Ba Dirile Thato Ya Jehofa

Jesu o Dirišitše Nako a na le Bana

BODIREDI bja Jesu bja nywaga e meraro le seripa bo be bo batamela mafelelong a bjona. Go se go ye kae o be a tla tsena Jerusalema gomme a hwe lehu le bohloko. O be a lemoga gabotse seo se bego se letše ka pele, ka ge a ile a botša barutiwa ba gagwe gore: “Morwa-motho ó tlo xafêlwa diatleng tša batho; ’me ba tlo mmolaya.”—Mareka 9:31.

Ruri, Jesu o be a tla nyaka go diriša letšatši le lengwe le le lengwe, iri e nngwe le e nngwe le sebaka se sengwe le se sengwe tše di šetšego ka mo go holago. Barutiwa ba gagwe ba be ba sa dutše ba nyaka tlhokomelo. Jesu o be a lemogile gore ba be ba sa dutše ba nyaka keletšo e matla mabapi le go nyakega ga boikokobetšo le kotsi yeo e dulago e le gona ka mehla ya go kgopišega. (Mareka 9:35-37, 42-48) Ba be ba bile ba nyaka tlhahlo ka lenyalo, tlhalo le go se be lenyalong. (Mateo 19:3-12) Ka go tseba gore go se go ye kae o be a tla hwa, ga go pelaelo gore Jesu o ile a bolela le barutiwa ba gagwe ka bokopana le ka kgopolo ya go akgofa. Nako e be e le ya bohlokwa kudu—e lego lebaka le dirilego gore seo Jesu a se dirilego sa go latela e be sa bohlokwa kudu.

Jesu o Amogela Bana

Pego ya Beibele e re: “Ba tliša bana xo Jesu, xore a ba swarê.” Ge barutiwa ba gagwe ba bona se, gatee-tee ba ile ba kgalema. Mohlomongwe ba be ba nagana gore Jesu o be a le bohlokwa kudu goba a swaregile kudu go ka tshwenyega ka bana. Ka gona, nagana ka mo barutiwa ba ilego ba makala ka gona, ge Jesu a be a ba galefela! O ba boditše gore: “Lesang bana ba tlê xo Nna; Le se kê la ba thibêla, xobane mmušô wa Modimo ké wa ba byalo.” Ke moka Jesu o ile a oketša ka gore: “Ruri, ke a Le botša, motho e a sa amoxelexo mmušô wa Modimo byalo ka ngwana, a ka se kê a bá a tsêna xo wôna.”—Mareka 10:13-15.

Jesu o bone dika tše di rategago baneng. Gantši ke ba ba nyakago go tseba le ba botegago. Ba tla amogela mantšu a batswadi ba bona gaešita le go ba emelela baneng ba bangwe. Mokgwa wa bona wa go swara dilo ka pela le go rutega o swanelwa ke go ekišwa ke bohle bao ba kganyogago go tsena Mmušong wa Modimo. Go bjalo ka ge Jesu a itše, “mmušô wa Modimo ké wa ba byalo.”—Bapiša le Mateo 18:1-5.

Eupša Jesu ga se a fo dirišetša bana ba bakeng sa seswantšho. Pego e bontšha gabotse gore Jesu o be a rata e le ka kgonthe go ba le bona. Mareka o bega gore Jesu o ile “a ba xokara, a ba bea diatla a ba šexofatša.” (Mareka 10:16) Ke pego ya Mareka feela yeo e akaretšago taba e lapološago ya gore Jesu o ile “a ba xokara.”a Ka go rialo Jesu o ile a fetela ka kua ga ditebelelo tša batho ba bagolo, bao ba tlišitšego bana ba go Jesu gore a fo ba ‘swara.’

Bohlokwa bja gore Jesu a ‘bee bana diatla’ e be e le bofe? Mo ga go bolelwe ka tirelo ya bodumedi, bjalo ka kolobetšo. Le ge mabakeng a mangwe, go bea diatla go be go bolela go nea kabelo, go a mangwe go fo ba go swantšhetša go šegofatša. (Genesi 48:14; Ditiro 6:6) Ka gona Jesu a ka fo ba a be a šegofatša bana.

Se se lego gona ke gore Mareka o diriša lentšu le matla bakeng sa “tšhegofatšo” (ka·teu·lo·geʹo), leo le bolelago matla a tseneletšego. Se se bolela gore Jesu o šegofaditše bana ka phišego, lerato le ka borutho. Ka mo go kwalago, ga se a ka a lebelela bana e le morwalo o senyago nako.

Thuto go Rena

Mokgwa wa Jesu wa go dirišana le bana gotee le batho ba bagolo e be e se wo o boifišago goba o nyenyefatšago. Puku e nngwe ya tšhupetšo e re: “O swanetše go ba a be a myemyela gabonolo le go sega ka lethabo.” Ga go makatše ge batho ba nywaga ka moka ba be ba ikwa ba lokologile ge ba be ba e-na le yena. Ge re nagana ka mohlala wa Jesu, re ka ipotšiša gore, ‘Na batho ba bangwe ba nkhwetša ke batamelega?’ ‘Na ke bonala ke swaregile kudu gore nka šitelwa ka mediro ya ba bangwe le dilo tše ba tshwenyegilego ka tšona?’ Go hlagolela kgahlego ya kgonthe go batho go tla re tutueletša go ikgafa, go etša ge Jesu a dirile. Ba bangwe ba tla lemoga kgahlego ya rena e tseneletšego gomme ba tla re batamela.—Diema 11:25.

Go etša ge pego ya Mareka e bontšha, Jesu o thabetše go ba le bana. Go molaleng gore o ile a ipha nako ya go ba bogela ge ba bapala, ka ge a ile a bolela ka dipapadi tša bona go e nngwe ya diswantšhetšo tša gagwe. (Mateo 11:16-19) Mohlomongwe ba bangwe ba bana bao Jesu a ilego a ba šegofatša e be e le ba banyenyane kudu go kwešiša yo e bego e le yena le seo a bego a se ruta. Eupša se ga se sa ka sa mo dira gore a ikwe eka o be a senya nako ya gagwe. O dirišitše nako a e-na le bana ka gobane o be a ba rata. Mohlomongwe ba bantši ba bana bao Jesu a ilego a kopana le bona nakong ya bodiredi bja gagwe, ka morago ba ile ba tutueletšega go arabela leratong la gagwe ka go ba barutiwa ba gagwe.

Ge e ba Jesu a ile a diriša nako le bana dibekeng tša mafelelo tše bohlokwa tša bophelo bja gagwe, ruri re ka ipha nako ya bona thulaganyong ya rena e pitlaganego. Re swanetše go gopola kudu-kudu ka bao ba nyakago thušo e kgethegilego, bjalo ka ditšhiwana. Ka kgonthe, bana ka moka ba gola gabotse ge ba newa tlhokomelo, le gona ke kganyogo ya Jehofa gore re ba nee lerato ka moka le thušo kamoo re ka kgonago ka gona.—Psalme 10:14.

[Mengwalo ya tlase]