego matleng a taolo e kgameletša lethabo, mola ditšhišinyo tše di thušago tšeo di newago ke badiri-gotee di le oketša. Therešo ya gore “Morêna ó kxaufsi” e swanetše go gopotša motho yo a nago le teka-tekano gore ‘ga se ra swanela go ahlola molata wa e mong. Ge a ema o emela Mong wa gagwe; ge a e-wa o wela Mong wa gagwe.’—Ba-Roma 14:4.

7, 8. Ke ka baka la’ng Bakriste ba swanetše go letela go ba le mathata, eupja go kgonega bjang gore ba tšwele pele ba thabile?

⁷ “A Le se kê la belaêla selô. Mo xo kaxo ba le tše Le di nyakaxo, Le di tlišê pele xa Modimo ka kxopêlô le ka thapêlô e naxo le teboxô.” (Ba-Filipi 4:6) Lehono re feta gare ga ‘mehla e thata’ yeo Paulo a ngwadilego ka yona. (2 Timotheo 3:1-5) Ka gona Bakriste ba swanetše go letela go lebeletšana le mathata. Mantšu a Paulo a a rego ‘thabang ka mehla’ ga a phaele ka thoko kgonagalo ya gore Mokriste yo a botegago ka dinako tše dingwe a ka hlaselwa ke go nolega moko goba go nyama. Tabeng ya Paulo ka noši, o ile a dumela ka potego gore: “Re dikilwe thokô tšohle, ’me xa re pitlaxanywe. Re a phoraphora, ’me xa re xakanexe. Re a tlaišwa, ’me xa r’a lahlêxa. Re dixêlwa fase, ’me xa re senyexe.” (2 Ba-Korinthe 4:8, 9) Lega go le bjalo, lethabo la Mokriste le fokotša mabaka a nakwana a go belaela le manyami gomme mafelelong la a fenya. Le nea matla a nyakegago bakeng sa go dula re gatela pele, le ka mohla re sa lahlegelwe ke pono ya mabaka a mantši a go thaba.

⁸ Ge mathata a rotoga, go sa šetšwe gore ke a mohuta ofe, Mokriste yo a thabilego ka boikokobetšo o kgopela thušo ya Jehofa ka thapelo. Ga a ineele pelaelong e feteletšego. Ka morago ga go dira seo yena ka mo go kwagalago a ka se kgonago go rarolla bothata, o tlogela mafelelo diatleng tša Jehofa ka go dumelelana le taletšo ye e rego: “Lahlêla Morêna morwalô wa xaxo; Yêna ó tlo Xo babalêla.” Ge go sa dutše go le bjalo, Mokriste o tšwela pele go leboga Jehofa bakeng sa go loka ga Gagwe ka moka.—Psalme 55:22; bona gape le Mateo 6:25-34.

9. Tsebo ya therešo e nea bjang khutšo ya monagano, gomme ke mafelelo afe a mabotse ao se se nago le ona go Mokriste?

⁹ “Khutšô ya Modimo, ye e fetaxo thlaoloxanyô yohle, a e boloke dipelo tša lena le ’kxopolô tša lena xo Kriste Jesu.” (Ba-Filipi 4:7) Tsebo ya therešo ya Beibele e lokolla monagano wa Mokriste maakeng gomme ya mo thuša go hlagolela mekgwa ya go nagana ye e phedilego. (2 Timotheo 1:13) Ka go rialo o thušwa go phema boitshwaro bjo bo fošagetšego goba bja bošilo bjo bo ka beago ditswalano tša khutšo le ba bangwe kotsing. Go e na le go ferekanywa ke go hloka toka le bokgopo, o bea kholofelo ya gagwe go Jehofa bakeng sa go rarolla mathata a batho ka Mmušo. Khutšo e bjalo ya monagano e diša pelo ya gagwe, e boloka maikemišetšo a gagwe a sekile, gomme ya hlahla go nagana ga gagwe ka tsela ya toko. Maikemišetšo a sekilego le tsela e nepagetšego ya go nagana le tšona di nea mabaka a mantši kudu bakeng sa go thaba, go sa šetšwe mathata le dikgateletšo tšeo di tlišwago ke lefase la mojano.

10. Lethabo la kgonthe le ka hwetšwa feela ka go bolela le go nagana ka eng?

¹⁰ “Bana bešo! Ke fetša ka xo re: Išang mexopolô le tše e lexo therešô, le tše e lexo bokwala, le tše e lexo tokô, le tše e lexo pelo-thereši, le tše di yaxo ka leratô, tša tumô e botse, tše e lexo boló, tše di kaxo ratiwa, e bê tšôna Le di naxanaxo.” (Ba-Filipi 4:8) Mokriste ga a thabišwe ke go bolela goba go nagana ka dilo tše mpe. Se ka bosona se lahla bontši bja boithabišo bjo lefase le bo neago. Ga go na motho yo a ka kgomarelago lethabo la Bokriste ge e ba a tlatša monagano wa gagwe le pelo ka maaka, metlae ya bošilo gotee le ditaba tše di sa lokago, tše di gobogilego tšeo di se nago bokwala, tša lehloyo le tšeo e lego makgapa. Ge go bolelwa ka go se pepetletše, ga go na motho yo a ka hwetšago lethabo la kgonthe ka go tlatša monagano wa gagwe le pelo ka ditšhila. Lefaseng le le bodilego la Sathane, ke mo go kgothatšago gakaakang go tseba gore Bakriste ba na le dilo tše dintši kudu tše di botse tše ba ka naganago ka tšona le go boledišana ka tšona!

Mabaka a Mantši-ntši a go Thaba

11. (a) Ke’ng seo se sa swanelago go tšewa gabohwefo, gomme ka baka la’ng? (b) Ke mafelelo afe ao go ba gona kopanong ya ditšhaba-tšhaba go bilego le ona go moemedi yo mongwe le mosadi wa gagwe?

¹¹ Ge re bolela ka mabaka a go thaba, anke re se ke ra lebala borwarre bja rena bja ditšhaba-tšhaba. (1 Petro 2:17) Gaešita lege ditšhaba tša lefase le dihlopha tša merafo di bontšha go hloyana mo gogolo, fela batho ba Modimo ba batamelana kgaufsi ka lerato. Botee bja bona bo bonala ka mo go kgethegilego dikopanong tša ditšhaba-tšhaba. Mabapi le yeo e bego e swerwe ka 1993 kua Kiev, Ukraine, moemedi yo a tšwago United States o ngwadile gore: “Megokgo ya lethabo, mahlo a phadimago, go gokarelana mo go tšwelago pele mo go swanago le ga lapa le ditumedišo tše romelwago ka mošola wa lebala la dipapadi ke dihlopha tšeo di tšokotšago disamporele tša mebala-bala le disakatuku ka ntle le pelaelo e be e le bohlatse bja botee bja pušo ya Modimo. Dipelo tša rena di phophoma ka boikgantšho mabapi le seo Jehofa a se phethilego ka mohlolo ka borwarre bja lefase ka bophara. Se se ile sa kgoma nna le mosadi wa-ka ka mo go tseneletšego gomme se tlaleleditše morero o mofsa tumelong ya rena.”

12. Jesaya 60:22 e phethagala bjang pele ga mahlo a rena?

¹² Ke mo go matlafatšago tumelo gakaakang go Bakriste lehono go bona diporofeto tša Beibele di phethagala pele ga mahlo a bona ka noši! Ka mohlala, ela hloko mantšu a Jesaya 60:22: “E monyenyane ó tlo tšwa ba sekete; ’me mmôtlana ó tlo tšwa ’thšaba se matla. Ké Nna Morêna e ke tl’o xo dira tšeo ka pelá lebakeng la xôna.” Ge Mmušo o be o tswalwa ka 1914, go be go e-na le ba 5 100 feela—ba yo monyenyane—bao ba bego ba bolela ka mafolofolo. Eupja nywageng e mehlano e fetilego, bogolo bja borwarre bja lefase ka bophara bo be bo dutše bo oketšega ka tekanyo ya palogare ya Dihlatse tše 5 628 tše di sa tšwago go kolobetšwa beke e nngwe le e nngwe! Ka 1993, tlhora ya badiredi ba mafolofolo ba 4 709 889 e ile ya fihlelelwa. Anke o nagane feela ka seo! Se se bolela gore “e monyenyane” wa 1914 o kgaufsi le go ba “ba sekete” e le ka kgonthe!

13. (a) Ke’ng seo se bego se dutše se direga ga e sa le go tloga ka 1914? (b) Dihlatse tša Jehofa di kwa bjang molao wa motheo wa mantšu a Paulo go 2 Ba-Korinthe 9:7?

¹³ Ga e sa le go tloga ka 1914 Kgoši yeo e lego Mesia e ile ya tšwa dira bakeng sa go fenya gare ga manaba a yona. Pušo ya yona e ile ya thekgwa ke balatedi ba ratago bao e lego batho bao ba neelago nako, matla le tšhelete bakeng sa go tšwetša pele modiro wa boboledi wa lefase ka bophara gotee le lesolo la go aga la ditšhaba-tšhaba. (Psalme 110:2, 3) Dihlatse tša Jehofa di thabela gore meneelo ya tša ditšhelete e a neelwa bakeng sa go phetha mediro ye, gaešita lege tšhelete e bolelwa ka sewelo dibokeng tša tšona.a (Bapiša le 1 Koronika 29:9.) Bakriste ba therešo ga ba swanelwe ke go gapeletšwa gore ba nee; ba go lebelela e le tokelo go thekga Kgoši ya bona go ya tekanyong yeo maemo a bo-na a ba dumelelago, yo mongwe le yo mongwe “[o ntšha] ka mo a kwanexo le pelo ya xaxwe; a se nthše ka xo belaêla le ka xo xapeletšwa.”—2 Ba-Korinthe 9:7.

14. Ke maemo afe gare ga batho ba Modimo ao a thomilego go ba molaleng ga e sa le go tloga ka 1919, e lego ao a ba neago lebaka lefe la go thaba?

¹⁴ Tsošološo yeo e boletšwego e sa le pele ya borapedi bja therešo gare ga batho ba Modimo e ile ya feleletša ka go bopja ga paradeise ya moya. Ga e sa le go tloga ka 1919 e ile ya katološa mellwane ya yona ka mo go tšwelago pele. (Psalme 14:7; Jesaya 52:9, 10) Mafelelo e bile afe? Bakriste ba therešo ba na le ‘tlhalalo le lethabo.’ (Jesaya 51:11) Dienywa tše dibotse tšeo di tšwelelago ka baka la seo ke bohlatse bja seo moya o mokgethwa wa Modimo o kgonago go se phetha ka batho ba ba sa phethagalago. Tumišo ka moka le kgodišo di ya go Jehofa, eupja ke tokelo efe yeo e ka fetago ya go ba badirišani ba Modimo? (1 Ba-Korinthe 3:9) Jehofa ke yo matla ka mo go lekanego go ka dira gore ge e ba go nyakega mafsika a goeletše melaetša ya therešo. Lega go le bjalo, o ile a bona go swanela gore a se ke a retologela mokgweng wo, eupja go e na le moo a tutuetše dibopiwa tše di ratago tšeo di dirilwego ka lerole gore di phethagatše thato ya gagwe.—Luka 19:40.

15. (a) Ke ditiragalo dife tša mehleng yeno tšeo re di latelago ka kgahlego? (b) Ke tiragalo efe yeo re e letetšego ka lethabo?

¹⁵ Bahlanka ba Jehofa mo nakong ye ba lebelela ditiragalo tša lefase ge di dutše di tswalana le diporofeto tše di šetšego tša Beibele e le ba ba tletšego poifo. Ditšhaba di leka ka thata—eupja ka ntle le go atlega—go fihlelela khutšo ye e tsepamego. Ditiragalo di di gapeletša go kgopela mokgatlo wa Ditšhaba tše Kopanego gore o gate mogato mafelong a lefase ao a nago le meferefere. (Kutollo 13:15-17) Go sa le bjalo, batho ba Modimo ba šetše ba lebeletše pele ka tetelo-kgolo go e nngwe ya ditiragalo tše di thabišago kudu tšeo di tlago go direga, e lego yeo e batamelago kgaufsi letšatši le letšatši. “A re thabeng, re hlalaleng, re mo reteng, xobane monyanya wa tšeô ya Kwana o tlile, monyalwa wa xaxwe ó thšephile.”—Kutollo 19:7.

Boboledi—Na ke Morwalo Goba Lethabo?

16. Bontšha kamoo go palelwa ke go diriša seo a ithutilego sona go ka amogago Mokriste lethabo la gagwe.

¹⁶ “Le dirê tše Le di rutilwexo la di amoxêla, la kwa tšôna; tše Le di bonexo nna kè di dira, dirang tšôna; xomme Modimo wa khutšô ó tlo ba le lena.” (Ba-Filipi 4:9) Bakriste ka go diriša seo ba ithutilego sona ba ka letela go amogela tšhegofatšo ya Modimo. Se sengwe sa dilo tše bohlokwa kudu tšeo ba ithutilego tšona ke go nyakega ga go bolela ditaba tše di lokilego go ba bangwe. Ka kgonthe, ke mang yo a ka thabelago khutšo ya monagano goba a thaba ge e ba a tima batho ba dipelo tše di botegago tsebišo, e lego bao maphelo a bona ka noši a ithekgilego ka go e kwa?—Hesekiele 3:17-21; 1 Ba-Korinthe 9:16; 1 Timotheo 4:16.

17. Ke ka baka la’ng modiro wa rena wa go bolela ka mehla e swanetše go ba mothopo wa lethabo?

¹⁷ Ke mo go thabišago gakaakang go hwetša batho ba ba swanago le dinku ba ba ikemišeditšego go ithuta ka Jehofa! Ka kgonthe, bao ba hlankelago ka maikemišetšo a mabotse ka mehla ba tla hwetša tirelo ya Mmušo e le mothopo wa lethabo. Se ke ka baka la gore lebaka le legolo la go ba Hlatse ya Jehofa ke go tumiša leina la Gagwe le go thekga boemo bja Gagwe bjalo ka Mmuši yo a Phagamego. (1 Koronika 16:31) Motho yo a lemogago therešo ye o tla thaba gaešita lege batho ka tsela yeo e sego ya bohlale ba gana ditaba tše di lokilego tšeo a di tlišago. O a tseba gore go bolela le batho ba ba sa dumelego ka letšatši le lengwe go tla fela; go tumiša leina la Jehofa go tla tšwela pele ka mo go sa felego.

18. Ke’ng seo se tutueletšago Mokriste gore a dire thato ya Jehofa?

¹⁸ Bodumedi bja therešo bo tutueletša bao ba bo dirišago go dira dilo tše di nyakwago ke Jehofa, e sego ka baka la gore ba swanetše go dira bjalo, eupja ka baka la gore ba rata go dira bjalo. (Psalme 40:8; Johane 4:34) Batho ba bantši ba hwetša se go le thata go se kwešiša. Mosadi yo mongwe o kile a botša Hlatse yeo e bego e mo etetše gore: “O a tseba, ke swanetše go go reta. Nna le ka mohla nka se ye ka ntlo le ntlo ke bolela ka bodumedi bja-ka bjalo ka ge wena o dira.” Hlatse e ile ya araba ka go nywanywa ya re: “Ke kwešiša kamoo o ikwago ka gona. Pele ke e ba yo mongwe wa Dihlatse tša Jehofa, o be o ka se ntire gore ke ye go batho ba bangwe bakeng sa go bolela ka bodumedi. Eupja ga bjale ke a rata.” Mosadi o ile a nagana ka nakwana gomme ka morago a phetha ka gore: “Go molaleng gore bodumedi bja lena bo na le se sengwe seo bo ka se neago seo bja-ka bo se nago sona. Mohlomongwe ke swanetše go nyakišiša.”

19. Ke ka baka la’ng bjale e le nako ya go thaba go feta lege e le neng pele?

¹⁹ Temana ya ngwaga ya 1994, yeo e beilwego ka mo go bonagalago ka Diholong tša rena tša Mmušo, ka mehla e re gopotša gore: “Bota Jehofa ka pelo ya gago ka moka.” (Diema 3:5, PK) Na go ka ba le lebaka le legolo la go thaba le le fetago go bota ga rena Jehofa, sebo sa rena seo re khutago ka sona? Psalme 64:10 e a hlalosa: “Moloki ó tlo ithabêla Moreneng, a khuta ka Yêna.” Ye ga se nako ya go tekema goba go langwa. Kgwedi e nngwe le e nngwe ye e fetago e re batametša kgaufsi kudu le boemo bja kgonthe bja seo bahlanka ba Jehofa ba ilego ba hlologela go se bona ga e sa le go tloga mehleng ya Abele. Bjale ke nako ya go bota Jehofa ka pelo ya rena ka moka, re tseba gore le ka mohla ga se ra ka ra ba le mabaka a mantši gakaakaa a go thaba!

[Mongwalo wa tlase]

O be o tla Araba Bjang?

◻ Go ya ka Nehemia 8:10, ke ka baka la’ng re swanetše go thaba?

◻ Doiteronomio 26:11 le 28:45-47 di bontšha bjang bohlokwa bja go thaba?

◻ Ba-Filipi 4:4-9 e ka re thuša bjang go thaba ka mehla?

◻ Temana ya ngwaga ya 1994 e re nea lebaka lefe la go thaba?

[Seswantšho go letlakala 16]

Dihlatse tša ma-Russia le tša Majeremane di thabela go ba karolo ya borwarre bja ditšhaba-tšhaba

[Seswantšho go letlakala 17]

Go abelana therešo le ba bangwe ke lebaka la go thaba