Na O Na Le Tumelo E Swanago Le Ya Aborahama?

“Morwa-motho mohla a tlaxo a Le re ó tlo hwetša lefaseng xò sa na le tumêlô?”​—LUKA 18:8.

1. Ke ka baka la’ng go le thata gore motho a boloke tumelo ya gagwe e tiile lehono?

GA GO bonolo gore motho a boloke tumelo ya gagwe e tiile lehono. Lefase le gatelela Bakriste kudu e le gore le aroše tlhokomelo ya bona dilong tša moya. (Luka 21:​34; 1 Johane 2:​15, 16) Ba bantši ba swanelwa ke go katanela go phela ba lebeletšane le dintwa, dikotsi, malwetši goba tlala. (Luka 21:​10, 11) Ditšhabeng tše mmalwa go na le thuto e matla yeo e sego ya bodumedi, gomme batho le ge e le bafe bao ba phelago ka tumelo ya bona ba lebelelwa e le bao ba se nago teka-tekano e bile e le bao ba fišegelago thoko. Go feta moo, Bakriste ba bantši ba tlaišetšwa tumelo ya bona. (Mateo 24:9) Potšišo ya Jesu yeo e ilego ya rotošwa mo e nyakilego go ba nywaga e 2 000 e fetilego ke yeo e swanetšego e le ka kgonthe: “Morwa-motho mohla a tlaxo a Le re ó tlo hwetša lefaseng xò sa na le tumêlô?”​—Luka 18:8.

2. (a) Ke ka baka la’ng tumelo e tiilego e le bohlokwa bakeng sa Mokriste? (b) Ke mohlala wa mang wa tumelo woo re dirago gabotse go o hlahloba?

² Lega go le bjalo, therešo ke gore tumelo e tiilego e bohlokwa ge e ba re tla atlega bophelong gona bjale gomme ra amogela bophelo bjo bo sa felego bjo bo holofeditšwego nakong e tlago. Ge a tsopola mantšu a Jehofa go Habakuku, moapostola Paulo o ngwadile gore: “Moloki wa-ka ó tlo phela ka tumêlô; e a xomêlaxo moraxo yêna pelo ya-ka e ka se mo thabêle. . . . xo kxahla Modimo xa xo kxônexe xe xo se tumêlô.” (Ba-Hebere 10:​38–11:6; Habakuku 2:4) Paulo o boditše Timotheo gore: “Hlabana thlabanô e botse ya tumêlô, O thopê bophelô byo bo sa felexo, byo O bileditšwexo byôna.” (1 Timotheo 6:​12) Ka gona, go ba le tumelo e sa senyegego go kgonega bjang? Ge re hlahloba potšišo yeo, re dira gabotse ge re lebelela monna yo a phetšego mo e ka bago nywaga e 4 000 e fetilego, eupša e le yoo tumelo ya gagwe e sa dutšego e tšeelwa godimo kudu madumeding a mararo a magolo​—Bomoseleme, Bojuda le Bokriste. Monna yoo ke Aborahama. Ke ka baka la’ng tumelo ya gagwe e be e le e makatšago gakaakaa? Na re ka mo ekiša lehono?

Go Ikokobeletša Tlhahlo ya Modimo

3, 4. Ke ka baka la’ng Thara a ile a huduša lapa la gagwe go tloga Uri go ya Harane?

³ Aborahama (yo mathomong a bego a bitšwa Aborama) o bolelwa ka lekga la pele karolong ya pele-pele ya Beibele. Go Genesi 11:​26, re bala gore: “Thara . . . a bêlêxêlwa Aborama le Nahoro le Harane.” Thara le lapa la gagwe ba be ba agile Uri ya ba-Kaladea, e lego motse wo o bego o atlegile ka borwa bja Mesopotamia. Lega go le bjalo, ga se ba dula moo. “Thara ó tloxile motseng wa Uri wa kwa Kaladea, à na le Aborama morwa wa xaxwe, le Loto morwa wa Harane morwa wa morwa wa xaxwe, le Sarai [Sara] ngwetši ya xaxwe mosadi wa Aborama morwa wa xaxwe, a tloxa a re ke khuduxêla naxeng ya Kanana. Ya re xe ba fihla Harane, ba axa xôna.” (Genesi 11:​31) Morwarrago Aborahama e lego Nahoro le yena o ile a hudušetša lapa la gagwe Harane. (Genesi 24:​10, 15; 28:​1, 2; 29:4) Lega go le bjalo, ke ka baka la’ng Thara a ile a huduga Uri e bego e atlegile a ya Harane yeo e lego kgole?

⁴ Mo e ka bago nywaga e 2 000 ka morago ga mehla ya Aborahama, monna yo a botegago Stefano ge a be a bolela pele ga Sanhedrine ya ba-Juda o ile a hlalosa go huduga mo mo go sa tlwaelegago ga lapa la Thara. O itše: “Modimo wa letaxô ó ipônaditše xo Aborahama tata-wešo mola à sa le kua Mesopotamia, à sešo a axa Harane. A mo laêla a re: Tloxêla lefase la xeno, le metswalô ya xaxo, O yê naxeng ye ke tl’o xo Xo laetša yôna. Ya ba xôna a tloxaxo naxeng ya Ba-Kaladea, a axa Harane.” (Ditiro 7:​2-4) Thara o ile a ikokobeletša thato ya Jehofa ka Aborahama ge a be a hudušetša lapa la gagwe Harane.

5. Aborahama o ile a ya kae ka morago ga ge tatagwe a hwile? Ka baka la’ng?

⁵ Lapa la Thara le ile la aga motseng wa lona o mofsa. Nywaga ka morago ge Aborahama a be a bolela ka “naxeng ya xešo,” o be a bolela ka tikologo ya Harane e sego Uri. (Genesi 24:4) Lega go le bjalo, Harane e be e ka se be legae la Aborahama la go ya go ile. Go ya ka Stefano, “xe tat’axwe a hwile, Modimo a mo tloša fao, a mo tliša naxeng yeno Le axilexo xo yôna byale.” (Ditiro 7:4) Ka go ikokobeletša tlhahlo ya Jehofa, Aborahama o ile a tshela noka ya Eforate a tshelela nageng ya Kanana a sepedišana le Lota.a

6. Ke kholofetšo efe yeo Jehofa a ilego a e nea Aborahama?

⁶ Ke ka baka la’ng Jehofa a ile a dira gore Aborahama a hudugele Kanana? Lebaka la se le be le tswalane le morero wa Modimo bakeng sa monna yoo yo a botegago. Jehofa o be a itše go Aborahama: “Tloxêla lefase lé la xeno, le metswalo ya xaxo, le ngwako wa tat’axô; O yê naxeng ye ke tl’o xo Xo laetša yôna. Xobane ke tlo Xo dira sethšaba se sexolo; ke tlo Xo šexofatša ka xodiša leina la xaxo; ’me wêna O tlo ba thšexofatšô. Ke tlo šexofatša ba ba Xo šexofatšaxo, ka roxa ba ba Xo roxaxo; ’me meloko ka moka ya lefase e tlo šexofatšwa ka wêna.” (Genesi 12:​1-3) Aborahama e be e tla ba tatago setšhaba se segolo seo se bego se tla thabela tšhireletšo ya Jehofa le seo se bego se tla rua naga ya Kanana. A kholofetšo e kgahlišago gakaakang! Eupša Aborahama o be a swanelwa ke go dira diphetogo tše dikgolo kudu bophelong bja gagwe e le gore a tle a rue bohwa bja naga yeo.

7. Ke diphetogo dife tšeo Aborahama a ilego a swanelwa ke go ikemišetša go di dira e le gore a rue kholofetšo ya Jehofa e le bohwa?

⁷ Ge Aborahama a be a tloga Uri, o ile a tlogela motse o atlegago, mo gongwe le lapa la tatagwe le le katološitšwego​—tšeo e bego e le methopo e bohlokwa ya tšhireletšo mehleng yeo ya bapatriareka. Ge a be a tloga Harane, o ile a ikaroganya le lapa la tatagwe, go akaretša le lapa la Nahoro morwarragwe gomme a hudugela nageng yeo e sa tsebjego. Ge a le Kanana ga se a tsoma tšhireletšo ka gare ga merako ya motse. Ke ka baka la’ng a sa dira bjalo? Go se go ye kae ka morago ga ge Aborahama a tsene motseng, Jehofa o ile a re go yena: “O phatšê naxa yé ka botelele le ka bophara, ka xobane ke Xo nea yôna.” (Genesi 13:​17) Aborahama wa nywaga e 75 le mosadi wa gagwe wa nywaga e 65 e lego Sara, ba ile ba latela ditaelo tše. “Ké ka tumêlô xe a diilêla naxeng yeo a e holofedišitšwexo, xwa ba byalo ka e ke xa se naxa ya xaxwe, a dula merakeng.”​—Ba-Hebere 11:9; Genesi 12:4.

Tumelo e Swanago le ya Aborahama Lehono

8. Ka baka la mohlala wa Aborahama le dihlatse tše dingwe tša bogologolo, ke’ng seo re swanetšego go se hlagolela?

⁸ Aborahama le lapa la gagwe ba balwa gare ga “leru le lekaakao la dihlatse [tša pele ga Bokriste]” leo le bolelwago go Ba-Hebere kgaolo 11. Ka baka la tumelo ya bahlanka ba ba pele ba Modimo, Paulo o kgothaletša Bakriste gore ‘ba apole tše di ba imelago tšohle le sebe [go hloka tumelo] se se re rarelago.’ (Ba-Hebere 12:1) Ee, go hloka tumelo go ka ‘re rarela gabonolo.’ Eupša mehleng ya Paulo le ya rena Bakriste ba kgonthe ba ile ba kgona go hlagolela tumelo e tiilego e swanago le ya Aborahama le ba bangwe ba mehleng ya bogologolo. Paulo ge a bolela ka yena le Bakriste-gotee le yena o re: “Rena xa re ba xo xomêla moraxo le xo y’o lahlwa; re ba tumêlô ya xo y’o rua bophelô.”​—Ba-Hebere 10:39.

9, 10. Ke bohlatse bofe bjo bo lego gona bja gore lehono ba bantši ba na le tumelo e swanago le ya Aborahama?

⁹ Ke therešo gore lefase le fetogile go tloga mehleng ya Aborahama. Lega go le bjalo, re sa dutše re hlankela yena “Modimo wa Aborahama,” gomme ga a fetoge. (Ditiro 3:​13; Maleaki 3:6) Jehofa o swanelwa ke go rapelwa lehono go fo etša ge a be a swanelwa ke go rapelwa mehleng ya Aborahama. (Kutollo 4:​11) Ba bantši ba ineela ka mo go feletšego go Jehofa, gomme ka go swana le Aborahama ba dira diphetogo le ge e le dife tšeo di nyakegago maphelong a bona e le gore ba dire thato ya Modimo. Ngwagola ba 316 092 ba ile ba nea bohlatse bja phatlalatša bja boineelo bja bona ka go ineela kolobetšong ya meetseng “leineng la Tate le la Morwa le la Môya o mokxêthwa.”​—Mateo 28:19.

¹⁰ Bontši bja Bakriste ba ba bafsa ga se ba swanelwa ke gore ba ye dinageng dišele tša kgole e le gore ba phethe boineelo bja bona. Lega go le bjalo, ka kgopolo ya moya ba bantši ba bona ba ile ba sepela monabo o motelele. Ka mohlala, nageng ya Mauritius, Elsie e be e le ngaka ya moloi. Mang le mang o be a mo tšhaba. Mmulamadibogo yo a kgethegilego o ile a rulaganya thuto ya Beibele le morwedi wa Elsie gomme se sa bulela Elsie tsela ‘ya go tšwa lefsifsing le go tla seetšeng.’ (Ditiro 26:​18) Ka baka la go thabela ga morwedi wa gagwe, Elsie o ile a dumela go ithuta Puku Ya-ka ya Ditaba tša Beibele. Thuto ya gagwe e be e swarwa gararo ka beke ka gobane o be a nyaka kgothatšo ya ka mehla. Ditiro tša gagwe tša go dirišana le matla a sephiri a phagametšego a tlhago ga se tša mo tlišetša lethabo, gomme o be a e-na le mathata a mantši a motho ka noši. Lega go le bjalo, mafelelong o ile a kgona go phetha leeto le letelele la go tloga go dirišaneng le batemona go ya borapeding bja therešo. Ge batho ba be ba e-tla go kgopela ditirelo tša gagwe, o be a hlalosa gore ke Jehofa feela yo a bego a ka ba šireletša bobeng. Gona bjale Elsie ke Hlatse e kolobeditšwego gomme batho ba 14 ba tšwago lapeng labo le batho bao a tlwaelanego le bona ba amogetše therešo.

11. Ke diphetogo dife tšeo bao ba ineelago go Jehofa ba ikemišeditšego go di dira?

¹¹ Bontši bja bao ngwagola ba ilego ba ineela bakeng sa go hlankela Modimo ga se bja ka bja swanelwa ke go dira diphetogo tše dikgolo gakaalo. Eupša ka moka ga bona ba ile ba tloga go beng bao ba hwilego moyeng go ya go beng ba phelago moyeng. (Ba-Efeso 2:1) Gaešita le ge ba sa dutše ba le lefaseng ka nama, fela ga e sa le bona karolo ya lona. (Johane 17:​15, 16) Ka go swana le Bakriste ba tloditšwego bao ‘gagabo bona e lego magodimong’ ba bjalo ka “bafaladi le baeng.” (Ba-Filipi 3:​20; 1 Petro 2:​11) Ba dumelelantše maphelo a bona le ditekanyetšo tša Modimo, kudu-kudu ba tutuetšwa ke lerato la go rata Modimo le magagabo bona. (Mateo 22:​37-39) Ga ba phegelele dipakane tša boithati tša dilo tše di bonagalago goba ba ikwa ba nyaka kgotsofalo ya motho ka noši lefaseng le. Go e na le moo, ba tsepamišetša mahlo a bona ‘magodimong a mafsa le lefaseng le lefsa [tšeo di holofeditšwego] moo go agilego toko.’​—2 Petro 3:​13; 2 Ba-Korinthe 4:18.

12. Ke modiro ofe wo o begilwego ngwagola wo o neago bohlatse bja gore Jesu nakong ya go ba gona ga gagwe o hweditše “lefaseng xò sa na le tumêlô”?

¹² Ge Aborahama a be a hudugela Kanana, yena le lapa la gagwe ba be ba nnoši moo, ba thekgwa le go šireletšwa ke Jehofa feela. Lega go le bjalo, Bakriste ba ba 316 092 bao ba sa tšwago go kolobetšwa le gatee ga ba noši. Ke therešo gore Jehofa o ba thekga le go ba šireletša ka moya wa gagwe, go etša ge a ile a dira bjalo go Aborahama. (Diema 18:​10) Lega go le bjalo, go oketša moo, o ba thekga ka “sethšaba” se se tletšego bophelo sa ditšhaba-tšhaba seo se bopšago ke batho ba bantši kudu go feta ditšhaba tše dingwe tša lefase lehono. (Jesaya 66:8) Ngwagola, tlhora ya baagi ba 5 888 650 ba setšhaba seo e neile bohlatse bja tumelo ya bona e šomago ka go boledišana le baagišani ba bona ka dikholofetšo tša Modimo. (Mareka 13:​10) Ba dirišitše nako e ntši kudu ya diiri tše 1 186 666 708 modirong wo ba tsoma go hwetša batho ba thabelago. Ka baka la se go ile gwa swarwa dithuto tša Beibele tše 4 302 852 le ba bangwe bao ba ratago go hlagolela tumelo. E le pontšho e nngwe ya phišego ya bona ba 698 781 ‘setšhabeng’ se ba bile le karolo tirelong ya bobulamadibogo, e ka ba ka nako e tletšego goba ka lebaka la kgwedi goba go feta moo. (Ditaba ka botlalo tša modiro wa Dihlatse tša Jehofa ngwagola di hwetšwa go matlakala 12 go ya go 15.) Pego ye e kgahlišago ke karabo e kgodišago le e phelago potšišong ya Jesu e rego, “Morwa-motho mohla a tlaxo a Le re ó tlo hwetša lefaseng xò sa na le tumêlô?”

Go Botega go sa Šetšwe Diteko

13, 14. Hlalosa a mangwe a mathata ao Aborahama le lapa la gagwe ba ilego ba kopana le ona Kanana.

¹³ Dilo gantši di be di le thata bakeng sa Aborahama le lapa la gagwe nageng ya Kanana. Mo e ka bago gatee, go kile gwa ba le tlala yeo e ilego ya mo tloša Kanana ya mo iša Egipita. Go feta moo, bobedi mmuši wa Egipita le mmuši wa Gerara (kgaufsi le Gatsa) ba ile ba leka go itšeela mosadi wa Aborahama, e lego Sara. (Genesi 12:​10-20; 20:​1-18) Gape go be go e-na le dikgakgano magareng ga badiši ba mehlape ya Aborahama le badiši ba mehlape ya Lota, gomme se se ile sa baka karogano magareng ga malapa ao a mabedi. Aborahama ka go hloka boithati o ile a nea Lota kgetho ya pele ya go kgetha naga, gomme Lota o ile a kgetha go dula Seleteng sa Jorodane seo se bego se bonala se swana le Edene ka go nona ga sona le botse bja sona.​—Genesi 13:​5-13.

¹⁴ Ke moka Lota o ile a ba ntweng ya magareng ga kgoši ya Elama ya kgole le badirišani ba gagwe le dikgoši tša metse e mehlano Moeding wa Tlase wa Sidima. Dikgoši dišele di ile tša fenya dikgoši tša lefelong leo gomme tša tšea dithebola tše dintši go akaretša le Lota le dithoto tša gagwe. Ge Aborahama a kwele seo se diragetšego, o ile a rakediša dikgoši dišele ka go se boife gomme a kgona go thopolla Lota le lapa la gagwe gotee le dithoto tša dikgoši tša lefelong leo. (Genesi 14:​1-16) Lega go le bjalo, yeo e be e se phihlelo e mpe go di feta ka moka yeo Lota a ilego a ba le yona nageng ya Kanana. Ka baka la mabaka a itšego o ile a ya go dula Sodoma go sa šetšwe go tuma ga motse wo ka boitshwaro bjo bo gobogilego.b (2 Petro 2:​6-8) Ge a be a lemošwa ke barongwa ba babedi gore motse o be o tla senywa, Lota o ile a tšhaba le mosadi wa gagwe le barwedi ba gagwe. Lega go le bjalo, mosadi wa Lota o ile a hlokomologa ditaelo tše di lebanyago tša barongwa gomme ka baka leo a ba lebitla la letswai. Lota o ile a kokobetšwa gore ka nakwana a dule mphomeng wa Tsoare le barwedi ba gagwe. (Genesi 19:​1-30) Ditiragalo tše di swanetše go ba di ile tša tshwenya Aborahama kudu, kudu-kudu ka ge Lota a be a tlile Kanana e le karolo ya lapa la Aborahama.

15. Go sa šetšwe mathata ao Aborahama a ilego a lebeletšana le ona ge a be a dula ditenteng nageng yeo e šele, ke kgopolo efe e mpe yeo go lego molaleng gore o ile a e phema?

¹⁵ Na Aborahama o ile a ka a ipotšiša ge e ba yena le Lota ba ka be ba ile ba dula tšhireletšegong ya Uri gotee le lapa le le katološitšwego la tatagwe goba ba dula Harane gotee le Nahoro morwarragwe? Na o ile a ka a duma ge nkabe a ile a tsema medu tšhireletšegong ya motse wa marako go e na le go dula ditenteng? Na mohlomongwe o ile a belaela bohlale bja boikgafo bjo a bo dirilego ka go ba mohloka-šope nageng e sa tsebjego? Moapostola Paulo ge a bolela ka Aborahama le lapa la gagwe o itše: “Ba be ba sa bolele naxa yela ba tšwilexo xo yôna; xobane sebaka sa xo boêla xo yôna, ba be ba na nasô’.” (Ba-Hebere 11:​15) Lega go le bjalo, ga se ba ka ba boela morago. Ba ile ba dula moo Jehofa a bego a nyaka gore ba dule gona ba sa nyemišwe moko ke mathata.

Kgotlelelo Lehono

16, 17. (a) Ke mathata afe ao Bakriste ba bantši ba lebeletšanago le ona lehono? (b) Ke boemo bofe bjo bo nepagetšego bja kgopolo bjo Bakriste ba nago le bjona? Ka baka la’ng?

¹⁶ Kgotlelelo e swanago e bonwa go Bakriste lehono. Gaešita le ge go hlankela Modimo e le mothopo wa lethabo le legolo go bona, bophelo ga bo bonolo bakeng sa Bakriste ba therešo mehleng ye ya bofelo. Gaešita le ge ba dula paradeiseng ya moya, fela ba tlaišwa ke dikgateletšo tša tša boiphedišo tšeo di swanago le tšeo di tlaišago baagišani ba bona. (Jesaya 11:​6-9) Ba bantši ba fetogile bahlaselwa ba se nago molato dintweng tša ditšhaba, gomme ba bantši ba bile bodiiding bjo bo feteletšego e se ka baka la phošo ya bona. Go oketša moo, ba kgotlelela mathata a go ba palo e nyenyane yeo e sa ratwego. Dinageng tše dintši ba bolela ditaba tše di lokilego ba lebeletšane le go se thabele mo gogolo. Dinageng tše dingwe ba tlaišwa ke ditlhaselo tša bofora tša bao ba ‘bakago bothata ka molao-taelo’ (NW) gomme “ba lahla madi a se naxo molato.” (Psalme 94:​20, 21) Gaešita le dinageng tšeo go tšona Bakriste ba sa hlaselwego le moo ba retwago ke ba bangwe ka baka la ditekanyetšo tša bona tše di phagamego, ba tseba gore ke ba ba fapanego le bao ba tsenago le bona sekolo le bao ba šomago le bona​—go fo swana le Aborahama yo a ilego a dula ditenteng mola batho ba bantši bao ba bego ba mo dikologile ba be ba dula metseng. Ee, ga go bonolo go phela lefaseng eupša wa se be ‘karolo’ ya lona.​—Johane 17:14.

¹⁷ Ka gona, na re a itshola ka ge re ineetše go Modimo? Na re duma ge nkabe re ile ra dula re le karolo ya lefase e bile re swana le mang le mang? Na re llela boikgafo bjo re bo dirilego tirelong ya Jehofa? Le gatee! Go e na le go lebelela morago ka tlhologelo, re lemoga gore selo le ge e le sefe seo re ka bago re se gafile se be se se na mohola wa kgonthe ge se bapišwa le ditšhegofatšo tšeo di thabelwago gona bjale le tšeo di tlago go thabelwa nakong e tlago. (Luka 9:​62; Ba-Filipi 3:8) Ka ntle le moo, na batho lefaseng ba thabile? Therešo ke gore ba bantši ba bona ba tsoma dikarabo tšeo rena re šetšego re e-na le tšona. Ba tlaišega ka gobane ba sa latele tlhahlo yeo rena re e latelago go tšwa go Modimo ka matlakala a Beibele. (Psalme 119:​105) Le gona, ba bantši ba bona ba duma mohuta wa bogwera bja Bokriste le bogwera bjo bo kgahlišago bjo re bo thabelago le badumedi-gotee le rena.​—Psalme 133:1; Ba-Kolose 3:14.

18. Ditla-morago tša mafelelo e ba dife ge Bakriste ba bontšha sebete sa go swana le sa Aborahama?

¹⁸ Ke therešo gore ka dinako tše dingwe re swanelwa ke go ba sebete go swana le Aborahama ge a be a rakediša bathopi ba Lota. Eupša ge re dira bjalo Jehofa o šegofatša ditla-morago. Ka mohlala, Leboa la Ireland lehloyo le ile la thoma go ikepela ka baka la bošoro bja dihlotswana tša bokgelogi, gomme go se tšee lehlakore go nyaka sebete. Lega go le bjalo, Bakriste ba botegago ba ile ba latela mantšu a Jehofa go Jošua: “O tiišê matla, O dirê senna. O se kê wa thšoxa, O se kê wa xakanêxa, ka xobane Morêna Modimo wa xaxo ó êma le wêna mo O yaxo.” (Jošua 1:9; Psalme 27:​14) Go theoša le nywaga boemo bja bona bja go se boife bo ile bja dira gore ba ikhweletše tlhompho, gomme lehono ba ka dira boboledi ka bolokologi ditšhabeng ka moka tša naga yeo.

19. Bakriste ba thabela go ba kae, gomme ke mafelelo afe ao ba a letelago ka kgodišego ge ba latela tlhahlo ya Jehofa?

¹⁹ Ga se ra swanela go belaela gore boemo le ge e le bofe bjo re lebeletšanago le bjona, ge e ba re latela tlhahlo ya Jehofa ditla-morago e tla ba tše di išago letago go yena le tšeo di tlago go hola rena ka nako e telele. Go sa šetšwe ditlhohlo le boikgafo, ga go na lefelo leo re bego re ka upša ra ba go lona go e na le go ba tirelong ya Jehofa, re thabela bogwera le banababo rena ba Bakriste gomme re lebeletše pele ka kgodišego bokamosong bja ka mo go sa felego bjo Modimo a bo holofeditšego.

[Mengwalo ya tlase]

Na o a Gopola?

◻ Ke ka baka la’ng tumelo e tiilego e le bohlokwa?

◻ Aborahama o bontšhitše bjang gore o be a e-na le tumelo e tiilego?

◻ Boineelo bo sepedišana bjang le diphetogo bophelong bja motho?

◻ Ke ka baka la’ng re thabela go hlankela Modimo go sa šetšwe mathata le ge e le afe ao re ka lebeletšanago le ona?

[Seswantšho go letlakala 7]

Aborahama o be a ikemišeditše go dira diphetogo tše dikgolo bophelong bja gagwe e le gore a rue kholofetšo e le bohwa

[Seswantšho go letlakala 9]

Bohlatse bo bontšha gore Jesu o hweditše “lefaseng xò sa na le tumêlô” nakong ya go ba gona ga gagwe