“Tlhaologanyo” Ge Bofelo Bo Dutše Bo Batamela

“Gomme bofelo bja dilo ka moka bo batametše; ke gona le be le tlhaologanyo.”—1 PETRO 4:7, 8, PK.

1. Go akaretšwa’ng tabeng ya go ba le “tlhaologanyo”?

MANTŠU a lego ka mo godimo a moapostola Petro a swanetše go ba le mafelelo a tseneletšego tseleng yeo Bakriste ba phelago maphelo a bona ka yona. Lega go le bjalo, Petro ga se a botša babadi ba gagwe gore ba tlogele boikarabelo bja bophelo bja letšatši le letšatši le dilo tše di nyakegago tša bophelo; le gona ga se a kgothaletša maikwelo a tlalelo ka baka la tshenyego e batamelago. Go e na le moo, o kgothaleditše gore: “Le be le tlhaologanyo.” Go ba “le tlhaologanyo” go akaretša go bontšha kahlolo e botse, go ba le kelelo, go ba bohlale, go nagana ge re bolela le ge re dira dilo. Go bolela go dira gore Lentšu la Modimo le buše tsela ya rena ya go nagana le ditiro. (Ba-Roma 12:2) Ka ge re phela “xare xa bakxôpô le bahlanoxi,” go nyakega tlhaologanyo gore re pheme mathata.—Ba-Filipi 2:15.

2. Go se fele pelo ga Jehofa go hola bjang Bakriste lehono?

² “Tlhaologanyo” e bile e re thuša go ba le pono e hlaphogetšwego le ya kgonthe ka rena ka noši. (Tito 2:12; Ba-Roma 12:3) Se ke sa bohlokwa go ya ka mantšu a begilwego go 2 Petro 3:9 a rego: “Morêna xa a diexiše tše a di boletšexo a re di tlo tla, bo-ka ba bangwê xe ba re ké xo diexiša; sa xaxwe ké xo se Le fêlêle pelo, xobane xa a rate xe xo na le ba ba lahlêxaxo; ó rata xe bohle ba ka fihlêla thsokoloxô.” Ela hloko gore Jehofa ga a fele pelo, e sego go ba sa dumelego feela eupša le ‘go lena’—ditho tša phuthego ya Bokriste. Ka baka la’ng? Ka gobane “xa a rate xe xo na le ba ba lahlêxaxo.” Mohlomongwe ba bangwe ba sa dutše ba swanelwa ke go dira diphetogo le dipeakanyo e le gore ba swanelegele mpho ya bophelo bjo bo sa felego. Ka gona, anke re lebeleleng mafelo ao go ona go ka nyakegago dipeakanyo.

“Tlhaologanyo” Ditswalanong tša Rena ka Noši

3. Batswadi ba ka ipotšiša dipotšišo dife mabapi le bana ba bona?

³ Legae e swanetše go ba lewa la khutšo. Eupša go ba bangwe ke “ngwako o tletšego . . . dikgang.” (Diema 17:1, PK) Go thwe’ng ka lapa la gago? Na lapa la gago ga le na “bonaba le mašata, le maroxa”? (Ba-Efeso 4:31) Go thwe’ng ka bana ba gago? Na ba ikwa ba ratwa e bile ba lebogwa? (Bapiša le Luka 3:22.) Na o tšea nako o ba ruta le go ba tlwaetša? Na o ‘laya ka go loka’ go e na le ka pefelo le kgalefo? (2 Timotheo 3:16, NW) Ka ge bana e le “neô ya Morêna,” o kgahlegela kudu tsela yeo ba swarwago ka yona.—Psalme 127:3.

4. (a) Ke eng seo se ka tšwelelago ge e ba monna a swara mosadi wa gagwe ka mokgwa wa makgwakgwa? (b) Basadi ba ka godiša bjang khutšo le Modimo gotee le lethabo ka lapeng ka moka?

⁴ Go thwe’ng ka molekane wa rena wa lenyalo? “Banna a ba tsebê xe xo ba swanetše xe ba rata basadi ba bôná, ka mokxwa wo ba rataxo mebele ya bôná ka wôna. Xe monna a rata mosadi wa xaxwe ké xôna xe a ithata. Xa xo motho e a kilexo a hlôya mmele wa xaxwe; se motho a se diraxo ké xo o fêpa le xo o babalêla; le Kriste ó dira phuthêxô ka mokxwa woo.” (Ba-Efeso 5:28, 29) Monna yo a swarago gampe, yo a gatelelago goba yo a sa leka-lekanago ga se feela gore o bea khutšo ya legae la gagwe kotsing, eupša o nyatša tswalano ya gagwe le Modimo. (1 Petro 3:7) Go thwe’ng ka basadi? Le bona ka mo go swanago e swanetše go “ba ba kwaxo banna ba [bona], byalo ka xe [ba] e-kwa Morêna.” (Ba-Efeso 5:22) Go nagana ka go kgahliša Modimo go ka thuša mosadi gore a hlokomologe mafokodi a monna wa gagwe gomme a ikokobeletše yena ka ntle le sekgopi. Ka dinako tše dingwe mosadi a ka ikwa a gapeletšega go bolela seo a se naganago. Diema 31:26 e bolela ka mosadi wa seroto gore: “Se a se bolêlaxo ké bohlale; ’leme la xaxwe le ruta batho botho.” Ka go swara monna wa gagwe ka tsela e botho ya tlhompho, o kgomarela khutšo le Modimo gomme o godiša lethabo la lapa ka moka.—Diema 14:1.

5. Ke ka baka la’ng bafsa ba swanetše go latela keletšo ya Beibele mabapi le go swara batswadi ba bona?

⁵ Bana, le swara bjang batswadi ba lena? Na le diriša polelo ya kodutlo le ya lenyatšo yeo e kgotlelelwago gantši ke lefase? Goba na le kwa taelo ya Beibele e rego: “Lena Bana! Kwang batswadi ba lena Moreneng, xobane ké xôna xo loka. Xodiša tat’axo le mm’axo, ké wôna molaô wa pele o naxo le kholofedišô ya xo re: O tlê O bê le mahlatse, O phele xalelele lefaseng”?—Ba-Efeso 6:1-3.

6. Re ka tsoma bjang khutšo le barapedi-gotee le rena?

⁶ Re bile re bontšha “tlhaologanyo” ge re ‘tsoma khutšo le go e kganyelela’ gotee le barapedi-gotee le rena. (1 Petro 3:11) Go tšwelela go se dumelelane le go se kwešišane nako le nako. (Jakobo 3:2) Ge e ba bonaba bo dumelelwa gore bo tseme medu, gona khutšo ya phuthego ka moka e ka bewa kotsing. (Ba-Galatia 5:15) Ka gona lokišang dithulano kapejana; tsomang ditharollo tša khutšo.—Mateo 5:23-25; Ba-Efeso 4:26; Ba-Kolose 3:13, 14.

“Tlhaologanyo” le Boikarabelo bja Lapa

7. (a) Paulo o kgothaleditše bjang go bontšha “tlhaologanyo” ditabeng tša bophelo bja letšatši le letšatši? (b) Banna le basadi ba Bakriste ba swanetše go ba le boemo bofe bja kgopolo ka boikarabelo bja ka gae?

⁷ Moapostola Paulo o eleditše Bakriste gore ba “phele ka tlhaologanyo.” (Tito 2:12, PK) Ke mo go kgahlišago gore tabeng e dikologilego, Paulo o kgothaletša basadi “gore ba rate banna ba bona, ba rate bana ba bona, e be ba tlhaologanyo, ba ba sekilego, baloti ba nywako ya bona.” (Tito 2:4, 5, PK) Paulo o ngwadile seo nywageng ya 61-64 C.E., e lego nywaga e sego kae pele ga bofelo bja tshepedišo ya dilo ya Sejuda. Lega go le bjalo, ditaba tša bophelo bja letšatši le letšatši tše bjalo ka modiro wa ka lapeng e be e sa dutše e le tša bohlokwa. Ka go rialo, banna le basadi ka bobedi ba swanetše go kgomarela kgopolo e agago le e nepagetšego ya boikarabelo bja bona bja ka gae e le gore “Lentšu la Modimo le se xobošwê.” Hlogo e nngwe ya lapa e ile ya kgopela tshwarelo go moeng ka baka la ponagalo e lešago dihlong ya legae la yona. E ile ya hlalosa gore le be le senyegile “ka gobane e be e bula madibogo.” Ke mo go retegago ge re ikgafa ka baka la Mmušo, eupša re swanetše go šetša gore re se ke ra gafa boiketlo bja malapa a rena.

8. Dihlogo tša malapa di ka hlokomela bjang dinyakwa tša malapa a tšona ka tsela e leka-lekanego?

⁸ Beibele e kgothaletša bo-tate gore ba nee malapa a bona boemo bja pele, e bolela gore motho yo a palelwago ke go hlokomela lapa la gagwe “ó latola tumêlô; ó phalwa ke e a sa dumelexo.” (1 Timotheo 5:8) Ditekanyetšo tša go phela di a fapa-fapana lefaseng ka moka gomme ke mo gobotse go boloka ditebelelo tša dilo tše di bonagalago di lekanetše. Mongwadi wa Diema 30:8 o rapetše ka gore: “Se nneê bodiidi, se nneê lehumô.” Lega go le bjalo, batswadi ga se ba swanela go hlokomologa dinyakwa tša bana ba bona tša dilo tše di bonagalago. Ka mohlala, na e tla ba gabohlale go tlogela lapa la motho ka boomo le se na dinyakwa tša motheo tša bophelo e le gore a phegelele ditokelo tša pušo ya Modimo? Na se ka se ke sa galefiša bana ba motho? Ka lehlakoreng le lengwe, Diema 24:27 e re: “Phêtha medirô ya xaxo ya ntlê, O itemêlê thšemo; e bê xôna O axaxo ntlo ya xaxo.” Ee, le ge go tshwenyega ka dilo tše di bonagalago go e-na le lefelo la gona, ‘go aga lapa la motho’—moyeng le maikwelong—ke gabohlokwa.

9. Ke ka baka la’ng e le gabohlale gore dihlogo tša malapa di naganišiše ka kgonagalo ya go hwa goba go babja ga tšona?

⁹ Na o dirile ditokišetšo tša go hlokomela lapa la gago ge e ba o ka hwa pele ga nako? Diema 13:22 e re: “Bohwa bya moloki ké bya bana ba bana.” Go tlaleletša bohweng bja go tseba Jehofa le go ba le tswalano le yena, batswadi ba tla kgahlegela go nea bana ba bona dilo tše di bonagalago. Dinageng tše dintši dihlogo tša malapa tšeo di rwelego boikarabelo di tla leka go ba le tšhelete e bolokilwego, keno ya molao le phemelo. Go ba gona, batho ba Modimo ga se ba sa welwego ke “nako le tiragalo e sa letelwago.” (Mmoledi 9:11, NW) Tšhelete ke “tšhireletšo” gomme go rulaganya ka kelohloko gantši go ka thibela bothata. (Mmoledi 7:12, PK) Dinageng tšeo go tšona tlhokomelo ya tša kalafo e sa lefelelwego ke mmušo, ba bangwe ba ka kgetha go beela tšhelete ka thoko bakeng sa dinyakwa tša tša maphelo goba go rulaganyetša mohuta o itšego wa tefelo ya tša maphelo.a

10. Batswadi ba Bakriste ba ka ‘kgobelela’ bana ba bona bjang?

¹⁰ Mangwalo a bile a bolela gore: “Xa xo a swanêla xe batswadi ba kxobêlêlwa mahumô ke bana ba bôná.” (2 Ba-Korinthe 12:14) Lefaseng ke mo go tlwaelegilego gore batswadi ba bee tšhelete bakeng sa thuto ya bana ba bona ya nakong e tlago le lenyalo e le gore ba ba theele motheo o mobotse bophelong. Na o kile wa nagana ka go bolokela bokamoso bja moya bja ngwana wa gago? Ka mohlala, anke re re ngwana yo a gotšego o phegelela bodiredi bja nako e tletšego. Le ge bahlanka ba nako e tletšego ba sa swanela go nyaka goba go letela thekgo ya tša ditšhelete ya ka ntle, batswadi ba lerato ba ka kgetha go ‘abelana le yena go ya ka dinyakwa tša gagwe’ e le gore ba mo thuše go dula tirelong ya nako e tletšego.—Ba-Roma 12:13, NW; 1 Samuele 2:18, 19; Ba-Filipi 4:14-18.

11. Na go ba le pono ya kgonthe ka tšhelete go bontšha go hloka tumelo? Hlalosa.

¹¹ Go ba le pono ya kgonthe ka tšhelete ga go bontšhe go se dumele gore tshepedišo e kgopo ya Sathane e batametše bofelo bja yona. Ke feela taba ya go bontšha “bohlale bjo bo šomago” le kahlolo ya tlhaologanyo. (Diema 2:7, NW; 3:21) Jesu o kile a bolela gore “bana ba lefase leno, ka maanô a ba diranaxo . . . ka ôna, ba phala bana ba seetša” go dirišeng ga bona tšhelete. (Luka 16:8) Ka gona, ga go makatše ge ba bangwe ba ile ba bona go nyakega ga go dira dipeakanyo tseleng yeo ba dirišago mahumo a bona ka yona, e le gore ba kgone go hlokomela dinyakwa tša malapa a bona gakaone.

“Tlhaologanyo” Ponong ya Rena ka Thuto

12. Jesu o rutile bjang barutiwa ba gagwe gore ba itlwaelanye le maemo a mafsa?

¹² “Sebopêxô sa lefase leno se a [feta, PK]” gomme diphetogo tše di akaretšago tša tša boiphedišo le kgatelopele ya tša thekinolotši di direga ka lebelo. (1 Ba-Korinthe 7:31) Lega go le bjalo, Jesu o rutile barutiwa ba gagwe gore e be ba itlwaelanyago le maemo. O ba boditše ge a be a ba roma lesolong la bona la mathomo la boboledi gore: “Le se kê la ipabalêla ka xauta le xe e le ka silifêra dikxwameng tša lena. Le mekotla ya leêtô, le xe e le kobô ya bobedi, le xe e le diêta, le xe e le lepara, Le se kê la tloxa natšô’. Xobane mohlanka sa xaxwe ké xo newa dijô.” (Mateo 10:9, 10) Lega go le bjalo, lekgeng la ka morago Jesu o ile a re: “E a naxo le sekhwama, a se swarê, le e a naxo le mokotla.” (Luka 22:36) Go be go fetogile eng? Go fetogile maemo. Tikologo ya bodumedi e be e fetogile e nago le lehloyo kudu gomme bjale ba be ba swanetše go itirela mefago.

13. Morero o mogolo wa thuto ke eng, gona batswadi e ka ba ba ba thekgago bana ba bona bjang tabeng ye?

¹³ Ka mo go swanago lehono, batswadi ba ka swanelwa ke go naganela maemo a kgonthe a lehono a tša boiphedišo. Ka mohlala, na le kgonthišetša gore bana ba lena ba tsena sekolo ka mo go lekanego? Morero o mogolo wa thuto e swanetše go ba wa go hlama mofsa gore e be modiredi yo a atlegago wa Jehofa. Le gona thuto e bohlokwa kudu go tšohle ke thuto ya moya. (Jesaya 54:13) Batswadi ba bile ba tshwenyegile ka bokgoni bja bana ba bona bja go ithekga ka tša ditšhelete. Ka gona, neang bana ba lena tlhahlo, ba thušeng gore ba kgethe dithuto tše di swanetšego tša sekolo gomme le boledišane le bona ge e ba e le gabohlale go phegelela thuto ya tlaleletšo goba go se bjalo. Diphetho tše bjalo ke boikarabelo bja lapa gomme ba bangwe ga se ba swanela go swaya tsela yeo e tšerwego phošo. (Diema 22:6) Go thwe’ng ka bao ba kgethilego go ruta bana ba bona ka gae?b Gaešita le ge ba bantši ba dirile modiro o retegago, ba bangwe ba hweditše modiro wo e le o thata kudu go feta kamoo ba bego ba akanya ka gona gomme bana ba bona ba ile ba loba. Ka gona ge e ba le nagana ka go tsena sekolo ka gae, kgonthišegang gore le bala ditshenyagalelo le lekanye ka mo go leka-lekanego ge e ba le e-na le bokgoni bjo bo nyakegago le boitayo go phetha se.—Luka 14:28.

‘O se ke wa Tsoma Dilo tše Dikgolo’

14, 15. (a) Baruke o ile a lahlegelwa ke teka-tekano ya gagwe ya moya bjang? (b) Ke ka baka la’ng e be e le bošilo gore a “inyakêlê tše kxolo”?

¹⁴ Ka ge bofelo bja tshepedišo ye bo sa hlwa bo e-tla, ba bangwe ba ka ba le tshekamelo ya go tsoma seo lefase le nago le sona—e lego mediro e tumišegago ya bophelo ka moka, mediro e lefago kudu le lehumo. Nagana ka mongwaledi wa Jeremia, e lego Baruke. O llile ka gore: “Ke yo madi-mabe! Hleng mahloko a-ka Morêna ó a hlatlaxanya le ma-ja-pelô! Ke fedile matla ka phêxêlô; mo nkaxo khutša se xo bône!” (Jeremia 45:3) Baruke o be a lapile. Go hlankela e le mongwaledi wa Jeremia e be e le modiro o thata le o gateletšago. (Jeremia 36:14-26) Kgateletšego e be e bonala e sa fele. E be e tla ba nywaga e 18 pele ga ge Jerusalema e fedišwa.

¹⁵ Jehofa o ile a botša Baruke gore: “Tseba, se ke se axilexo ke a se phušola; se ke se hlomilexo ke a se tomola; ke di dira naxa yohle. Xomme wêna, a O sa inyakêla tše kxolo? Se di nyakê!” Baruke o be a lahlegetšwe ke teka-tekano. O be a thomile go “inyakêla tše kxolo,” mohlomongwe lehumo, bophagamo goba tšhireletšo ya dilo tše di bonagalago. Ka ge Jehofa a be a “tomola; [a] di dira naxa yohle,” go nyaka dilo tše bjalo go be go e-na le tlhaologanyo efe? Ka gona, Jehofa o ile a nea Baruke kgopotšo ye e dirago motho gore a nagane: “Tseba xobane ke tliša bošula bo tl’o xo wêla nama yohle. . . . Xe e le wêna, ke Xo fa bophelô bya xaxo, xore mo xo fêla mo O yaxo, O yê Ò thšabile Ò na nabyô’.” Dithoto tša dilo tše di bonagalago di be di ka se phologe phedišo ya Jerusalema! Jehofa o be a kgonthišeditše feela phologo ya “bophelô bya” gagwe.—Jeremia 45:4, 5.

16. Batho ba Jehofa lehono ba ka ithuta thuto efe phihlelong ya Baruke?

¹⁶ Baruke o ile a kwa phošollo ya Jehofa gomme ka go dumelelana le kholofetšo ya Jehofa, Baruke o ile a phonyokga le bophelo bja gagwe. (Jeremia 43:6, 7) Ke thuto e matla gakaakang bakeng sa batho ba Jehofa lehono! Ye ga se nako ya go “inyakêla tše kxolo.” Ka baka la’ng? Ka gobane “lefase le a feta, le yôna kxanyoxô ya lôna.”—1 Johane 2:17.

Go Diriša Nako e Šetšego Gabotse

17, 18. (a) Jona o ile a arabela bjang ge ba-Ninife ba be ba itshola? (b) Jehofa o ile a ruta Jona thuto efe?

¹⁷ Ka gona, re ka diriša bjang nako e šetšego gabotse? Ithute phihlelong ya moporofeta Jona. O ile “a ya Ninife, . . . a xoêlêla a re: Xo sa šetše matšatši a masome a manê; ké mo motse wa Ninife ò tl’o xo ribexetšwa!” Seo se ilego sa makatša Jona ke gore ba-Ninife ba ile ba arabela molaetšeng wa gagwe gomme ba itshola! Jehofa o ile a tlogela go fediša motse. Karabelo ya Jona e bile efe? “Morêna, byale a k’O tšeê bophêlô bya-ka, xobane xo kaone xe nka hwa, ke se hlwê ke phela.”—Jona 3:3, 4; 4:3.

¹⁸ Ka morago, Jehofa o ile a ruta Jona thuto e bohlokwa. O ile “a mediša mokhurê, wa okamêla Jona, ya ba moriti wa hlôxô ya xaxwe . . . ’Me Jona, mokhurê woo a o thabêla ka lethabô le lexolo.” Lega go le bjalo, lethabo la Jona e bile la nakwana ka ge sehlare se ile sa pona ka pela. Jona o ile a “befêlwa” ka baka la go hloka boiketlo. Jehofa o ile a gatelela ntlha ya Gagwe ka gore: “Wêna O kwêla mokhurê bohloko . . . Byale Nna a nka se kwêlê Ninife bohloko, e lexo motse o moxolo, o naxo le batho ba ba fetišaxo dikete tše lekxolo le dikete tše masome a mabedi, tša ba ba sešoxo ba tseba xo hlaola letsôxô le letona le la ntsôxôšô, le diruiwa tše ntši?”—Jona 4:6, 7, 9-11.

19. Ke tsela efe ya boithati ya go nagana yeo re tla ratago go e phema?

¹⁹ Kgopolo ya Jona e be e le ya boithati gakaakang! O be a ka kwela sehlare bohloko, eupša a se be le kwelobohloko le e nyenyane ka batho ba Ninife—batho bao ge re bolela ka kgopolo ya moya ‘ba bego ba sa tsebe phapano magareng ga seatla sa bona se setona le se setshadi.’ Le rena ka mo go swanago re ka hlologelwa phedišo ya lefase le le kgopo ka mo go swanetšego! (2 Ba-Thesalonika 1:8) Lega go le bjalo, ge re sa dutše re letile re na le boikarabelo bja go thuša batho ba dipelo tše di botegago bao ge re bolela ka kgopolo ya moya, ba sa ‘tsebego phapano magareng ga seatla sa bona se setona le se setshadi.’ (Mateo 9:36; Ba-Roma 10:13-15) Na o tla dirišetša nako e kopana e šetšego go thuša ba bantši ka mo go kgonegago go hwetša tsebo e bohlokwa-hlokwa ka Jehofa? Ke modiro ofe ruri wo o bego o ka lekana le lethabo la go thuša motho yo mongwe gore a hwetše bophelo?

Tšwelang Pele le Phela ka “Tlhaologanyo”

20, 21. (a) Ditsela tše dingwe tšeo ka tšona re ka bontšhago “tlhaologanyo” mehleng e lego ka pele ke dife? (b) Go phela ka “tlhaologanyo” go tla tliša ditšhegofatšo dife?

²⁰ Ge tshepedišo ya Sathane e dutše e tšwela pele tseleng ya yona ya go ya tshenyegong, ga go pelaelo gore re tla lebeletšana le ditlhohlo tše difsa. Timotheo wa Bobedi 3:13 e bolelela pele gore: “Batho ba babe le baaroši, bobe bya bôná bo tlo fêla bò xola bò e-ya.” Eupša le se “lapê dipelo la lesetša.” (Ba-Hebere 12:3) Ithekgeng ka Jehofa bakeng sa matla. (Ba-Filipi 4:13) Ithuteng go kobakobega le maemo, go itlwaelanya le maemo a a mpefalelago pele go e na le go kgomarela tša nakong e fetilego. (Mmoledi 7:10) Dirišang bohlale bjo bo šomago le dutše le sepedišana le tlhahlo yeo “molaki e a bôtêxaxo yo bohlale” a e neago.—Mateo 24:45-47.

²¹ Ga re tsebe botelele bja nako yeo e sa šetšego. Lega go le bjalo, re ka bolela ka kgodišego gore “bofelo bja dilo tšohle bo batametše.” Go fihlela ge bofelo bjoo bo e-tla, anke re pheleng ka “tlhaologanyo” ditirišanong tša rena seng sa rena, tseleng yeo re hlokomelago malapa a rena ka yona le boikarabelong bja rena bja tša boiphedišo. Ka go dira bjalo, ka moka ga rena re ka kgodišega gore mafelelong re ka hwetšwa ‘re se na bosodi le senyalo re le ba khutšo’!—2 Petro 3:14.

[Mengwalo ya tlase]

[Seswantšho go letlakala 18]

Ge monna le mosadi ba swarana gampe, ba senya tswalano ya bona le Jehofa

[Seswantšho go letlakala 20]

Batswadi ba swanetše go kgahlegela thuto ya bana ba bona

[Seswantšho go letlakala 22]

Dintlha tša Tlhahlobo

◻ Re ka bontšha bjang “tlhaologanyo” ditswalanong tša rena ka noši?

◻ Re ka bontšha bjang teka-tekano ge re phetha boikarabelo bja rena bja lapa?

◻ Ke ka baka la’ng batswadi ba swanetše go kgahlegela thuto ya lefase ya bana ba bona?

◻ Re ithuta dithuto dife ka Baruke le Jona?