Puku ya Bobedi ya Dikgoši
2 Eliya le Elisha ba ile ba tloga Giligala ge Jehofa a be a le kgauswi le go rotošetša Eliya magodimong* ka ledimo. 2 Eliya a re go Elisha: “Ke kgopela gore o šale mo, ka gobane Jehofa o nthomile Bethele.” Eupša Elisha a re: “Ke ikana ka wena le ka Jehofa Modimo yo a phelago, ke re nka se go tlogele.” Ka gona ba ya Bethele. 3 Ke moka barwa ba baporofeta bao ba bego ba le Bethele ba tla go Elisha ba re: “Na o a tseba gore lehono Jehofa o tlo tloša mong wa gago gore e se sa ba morutiši wa gago?” Ke moka Elisha a re: “Ke a tseba. Homolang.”
4 Bjale Eliya a re go yena: “Elisha, hle šala mo, ka gobane Jehofa o nthomile Jeriko.” Eupša Elisha a re: “Ke ikana ka wena le ka Jehofa Modimo yo a phelago, ke re nka se go tlogele.” Ka gona ba ya Jeriko. 5 Ke moka barwa ba baporofeta bao ba bego ba le Jeriko ba tla go Elisha ba re: “Na o a tseba gore lehono Jehofa o tlo tloša mong wa gago gore e se sa ba morutiši wa gago?” Ke moka Elisha a re: “Ke a tseba. Homolang.”
6 Bjale Eliya a re go yena: “Elisha, hle šala mo, ka gobane Jehofa o nthomile Jorodane.” Eupša Elisha a re: “Ke ikana ka wena le ka Jehofa Modimo yo a phelago, ke re nka se go tlogele.” Ke moka ba sepela e le ba babedi. 7 Ge Elisha le Eliya ba eme kgauswi le Jorodane, barwa ba 50 ba baporofeta ba ile ba ba šala morago, ba ema kgojana le bona ba ba lebelela. 8 Ke moka Eliya a tšea seaparo sa gagwe sa baporofeta a se sopaganya gomme a itia meetse ka sona, meetse ao a arogana, a mangwe a ya ka go le letona gomme a mangwe a ya ka go le letshadi, e le gore bobedi bja bona ba fete mmung o omilego.
9 Ge ba se na go tshela, Eliya a re go Elisha: “Nkgopele seo o nyakago ke go direla sona pele ke tlošwa go wena.” Elisha a re: “Ke kgopela o mphe moya o mokgethwa woo Modimo a go filego wona.”* 10 Eliya a re: “O kgopetše selo se sethata. Ge e ba o ka mpona ge ke tlošwa go wena gona selo seo o se kgopetšego se tla direga, eupša ge o ka se mpone gona selo seo se ka se direge.”
11 Ge ba dutše ba sepela, ba tšama ba bolela, go ile gwa tšwelela koloi ya ntwa le dipere tšeo di bego di swana le mollo gomme ya ba tsena ka bogare, ke moka Eliya a rotošetšwa magodimong ka ledimo. 12 Ge Elisha a dutše a lebeletše, o be a goelela a re: “Tate, tate, bona koloi ya ntwa ya Isiraele le banamedi ba gagwe ba dipere!” Ge Elisha a se sa bona Eliya o ile a swara diaparo tša gagwe gomme a di gagola ka diripa tše pedi. 13 Ka morago a topa seaparo sa baporofeta seo se bego se wele go Eliya gomme a boela morago a ema kgauswi le Noka ya Jorodane. 14 Ke moka a tšea seaparo sa Eliya seo se bego se wele, a itia meetse ka sona gomme a re: “O kae Jehofa Modimo wa Eliya?” Meetse ao a ile a arogana, a mangwe a ya ka go le letona gomme a mangwe a ya ka go le letshadi, gore Elisha a kgone go feta.
15 Ge barwa ba baporofeta bao ba bego ba le Jeriko ba mmona a sa le kgole, ba ile ba re: “Moya wa Eliya o godimo ga Elisha.” Ka gona ba tla ba mo gahlanetša gomme ba mo khunamela. 16 Ba re go yena: “Mo gare ga rena bahlanka ba gago go na le banna ba 50 ba matla. E re re ba rome gore ba ye ba nyake mong wa gago, mohlomongwe moya wa Jehofa o mo kukile wa mo lahlela go e nngwe ya dithaba goba go o mongwe wa meedi.” Eupša yena a re: “Le se ke la ba roma.” 17 Lega go le bjalo, ba ile ba dulela go mo kgopela go fihlela a hlabja ke dihlong, ka gona a re: “Ba romeng.” Ke moka ba romela banna bao ba 50 bao ba ilego ba mo nyaka matšatši a mararo eupša ba se mo hwetše. 18 Ge ba boela go yena, ba mo hweditše a dula Jeriko. Ke moka a re go bona: “Na ga se ka le botša gore le se ke la ya?”
19 Ge nako e dutše e eya banna ba motseng wa Jeriko ba re go Elisha: “Mong wa rena, o a bona gore motse wa rena o dutše lefelong la maleba, eupša meetse a wona ga se a hlweka, e bile mobu wa wona ga se wa nona.”* 20 Ge ba realo Elisha a re: “Ntlišetšeng sebjana se senyenyane se seswa le tšheleng letswai ka gare ga sona.” Ka gona ba mo tlišetša sona. 21 Ke moka a ya moo meetse ao a tšwago gona, gomme a tšhela letswai a re: “Jehofa o re: ‘Ke fodišitše meetse a, a ka se sa baka lehu goba a dira gore basadi ba se ke ba kgona go ba le bana.’”* 22 Meetse ao a ile a hlweka go ba go fihla le lehono, go ya ka seo Elisha a se boletšego.
23 A tloga moo a ya Bethele. Ge a dutše a sepela, gwa tšwelela bašemanyana bao ba bego ba etšwa motseng, ba dulela go mo kwera ba re: “Rotoga lefatla tena! Rotoga lefatla tena!” 24 Mafelelong a retologa a ba lebelela gomme a kgopela Jehofa gore a ba otle. Gwa napa gwa tšwelela dibere tše pedi tša ditshadi di etšwa sethokgweng gomme tša rathaganya bana ba 42 go bao ba bego ba le moo. 25 Go tloga moo a ya Thabeng ya Karamele, ge a tloga moo a boela Samaria.