Go Rwala Boikarabelo bja go Hlokomela Lapa

“BÔ-TATA-XO-BANA! Le se kê la befediša bana ba lena; sa lena a e bê xo ba etetša ka xo ba ruta le xo ba eletša tša Morêna.” (Ba-Efeso 6:4) Ka mantšu ao a buduletšwego, moapostola Paulo o ile a bea boikarabelo bja go hlokomela lapa tlwaa mo bo swanetšego gona—magetleng a tate.

Malapeng a mantši tate ga a noši go hlokomeleng bana ba gagwe. Mosadi wa gagwe e lego mmago bana ba gagwe o arolelana morwalo le monna wa gagwe ka lethabo. Ka gona Kgoši Salomo o ile a re: “Ngwan’a-ka! Theetša tayô ya tat’axo; O se nyatšê thutô ya mm’axo.”—Diema 1:8.

Tlhokomelo ya Dilo tše di Bonagalago le ya Moya

Batswadi bao ba ratago bana ba bona ga ba ba hlokomologe ka boomo. Ka kgonthe, go Bakriste go dira bjalo go tla swana le go latola tumelo ya bona ka ge re phetha go tšwa mantšung a Paulo go Timotheo gore: “Xe motho a sa babalele b’abô, xaxolo ba lapeng la xabô, ó latola tumêlô; ó phalwa ke e a sa dumelexo.” (1 Timotheo 5:8) Bakriste ba lemoga gore go godiša bana ka “xo ba etetša ka xo ba ruta le xo ba eletša tša Morêna” go nyaka mo gontši kudu go feta go ba hlokomela ka tsela ya dilo tše di bonagalago.

Ela hloko kgothatšo ya Moše go setšhaba sa Isiraele ge ba be ba kampile melaleng ya Moaba pejana ga ge ba tsena Nageng ya Kholofetšo. Moo o ile a boeletša melao ya Modimo go bona gomme a ba laela gore: “Mantšu a-ka á, a beeng dipelong tša lena le meoyeng ya lena.” (Doiteronomio 11:18) Pejana o be a ba gopoditše gore ba swanetše go rata Jehofa ka dipelo, moya le matla a bona ka moka, a oketša ka gore: “Mantšu a ke Xo laetšaxo lehono a a dulê a le pelong ya xaxo.” (Doiteronomio 6:5, 6) Go be go le bohlokwa gore batswadi ba ba-Isiraele ba dumelele mantšu a Molao wa Modimo gore a tsenelele dipelong tša bona. Ka dipelo tšeo di tletšego tebogo ya moya, batswadi ba ba-Isiraele ba be ba ka kwa mantšu a latelago a Moše: “O a tiišetšê [mantšu a Molao wa Modimo] bana ba xaxo; O bolêlê ôna Ò dutše ngwakong wa xaxo, le xe O le tseleng, xe O y’o rôbala le xe Ò tsoxa.”—Doiteronomio 6:7; 11:19; bapiša le Mateo 12:34, 35.

Ela hloko gore bo-tate ba be ba swanetše go ‘tiišetša’ mantšu ao baneng ba bona gomme ba “bolêlê ôna.” Merriam-Webster’s Collegiate Dictionary e hlalosa go ‘tiišetša’ e le “go ruta le go gatelela ka go boeletša goba go eletša kgafetša-kgafetša.” Ge batswadi ba be ba bolela ka Molao wa Modimo letšatši le letšatši—mesong, mosegare le bošego—se se be se fetišetša mo gontši baneng ba bona. Ge bana ba be ba dutše ba bona lerato leo batswadi ba bona ba bego ba na le lona la go rata Molao wa Modimo, le bona ka mo go swanago ba be ba tutueletšega gore ba godiše go ba ga bona kgaufsi le Jehofa. (Doiteronomio 6:24, 25) Ka mo go kgahlišago, Moše o ile a laela bo-tate ka mo go kgethegilego gore ba rute bana ba bona ‘ge ba dutše ngwakong wa bona.’ Thuto e bjalo e be e le karolo ya go hlokomela lapa. Eupša go thwe’ng ka lehono?

“Ò Dutše Ngwakong wa Xaxo”

Janet yo e lego mma wa bana ba bane wa Mokriste o hlalosa gore: “Ga go bonolo.”a Monna wa gagwe Paul o dumela ka gore: “Go nyakega go phegelela.” Go swana le batswadi ba bangwe ba bantši ba Dihlatse, Paul le Janet ba katanela go ithuta Beibele le bana ba bona bonyenyane gatee ka beke. Paul o a hlalosa: “Re leka go ba le poledišano ya rena ya lapa ya Beibele mantšiboeng a mangwe le a mangwe a Mošupologo ka nako e beilwego,” gomme o dumela gore: “Eupša ga se ka mehla go šomago.” Bjalo ka mogolo yo a kgethilwego ka phuthegong ya gabo ka dinako tše dingwe o ile a biletšwa go swaragana le ditaba tše di akgofilego. Bana ba gagwe ba babedi ba bagolo ba hlankela e le badiredi ba nako e tletšego. Ba hwetša gore mantšiboa ke dinako tše nago le mafelelo a mabotse go ikopanyeng le batho bodireding. Ka gona e le lapa, ba fetošitše nako ya bona ya thuto ya lapa. Paul o hlalosa gore: “Ka dinako tše dingwe re ba le thuto ya rena kapejana ka morago ga dijo tša rena tša mantšiboa.”

Gaešita le ge batswadi ba bontšha go koba-kobega ka bohlale ge e le mabapi le nako ya thuto ya lapa, ba leka go kgomarela go e swara ka mehla. Morwedi wa bona Clare o bolela gore: “Ge e ba nako ya thuto ya rena e swanetše go fetošwa, ka mehla tate o bea nako e mpsha lebating la setšidifatši, e le gore ka moka ga rena re tsebe nako yeo thuto e tlago go ba ka yona.”

Go bokanela thuto ya ka mehla ya lapa ya Beibele gape go nea sebaka se sebotse sa gore ditho tše nyenyane tša lapa di bolele dilo tšeo di tshwenyegago ka tšona le mathata le batswadi ba bona. Thuto e bjalo e sepela gabotse ge e ba e se e thata kudu mo e lego gore bafsa ba fo bala dikarabo tša dipotšišo tšeo di botšišwago pukung ya go ithuta Beibele yeo ba e dirišago. Martin yo a nago le barwa ba babedi o hlalosa gore: “Thuto ya rena ya lapa ke lekgotla la go ahla-ahla.” O bolela gore: “Ge e ba le e-ba gotee gatee ka beke go ahla-ahla taba ya Mangwalo, o bona kamoo lapa la gago le swerego ka gona moyeng. Dilo tše di fapa-fapanego ka moka di a tšwelela poledišanong. O kwa seo se diregago sekolong gomme se se kgahlišago kudu ke gore o hwetša gore ke boemo bofe bja kgopolo bjo bana ba gago ba bago le bjona.” Mosadi wa gagwe e lego Sandra o a dumela e bile o nagana gore le yena o hwetša mo gontši thutong ya lapa. O anega ka gore: “Ge monna wa-ka a swere thuto, ke ithuta mo gontši ka go theetša tsela yeo barwa ba-ka ba arabago dipotšišo tša gagwe ka yona.” Ke moka Sandra o lokiša ditlhaloso tša gagwe gore di thuše bašemane ba gagwe. O thabela thuto kudu ka baka la gore o akaretšwa ka mafolofolo. Ee, dinako tša thuto ya lapa di nea batswadi temogo ka dikgopolo tša bana ba bona.—Diema 16:23; 20:5.

E-ba yo a Dumelelanago le Maemo Gomme o Phegelele

Ge nako ya thuto ya lapa la gago e fihla, mo gongwe o ka hwetša ngwana yo mongwe a phafogile e bile a na le kgahlego mola yo mongwe a nyaka go goka-goketšwa gore a theetše ka kelohloko gomme a holege. Mma yo mongwe wa Mokriste o hlalosa gore: “Bjoo ke bophelo bja lapa! O tseba seo o swanetšego go se dira bjalo ka motswadi. Ka gona ge o tšwela pele ka yona, Jehofa o a thuša gomme o tliša meputso.”

Nako yeo ngwana a kgonago go theetša ka yona e ka fapa-fapana kudu go ya ka nywaga ya gagwe. Motswadi yo a lemogago o gopola se. Banyalani ba bangwe ba na le bana ba bahlano bao ba tlogago go nywaga e 6 go ya go e 20. Tate e lego Michael o re: “Nea yo monyenyane sebaka sa go araba dipotšišo pele. Ke moka dumelela ba bagolo ba oketše ditaba ka botlalo gomme ba tsenye dintlha tše ba di lokišeditšego.” Tsela ye ya go dirišana le bana ba bona ka temogo e dira gore batswadi ba kgone go ruta bohlokwa bja go šetša ba bangwe. Martin o re: “Yo mongwe wa barwa ba rena a ka kwešiša, eupša mošemane yo mongwe o nyaka thušo e oketšegilego gore a kwešiše taba. Ke hwetša gore nako ya thuto e ba motheo wa tlwaetšo ya go bontšha go se fele pelo ga Bokriste le dienywa tše dingwe tša moya.”—Ba-Galatia 5:22, 23; Ba-Filipi 2:4.

Itokišeletše go dumelelana le bokgoni le boemo bja go gola ga bana ba gago bjo bo fapa-fapanego. Simon le Mark bao gona bjale ba lego nywageng ya bona ya mahlalagading, ba ile ba hwetša gore ge e be e sa le ba banyenyane ba be ba tloga ba thabela go ithuta le batswadi ba bona puku ya Motho yo a Phagamego Kudu yo a Kilego a Phela. Ba gopola gore: “Tatago rena o be a re dira gore re bapale dikarolo tše di fapa-fapanego go fo swana le papadi.” Tatago bona o gopola a khuname fase gore a bapale seswantšho sa mo-Samaria wa kgaugelo le barwa ba gagwe. (Luka 10:30-35) “E be e le tša kgonthe le tše di thabišago kudu.”

Bana ba bantši ba ganetšana le mokgwa wa ka mehla wa thuto ya lapa. Na se se swanetše go thibela batswadi go swara thuto ka nako yeo e rulagantšwego? Le gatee-tee. Diema 22:15 (PK) e re: “Bošilo bo tlemeletšwe pelong ya mošemanyana [goba, ngwanenyana].” Mma yo mongwe yo a se nago molekane o be a nagana gore o a palelwa ge e le ka go ba moswari wa thuto ya lapa ge ka mabaka a mantši ditšhitišo di be di bonala di senya thuto. Eupša o ile a phegelela. Bjale bana ba gagwe ba mo hlompha kudu gomme ba tšeela godimo lerato le go tshwenyega mo a go bontšhitšego ka go phegelela go swareng thuto ya lapa ya ka mehla.

Go Thuša ‘Ditšhiwana’

Bagolo ba Bakriste ba swanetše go “[diša] mohlape wa Modimo.” (1 Petro 5:2, 3) Go etela ka nako le nako malapa a lego diphuthegong tša bona go ba nea dibaka tša go reta batswadi bao ba rwelego boikarabelo bja bona bja Bokriste. Boikarabelo bja go ruta bana ba batswadi ba ba se nago balekane bo letše magetleng a mang? O se ke wa lebala gore boikarabelo bja go ruta bana bo letše go motswadi.

Bohlale bja Bokriste bo tla thuša bagolo go phema maemo a kwanantšhago ao a ka tsogago ge e ba ba be ba ka tšea karolo ya motswadi yo a sego gona. Gaešita le ge banababo rena ba babedi ba ka kgona go etela kgaetšedi wa Mokriste yo e lego motswadi yo a se nago molekane, ka mehla ba tla ela hloko ka bohlale maemo ka moka go seo ba se rulaganyago bakeng sa go thekga thulaganyo ya thuto ya lapa. Ka dinako tše dingwe go laletša bana (ruri le motswadi yo a se nago molekane) gore ba tlatše thuto ya lapa la mogolo ka noši go ka itlhatsela e le mo go agago le mo go šomago. Lega go le bjalo, le ka mohla o se ke wa lebala gore Jehofa ke Tatago rena yo mogolo wa legodimong. Ka kgonthe o ba gona go hlahla le go thuša mma ge a swara thuto ya lapa le bana ba gagwe, gaešita le ge a dira bjalo a nnoši.

Go thwe’ng ka boemo bjo go bjona mofsa a sekametšego dilong tša moya, eupša batswadi ba gagwe ba bontšha go se tshwenyege goba go tshwenyega ganyenyane ka boikarabelo bja bona bja moya? Ga go nyakege gore bahlanka ba botegago ba Jehofa ba nyame. Mopsalme o ile a opela ka gore: “Mohumanegi o di gafetše go wene [Jehofa Modimo], O bile mohlakodiši wa sešuana.” (Psalme 10:14, PK) Ke moka, bagolo ba lerato ka phuthegong ba tla dira sohle se ba ka se kgonago go kgothaletša batswadi ge ba dutše ba hlokomela bana ba bona. Mohlomongwe ba ka šišinya poledišano ya lapa ke moka ba be gona gore ba nee ditšhišinyo tše di šomago mabapi le kamoo go ka ithutwago gotee ka gona. Go ba gona ba ka se tšee boikarabelo bja batswadi bao bo letšego magetleng a bona go ya ka Mangwalo.

Bana bao batswadi ba bona ba sa amogelego tumelo ba nyaka thekgo e kgolo. Go ba akaretša thutong ya gago ya lapa go ka ipontšha go na le mohola ge e ba seo se amogelega go batswadi ba bona. Robert yo gona bjale a godilego gomme a na le lapa la gagwe ka noši, o be a e-ya dibokeng tša Bokriste le batswadi ba gagwe ge a be a sa na le nywaga e meraro feela. O be a sa dutše a gopola diboka tšeo ka lerato gaešita le ka morago ga ge batswadi ba gagwe ba ile ba kgaotša go kopanela le phuthego ya Bokriste. Ge a be a na le nywaga e lesome, o ile a gahlana le mošemane wa Hlatse yo a ilego a ya le yena dibokeng. Batswadi ba mošemane wa Hlatse ba ile ba hlokomela Robert ka lethabo bjalo ka tšhiwana ya moya gomme ka morago ba ithuta le yena. Ka thušo ya tlhokomelo ye e lerato, o ile a tšwela pele ka lebelo gomme bjale o thabela go hlankela e le mogolo ka phuthegong.

Gaešita le ge batswadi ba ganetša tšwelopele ya bana ba bona, bana ga ba noši. Jehofa o dula e le Tate wa legodimong yo a botegago. Psalme 68:5 e bolela gore: “Ké Yêna tata-xo-dišuana . . . Ké Yêna Modimo; ó moaxong o mokxêthwa w’axwe.” Ditšhiwana tša moya di tseba gore di ka retologela go yena ka thapelo gomme o tla di thekga. (Psalme 55:22; 146:9) Mokgatlo wa Jehofa wo o swanago le mma o phetha boikarabelo bja wona ka boroto bakeng sa go lokišetša dijo tša moya tše di hlabolago tšeo di solwago ka dikgatišo tša wona le dibokeng tša diphuthego tša Bokriste tše di fetago 85 000 lefaseng ka bophara. Ka gona, ka thušo ya moya e tšwago go Tatago rena, Jehofa le mokgatlo wa gagwe wo o swanago le mma gaešita le ‘tšhiwana’ e tla thabela tekanyo e itšego ya thuto ya Beibele.

Batswadi ba Bakriste bao ba swarago dithuto tša ka mehla tša lapa tša Beibele le bana ba bona ba swanelwa ke go retwa. Batswadi ba se nago balekane bao ba phegelelago go tlwaetšeng bana ba bona ka ditsela tša Jehofa ba swanetšwe ke tlhokomelo le tumišo tše di kgethegilego bakeng sa maiteko a bona. (Diema 22:6) Bohle bao ba bontšhago tlhokomelo go ditšhiwana tša moya ba tseba gore se se kgahliša Tatago rena wa legodimong, Jehofa. Go hlokomela dinyakwa tša lapa tša moya ke boikarabelo bjo boima. Eupša ‘o se ke wa lapa, gobane ge o sa lesetše, o tlo buna ka lebaka la gona.’—Ba-Galatia 6:9.

[Mengwalo ya tlase]

[Seswantšho go letlakala 20]

Harper’s

[Seswantšho go letlakala 23]

Thuto ya lapa e nea sebaka se sebotse bakeng sa ditho tše nyenyane gore di abelane dilo tšeo di ba tshwenyago le batswadi ba bona