Letšatši La mafelelo La Bophelo Bja jesu E le motho

Ke karolong ya mafelelo ya Labohlano thapama, Nisani 14, 33 C.E. Sehlopha sa banna le basadi se kgaufsi le go boloka mogwera yo a ratwago. Yo mongwe wa banna, e lego Nikodemo o tlile le dinoko bakeng sa go lokišeletša mmele go bolokwa. Monna yo a bitšwago Josefa o tlile le lešela le le hlwekilego bakeng sa go tatetša setopo seo se tetetšego madi ka teng le seo se bethilwego.

BATHO ba ke bomang le gona ba boloka mang? Na se ka moka se a go kgoma? Bakeng sa go araba dipotšišo tše, a re boeleng morago mathomong a letšatši leo le bohlokwa.

Labone Mantšiboa, Nisani 14

Kgwedi e tagilego le e tletšego e hlatloga ka go nanya ka godimo ga Jerusalema. Motse wa leema-ema o a homola ka morago ga letšatši la go swarega kudu. Mantšiboeng a moya o tletše ka monkgo wa nama ya nku yeo e bešitšwego. Ee, batho ba dikete ba itokišetša tiragalo e kgethegilego​—monyanya wa ngwaga le ngwaga wa Paseka.

Phapošing e kgolo ya baeng, re hwetša Jesu Kriste le baapostola ba gagwe ba 12 ba dutše tafoleng e tekilwego. Theetša! Jesu o a bolela. O re: “Ke hloloxetšwe xa-xolo-xolo xo ja Paseka yé le lena kè sešo ka hlokofatšwa.” (Luka 22:​15) Jesu o a tseba gore manaba a gagwe a bodumedi a ikemišeditše go mmolaya. Eupša pele seo se direga, go tla direga selo se sengwe se bohlokwa kudu mantšiboeng a.

Ka morago ga ge Paseka e binnwe, Jesu o tsebiša gore: “E mongwê wa lena ó tlo nkêka.” (Mateo 26:​21) Se se nyamiša baapostola. E ka ba e le mang? Ka morago ga poledišano e itšego, Jesu o botša Judase Isikariothe gore: “Se O se diraxo, akxofiša xo se dira.” (Johane 13:​27) Gaešita le ge ba bangwe ba sa lemoge seo, Judase ke moeki. O a tloga bakeng sa go yo phethagatša karolo ya gagwe ya bofšega leanong leo le lego malebana le Jesu.

Monyanya o Kgethegilego

Jesu bjale o hloma monyanya o mofsa ka mo go feletšego​—wo e tlago go ba segopotšo sa lehu la gagwe. Ge a tšea senkgwa, Jesu o se rapelela thapelo ya go leboga gomme o a se ngwathaganya. O laela gore: “Tšeang Le jê.” “Ké mmele wa-ka o newaxo ka ’baka la lena.” Ge yo mongwe le yo mongwe a jele senkgwa, o tšea senwelo sa beine e khwibidu gomme o a leboga. Jesu o ba botša gore: “Nwang sôna bohle” gomme o a hlalosa: “Senwêlô sé ké kxwêranô e mphsa mading a-ka a a thšollwaxo ka ’baka la lena.” O laela baapostola ba gagwe ba šetšego ba botegago ba 11 gore: “Dirang byalo xore e bê xo nkxopola.”​—Mateo 26:​26-28; Luka 22:​19, 20; 1 Ba-Korinthe 11:​24, 25.

Mantšiboeng ao Jesu o hlamela baapostola ba gagwe bao ba botegago ka go se kwanantšhe seo se letšego ka pele gomme o ba kgonthišeletša lerato la gagwe leo le tseneletšego go bona. O hlalosa gore: “Xa xo e a naxo le leratô le le fetišaxo la eo a xafaxo bophelô bya xaxwe ka ’baka la baxwêra ba xaxwe. Lena Le baxwêra ba-ka, xe Le dira tše ke Le laêlaxo tšôna.” (Johane 15:​13-15) Ee, baapostola ba 11 ba ile ba itlhatsela e le bagwera ba kgonthe ka go kgomarela Jesu nakong ya diteko tša gagwe.

Bošego​—mohlomongwe go šetše go fetile bošego-gare​—Jesu o rapela thapelo e sa lebalegego, yeo ka morago ga yona ba opelelago Jehofa dikoša tša theto. Ka morago, ka seetša sa kgwedi e tletšego, ba tšwa motseng gomme ba tshela Moedi wa Kidironi.​—Johane 17:1–18:1.

Serapeng sa Getsemane

Go se go ye kae ka morago, Jesu le baapostola ba gagwe ba fihla serapeng sa Getsemane. Jesu a tlogela baapostola ba seswai kgorong ya serapa, o tsenelela le Petro, Jakobo le Johane ka gare ga dihlare tša mohlware. O botša ba bararo gore: “Môya wa-ka o nyamile ka xoxolo wa xo iša lehung; dulang fá Le phakxamê.”​—Mareka 14:​33, 34.

Baapostola ba bararo ba letela Jesu ge a le gare a tsenelela serapeng go yo rapela. O lopa ka megoo e matla le megokgo, o re: “Tata! Xe O ka rata, šuthiša senwêlô sé se mphetê.” Jesu o rwele boikarabelo bjo bogolo magetleng. Ke mo go nyamišago gakaakang go yena go nagana ka seo manaba a Jehofa a tla se bolelago ge Morwa wa Gagwe yo a tswetšwego a nnoši a kokotelwa koteng bjalo ka ge eka ke sesenyi! Se se kwešago Jesu bohloko le go feta ke kgobošo yeo e tlago go kgobelelwa godimo ga Tatagwe yo a rategago wa legodimong ge e ba a palelwa ke go fenya teko ye e bohloko kudu. Jesu o rapela ka mo go tseneletšego kudu gomme o tsena tlalelong e šoro kudu mo e lego gore kudumela ya gagwe e swana le marothodi a madi ao a rothelago fase.​—Luka 22:​42, 44.

Jesu o sa tšwa go fetša go rapela lekga la boraro. Banna bao ba swerego dirumula le mabone bjale ba a batamela. Ga go na yo mongwe yo a etilego pele ge e se Judase Isikariothe, yo a tlago a lebile thwii go Jesu. O bolela e bile a mo atla gabonolo o re: “Dumêla, Moruti!” Jesu o arabela ka gore: “Judase, a O êka Morwa-motho ka xo mo atla?”​—Mateo 26:​49; Luka 22:​47, 48; Johane 18:3.

Gatee-tee baapostola ba lemoga seo se diregago. Morena wa bona le mogwera wa bona yo a ratwago o kgaufsi le go swarwa! Ka gona Petro o tšea tšhoša gomme o kgaola tsebe ya mohlanka wa moperisita yo mogolo. Jesu o goeletša kapejana o re: “Lesang: Le se kê la boeletša.” A e-ya pele, Jesu o fodiša mohlanka gomme o laela Petro gore: “Bušetša thšoša ya xaxo bodulong bya yôna; xobane e a swaraxo thšoša, ó tlo bolawa ka yôna.” (Luka 22:​50, 51; Mateo 26:​52) Balaodi le mašole ba swara Jesu gomme ba a mo tlema. Ka go swarwa ke poifo le kgakanego, baapostola ba tlogela Jesu gomme ba tšhabela lefsifsing.​​—Mateo 26:​56; Johane 18:12.

Labohlano Mesong, Nisani 14

Go šetše go fetile bošego-gare gomme ke matla-go-sa a Labohlano. Jesu o thoma ka go išwa legaeng la yo e bego e le Moperisita yo Mogolo Hanna, yo a sa dutšego a e-na le tutuetšo le matla a magolo. Hanna o mmotšiša dipotšišo ke moka a laela gore a išwe legaeng la Moperisita yo Mogolo Kayafa moo lekgotla la Sanhedrine le bokanego gona.

Baetapele ba bodumedi bjale ba leka go hwetša dihlatse tšeo di tla hlamago molato malebana le Jesu. Lega go le bjalo, gaešita le dihlatse tša maaka ga di kgone go dumelelana bohlatseng bja tšona. Nakong ye ka moka, Jesu o ikhomoletše. Ka go fetoša maano, Kayafa o laela gore: “Ké Xo eniša ka Modimo [yo] a phelaxo, xore O re botšê xe O le Kriste Morwa wa Modimo.” Ye ke therešo yeo e ka se kego ya ganetšwa, ka gona Jesu o araba ka sebete o re: “Ké Nna! Xomme Le tlo bôna Morwa-motho à dutše ka letsoxong le letona la Yo-matla, à e-tla ka maru a lexodimo.”​—Mateo 26:​63; Mareka 14:​60-​62.

Kayafa o goeletša ka gore: “Ó roxile Modimo. Re sa nyaka dihlatse tsa’ng?” Ba bangwe bjale ba phasola Jesu sefahlegong le go mo tshwela ka mare. Ba bangwe ba mmetha ka matswele le go mo rogaka. (Mateo 26:​65-68; Mareka 14:​63-​65) Kapejana ka morago ga moo maseng a Labohlano, lekgotla la Sanhedrine le bokana gape, mohlomongwe bakeng sa go dira gore tsheko yeo e sego ya molao yeo e dirilwego bošego e bonagale e le ya molao. Jesu o bontšha gape ka sebete gore ke yena Kriste, Morwa wa Modimo.​—Luka 22:​66-​71.

Se se latelago, baperisita ba bagolo le bagolo ba goga Jesu gore a yo lekwa ke Pontio Pilato, yo e lego mmušiši wa Roma wa Judea. Ba bea Jesu molato wa gore o aroša setšhaba, o iletša batho go ntšhetša Kesara lekgetho le ‘go re yena ka noši ke Kriste kgoši.’ (Luka 23:2; bapiša le Mareka 12:​17.) Ka morago ga go botšiša Jesu dipotšišo, Pilato o tsebiša gore: “Nna xa ke hwetše molato xo motho yó.” (Luka 23:4) Ge Pilato a e-kwa gore Jesu ke mo-Galilea, o mo romela go Heroda Antipase, mmuši wa Galilea yo a tlilego Jerusalema bakeng sa Paseka. Heroda ga se a ikemišetša go bona toka e phethwa. O nyaka feela go bona Jesu a dira mohlolo. Ka ge Jesu a sa kgotsofatše kgahlego ya gagwe gomme a ikhomolela, Heroda le mašole a gagwe ba a mo kwera le go mo mmušetša morago go Pilato.

Pilato o botšiša gape gore: “Xomme bosenyi byo a bo dirilexo ké bofe? Nna xa k’a hwetša molato xo Yêna le o tee o kaxo swanêla polaô. Ké xôna ke tlo mo itia, ke mo xololê.” (Luka 23:​22) Ka gona o dira gore Jesu a bethwe ka sefepi seo se nago le mabja a mantši seo se gagolago Jesu gabohloko ka mokokotlong. Ke moka madira a mo gwahlametša mphapahlogo wa meetlwa hlogong. Ba a mo kwera le go mo otla ka lehlaka le thata, ba gatelela mphapahlogo wa meetlwa go tsenelela letlalong la hlogo ya gagwe. Nakong ka moka ya go kwešwa bohloko ka mo go sa hlalosegego le go gobošwa, Jesu o dutše a e-na le seriti se se sa tlwaelegago le matla.

Pilato​—mohlomongwe a holofetše gore boemo bja Jesu bja go otlwa bo tla tsoša kwelobohloko e itšego​—o a boela o mo iša pele ga lešaba. Pilato o bolela gore: “Bônang, ke mo tliša fá ntlê xo lena, xore Le tsebê xobane xa xo molato wo ke o hwetšaxo xo Yêna.” Eupša baperisita ba bagolo ba goeletša ka gore: “Mmapolê, mmapolê!” (Johane 19:​4-6) Ge lešaba le dutše le phegelela kudu, Pilato o a ineela gomme o neela Jesu gore a kokotelwe koteng.

Lehu le Bohloko

Bjale ke gare-gare mesong, mohlomongwe go batamela go ba mosegare wa sekgalela. Jesu o ntšhetšwa ka ntle ga Jerusalema o išwa lefelong leo le bitšwago Gologotha. Jesu o kokotelwa dipikiri tše dikgolo diatleng le maotong koteng ya tlhokofatšo. Mantšu ga a kgone go hlalosa bohloko ge boima bja mmele wa gagwe bo gagola dintho tša dipikiri ge kota ya tlhokofatšo e emišwa. Lešaba le bokane bakeng sa go bona Jesu le disenyi tše pedi ba kokotelwa koteng. Ba bantši ba kwera Jesu. Baperisita ba bagolo le ba bangwe ba kwera ka gore: “Ba bangwê ó ba phološitše; byale ó šitwa xo iphološa.” Gaešita le mašole le disenyi tše pedi tšeo di kokotetšwego ba kwera Jesu.​—Mateo 27:​41-44.

Gatee-tee mosegareng wa sekgalela, ka morago ga ge Jesu a bile koteng ka lebakanyana, lefsifsi leo le boifišago leo le tšwago go Modimo le aparela nageng lebaka la diiri tše tharo.a Mohlomongwe ke lefsifsi le le le hlohleleditšego sesenyi se sengwe gore se kgalemele sela se sengwe. Ke moka se retologela go Jesu, se lopa ka gore: “O nkxopolê xe O e-tla ka mmušô wa xaxo.” A tumelo e makatšago gakaakang go lebeletšanwe le lehu le le batamelago! Jesu o arabela ka gore: “Ruri ke a go botša lehono, o tlo ba le nna Paradeiseng.”​—Luka 23:​39-43, bapiša le NW.

Mo e ka bago ka iri ya boraro thapama, Jesu o kwa gore bofelo bja gagwe bo batametše. O re: “Ke nyorilwe!” Ke moka o goeletša ka lentšu le le phagamego o re: “Modimo wa-ka! Modimo wa-ka! O ntloxeletše’ng?” Jesu o kgona go kwa gore, go bjalo ka ge eka Tatagwe o tlošitše tšhireletšo ya gagwe go yena e le go dumelela gore potego ya gagwe e lekwe ka mešego fela, gomme o tsopola mantšu a Dafida. Motho yo mongwe o bea sepontšhe seo se inetšwego ka gare ga beine e galakago molomong wa Jesu. Ka morago ga go nwa beine e nyenyane, Jesu o hemela godimo o re: “Xo phethexile!” Ke moka o goeletša ka gore: “Tata! Môya wa-ka ke o xafêla diatleng tša xaxo,” o inamiša hlogo ya gagwe gomme o a hwa.​—Johane 19:​28-30; Mateo 27:​46; Luka 23:​46; Psalme 22:1.

Ka ge e šetše e le karolong ya mafelelo ya thapama, go dirwa ditokišetšo tša kapejana bakeng sa go boloka Jesu pele ga ge Sabatha (Nisani 15) e thoma ge letšatši le sobela. Josefa wa Arimathea, yo e lego setho se se tumilego sa lekgotla la Sanhedrine yoo e bego e le morutiwa wa Jesu wa ka sephiring o hwetša tumelelo ya go mmoloka. Nikodemo, yo le yena e lego setho sa lekgotla la Sanhedrine yo a ipoletšego ka sephiring gore o dumela go Jesu, o thuša ka diponto tše lekgolo (dikhilograma tše 33) tša mira le dinoko. Ba robatša mmele wa Jesu ka šedi ka lebitleng la segopotšo le lefsa kgaufsinyane.

O Boetše o a Phela!

Go sa dutše go le lefsifsi e sa le mesong kudu ka Sontaga ge Maria Magdalena le basadi ba bangwe ba batamela lebitleng la Jesu. Eupša bonang! Lefsika le le lego ka pele ga lebitla le kgokološitšwe. Ee, lebitla ga le na selo! Maria Magdalena o kitimela go yo botša Petro le Johane. (Johane 20:​1, 2) E se kgale a tlogile, morongwa o tšwelela go basadi bale ba bangwe. O re: “Lena Le se thšoxeng.” O bile o ba kgothaletša gore: “Le tseb’o hlaxanêla Lè e-ya Lè botša barutiwa ba xaxwe, Le re: O tsoxile.”​—Mateo 28:​2-7.

Ge ba dutše ba itlhaganetše, ba gahlana le mang ge e se Jesu ka boyena! O ba botša gore: “Sepelang Le botšê bana bešo.” (Mateo 28:​8-10) Ka morago, Maria Magdalena o lebitleng o a lla ge Jesu a tšwelela go yena. Ga a kgone go swara lethabo la gagwe gomme o itlhaganela go botša barutiwa ba bangwe ditaba tše di kgahlišago. (Johane 20:​11-​18) Ge e le gabotse, ke gahlano Sontageng seo sa go se lebalege, Jesu yo a tsošitšwego a tšwelela go barutiwa ba ba fapa-fapanego, go sa belaetše gore o boetše o a phela e le ka kgonthe!

Kamoo o Kgomegago ka Gona

Ditiragalo tša nywaga e 1 966 e fetilego di ka go kgoma bjang gona bjale mollwaneng wa ngwaga-kgolo wa bo-21? Hlatse yeo e bonego ditiragalo tšeo ka mahlo e hlalosa gore: “Leratô la Modimo le a re ratilexo ka lôna, le bônaxetše ka xe a roma Morwa wa xaxwe Mo-tswalwa-esi, a tla lefaseng xore re phelê ka yêna. Leratô xe le le xôna, xa se ka xore ké rena re ratilexo Modimo; ké ka xe Yêna a re ratile a roma Morwa wa xaxwe, a ba seloba sa dibe tša rena.”​—1 Johane 4:​9, 10.

Ke ka tsela efe lehu la Kriste e lego “seloba”? Ke seloba ka gobane le dira gore tswalano e rategago le Modimo e kgonege. Motho wa pele, Adama, o ile a rabela malebana le Modimo gomme ka go rialo a fetišetša sebe le lehu baneng ba gagwe. Ka lehlakoreng le lengwe, Jesu o ile a neela bophelo bja gagwe e le topollo ya go lefelela theko bakeng sa sebe sa batho le lehu, ka go rialo a nea motheo bakeng sa gore Modimo a fetišetše kgaugelo le kamogelo go bona. (1 Timotheo 2:​5, 6) Ka go bontšha tumelo sehlabelong sa Jesu seo se bipago sebe, o ka lopollwa kahlolong yeo o e abetšego go modira-dibe Adama. (Ba-Roma 5:​12; 6:​23) Ka go rialo, se se go bulela sebaka se sebotse sa go ba le tswalano ya motho ka noši le Tatago yo lerato wa legodimong, Jehofa Modimo. Ka boripana, sehlabelo sa Jesu se se phagamego se ka bolela bophelo bjo bo sa felego go wena.​​—Johane 3:​16; 17:3.

Ditaba tše le tše dingwe tše di tswalanago le tšona di tla ahla-ahlwa ka Labone mantšiboa, April 1, mafelong a dikete tše masome-some go dikologa lefase ge batho ba dimilione ba tla be ba bokane go gopola lehu la Jesu Kriste. O laletšwa gore o be gona. Dihlatse tša Jehofa tša tikologong ya geno di tla thabela go go botša lefelo le nako yeo o ka bago gona. Ka ntle le pelaelo go ba gona ga gago go tla godiša tebogo ya gago ya seo Modimo wa rena yo lerato le Morwa wa gagwe yo a rategago ba se dirilego letšatšing la mafelelo la bophelo bja Jesu e le motho.

[Mengwalo ya tlase]