Bagoeledi ba Mmušo ba a Bega

Lentšu la Modimo le na le Matla

“LENTŠU la Modimo ké le le phelaxo, ké le matla.” (Ba-Hebere 4:12) Mantšu a a itlhatsetše e le a therešo ka makga a mantši kudu ge batho bao ba bego ba forilwe ke bodumedi bja maaka ba utollelwa ditherešo tša Beibele. Bjalo ka ge go bontšhitšwe phihlelong ye e latelago e tšwago Repabliking ya Dominican, matla a Beibele a ka fetola maphelo a batho gomme a nea kholofelo.

Dihlatse tša Jehofa di ile tša etela mosadi yo a tumilego wa Mokatholika yo a bego a sa tšwa go lahlegelwa ke bana ba babedi ba banyenyane lehung. O be a tshwenyegile ka mo go nyamišago gomme a llela masetlapelo a gagwe letšatši le lengwe le le lengwe. Dihlatse di ile tša mmontšha seo Beibele e se bolelago go Johane 5:28, 29 ka kholofelo ya tsogo. Ka morago ga dipoledišano tše oketšegilego le Dihlatse, ga se a hwetša feela khomotšo kholofelong ya tsogo eupja o ile a lemoga gore baetapele ba gagwe ba bodumedi bja Makatholika ba be ba mo fora.

Ga se a dika-dika go tlogela Kereke ya Katholika gomme a amogela thuto ya ka mehla ya Beibele le Dihlatse tša Jehofa. Lega go le bjalo, monna wa gagwe ga se a ka a dumelelana le dikgopolo tša gagwe. Ka ge le yena e be e le Mokatholika yo a tumilego kudu, o ile a rulaganyetša gore bagwera ba tumilego ka tša bopolitiki le tša bodumedi ba etele mosadi wa gagwe ka boiteko bja go mo tlogediša tsela ya gagwe le go mmušetša Bokatholikeng. Ka morago o ile a mo tšhošetša ka tlhalo, boemong bjo bongwe a bile a tsebiša metswalo ya gagwe le ditho-gotee le yena tša kereke gore ba be ba yo hlalana.

Eupja maano a gagwe ga se a šoma. Ka mo go fapanego, o ile a ba yo a ikemišeditšego ka mo go oketšegilego go tšwetša pele dithuto tša gagwe tša Beibele. Ka baka la kgolo ya gagwe ya moya le go hlagolela ga gagwe dika tše botse tša Bokriste, monna o ile a ikemišetša go dula le yena go e-na le go tsoma go hlala. Ka letšatši le lengwe le yena o ile a dumela go hlahloba dipuku tša Beibele tšeo mosadi a bego a ithuta tšona—eupja boemong bjo botee. O ile a nyaka go diriša phetolelo ya Beibele ya gagwe ka noši ya Katholika.

Seo se ilego sa mo makatša ke gore ka thušo ya dipuku tše di tšwago go Dihlatse tša Jehofa, o ile a thoma go ithuta dilo tše difsa go tšwa Beibeleng ya gagwe ka noši ka go lebanya. O ile a lemoga gore mosadi wa gagwe o be a kgethile tsela e nepagetšego gomme kgaufsinyane o be a ikemišeditše go latela mohlala wa gagwe. Ka kgonthe, o ile a bona go nyakega ga go dira diphetogo bophelong bja gagwe ka noši. Tlhohlo e nnoši e thata e be e le go lesa mokgwa wa gagwe wa go kgoga sekerete. Ka morago ga go bala tokollo ya makasine wa Awake! ya July 8, 1989, wo o nago le sehlogo sa letlakala la ka ntle se se rego “Lehu le a Rekišwa—Ditsela tše Lesome tša go Kgaotša go Kgoga,” o ile a ikemišetša go tlogela mokgwa wo wo e sego wa mangwalo. Legatong la pakana e tlwaetšwego ya disekerete yeo e bego e hwetšwa gantši ka potleng ya gagwe, o ile a thoma go swara tokollo yeo ya Awake! Nako e nngwe le e nngwe ge a be a hlohleletšega gore a kgoge o be a bala dihlogo tše di lego mabapi le go kgoga. Mokgwa wo o ile wa šoma! Ka morago ga go bala dihlogo ka dinako tše dintši, o ile a kgona go kgaotša go kgoga.

Lehono monna le mosadi ka bobedi ba hlankela Jehofa e le badiredi ba ba kolobeditšwego. Ge maemo a dumela, o hlankela bjalo ka modiredi wa nako e tletšego a gafela nako ya gagwe e ntši boboleding bja ditaba tše di lokilego tša Mmušo wa Modimo gomme o hlankela bjalo ka mohlanka wa bodiredi phuthegong ya lefelong la gabo ya Dihlatse tša Jehofa. Yena le mosadi wa gagwe ba lebeletše pele tsogong moo ba tlago go kgona go amogela bana ba bona ba boetše ba phela lefaseng le lefsa. Ee, Lentšu la Modimo Beibele, ke le le phelago gomme le na le matla!