Anke Bohle Ba Tumiše Jehofa!

“Lena ba bohlabatšatši, godišang Jehofa.”—JESAYA 24:15, PK.

1. Leina la Jehofa le be le lebelelwa bjang ke baporofeta ba gagwe, gomme seo se fapana le kgopolo efe yeo e lego Bojakaneng lehono?

JEHOFA—leina le le hlomphegago la Modimo! Baporofeta ba ba botegago ba kgale ba ile ba thabišwa gakaakang ke go bolela ka leina leo! Ba ile ba tumiša Morena wa bona yo a Phagamego Jehofa, yo leina la gagwe le mo hlaolago e le Mophethi yo Mogolo wa Merero. (Jesaya 40:5; Jeremia 10:6, 10; Hesekiele 36:23) Gaešita le bao go thwego ke baporofeta ba banyenyane ba be ba thabišwa kudu ke go tumiša Jehofa. Yo mongwe wa bona e be e le Hagai. Leina la Modimo le dirišwa ka makga a 35 ka pukung ya Hagai yeo e bopšago ke ditemana tše 38 feela. Boporofeta bjo bjalo bo kwagala bo se na mohola ge leina le bohlokwa la Jehofa le tšeelwa sebaka ke sereto sa “Morena,” go etša ge baapostola ba ba ikgodišago ba Bojakane ba le fetolela diphetolelong tša bona tša Beibele.—Bapiša le 2 Ba-Korinthe 11:5.

2, 3. (a) Boporofeta bjo bongwe bjo bo lemogegago bjo bo lego mabapi le tsošološo ya Isiraele bo ile bja phethagala bjang? (b) Mašaledi a ba-Juda le bagwera ba ona ba ile ba kopanela lethabong lefe?

² Go Jesaya 12:2, go dirišwa dibopego tše pedi tša leina.a Moporofeta o goeletša ka gore: “Ka kxonthe, Mophološi wa-ka ké Modimo; byale ke a holofêla, xa ke sa boifa; xobane matla a-ka le sefela sa-ka ké [Jah Jehofa, NW]. Ké Yêna a mphološitšexo.” (Bona gape le Jesaya 26:4.) Ka go rialo nywaga e ka bago 200 pele Isiraele e lokollwa bothopšeng bja Babele, Jah Jehofa o be a nea kgonthišetšo ka moporofeta wa gagwe Jesaya ya gore e be e le Mophološi wa bona yo matla. Bothopša bjoo bo be bo tla tšea lebaka la go tloga go 607 go ya go 537 B.C.E. Jesaya o ngwadile gape gore: “Nna Jehofa, ke Yo a dirilego tšohle; . . . Yo ke rago Korese ka re: Ke modiši wa-ka! e a tlogo go phetha tše di nkgahlago ka moka; Yo gape ke rego go Jerusalema: Agiwa! le go Tempele: Theiwa!” Korese yo e be e le mang? Ka mo go makatšago, o itlhatsetše e le Kgoši Korese wa Peresia yo a ilego a fenya Babele ka 539 B.C.E.—Jesaya 44:24, 28, PK.

³ Ka go dumelelana le mantšu a Jehofa ao a begilwego ke Jesaya, Korese o ile a ntšha taelo e yago go Isiraele e thopilwego gore: “Byale mang le mang yo e lexo wa sethšaba sa xaxwe, a Modimo wa xaxwe a bê le yêna, a rotoxêlê Jerusalêma kwa naxeng ya Juda, a axê Ngwakô wa Morêna Modimo wa Isiraele, Yêna Modimo wa Jerusalêma.” Mašaledi a ba-Juda ao a thabilego kudu gotee le ba-Nethinime bao e sego ba-Isiraele le barwa ba bahlanka ba Salomo ba ile ba boela Jerusalema. Ba ile ba fihla ka nako bakeng sa go bina Monyanya wa Mešaša ka 537 B.C.E. le go direla Jehofa dihlabelo aletareng ya gagwe. Ngwaga o latetšego ka kgwedi ya bobedi, ba ile ba thea motheo wa tempele ya bobedi, gare ga legowa le legolo la lethabo le la go tumiša Jehofa.—Esera 1:1-4; 2:1, 2, 43, 55; 3:1-6, 8, 10-13.

4. Jesaya dikgaolo 35 le 55 di ile tša phethagala bjang?

⁴ Boporofeta bja Jehofa bja tsošološo bo be bo swanetše go phethagatšwa ka mo go kgahlišago go Isiraele: “A xo thabê lešoka le naxa ye e omilexo; le lehanata a le hlalalê, le taxê byalo ka letšoba. . . . Batho ba tlo bôna letaxo la Morêna le bothšepi bya Modimo wa rena.” “Le tlo tšwa ka go thaba, le sepedišwe ka khutšo; dithaba le meboto di tlo hlalala pele ga lena, . . . Seo e tlo ba tumišo go Jehofa le pontšho e ka se kego ya fedišwa le ka go sa felego.”—Jesaya 35:1, 2; 55:12, 13, PK.

5. Ke ka baka la’ng lethabo la Isiraele e be e le la nakwana?

⁵ Lega go le bjalo, lethabo leo e be e le la nakwana. Batho ba tikologong ba ile ba tsoma go dira kgwerano ya go tswaka tumelo bakeng sa go aga tempele. Mathomong ba-Juda ba ile ba ema ba tiile, ba tsebatša gore: “Xo axêla Modimo wa rena ngwakô o tee le lena xa xo kxônexe. Re tlo axa re nnoši Ngwakô wó wa Morêna Modimo wa rena, ka mo re laetšwexo ke Korese kxoši ya Peresia.” Baagišani bao bjale e ile ya ba baganetši ba ba tletšego bonaba. Ba ile ba ‘rephiša matsogo a setšhaba sa ba-Juda, ba ba šitiša go aga ka go ba tšhoša.’ Ba ile ba ba ba bolela boemo gampe go mohlatlami wa Korese, e lego Arithasasitha yo a ilego a ntšha thibelo go agweng ga tempele. (Esera 4:1-24) Modiro o ile wa kgaotša ka nywaga e 17. Ka mo go nyamišago, ba-Juda ba ile ba wela tseleng ya bophelo bja go rata dilo tše di bonagalago ka nako yeo.

“Jehofa wa Madira” o a Bolela

6. (a) Jehofa o ile a arabela bjang boemong bja Isiraele? (b) Ke ka baka la’ng seo go bonalago e le tlhaloso ya leina la Hagai e le se se swanetšego?

⁶ Lega go le bjalo, Jehofa o ile a bontšha ‘matla a gagwe’ legatong la Isiraele ka go romela baporofeta ba gagwe, bao ba tsebegago kudu e le Hagai le Sakaria, go phafošetša ba-Juda boikarabelo bja bona. Leina la Hagai le kgokagana le monyanya, ka gobane go bonala le bolela “Go Belegwa ka Monyanya.” Ka mo go swanetšego, o ile a thoma go porofeta letšatšing la pele la kgwedi ya Monyanya wa Mešaša, nakong yeo ka yona ba-Juda ba ilego ba laelwa gore ba ‘fele ba ithabela.’ (Doiteronomio 16:15) Jehofa o ile a fetiša melaetša e mene ka Hagai ka lebaka la matšatši a 112.—Hagai 1:1; 2:1, 10, 20.

7. Mantšu a matseno a Hagai a swanetše go re kgothatša bjang?

⁷ Ge a rola boporofeta bja gagwe, Hagai o itše: “Se ke seo Jehofa wa madira a se boletšego.” (Hagai 1:2a, NW) “Madira” ao e ka ba e le bomang? Ke mašaba a Jehofa a barongwa, ka dinako tše dingwe a bitšwa ka Beibeleng e le madira a tša bohlabani. (Jobo 1:6; 2:1; Psalme 103:20, 21; Mateo 26:53) Na ga go re kgothatše lehono gore Morena yo a Phagamego Jehofa ka boyena o diriša madira a a sa fenywego a legodimong bakeng sa go hlahla modiro wa rena wa go tsošološa borapedi bja therešo lefaseng?—Bapiša le 2 Dikxoši 6:15-17.

8. Ke pono efe yeo e bego e kgomile Isiraele, gomme ka mafelelo afe?

⁸ Moko wa molaetša wa mathomo wa Hagai e be e le ofe? Batho ba be ba itše: “Lebaka la xo axa Ntlo ya Morêna xa le ešo la fihla.” Ba be ba se sa hlwa ba tshwenyega kudu ka go agwa ga tempele yeo e bego e emela go tsošološwa ga borapedi bja Modimo. Ba be ba retologetše go ikageleng magae a sešate. Pono ya go rata dilo tše di bonagalago e be e fokoditše go fišegela ga bona borapedi bja Jehofa. Ka baka leo, tšhegofatšo ya gagwe e be e tlošitšwe. Mašemo a bona a be a se sa tšweletša gomme ba be ba hloka diaparo bakeng sa nako e šoro ya marega. Ditseno tša bona di be di se nene, gomme go be go le bjalo ka ge eka ba be ba tsenya tšhelete ka mokotleng wo o tletšego mašoba.—Hagai 1:2b-6.

9. Ke temošo efe e matla le e agago yeo Jehofa a ilego a e nea?

⁹ Ka makga a mabedi, Jehofa o neile temošo e matla ka gore: “Hlôkômêlang ditsela tša lena.” Go bonala Serubabele mmuši wa Jerusalema le moperisita yo mogolo Jošuab ba ile ba arabela gomme ba kgothaletša batho ka moka ka sebete “[go] theetša Lentšu la Morêna Modimo wa bôná, le tše a di boletšexo ka moporofeta Hagai, ka mo Morêna Modimo wa bôná a bexo a mo laetše. Xomme sethšaba sa boifa Modimo.” Go oketša moo, “Hagai motseta wa Morêna a botša sethšaba malaeledi a Morêna a re: Morêna ó re: Ke na le lena!”—Hagai 1:5, 7-14.

10. Jehofa o ile a diriša matla a gagwe bjang legatong la Isiraele?

¹⁰ Badudi ba bangwe ba kgale ba Jerusalema ba ka ba ba ile ba nagana gore letago la tempele e tsošološitšwego e be e tla ba “è se selô” ge le bapišwa le la tempele ya pele. Lega go le bjalo, mo e ka bago matšatšing a 51 ka morago Jehofa o ile a tutueletša Hagai go tsebatša molaetša wa bobedi. O ile a tsebatša gore: “Wene Serubabele, tia matla!—Ó r’yalo Morêna.—Le wene Jošua morwa wa Jotsadaka moperisita e moxolo, tia matla! Le lena sethšaba ka moka sa naxa, tiang matla! Dirang xobane ke na le lena.—Ó r’yalo Morêna wa mašaba. . . . Se boifeng!” Jehofa yo ka nako e swanetšego a bego a tla diriša matla a gagwe a magolo bakeng sa “xo šišinya lexodimo le lefase,” o ile a kgonthišetša gore kganetšo ka moka gaešita le thibelo ya mmuši di a fenywa. Ka nywaga e mehlano feela, go agwa ga tempele go ile gwa fetšwa ka katlego e kgolo.—Hagai 2:3-6.

11. Modimo o ile a tlatša bjang tempele ya bobedi ka ‘letago le legolo’?

¹¹ Kholofetšo e makatšago e ile ya phethagatšwa ka nako yeo e rego: “Xwa tseb’o tla matsaka a dithšaba ka moka; ’me Ntlo yé ke tlo e tlatša letaxô.—Ó r’yalo Morêna wa mašaba.” (Hagai 2:7) “Matsaka” ao a ipontšhitše e le bao e sego ba-Isiraele bao ba ilego ba tla go rapela tempeleng yeo ka ge e be e bonagatša letago la go ba gona ga gagwe mo go hlomphegago. Tempele ye yeo e ilego ya tsošološwa e bapišwa bjang le yeo e ilego ya agwa mehleng ya Salomo? Moporofeta wa Modimo o tsebaditše gore: “Letaxô la Ntlo yé e tlo ba le lexolo, le le fetišaxo lela la ya kxalê.—Ó r’yalo Morêna wa mašaba.” (Hagai 2:9) Phethagatšong ya mathomo ya boporofeta, tempele yeo e tsošološitšwego e ile ya ba gona ka lebaka le letelele go feta ngwako wa mathomo. E be e sa dutše e eme ge Mesia a bonagala ka 29 C.E. Gape, pele ga ge manaba a gagwe a bahlanogi a be a dira gore a bolawe ka 33 C.E., Mesia ka boyena o ile a e tlišetša letago ge a be a ruta therešo moo.

12. Ditempele tše pedi tša mathomo di ile tša phetha morero ofe?

¹² Tempele ya pele le ya bobedi tša Jerusalema di ile tša phetha morero o bohlokwa go swantšhetšeng dibopego tša bohlokwa tša tirelo ya boperisita ya Mesia le go boloka borapedi bjo bo sekilego bja Jehofa bo le mafolofolo lefaseng go fihlela go tšweleleng ga kgonthe ga Mesia.—Ba-Hebere 10:1.

Tempele ya Letago ya Moya

13. (a) Ke ditiragalo dife ge e le mabapi le tempele ya moya tšeo di ilego tša diragala go tloga ka 29 go ya go 33 C.E.? (b) Sehlabelo sa Jesu sa topollo se kgathile tema efe e bohlokwa ditiragalong tše?

¹³ Na boporofeta bja Hagai bja tsošološo bo na le tlhaloso e kgethegilego bakeng sa mehla ya morago bjale? Bo na le yona e le ka kgonthe! Tempele e tsošološitšwego ya Jerusalema e bile lefelo la borapedi ka moka bja therešo lefaseng. Eupša e be e swantšhetša tempele ya moya yeo e tagilego ka mo go fetišišago kudu. Ye e ile ya thoma go šoma ka 29 C.E., ge go kolobetšweng ga Jesu Nokeng ya Jorodane, Jehofa a ile a tlotša Jesu bjalo ka Moperisita yo Mogolo, gomme moya o mokgethwa o theogela go yena bjalo ka leeba. (Mateo 3:16) Ka morago ga ge Jesu a phethile bodiredi bja gagwe bja lefaseng ka lehu la sehlabelo, o ile a tsošetšwa legodimong leo le bego le swantšhetšwa ke Sekgethwa-kgethwa sa tempele gomme o ile a neela Jehofa mohola wa sehlabelo sa gagwe moo. Se se šomile e le topollo yeo e bipago dibe tša barutiwa ba gagwe gomme sa bula tsela ya go ba tlotša ka letšatši la Pentekoste ya 33 C.E. e le baperisita ba tlasana tempeleng ya Jehofa ya moya. Bodiredi bja bona bja potego go iša lehung ka lapeng la tempele lefaseng bo be bo tla lebiša tsogong ya nakong e tlago ya go tsogela legodimong bakeng sa tirelo ya boperisita e tšwelago pele.

14. (a) Ke lethabo lefe leo le ilego la sepedišana le modiro wa phišego wa phuthego ya pele ya Bokriste? (b) Ke ka baka la’ng go thaba mo e be e le ga nakwana?

¹⁴ Ba-Juda ba itsholago ba dikete—gomme ka morago le Ba-ntle—ba ile ba tšhologela phuthegong yeo ya Bokriste gomme ba tšea karolo go tsebatšeng ditaba tše di lokilego tša pušo e tlago ya Mmušo wa Modimo o tlago go buša godimo ga lefase. Ka morago ga nywaga e ka bago 30, moapostola Paulo o be a ka bolela gore ditaba tše di lokilego di be di boletšwe go “babopya bohle ba tlase xa lexodimo.” (Ba-Kolose 1:23) Eupša ka morago ga lehu la baapostola, bohlanogi bjo bogolo bo ile bja tšwelela gomme seetša sa therešo se ile sa thoma go fokola. Bokriste bja kgonthe bo ile bja bipetšwa ke go ikaga dihlotswana ga Bojakane, mo go theilwego dithutong tša boheitene le difilosofing.—Ditiro 20:29, 30.

15, 16. (a) Boporofeta bo ile bja phethagatšwa bjang ka 1914? (b) Ke go kgoboketša gofe mo go ilego gwa swaya karolo ya mafelelo a lekgolo la bo-19 la nywaga le mathomo a la bo-20?

¹⁵ Go ile gwa feta makgolo a nywaga. Ka morago nywageng ya bo-1870, sehlopha sa Bakriste ba ba botegago se ile sa thoma go ba le thuto ya Beibele e tseneletšego. Se ile sa kgona go šupa go tšwa Mangwalong ngwaga wa 1914 e le o swayago bofelo bja “mabaka a ba-ntlê.” E bile ka nako yeo moo “mabaka” a šupago a seswantšhetšo (e lego nywaga e 2520 ya pušo ya batho yeo e swanago le ya dibata) a ilego a fela ka go bewa ga Kriste Jesu sedulong sa bogoši legodimong—e lego Yo a nago le “tshwanelo ya molao” bjalo ka Kgoši ya lefase yeo e lego Mesia. (Luka 21:24; Daniele 4:25; Hesekiele 21:31, 32 [21:26, 27, NW]) Kudu-kudu go tloga ka 1919 go ya pele, Barutwana ba ba Beibele bao lehono ba tsebjago e le Dihlatse tša Jehofa, ba be ba dutše ba swaregile go phatlalatšeng ka mafolofolo ditaba tše di lokilego tša Mmušo o tlago lefaseng ka moka. E bile ka 1919 moo ba dikete tše sego kae ba ba ba ilego ba arabela pitšong ya modiro yeo e ilego ya tsebatšwa kopanong ya Cedar Point, Ohio, U.S.A. Di ile tša oketšega ka palo go fihla ngwageng wa 1935 ge ba 56 153 ba bega tirelo ya tšhemo. Ngwageng woo, ba 52 465 ba ile ba ja diswantšhetšo tša senkgwa le beine Segopotšong sa ngwaga le ngwaga sa lehu la Jesu, ka go rialo ba bontšha kholofelo ya bona ya go tlo ba baperisita gotee le Kriste Jesu karolong ya legodimong ya tempele ya Jehofa e kgolo ya moya. Ba tla hlankela le yena e le dikgoši-gotee Mmušong wa gagwe wa Mesia.—Luka 22:29, 30; Ba-Roma 8:15-17.

¹⁶ Lega go le bjalo, Kutollo 7:4-8 le 14:1-4 e bontšha gore palo-moka ya Bakriste ba ba tloditšwego e lekaneditšwe go 144 000, bao bontši bja bona ba ilego ba kgoboketšwa lekgolong la pele la nywaga pele bohlanogi bo tšwelela. Go tloga mafelelong a lekgolo la bo-19 la nywaga le go tšwela pele go fihla go la bo-20, Jehofa o be a dutše a feleletša go kgoboketšwa ga sehlopha se seo se hlatswiwago ka meetse a Lentšu la gagwe, sa bolelwa se lokile ka go dumela sehlabelong sa poelano sa Jesu gomme mafelelong sa swawa e le Bakriste ba tloditšwego bakeng sa go bopa palo e tletšego ya ba 144000.

17. (a) Ke go kgoboketšwa gofe mo go ilego gwa tšwela pele ga e sa le go tloga nywageng ya bo-1930? (b) Ke ka baka la’ng Johane 3:30 e le e kgahlišago mo? (Bona gape le Luka 7:28.)

¹⁷ Go latela’ng ge palo ka moka ya batlotšwa e kgethilwe? Ka 1935 kopanong yeo e dirilego histori kua Washington, D.C., U.S.A., go ile gwa tsebišwa gore “lešaba le lexolo” la Kutollo 7:9-17 e be e le sehlopha seo se bego se tla lemogwa “ka morago” ga ba 144 000 le seo pheletšo ya sona e lego bophelo bjo bo sa felego lefaseng la paradeise. Ka morago ga go hlaola gabotse Jesu yo a tloditšwego, Johane Mokolobetši yo tsogo ya gagwe e tlago go ba ya lefaseng bjalo ka yo mongwe wa “dinku tše dingwê,” o itše ka Mesia: “Yêna ké wa xo xola; nna ke wa xo kôkôbêla.” (Johane 1:29; 3:30; 10:16; Mateo 11:11) Modiro wa Johane Mokolobetši wa go lokišetša Mesia barutiwa o be o felela ge Jesu ka nako yeo a tšea marapo tabeng ya go kgethwa ga palo e oketšegago ya bao ba bego ba tla go ba gare ga ba 144 000. Nywageng ya bo-1930 boemo bo ile bja fetoga. Palo e fokotšegago e be e le ya “ba ba biditšwego, le ba bakgethwa” gore ba be gare ga ba 144 000 mola koketšego e kgolo e be e thomile palong ya “lešaba le lexolo” la “dinku tše dingwê.” Lešaba le le legolo le tšwela pele le ata ge tshepedišo e kgopo ya dilo e batamela bofelong bja yona ka Haramagedone.—Kutollo 17:14b, PK.

18. (a) Ke ka baka la’ng re ka letela ka kgodišego gore “dimilione tšeo di phelago mo nakong ye le ka mohla di ka se ke tša hwa”? (b) Ke ka baka la’ng re swanetše go ela hloko ka mafolofolo Hagai 2:4?

¹⁸ Mathomong a bo-1920 polelo ya phatlalatša yeo e bego e bolelelwa ke Dihlatse tša Jehofa e be e e-na le sehlogo se rego, “Ba Dimilione Bao ba Phelago mo Nakong ye ba ka se ke ba hwa le ka Mohla.” Se se ka ba se ile sa bonagatša kholofelo e feteletšego ka nako yeo. Eupša lehono polelo yeo e ka bolelwa ka kgodišego e tletšego. Bobedi seetša se se oketšegago boporofeteng bja Beibele le bohlokwa-pušo bja lefase le le le hwago di bontšha ka go tia gore bofelo bja tshepedišo ya Sathane bo kgaufsi kudu-kudu! Pego ya Segopotšo sa 1996 e bontšha gore ba 12 921-933 ba bile gona, bao go bona e lego ba 8757 feela (,068 lekgolong) ba bontšhitšego kholofelo ya bona ya legodimong ka go ja diswantšhetšo. Tsošološo ya borapedi bja therešo e kgaufsi le go phethwa. Eupša anke le ka mohla re se ke ra nyefiša modirong woo. Ee, Hagai 2:4 e re: “Lena sethšaba ka moka sa naxa, tiang matla! Dirang xobane ke na le lena.—Ó r’yalo Morêna wa mašaba.” Eka re ka ikemišetša gore go se ke gwa ba le dikgateletšo le ge e le dife tša go rata dilo tše di bonagalago goba moya wa lefase tšeo di fokodišago phišego ya rena bakeng sa modiro wa Jehofa!—1 Johane 2:15-17.

19. Re ka ba le karolo bjang phethagatšong ya Hagai 2:6, 7?

¹⁹ Tokelo ya rena ke e thabišago gakaakang ya go ba le karolo phethagatšong ya mehleng yeno ya Hagai 2:6, 7 e rego: “Morêna wa mašaba ó re: Xo sa šetše lebakanyana, ké mo ke tl’o xo šišinya lexodimo le lefase, le lewatlê le naxa. Le dithšaba ka moka ke tlo di šišinya, xwa tseb’o tla matsaka a dithšaba ka moka; ’me Ntlo yé ke tlo e tlatša letaxô.—Ó r’yalo Morêna wa mašaba.” Megabaru, kgobogo le lehloyo di aparela kudu lefaseng ka moka la lekgolong le la bo-20 la nywaga. Ruri le mehleng ya lona ya bofelo gomme Jehofa o šetše a thomile go le “šišinya” ka go dira gore Dihlatse tša gagwe di ‘goelele letšatši la gagwe la tefetšo.’ (Jesaya 61:2) Go šišinya mo ga mathomo go tla fihla seremong ka tshenyego ya lefase ka Haramagedone, eupša pele ga nako yeo Jehofa o goga “matsaka a dithšaba ka moka” bakeng sa tirelo ya gagwe—e lego batho ba lefase ba ikokobeditšego ba go swana le dinku. (Johane 6:44) “Lešaba [le] le lexolo” ga bjale ‘le neela tirelo e kgethwa’ lapeng la lefaseng la ngwako wa gagwe wa borapedi.—Kutollo 7:9, 15.

20. Lehumo le bohlokwa-hlokwa le ka hwetšwa kae?

²⁰ Tirelo ka tempeleng ya Jehofa ya moya e tliša moputso wa bohlokwa o fetago lehumo le ge e le lefe la dilo tše di bonagalago. (Diema 2:1-6; 3:13, 14; Mateo 6:19-21) Go oketša moo, Hagai 2:9 e re: “Letaxô la Ntlo yé e tlo ba le lexolo, le le fetišaxo lela la ya kxalê.—Ó r’yalo Morêna wa mašaba.—’Me felô fá ke tlo bea khutšô.—Ó r’yalo Morêna wa mašaba.” Mantšu a a bolela’ng go rena lehono? Sehlogo sa rena se se latelago se tla hlalosa.

[Mengwalo ya tlase]

Dipotšišo tša Tlhahlobo

◻ Ke mohlala ofe wa baporofeta wo re swanetšego go o latela ge e le mabapi le leina la Jehofa?

◻ Ke kgothatšo efe yeo re e hwetšago molaetšeng o matla wa Jehofa go Isiraele e tsošološitšwego?

◻ Tempele ya letago ya moya yeo e šomago lehono ke efe?

◻ Ke go kgoboketšwa gofe mo go tšwetšego pele ka go latela lekgolong la bo-19 le la bo-20 la nywaga, gona ka tebelelo efe e botse?

[Pictures on page 7]

Madira a legodimong a Jehofa a hlahla Dihlatse tša gagwe lefaseng le go di thekga