Boineelo Le Tokologo Ya Go Ikgethela

“Kriste ó re lokololetše tokoloxô.” —BA-GALATIA 5:1.

1. Mantšu a Sehebere le Segerika ao a fetoletšwego e le “boineelo,” “kgakolo,” goba “kgethagatšo” a šoma kudu go eng?

BANGWADI ba Beibele ba dirišitše mantšu a mmalwa a Sehebere le Segerika go fetiša kgopolo ya go ba ba arogilego goba ba hlaotšwego, bakeng sa go dirišetšwa morero o mokgethwa. Dibeibeleng tša Seisemane mantšu a a fetolelwa ka mantšu a go swana le “dedication [boineelo],” “inauguration [kgakolo],” goba “consecration [kgethagatšo].” Ka dinako tše dingwe mantšu a a dirišwa mabapi le meago—ka kakaretšo tempele ya Modimo Jerusalema ya bogologolo le borapedi bjo bo bego go dirwa moo. Ke ka sewelo mantšu a a dirišwago ge go bolelwa ka ditaba tše e sego tša bodumedi.

Go Ineela go “Modimo wa Isiraele”

2. Ke ka baka la’ng Jehofa a be a ka bitšwa “Modimo wa Isiraele” ka mo go nepagetšego?

² Ka 1513 B.C.E., Modimo o ile a ntšha ba-Isiraele bohlankeng bja Egipita. Go se go ye kae ka morago ga moo, o ile a ba hlaola e le batho ba gagwe ba kgethegilego, a ba tsenya tswalanong ya kgwerano le yena. Ba be ba boditšwe gore: “Byale, xe Le tlo theetša ruri se ke se bolêlaxo, la hlôkômêla kxwêranô ya-ka, ké mo Le tl’o xo ba baruiwa ba-ka mo dithšabeng ka moka; ka xobane lefase ka moka ké la-ka.” (Ekisodo 19:5; Psalme 135:4) Ka go dira ba-Isiraele leruo la gagwe le le kgethegilego, Jehofa o be a ka bitšwa “Modimo wa Isiraele” ka mo go nepagetšego.—Jošua 24:23.

3. Ke ka baka la’ng Jehofa a be a sa bontšhe go beba sefahlego ka go kgetha Isiraele e le batho ba gagwe?

³ Ka go dira ba-Isiraele batho ba gagwe ba ineetšego, Jehofa o be a sa bebe sefahlego ka gobane o ile a ba a nagana ka bao e sego ba-Isiraele ka tsela e lerato. O ile a laela batho ba gagwe gore: “Xe moeng a diiletše xo lena mo naxeng ya xeno, Le se kê la mo pateletša. Moeng e a diiletšexo xo lena a dulê xo lena byalo ka motho wa xeno e a tswaletšwexo xaê. O mo ratê ka mokxwa wo O ithataxo ka wôna; ka xobane le lena Le kile la ba badiiledi naxeng ya Egipita. Ké Nna Morêna Modimo wa lena.” (Lefitiko 19:33, 34) Nywaga-kgolong ka morago, pono ya Modimo e be e kgomile moapostola Petro ka go tia yo a dumetšego gore: “Ka kxonthe, ke lemoxa xore Modimo xa a bebe motho. Anthe dithšabeng ka moka ó kxahlwa ke ba ba mmoifaxo, xe ba dira tše di lokilexo.”—Ditiro 10:34, 35.

4. Maemo a tswalano magareng ga Modimo le Isiraele e be e le afe, gona na ba-Isiraele ba ile ba a phelela?

⁴ Ela hloko gape gore go ba batho ba ineetšego ba Modimo go be go ithekgile ka boemo bjo itšego. Ke feela ge e ba ba be ba e-kwa lentšu la Modimo le go boloka kgwerano ya gagwe moo ba bego ba tla ba “leruo [la gagwe] le le kgethegilego.” (NW) Ka mo go nyamišago, ba-Isiraele ba ile ba palelwa ke go fihlelela dinyakwa tše. Ka morago ga go gana Mesia yo a bego a romilwe ke Modimo lekgolong la pele la nywaga C.E., ba ile ba lahlegelwa ke boemo bja bona bjo bo nago le tokelo. Jehofa e be e se sa hlwa e le “Modimo wa Isiraele.” Ba-Isiraele ba tlhago e be e se sa hlwa e le batho ba ineetšego ba Modimo.—Bapiša le Mateo 23:23.

Boineelo bja “Isiraele ya Modimo”

5, 6. (a) Jesu o be a bolela’ng ka mantšu a gagwe a boporofeta ao a ngwadilwego go Mateo 21:42, 43? (b) “Isiraele ya Modimo” e bile gona neng gomme bjang?

⁵ Na se se be se bolela gore Jehofa bjale o be a tla hloka batho ba ineetšego? Aowa. A tsopola mopsalme, Jesu Kriste o boletše e sa le pele gore: “A xa L’ešo la bala mangwalong mo xo rexo: Lefsika le baaxi ba le nyaditšexo le bile la mothêô wa sekhutlô? Tše byalo xe di dirêxa di tšwa xo Morêna; re bôna è le matete. Ké xôna ke Le botšaxo ke re: Le tlo amoxiwa mmušô wa Modimo; ’me o tlo fiwa sethšaba se se tl’o xo tšweletša dienywa tša sôna.”—Mateo 21:42, 43.

⁶ “Sethšaba se se tl’o xo tšweletša dienywa tša sôna” se itlhatsetše e le phuthego ya Bokriste. Nakong ya go ba ga gagwe ga nakwana lefaseng, Jesu o ile a kgetha bao e bego e tla ba ditho tša yona tša pele. Eupša letšatšing la Pentekoste ya 33 C.E., Jehofa Modimo e bile yena ka noši yo a theilego phuthego ya Bokriste ka go tšhollela moya wa gagwe o mokgethwa go ditho tša yona tša pele tše ka bago 120. (Ditiro 1:15; 2:1-4) Go etša ge moapostola Petro a ngwadile ka morago, phuthego ye yeo e bego e sa tšwa go hlongwa ka nako yeo e bile ‘moloko wo o hlaotšwego, boperisita bja bogoši, setšhaba se sekgethwa, selete se Yena a lego Mong wa sona.’ Ba kgethetšwe eng? Gore ba “tsebatšê mabothakxa a Eo a [ba] biditšexo [ba] le lefsifsing, a [ba] biletša seetšeng sa xaxwe se se tlabaxo.” (1 Petro 2:9) Balatedi ba Kriste ba ba tloditšwego ka moya wa Modimo bjale e be e le setšhaba se se ineetšego, e lego “Isiraele ya Modimo.”—Ba-Galatia 6:16, NW.

7. Ditho tša Isiraele ya Modimo di be di tla thabela’ng, ka gona di be di boditšwe gore di pheme eng?

⁷ Gaešita le ge ditho tša setšhaba se sekgethwa e be e le “batho ba leruo le le kgethegilego,” (NW) ba be ba sa swanela go dirwa bahlanka. Ka mo go fapanego, ba be ba swanetše go thabela tokologo e kgolo go feta yeo e bego e thabelwa ke setšhaba se se ineetšego sa Isiraele ya tlhago. Jesu o ile a holofetša bao e bego e tla ba ditho tša setšhaba se se sefsa gore: “Le tlo tseba therešo, gomme therešo e tlo le lokolla.” (Johane 8:32, PK) Moapostola Paulo o bontšhitše gore Bakriste ba be ba lokolotšwe go dinyakwa tša kgwerano ya Molao. O ile a lemoša badumedi-gotee le yena ba Galatia mabapi le se gore: “Kriste ó re lokololetše tokoloxô. Êmang-xê Le tiê, xore Le se boêlê ditlêmong tša bohlanka.”—Ba-Galatia 5:1.

8. Ke boemong bofe thulaganyo ya Bokriste e neago batho tokologo e kgolo go feta yeo e bilego gona ka tlase ga kgwerano ya Molao?

⁸ Ka go se swane le Isiraele ya tlhago ya bogologolo, go fihlela le lehono Isiraele ya Modimo e kwele ka go tia dinyakwa tša boineelo bja yona. Se ga se a swanela go makatša ka gobane ditho tša yona di ikgethetše go kwa ka go rata. Le ge ditho tša Isiraele ya tlhago di ile tša ineela ka lebaka la tswalo, ditho tša Isiraele ya Modimo di bile bjalo ka go ikgethela. Ka go rialo thulaganyo ya Bokriste e dula e fapane le kgwerano ya Molao ya ba-Juda yeo e gapeleditšego boineelo go batho ka ntle le go ba nea tokologo ya go ikgethela.

9, 10. (a) Jeremia o bontšhitše bjang gore go be go tla ba le phetogo mabapi le boineelo? (b) Ke ka baka la’ng o be o ka bolela gore ga se Bakriste ka moka ba ineetšego lehono bao e lego ditho tša Isiraele ya Modimo?

⁹ Moporofeta Jeremia o ile a bolela e sa le pele ka phetogo yeo e lego mabapi le boineelo ge a be a ngwala gore: “Tsebang! Xo tlo tla letšatši le ke tl’o xo dira kxwêranô e mphsa le ba leloko la Isiraele le la Juda. Ó r’yalo Morêna. E ka se bê kxwêranô e ka-kaxo yela ke e dirilexo le bô-rr’abô, mola kè ba swara ka seatla ka ba nthša Egipita. Kxwêranô yeo ba e sentše, mola kè le Mong wa bònà. Ó r’yalo Morêna. Xobane kxwêranô ye ke tl’o xo e dira le bôná xe xo fetile mehla yeno, Morêna ó re, šé: Ke tlo bea melaô ya-ka matswalong a bôná, ke tlo e tlôka dipelong tša bôná. Ké tlo ba Modimo wa bôná; ’me bôná e tlo ba sethšaba sa-ka.”—Jeremia 31:31-33.

¹⁰ Ka go ba le molao wa Modimo “ka teng ga bona,” (PK) bjalo ka ge eka o ngwadilwe “dipelong tša bôná,” ditho tša Isiraele ya Modimo di tutueletšega go phelela boineelo bja tšona. Phišego ya tšona e tiile go feta ya ba-Isiraele ba tlhago bao ba bego ba ineetše ka lebaka la tswalo e sego ka go ikgethela. Lehono, phišego e matla ya go dira thato ya Modimo bjalo ka ge e bontšhwa ke Isiraele ya Modimo, e bontšhwa ke barapedi-gotee ba fetago dimilione tše hlano lefaseng ka moka. Le bona ka mo go swanago ba neetše maphelo a bona go Jehofa Modimo bakeng sa go dira thato ya gagwe. Gaešita le ge batho ba ba se na kholofelo ya bophelo bja legodimong go etša bao ba bopago Isiraele ya Modimo, ba thabela tebelelo ya go phela ka mo go sa felego lefaseng ka tlase ga pušo ya Mmušo wa legodimong wa Modimo. Ba bontšha tebogo ya go leboga Isiraele ya moya ka go thekga ka mafolofolo ditho tša yona tše sego kae tšeo di šetšego go phethagatšeng kabelo ya tšona ya go ‘tsebatša mabothakga a yo a ba biditšego ba le lefsifsing, a ba biletša seetšeng sa gagwe se se tlabago.’

Go Diriša ka Bohlale Tokologo e Neilwego ke Modimo

11. Motho o bopilwe a e-na le bokgoni bofe, gomme bo ka dirišwa bjang?

¹¹ Modimo o bopile batho gore ba bone tokologo e le bohlokwa. O ile a ba nea bokgoni bja tokologo ya go ikgethela. Batho ba babedi ba pele ba ile ba diriša tokologo ya bona ya go ikgethela. Lega go le bjalo, ba dirile kgetho ka bošilo le ka go hloka lerato yeo e lebišitšego kotsing bakeng sa bona gotee le bana ba bona. Le gona, se se bontšha gabotse gore Jehofa le ka mohla ga a gapeletše dibopiwa tše nago le tlhaologanyo go tšea tsela e fapanego le ya maikemišetšo goba dikganyogo tša tšona tša ka gare. Ka ge ‘Modimo a rata mo-nea-a-thabile,’ boineelo bo nnoši bjo bo amogelegago go yena ke bjo bo theilwego leratong, bjo bo dirwago ka go rata ka lethabo, bjo bo theilwego tokologong ya go ikgethela. (2 Ba-Korinthe 9:7) Mohuta le ge e le ofe o mongwe ga o amogelege.

12, 13. Timotheo o dira bjang e le mohlala bakeng sa tlwaetšo e swanetšego ya bana, gomme mohlala wa gagwe o lebišitše bafsa ba bantši go eng?

¹² Ka go lemoga ka mo go tletšego dinyakwa tše, Dihlatse tša Jehofa di bolelela go ineela ga motho go Modimo, eupša le ka mohla ga di gapeletše motho le ge e le ofe go dira boineelo bjo bo bjalo, gaešita le bana ba tšona ka noši. Ka go fapana le dikereke tše dintši, Dihlatse ga di kolobetše bana ba tšona e sa le masea bjalo ka ge eka go a kgonega go ba gapeletša go ineela ka ntle le go ikgethela ga motho ka noši. Mohlala wa Mangwalo wo o swanetšego go latelwa ke wo o ilego wa latelwa ke lesogana Timotheo. Ge e le motho yo mogolo, o ile a botšwa ke moapostola Paulo gore: “Tšwela pele dilong tšeo o ithutilego tšona le tšeo o ilego wa kgothaletšwa gore o di dumele, o tseba batho bao o ithutilego tšona go bona le gore go tloga bjaneng o ile wa tseba mangwalo a makgethwa ao a kgonago go go hlalefišetša phologo ka tumelo e lego mabapi le Kriste Jesu.”—2 Timotheo 3:14, 15, NW.

¹³ Ke mo go lemogegago gore Timotheo o be a tseba mangwalo a makgethwa ka gobane o be a rutilwe go tloga bjaneng. O be a kgothaleditšwe—e sego a gapeleditšwe—gore a dumele dithuto tša Bokriste ke mmagwe le makgolo’agwe. (2 Timotheo 1:5) Ka baka leo, Timotheo o bone bohlale bja go ba molatedi wa Kriste gomme ka go rialo a dira kgetho ya motho ka noši ya boineelo bja Bokriste. Mehleng yeno, masogana le dikgarebe ba masome a dikete bao batswadi ba bona e lego Dihlatse tša Jehofa ba latetše mohlala wo. (Psalme 110:3) Ba bangwe ga se ba dira bjalo. Ke taba ya boikgethelo bja motho ka noši.

O Kgetha go ba Mohlanka wa Mang?

14. Ba-Roma 6:16 e re botša’ng ka tokologo e feletšego?

¹⁴ Ga go motho yo a lokologilego ka mo go feletšego. Motho yo mongwe le yo mongwe o thibelwa tokologong ya gagwe ke melao ya tlhago, bjalo ka molao wa matla-kgogedi wo o ka se hlokomologwego ka ntle le go hloka kotsi. Gape le ka kgopolo ya moya, ga go motho yo a lokologilego ka mo go feletšego. Paulo o itše: “A xa Le tsebe xore yo Le ineêlaxo yêna la mo kwa, Le balata ba yêna-eo Le mo kwaxo. Le ka ba balata ba sebe, ’me sa Le iša lehung. Le ka ba ba xo kwa Modimo, ’me la išwa tokong.”—Ba-Roma 6:16.

15. (a) Batho ba ikwa bjang ka go ba bahlanka, eupša ba bantši ba feleletša ba dira’ng? (b) Ke dipotšišo dife tše swanetšego tšeo mo gongwe re ka ipotšišago tšona?

¹⁵ Kgopolo ya go ba mohlanka wa motho yo mongwe e kgoma batho ba bantši e le e sa kgahlišego. Lega go le bjalo, lefaseng la lehono therešo ke gore batho gantši ba itumelela go hlalefetšwa le go tutuetšwa ka ditsela tše dintši kudu tše di sa lemogegego moo e lego gore ba feleletša ba dira ka go se ikemišetše seo ba bangwe ba nyakago gore ba se dire. Ka mohlala, diintaseteri tša papatšo le lefase la tša boithabišo di leka go gatelela batho gore ba swane, di ba beela ditekanyetšo gore ba di latele. Mekgatlo ya dipolitiki le ya bodumedi e dira gore batho ba thekge dikgopolo le dipakane tša yona, e sego ka dipolelo tše kgodišago ka mehla, eupša gantši ka go gokeletša kgopolong ya botee goba potego e sa kwanantšhego. Ka ge Paulo a boletše gore ‘re bahlanka ba bao re ba kwago,’ yo mongwe le yo mongwe wa rena o dira gabotse go ipotšiša gore, ‘Ke mohlanka wa mang? Ke mang yo a dirago tutuetšo e kgolo diphethong tša-ka le tseleng ya-ka ya bophelo? Na ke baruti ba bodumedi, baetapele ba tša dipolitiki, bo-rakgwebo ba maemo ba dikhorane goba batho ba tša boithabišo? Ke kwa mang—Modimo goba batho?’

16. Bakriste ke bahlanka ba Modimo ka kgopolo efe, gomme pono e swanetšego ka bohlanka bjo bo bjalo ke efe?

¹⁶ Bakriste ga ba lebelele go kwa Modimo e le go šitiša tokologo ya motho ka noši mo go sa swanelago. Ba diriša tokologo ya bona ka go rata ka mokgwa wa Mohlala wa bona e lego Jesu Kriste, ba dumelelanya dikganyogo tša motho ka noši le dilo tše di tlago pele le thato ya Modimo. (Johane 5:30; 6:38) Ba hlagolela “kêlêlô ya Kriste,” ba ikokobeletša yena e le Hlogo ya phuthego. (1 Ba-Korinthe 2:14-16; Ba-Kolose 1:15-18) Se se swana le mosadi yo a nyalwago gomme ka go rata a dirišana le monna yo a mo ratago. Ge e le gabotse, sehlopha sa Bakriste ba tloditšwego se bolelwa e le kgarebe e sekilego yeo e holofeditšwego Kriste lenyalong.—2 Ba-Korinthe 11:2; Ba-Efeso 5:23, 24; Kutollo 19:7, 8.

17. Dihlatse tša Jehofa ka moka di kgethile go ba eng?

¹⁷ Yo mongwe le yo mongwe wa Dihlatse tša Jehofa go sa šetšwe gore o na le kholofelo ya legodimong goba ya lefaseng, o dirile boineelo bja motho ka noši go Modimo bakeng sa go dira thato ya gagwe le go mo kwa e le Mmuši. Go Hlatse e nngwe le e nngwe, boineelo e bile kgetho ya motho ka noši ya go ba mohlanka wa Modimo go e na le go dula e le mohlanka wa batho. Se se dumelelana le keletšo ya moapostola Paulo e rego: “Le rekilwe ka thêkô e kxolo. Le se kê la ba bahlanka ba batho.”—1 Ba-Korinthe 7:23.

Go Ithuta Gore re Holege

18. Motho yo e tlago go ba Hlatse o swanelegela kolobetšo neng?

¹⁸ Pele motho a ka swanelegela go ba yo mongwe wa Dihlatse tša Jehofa, o swanetše go fihlelela ditshwanelego tša Mangwalo. Bagolo ba ela hloko go hlahlobeng ge e ba yo a tlago go ba Hlatse a kwešiša e le ka kgonthe dilo tše di tswalanago le boineelo bja Bokriste. Na o nyaka go ba yo mongwe wa Dihlatse tša Jehofa e le ka kgonthe? Na o ikemišeditše go phelela seo se se se akaretšago? Ge e ba go se bjalo, gona ga a swanelegele kolobetšo.

19. Ke ka baka la’ng go se na lebaka la go swaya motho yo mongwe yo a dirago phetho ya go ba mohlanka yo a ineetšego wa Modimo diphošo?

¹⁹ Lega go le bjalo, ge e ba motho a fihlelela dinyakwa ka moka, ke ka baka la’ng a swanetše go swawa diphošo bakeng sa go dira phetho ya motho ka noši ka go ithapa ya gore o itumelela go tutuetšwa ke Modimo le ke Lentšu la Gagwe le le buduletšwego? Na ke mo go sa amogelegego go itumelela go tutuetšwa ke Modimo go e na le batho? Goba na se ke se se sa holego? Dihlatse tša Jehofa ga di nagane bjalo. Di dumelelana ka pelo ka moka le mantšu a Modimo ao a ngwadilwego ke Jesaya gore: “Nna Morêna Modimo wa xaxo ke Xo ruta tše di Xo holaxo; ke Xo sepediša mo tseleng ye O swanetšexo xo e swara.”—Jesaya 48:17.

20. Batho ba lokollwa ke therešo ya Beibele dibopegong dife?

²⁰ Therešo ya Beibele e lokolla batho go dumeleng dithuto tša maaka tša bodumedi, tše bjalo ka tlaišo ya ka mo go sa felego diheleng tša mollo. (Mmoledi 9:5, 10) Go e na le moo, e tlatša dipelo tša bona ka tebogo ya go leboga kholofelo ya kgonthe bakeng sa bahu—tsogo yeo e dirwago gore e kgonege motheong wa sehlabelo sa topollo sa Jesu Kriste. (Mateo 20:28; Ditiro 24:15; Ba-Roma 6:23) Therešo ya Beibele e lokolla batho dikgakanegong tša go ithekga ka dikholofetšo tša dipolitiki tšeo di palelwago ka mehla. Go e na le moo, e dira gore dipelo tša bona di falale ka lethabo ka go tseba gore Mmušo wa Jehofa o šetše o buša magodimong gomme go se go ye kae o tla buša lefaseng ka moka. Therešo ya Beibele e lokolla batho mekgweng yeo gaešita le ge e ipiletša nameng ya sebe, e hlomphollago Modimo le yeo e lefišago gabohloko ka sebopego sa ditswalano tše di senyegilego, bolwetši le lehu la pele ga nako. Ka boripana, go ba mohlanka wa Modimo ke mo go holago ka go fetišiša go e na le go ba mohlanka wa batho. Ge e le gabotse, boineelo go Modimo bo holofetša mehola “bophelong byono . . . ’me mehleng e tl’o xo tla . . . bophelô byo bo sa felexo.”—Mareka 10:29, 30.

21. Dihlatse tša Jehofa di lebelela bjang boineelo go Modimo, gomme kganyogo ya tšona ke eng?

²¹ Dihlatse tša Jehofa lehono ga se tša ka tša ba karolo ya setšhaba se ineetšego ka tswalo go etša ge go dirile ba-Isiraele ba bogologolo. Dihlatse ke karolo ya phuthego ya Bakriste ba ineetšego. Hlatse e nngwe le e nngwe yeo e kolobeditšwego e bile yona ka go diriša tokologo ya go ikgethela e le motho yo a ikemetšego go direng boineelo. Ka kgonthe, go Dihlatse tša Jehofa boineelo bo feleletša ka tswalano e borutho ya motho ka noši le Modimo yeo e swawago ka tirelo ya boikemišetšo go yena. Tswalano ye yeo e thabišago di kganyoga go e kgomarela ka pelo ka moka, di kgomarele ka mo go sa felego tokologong yeo Jesu Kriste a di lokolletšego go yona.

O be o tla Araba Bjang?

◻ Ke ka baka la’ng Modimo a be a sa bebe sefahlego ka go kgetha Isiraele gore e be “leruo [la gagwe] le le kgethegilego”?

◻ Ke ka baka la’ng o be o ka re boineelo bja Bokriste ga bo akaretše go lahlegelwa ke tokologo?

◻ Mehola ya boineelo go Jehofa Modimo ke efe?

◻ Ke ka baka la’ng go le kaone go ba mohlanka wa Jehofa go e na le go ba mohlanka wa batho?

[Seswantšho go letlakala 15]

Isiraeleng ya bogologolo, boineelo go Modimo e be e le taba ya tswalo

[Seswantšho go letlakala 16]

Boineelo bja Bokriste ke taba ya go ikgethela