Ba Dirile Thato Ya Jehofa

Paulo o Fenya Tlalelong

PAULO o boemong bja tlalelo. Yena gotee le ba bangwe ba 275 ba ka gare ga lesela-watle leo le kgakgetšwego ledimong leo le tšubutlago le le bitšwago Euroaquilo​—e lego moya o matla kudu lewatleng la Mediterranean. Ledimo ke le matla kudu mo e lego gore letšatši ga le bonagale mosegare gaešita le tšona dinaledi bošego. Ka mo go kwešišegago, banamedi ba tšhogetše maphelo a bona. Lega go le bjalo, Paulo o ba homotša ka go ba anegela seo a bego a se utolletšwe ke Modimo torong ka gore: “Xo ka se senyexe le bophelô bya o tee. Se se tl’o xo senyêxa ké le-sela-watlê.”​—Ditiro 27:​14, 20-22.

Ka bošego bja bo-14 bja ledimo, basesiši ba utolla selo se se makatšago​—meetse e be e le a išago mo e ka bago dikelo tša matsogo tše 20 feela.a Ka morago ga leeto le lekopana, ba dira moelo o mongwe gape. Mo nakong ye meetse a iša ka dikelo tša matsogo tše 15. Naga e kgaufsi! Lega go le bjalo, ditaba tše di thabišago di ile tša ba le mafelelo a sa thabišego. Ka baka la go akga-akgwa meetseng ao a sa išego bošego, sekepe se ka thulana le matlapa gomme sa senyega. Ka bohlale, basesiši ba theoša ditshetledi. Ba bangwe ba bona ba nyaka go fološa legokgwana ke moka ba le namele e le ge ba leka mahlale lewatleng.b Lega go le bjalo, Paulo o a ba thibela. O botša molaodi-mogolo wa madira le mašole gore: “Xe banna bao ba sa dule fá lesela-watleng, Le ka se pholoxe.” Molaodi-mogolo o theeletša Paulo, gomme ga bjale banamedi ka moka ba 276 ba letetše ka tetelo-kgolo gore letšatši le hlabe.​—Ditiro 27:​27-32.

Ba Robegelwa ke Lesela-watle

Mesong e latelago, banamedi ba lesela-watle ba bona kou yeo e nago le lebopo. Ka kholofelo e mpshafaditšwego, basesiši ba kgaola dithapo tša ditshetledi gomme ba phagamišetša lephego la ka pele phefong. Lesela-watle le thoma go sesa le lebile lebopong​—ga go pelaelo gore le felegetšwa ke legowa la lethabo.​—Ditiro 27:​39, 40.

Lega go le bjalo, kapejana lesela-watle le tanywa lefelong leo le sa išego. Se sebe le go feta, maphoto a befilego a pšhatlagantšha bokamorago bja sekepe ka diripana. Banamedi ka moka ba tla swanelwa ke gore ba tšwe ka sekepeng! (Ditiro 27:​41) Lega go le bjalo, se se baka bothata. Bontši bja bao ba sepelago ka sekepe​—go akaretša le Paulo​—ke bagolegwa. Ka tlase ga molao wa Roma, mohlokomedi yo a dumelelago mogolegwa wa gagwe go phonyokga o swanetše go hwetša kotlo yeo e bego e tla newa mogolegwa wa gagwe. Ka mohlala, ge e ba mmolai a phonyokgile, mohlokomedi yo a sa šetšego o be a swanetše go lefa ka bophelo bja gagwe.

Ka go tšhaba ditla-morago tše bjalo, mašole a dira phetho ya gore bagolegwa ka moka ba bolawe. Lega go le bjalo, molaodi yo mogolo wa mašole yo a nago le bogwera le Paulo o tsena ditaba gare. O laela ka moka bao ba bego ba ka kgona gore ba itahlele ka meetseng gomme ba ruthele nageng. Bao ba sa kgonego go rutha ba swanetše go itshwareletša ka mapolanka ao a robegilego lesela-watleng. Banamedi ka o tee ka o tee bao ba tšwago ka sekepeng seo se senyegilego ba gagabela lebopong. Therešong ya mantšu a Paulo, ga go le o tee yo a lobilego bophelo bja gagwe!​—Ditiro 27:​42-44.

Mohlolo Kua Melite

Sehlopha se se lapilego se ile sa hwetša botšhabelo sehlakahlakeng sa Melite. Badudi ba moo ke “batho ba go bolela polelo e šele,” ge e le gabotse ke “batho bašele” (ka Segerika barʹba·ros).c Lega go le bjalo, batho ba Melite ga se ba sehlogo. Ka mo go fapanego, Luka, e lego mosepedi-gotee le Paulo o bega gore ba ile “ba re dira ka botho byo bo fetišaxo; ba re kxitleletše mollô o moxolo, ba re iša malapeng a bôná, xobane xo be xo e-na pula, xò le maruru.” Paulo ka boyena o tlatša baagi ba Melite go topelela dikgong le go kgohleletša mollo.​—Ditiro 28:​1-3, mongwalo wa ka tlase wa NW.

Kapejana, noga e itatetša letsogong la Paulo! Badudi ba sehlakahlakeng ba nagana gore Paulo o swanetše go ba e le mmolai. Ge e le gabotse ba nagana gore Modimo o otla badiradibe ka go hlasela setho sa mmele wa bona seo ba se dirišago go dira sebe. Eupša bona! Ka mo go makatšago go badudi ba sehlakahlakeng, Paulo o hlohlorela noga ka mollong. Bjalo ka ge pego ya Luka ya hlatse e bonego ka mahlo e bolela, “ba be ba lebeletše, xore [Paulo] ó tlo tloxa a ruruxa a wêla fase a hwa.” Badudi ba sehlakahlakeng ba fetoša dikgopolo tša bona gomme ba re Paulo o swanetše go ba e le modimo.​—Ditiro 28:​3-6.

Paulo o fetša dikgwedi tše di latelago tše tharo a le Melite, e lego nakong yeo a ilego a fodiša tatago Pubulio, mokgoma wa sehlakahlakeng yoo a ilego a amogela Paulo ka botho gotee le ba bangwe bao ba tlaišwago ke malwetši. Go oketša moo, Paulo o bjala dipeu tša therešo tšeo di ilego tša feleletša ka ditšhegofatšo tše ntši go badudi bao ba amogelago baeng ba Melite.​—Ditiro 28:​7-11.

Thuto Bakeng sa Rena

Nakong ya bodiredi bja gagwe, Paulo o ile a lebeletšana le ditlhohlo tše dintši. (2 Ba-Korinthe 11:​23-27) Ka pegong e lego ka mo godimo, e be e le mogolegwa ka baka la ditaba tše di lokilego. Ka gona, o ile a swanelwa ke go lebeletšana le diteko tše di sa letelwago: tše bjalo ka ledimo le šoro le go robegelwa ke lesela-watle mo go ilego gwa latela. Go tše ka moka Paulo ga se a ka a tekema boikemišetšong bja gagwe bja go fišegela go ba mmoledi wa ditaba tše di lokilego. Go tšwa phihlelong o ile a ngwala gore: “Ke tlwaetše tšohle, e ka ba xo hora le xo kwa tlala; e ka ba xo tlalêlwa ke dilô, e ka ba xo di hlôka. Ke kxôna tšohle ka Eo a mphaxo matla.”​—Ba-Filipi 4:​12, 13.

Le ka mohla mathata a bophelo ga se a swanela go fokodiša boikemišetšo bja rena bja go ba badiredi ba mafolofolo ba Modimo wa therešo! Ge teko e sa letelwago e tšwelela, re swanetše go lahlela morwalo wa rena go Jehofa. (Psalme 55:​22) Ka gona, re letela ka go se fele pelo go bona ka mokgwa woo a dirago gore re kgone go kgotlelela diteko. Ka nako e swanago, re tšwela pele re mo hlankela ka potego, re kgodišegile gore o na le taba le rena. (1 Ba-Korinthe 10:​13; 1 Petro 5:7) Ka go dula re tiile, go sa šetšwe maemo le ge e le afe, rena​—go swana le Paulo​—re ka fenya tlalelong.

[Mengwalo ya tlase]