Go Phelela Boineelo Bja Bokriste Ka Tokologo

“Mo xo lexo Môya wa Morêna, ké mo xo lexo khunoloxô.” —2 BA-KORINTHE 3:17.

1. Dihlatse tša Jehofa di ineetše go mang, gomme ke ka baka la’ng di diriša mokgatlo wa molao?

DIHLATSE TŠA JEHOFA di dumela gore bodumedi bja tšona bo tla ba gona ka mo go sa felego. Ka gona di letetše go hlankela Modimo “ka Môya le ka therešô” go ya ka mo go sa felego. (Johane 4:23, 24) Ka ge e le dibopiwa tše di nago le tokologo ya boikgethelo, Bakriste ba ba dirile boineelo bjo bo feletšego go Jehofa Modimo gomme ba ikemišeditše go bo phelela. Ka baka leo, ba ithekga ka Lentšu la Modimo le ka moya wa gagwe o mokgethwa. Ge di dutše di phegelela ka pelo ka moka tsela ya tšona ya boineelo bja tšona bja Bokriste ka tokologo yeo e neilwego ke Modimo, Dihlatse di bontšha tlhompho e swanetšego bakeng sa karolo ya “babuši ba bagolo” ba mmušo le go diriša didirišwa tša molao le dithulaganyo ka tshwanelo. (Ba-Roma 13:1, NW; Jakobo 1:25) Ka mohlala, Dihlatse di diriša Mokgatlo wa Watch Tower e le sedirišwa sa molao—se sengwe sa tše dintši tše di lego dinageng tše di fapa-fapanego—go dira gore di kgone go phetha modiro wa tšona wa go thuša magagabo tšona, kudu-kudu ka ditsela tša moya. Eupša Dihlatse di ineetše go Modimo e sego go mokgatlo le ge e le ofe wa molao gomme boineelo bja tšona go Jehofa e tla ba bja ka mo go sa felego.

2. Ke ka baka la’ng Mokgatlo wa Watch Tower le mekgatlo e swanago ya molao e lebogwa kudu ke Dihlatse tša Jehofa?

² Ka ge e le bahlanka bao ba ineetšego go Modimo, Dihlatse tša Jehofa di tlamegile go latela ditaelo tša Jesu tša gore “[di] dirê dithšaba ka moka barutiwa ka xo ba kolobetša Leineng la Tate le la Morwa le la Môya o mokxêthwa, le ka xo ba ruta.” (Mateo 28:19, 20) Modiro wo o tla tšwela pele go fihla bofelong bja tshepedišo ya dilo ka gobane Jesu o boletše gape gore: “Ebangedi yé ya mmušô wa maxodimong e tlo xoêlêlwa lefaseng ka moka xore e bê bohlatse mo xo dithšaba tšohle; ya tlo ba xôna bofêlô bo fihlaxo.” (Mateo 24:3, 14) Ngwaga o mongwe le o mongwe, difeketori tša kgatišo tša Mokgatlo wa Watch Tower le mekgatlo e swanago ya molao di abela Dihlatse tša Jehofa Dibeibele, dipuku, diporoutšha le dimakasine tše dimilione bakeng sa go di diriša modirong wa tšona wa boboledi wa lefaseng ka bophara. Ka gona mekgatlo ye ya molao e bohlokwa kudu go thušeng bahlanka ba ineetšego ba Modimo gore ba phelele boineelo bja bona go yena.

3. Ke ka kgopolo efe Dihlatse tša Jehofa di bego di diriša lentšu “Mokgatlo”?

³ Motho yo mongwe mo gongwe a ka bolela gore tsela yeo Dihlatse di bolelago ka yona ka Mokgatlo wa Watch Tower—goba gantši kudu e le feela “Mokgatlo”—e bontšha gore di o lebelela bjalo ka se se fetago sedirišwa sa molao. Na ga di o lebelele o na le taolo ya mafelelo ditabeng tša borapedi? Puku ya Dihlatse tša Jehofa—Bagoeledi ba Mmušo wa Modimo e hlalosa ntlha ye ka mo go kwalago ka go hlalosa gore: “Ge Morokami [wa Seisemane wa June 1, 1938] o be o bolela ka ‘Mokgatlo,’ se se be se bolela e sego ka lekgotla feela la molao, eupša ka sehlopha sa Bakriste ba tloditšwego seo se bego se hlomile lekgotla leo la molao le go le diriša.”a Ka gona polelwana yeo e be e emela “molaki e a bôtêxaxo yo bohlale.” (Mateo 24:45) Ke ka kgopolo ye moo Dihlatse di dirišitšego ka kakaretšo lentšu “Mokgatlo.” Go ba gona, mokgatlo wa molao le “molaki e a bôtêxaxo yo bohlale” ga se mantšu ao a dirišwago ka go swana. Balaodi ba Mokgatlo wa Watch Tower ba a kgethwa, mola Dihlatse tšeo di bopago “molaki e a bôtêxaxo” di tlotšwa ka moya o mokgethwa wa Jehofa.

4. (a) Dihlatse tše dintši di itlhalosa bjang e le gore di pheme go se kwešiše? (b) Ke ka baka la’ng re swanetše go ba ba leka-lekanego ge e le mabapi le mareo?

⁴ Gore di pheme go se kwešiše, Dihlatse tša Jehofa di leka go ba tše šetšago mabapi le kamoo di itlhalosago ka gona. Go e na le gore, “Mokgatlo o ruta,” Dihlatse tše dintši di kgetha go diriša dipolelwana tše bjalo ka “Beibele e re” goba, “Ke kwešiša Beibele e ruta gore.” Ka tsela ye di gatelela phetho ya motho ka noši yeo Hlatse e nngwe le e nngwe e e dirilego go amogeleng dithuto tša Beibele gomme e bile di phema go nea kgopolo e fošagetšego ya gore Dihlatse di tlemeletšwe ka tsela e itšego ditaelong tša sehlotswana se itšego sa bodumedi. Go ba gona, ditšhišinyo mabapi le mareo ga se tša swanela go ba taba yeo go ngangišanwago ka yona. Go feta moo, mareo ke a bohlokwa feela go fihla tekanyong e itšego moo a thibelago go se kwešiše. Go nyakega teka-tekano ya Bokriste. Beibele e re lemoša gore “[re] lesê xo tšea dikxang [mabapi le mantšu, NW].” (2 Timotheo 2:14, 15) Mangwalo gape a bolela molao wo wa motheo ka gore: “Xe ka maleme Lé sa bolele taba e kwêxaxo, se se bolêlwaxo se ka hlathwa bya’ng?”—1 Ba-Korinthe 14:9.

Moya wa Modimo o Fokotša go Nyakega ga Melao

5. Ba-Korinthe ba Pele 10:23 e swanetše go kwešišwa bjang?

⁵ Moapostola Paulo o ngwadile gore: “Ke dumeletšwe dilô tšohle; fêla, xa se xore ka moka di a hola.” O okeditše ka gore: “Ke dumeletšwe dilô tšohle; fêla, xa se xore ka moka di a axiša.” (1 Ba-Korinthe 10:23) Go molaleng gore Paulo o be a sa bolele gore go dumeletšwe go dira dilo tšeo Lentšu la Modimo le di solago ka mo go feletšego. Ge go bapišwa melao e ka bago 600 yeo e bego e neilwe Isiraele ya bogologolo, go na le ditaelo tše sego kae tše lebanyago tše di tswalanago tšeo di laolago bophelo bja Bokriste. Ka gona, ditaba tše dintši di tlogelelwa letswalo la motho. Motho yo a dirilego boineelo go Jehofa o thabela tokologo yeo e tlišwago ke go hlahlwa ke moya wa Modimo. Ka go dira therešo gore e be ya gagwe, Mokriste o latela letswalo la gagwe le le tlwaeditšwego ka Beibele le go ithekga ka tlhahlo ya Modimo ka go hlahlwa ke moya o mokgethwa. Se se thuša Mokriste yo a ineetšego go dira phetho ya seo se tlago go “axiša” le se se tlago go “hola” yena le ba bangwe. O lemoga gore diphetho tšeo a di dirago di tla kgoma tswalano ya gagwe ka noši le Modimo yo a ineetšego go yena.

6. Dibokeng tša Bokriste, re ka bontšha bjang gore re dirile therešo gore e be ya rena?

⁶ Hlatse e bontšha gore e dirile gore therešo e be ya yona ka go nea ditlhaloso dibokeng tša Bokriste. Mathomong e ka boeletša seo se bolelwago kgatišong yeo e ithutwago. Lega go le bjalo, ge nako e dutše e e-ya e tla dira tšwelopele go ba go fihla ntlheng ya go bolela dithuto tša Beibele ka mantšu a yona ka noši. Ka go rialo e nea bohlatse bja gore e a gola bokgoning bja yona bja go nagana, e sego go fo boeletša seo ba bangwe ba se boletšego. Go hlama dikgopolo ka mantšu a yona ka noši le go bolela mantšu a therešo ka tsela e tšwago pelong go tla e tlišetša lethabo gomme gwa bontšha gore e kgodišegile monaganong wa yona.—Mmoledi 12:10; bapiša le Ba-Roma 14:5b.

7. Ke diphetho dife tšeo di dirilwego ka bolokologi ke bahlanka ba Jehofa?

⁷ Dihlatse tša Jehofa di tutuetšwa ke lerato la go rata Modimo le magagabo tšona. (Mateo 22:36-40) Ke therešo gore di tlemagantšwe ka go tia ka tlemo ya lerato la go swana le la Kriste e le mokgatlo wa lefase ka bophara wa barwarre. (Ba-Kolose 3:14; 1 Petro 5:9) Eupša ka ge e le sebopiwa se se nago le tokologo ya go ikgethela, yo mongwe le yo mongwe o dirile phetho ya motho ka noši ya go tsebatša ditaba tše di lokilego tša Mmušo wa Modimo, go ema gare go tša dipolitiki, go ila madi, go phema mehuta e itšego ya boithabišo le go phela ka ditekanyetšo tša Beibele. Tše ga se diphetho tšeo ba di gapeletšwago. Ke diphetho tšeo di welago thulaganyong ya tsela ya bophelo yeo e kgethwago ka bolokologi ke bao e tlago go ba Dihlatse pele ba ka gata mogato wa boineelo bja Bokriste.

Na di Ikarabela go Sehlopha se Bušago?

8. Ke potšišo efe yeo e nyakago go hlaloswa ka mo go kwalago?

⁸ Beibele e bontšha gabotse gore Bakriste ba therešo ga ba hlankele Modimo ka kgapeletšo. E re: “Morêna ké Yêna Môya; xomme mo xo lexo Môya wa Morêna, ké mo xo lexo khunoloxô.” (2 Ba-Korinthe 3:17) Eupša taba ye e ka dumelelana bjang le kgopolo ya “molaki e a bôtêxaxo yo bohlale” le Sehlopha sa gagwe se Bušago?—Mateo 24:45-47.

9, 10. (a) Molao wa motheo wa bohlogo o šoma bjang ka phuthegong ya Bokriste? (b) Go latela molao wa motheo wa bohlogo go ile gwa nyaka eng go phuthego ya Bokriste ya lekgolong la pele la nywaga?

⁹ Gore re arabe potšišo ye, re swanetše go dula re gopola molao wa motheo wa Mangwalo wa bohlogo. (1 Ba-Korinthe 11:3) Go Ba-Efeso 5:21-24, Kriste o hlaolwa e le “hlôxô ya phuthêxô,” yoo e ‘ikokobeletšago’ yena. Dihlatse tša Jehofa di kwešiša gore molaki yo a botegago le yo bohlale o bopša ke banababo Jesu ba moya. (Ba-Hebere 2:10-13) Sehlopha se sa molaki yo a botegago se kgethetšwe go nea batho ba Modimo “dijô [tša moya] ka lebaka la xôna.” Nakong ye ya bofelo, Kriste o kgethile molaki yo “[go] laka dilô tša xaxwe ka moka.” Ka gona boemo bja sona bo swanelwa ke go hlompšha ke yo mongwe le yo mongwe yo a ipitšago Mokriste.

¹⁰ Morero wa bohlogo ke go boloka botee le go kgonthišetša gore “dilo ka moka di dirwe ka bothakga le ka thulaganyo.” (1 Ba-Korinthe 14:40, NW) Gore ba fihlelele se lekgolong la pele la nywaga, bontši bja Bakriste ba tloditšwego go tšwa go sehlopha sa molaki yo a botegago le yo bohlale ba ile ba kgethelwa go emela sehlopha ka moka. Ka ge ditiragalo tšeo di ilego tša latela di hlatsetše, bolebeledi bjo bo dirišitšwego ke sehlopha se se bušago sa lekgolong la pele la nywaga bo be bo amogetšwe le go šegofatšwa ke Jehofa. Bakriste ba lekgolong la pele la nywaga ba ile ba amogela thulaganyo ka lethabo. Ee, ge e le gabotse ba ile ba amogela le go leboga mafelelo a mabotse ao e a tšweleditšego.—Ditiro 15:1-32.

11. Sehlopha se Bušago sa mehleng yeno se swanetše go lebelelwa bjang?

¹¹ Mohola wa thulaganyo e bjalo o sa le gona. Gona bjale, Sehlopha se Bušago sa Dihlatse tša Jehofa se hlamilwe ka Bakriste ba tloditšwego ba lesome, bao ka moka ba nago le phihlelo ya Bokriste ka nywaga-some e mentši. Ba nea Dihlatse tša Jehofa tlhahlo ya moya go etša ge go dirile sehlopha se bušago sa lekgolong la pele la nywaga. (Ditiro 16:4) Go swana le Bakriste ba pele, Dihlatse di lebelela ka lethabo go banababo rena ba godilego ka tsebo ba Sehlopha se Bušago bakeng sa tlhahlo e theilwego Beibeleng le tlhahlo ditabeng tša borapedi. Gaešita le ge ditho tša Sehlopha se Bušago e le bahlanka ba Jehofa le ba Kriste go etša Bakriste-gotee le bona, Beibele e re laela gore: “Kwang baruti ba lena, Le laiwê ke bôná, xobane ba diša meôya ya lena; xobane ba tlo sekišwa se ba Le dirilexo sôna. Ba kweng, xore ba dirê bà thabile, e sexo ka diphêxêlô; xobane xo ba diriša ka mokxwa woo xo ka se Le hole selô.”—Ba-Hebere 13:17.

12. Mokriste yo mongwe le yo mongwe e le motho yo a ikemetšego o swanetše go ikarabela go mang?

¹² Na boemo bja bolebeledi bjo Mangwalo a bo abetšego Sehlopha se Bušago bo bolela gore yo mongwe le yo mongwe wa Dihlatse tša Jehofa o swanetše go ikarabela go sona ka mediro ya gagwe? E sego go ya ka mantšu a Paulo go Bakriste ba Roma a rego: “O re’ng xe O ahlola ngwan’eno? Ke buša ke re: Xomme wêna, O re’ng O nyatša wa xeno? Hleng ka moka re tlo êma rè lebane le sedulô sa kahlolô sa [Modimo, NW]! . . . Motho mang le mang wa rena ó tlo iphetolêla pele xa Modimo.”—Ba-Roma 14:10-12.

13. Ke ka baka la’ng Dihlatse tša Jehofa di bega modiro wa tšona wa boboledi?

¹³ Lega go le bjalo, na ga se therešo gore Dihlatse e le motho ka o tee ka o tee di letetšwe gore di bege modiro wa tšona wa boboledi? Ee, eupša morero wa se o hlaloswa ka mo go kwalago pukung ya tlhahlo ya Dihlatse yeo e rego: “Balatedi ba pele ba Jesu Kriste ba ile ba kgahlišwa ke dipego tša tšwelopele modirong wa go bolela. (Mareka 6:30) Ge modiro o dutše o atlega, go ile gwa kgobokanywa dipego tša dipalo-palo gammogo le ditaodišo tša diphihlelo tše dikgolo tša bao ba bilego le karolo ka go bolela ditaba tše di lokilego. . . . (Ditiro 2:5-11, 41, 47; 6:7; 1:15; 4:4) . . . Go be go kgothatša gakaakang go badiri bao ba Bakriste ba botegago go kwa dipego tša seo se bego se dirwa! . . . Ka tsela e swanago, phuthego ya Jehofa ya mehleng yeno e ikemišeditše go boloka direkoto tše nepagetšego tša modiro woo o dirwago ka go phethagatša Mateo 24:14.”

14, 15. (a) Ba-Korinthe ba Bobedi 1:24 e šoma bjang go Sehlopha se Bušago? (b) Bakriste e le motho ka o tee ka o tee ba swanetše go dira diphetho tša motho ka noši motheong ofe, gomme ba lemoga therešo efe?

¹⁴ Sehlopha se Bušago ke tokišetšo e lerato le mohlala wa tumelo wo o swanelwago ke go ekišwa. (Ba-Filipi 3:17; Ba-Hebere 13:7) Ka go kgomarela ga bona Kriste le go mo latela e le mohlala, ba ka boeletša mantšu a Paulo a rego: “Xa se xo re re babuši ba tumêlô; ké xo re re badiriši ba lethabô la lena, xobane Le eme tumelong.” (2 Ba-Korinthe 1:24) Ka go lemoga ditshekamelo, Sehlopha se Bušago se lebiša tlhokomelo go mehola ya go kwa keletšo ya Beibele, se nea ditšhišinyo mabapi le go diriša melao le melao ya motheo ya Beibele, se lemoša ka dikotsi tše utegilego le go nea ‘badirišani’ kgothatšo e nyakegago. Ka go rialo se phetha bolaki bja sona bja Bokriste, se ba thuša go kgomarela lethabo la bona le go ba aga tumelong e le gore ba ka ema ba tiile.—1 Ba-Korinthe 4:1, 2; Tito 1:7-9.

¹⁵ Ge e ba Hlatse e dira diphetho tšeo di theilwego keletšong ya Beibele yeo e neilwego ke Sehlopha se Bušago, e dira bjalo ka boikgethelo bja yona ka noši ka gobane thuto ya yona ka noši ya Beibele e e kgodišitše gore ye ke tsela e swanetšego. Hlatse e nngwe le e nngwe e tutuetšwa ke Lentšu la Modimo ka noši bakeng sa go diriša keletšo e kwagalago ya Mangwalo yeo e newago ke Sehlopha se Bušago, e lemoga ka mo go tletšego gore diphetho tšeo e di dirago di tla kgoma tswalano ya yona ya motho ka noši le Modimo yo e ineetšego go yena.—1 Ba-Thesalonika 2:13.

Barutwana le Mašole

16. Gaešita le ge diphetho mabapi le boitshwaro e le taba ya motho ka noši, ke ka baka la’ng ba bangwe ba kgaolwa?

¹⁶ Eupša ge e ba diphetho mabapi le boitshwaro e le taba ya motho ka noši, ke ka baka la’ng ba bangwe ba Dihlatse tša Jehofa ba kgaolwa? Ga go na motho yo ka boithatelo a dirago phetho ya gore tiro ya sebe se itšego e nyaka mogato wa go kgaola. Go e na le moo, mogato wo o a nyakega go ya ka Mangwalo ge feela setho sa phuthego ka go se itshole se dira dibe tše kgolo, bjalo ka tšeo di lokeleditšwego kgaolong ya bo-5 ya Ba-Korinthe ba Pele. Ka go rialo, le ge Mokriste a ka kgaolwa ka baka la go dira bootswa, se se direga feela ge e ba motho a gana go amogela thušo ya moya ya badiši ba lerato. Ka ntle le seo, Dihlatse tša Jehofa ga se tšona di nnoši di latelago mokgwa wo wa Bokriste. The Encyclopedia of Religion e re: “Setšhaba le ge e le sefe se na le tshwanelo ya go itšhireletša malebana le ditho tše sa kwego tšeo di ka beago boiketlo bjo bo tlwaelegilego kotsing. Thulaganyong ya bodumedi tshwanelo ye gantši e tiišwa ke tumelo ya gore kotlo [ya go kgaola] e kgoma boemo bja motho pele ga Modimo.”

17, 18. Tshwanelo ya go kgaola e ka swantšhwa bjang?

¹⁷ Dihlatse tša Jehofa ke barutwana ba Beibele. (Jošua 1:8; Psalme 1:2; Ditiro 17:11) Lenaneo la thuto ya Beibele leo le newago ke Sehlopha se Bušago mo gongwe le ka bapišwa le lenaneo-thuto la sekolo leo le rulagantšwego ke lekgotla la tša thuto. Gaešita le ge lekgotla ka bolona e se mothopo wa taba yeo e rutwago, le rulaganya lenaneo-thuto, le dira phetho ya mokgwa wa go ruta le go ntšha ditaelo tše di nyakegago. Ge e ba motho le ge e le ofe a gana gampe go phela ka go dumelelana le dinyakwa tša lekgotla, a bakela barutwana-gotee le yena mathata goba a hlompholla sekolo, a ka lelekwa. Balaodi ba sekolo ba na le tshwanelo ya go gata mogato bakeng sa go hola barutwana ka moka.

¹⁸ Ka ntle le go ba barutwana, Dihlatse tša Jehofa ke mašole a Jesu Kriste ao a laelwago go “hlabana thlabanô e botse ya tumêlô.” (1 Timotheo 6:12; 2 Timotheo 2:3) Gantši boitshwaro bjo bo phegelelago bjo bo sa swanelego lešole la Mokriste bo ka lebiša go se amogelweng ke Modimo. Ka ge e le motho yo a neilwego tokologo ya go ikgethela, lešole la Mokriste le ka dira phetho kamoo le ratago ka gona, eupša le swanetše go rwala ditla-morago tša phetho ya lona. Paulo o re: “Mohlabani xa a itate ka ditaba tša bophelô byono; se a se rataxo ké xo kxahla eo a mo rapilexo. Xomme le xe motho a ka katana, a ka se rwešwe seala, xe a sa katane senna.” (2 Timotheo 2:4, 5) Bakriste ba godilego ka tsebo go akaretša le ba Sehlopha se Bušago ba dula ba le taolong ya Moetapele wa bona Jesu Kriste ka mo go feletšego ba boloka “melao” (NW) e le gore ba ka thopa moputso wa bophelo bjo bo sa felego.—Johane 17:3; Kutollo 2:10.

19. Ge re hlahlobile ditherešo mabapi le boineelo bja Bokriste, re ka kgonthišega ka eng?

¹⁹ Na ditherešo ga di bontšhe gabotse gore Dihlatse tša Jehofa ke bahlanka ba Modimo, e sego bahlanka ba batho? E le Bakriste ba ineetšego bao ba thabelago tokologo yeo Kriste a ba lokolletšego go yona, ba dumelela moya wa Modimo le Lentšu la gagwe di laola maphelo a bona ge ba dutše ba hlankela ka botee le banababo bona ka phuthegong ya Modimo. (Psalme 133:1) Bohlatse bja se le bjona bo swanetše go phumola go se kgonthišege le ge e le gofe mabapi le mothopo wa matla a bona. Ba ka opela le mopsalme ka gore: “Matla a-ka ké Morêna, ké Yêna kôtsê ya-ka. Pelo ya-ka e botile Yêna, ’me ka hlakodišwa, pelo ya-ka ya xoloka, ka mo leboxa ka sefela sa-ka.”—Psalme 28:7.

[Mengwalo ya tlase]

O be o tla Araba Bjang?

◻ Mokgatlo wa Watch Tower le mekgatlo e swanago ya molao e thuša bjang Dihlatse tša Jehofa?

◻ Bakriste ba holwa bjang ke karolo ya Sehlopha se Bušago sa Dihlatse tša Jehofa?

◻ Ke ka baka la’ng batho ba Jehofa ba bega modiro wa bona wa boboledi?

◻ Ke ka tlase ga maemo afe go kgaolwa ga Mokriste yo a ineetšego e lego mo go swanetšego?

[Seswantšho go letlakala 19]

Sehlopha se bušago sa lekgolong la pele la nywaga se ile sa boloka botee bja thuto ya bodumedi

[Seswantšho go letlakala 23]

Go dikologa lefase, Dihlatse tša Jehofa di thabela tokologo yeo Kriste a di lokolletšego go yona